Ọdaphan Jọn
20 Ḍịḅel aḍio awiki phọ, a Meri Mạgdạlin aḅon ni ạghi ẹpe oḍi phọ mem dị ke̋kpoghoronhu, kụ ạmhiin mọ mookilhemhi ḍighiigh phọ opukiom bọ ọnhu oḍi phọ ọsighe. 2 Kụ ọdi aghiil ạghi ạteeny Sạịmọn Pita r’ọphoripho ọnyo ạmatuan phọ a Jizọs ạphomhoghian bọ ạḅenhi mọ: “Mọsighe Uwo Ẹmhoogh phọ sịphe oḍi phọ ọḍuanham, kụ yoor úlegheri esi phọ oseere bọ nyọdi.”
3 Kụ a Pita r’ọphoripho ọnyo ạmatuan phọ onyeenhe ẹpe oḍi phọ. 4 Kụ ịduon ịyal phọ ạbidi oghiil bọ rọki, ọphoripho ọnyo ạmatuan phọ aghiil li atenhom Pita ạphur asi ẹpe oḍi phọ. 5 Kụ aḅiriman aḅiilha ẹpe olhoghi oḍi phọ kụ ạmhiin oginha iidugha arukpe phọ, kụolo óḍigh olhoghi. 6 Ạ Sạịmọn Pita rosi aani, kụ aḍigh ẹpe oḍi phọ. Kụ ạmhiin oginha iidugha arukpe phọ. 7 Kụ ukpe phọ ophurughiom bọ ẹmhu phọ ọ́rol aani sịphe ịphoripho arukpe phọ ẹrol bọ, ukpooghi oseere ẹnhon esi. 8 Kụ ọphoripho ọnyo ạmatuan phọ ạphur bọ asi aḍigh aani ẹpe oḍi phọ ạmhiin kụ amheeraam. 9 Kụolo mem mọ ọpo phọ bịdi kọ̋nhaghanhan ịpe ịge iigbia phọ ẹghaaph bọ mọ ọdi kaḅetenhu ni esi aḍuugh. 10 Esi ịduon phọ ạbumatuan phọ ughelheghu ni.
11 Kụolo a Meri ạmheera ni atuman oḍi phọ amhoghi ghan. Ịduon ramoghi bọ kụ aḅiriman aḅiilha ẹpe oḍi phọ, 12 kụ ạmhiin ịyal ạruukpaany dị ọkpolhoghian ịphalhaḅaal ạrusuoma dị ọrol sịphe aḍizu phọ a Jizọs ẹrol bọ, oniin ẹpe ẹmhu phọ ẹrol bọ, ọphoripho ẹpe aruwol phọ ẹrol bọ. 13 Kụ bịdi opuru nyọdi mọ: “Nhịr phọ, nạ ramoghi ghan eeghe?” Kụ ọdi ạḅenhi bịdi mọ: “Mọsighe Uwo Ẹmhoogh phọ ạmhi ọḍuanham, kụ mị úlegheri esi phọ oseere bọ nyọdi.” 14 Ọdi rọghaaph ịphen phọ, kụ aaghiraan ạmhiin Jizọs dị ạmheera sịphe phọ, kụolo ólhegheri mọ a Jizọs. 15 Kụ a Jizọs apuru nyọdi mọ: “Nhịr phọ, nạ ramoghi ghan eeghe? Nạ rạwa ghan ạnhian?” Kụ a Meri agbi mọ ọdi opoghom oghoony ịizupha phọ, kụ ạḅenhi mọ: “Oye phọ, mọ nạ kụ ụsighe nyọdi ạḍuanham, pọ ụḅenhi ịmhi esi phọ nạ aseere bọ nyọdi, mị ụki ụsighe.” 16 Kụ a Jizọs ạmhagh nyọdi mọ: “Meri!” Kụ ọdi aaghiraan ạmhagh Jizọs ọnhu a Hibru mọ: “Rạboni!” (ẹmhu phọ pọ “Ọtughemhia!”) 17 Kụ a Jizọs ạḅenhi nyọdi mọ: “Ụwilhe ịmhi kụ, kẹ̋teeny dị mị kạki ạteeny Ọde phọ. Kịa ạteeny bumor phọ ạmhi ạḅenhi mọ, ‘Mị rạki ọteeny Ọde phọ ạmhi rạ Ọde phọ anyinha rạ Ẹnhaan phọ ạmhi rạ Ẹnhaan phọ anyinha.’” 18 Kụ a Meri Mạgdạlin aru ạḅenhi bụmatuan phọ mọ: “Mị mạmhiin Uwo Ẹmhoogh phọ!” Kụ ạḅenhi bịdi ịpe a Jizọs ạḅenhi bọ nyọdi.
19 Kụ ḍiniin phọ aḍio phọ ạḍiphe phọ eḍighi bọ ḍịḅel aḍio awiki phọ, ạbumatuan phọ uukpomhoghan ni eniin esi ọgbal adulhe, kụ ọkasaghi rughuugh phọ loor esi oghiilhaan ạbuo a Ju phọ. Kụ a Jizọs amite sịphe igbo phọ ạbidi kụ ạḅenhi bịdi mọ: “Ẹepho ịrolhonhaan inyinha.” 20 Ọdi rọghaaph ịphen phọ kụ aḍeenhaan bịdi rạghaagh r’ịkpurugaany phọ ọdi. Kụ ạbumatuan phọ obo loor ịduon bịdi mọmhiin bọ Uwo Ẹmhoogh phọ. 21 Kụ a Jizọs ạḅilhe ạḅenhi bịdi mọ: “Ẹepho ịrolhonhaan inyinha. Ịdipho Ọde phọ murom bọ ịmhi kụ ịdi mị rirom aani inyinha.” 22 Ọdi rọghaaph ịphen phọ kụ aphulha bịdi, kụ ạḅem mọ: “Itiin uwaloor iigbia phọ. 23 Nyinha ẹsar ẹwilhenhaan ịkaraph oye, pọ mọsar ọbilhenhaan nyọdi; kụolo nyinha ị́sar ịbilhenhaan, pọ kọ̋sar ọwilhenhaan nyọdi.”
24 Kụolo ạ Tọmọs oniin sịphe a Ḍioph rạ Ịyal phọ, ọpo ọmhagh ghan bọ mọ Didimọs, ọ́rol aani r’ạbidi mem mọ a Jizọs aru bọ. 25 Esi ịduon phọ ạbueripho ạbumatuan phọ ụḅenhi nyọdi mọ: “Yoor mọmhiin Uwo Ẹmhoogh phọ!” Kụolo ọdi ạḅenhi bịdi mọ: “Emuton dị mị ạmhiin riisi phọ ọkan bọ iḍugh phọ sịphe ạraghaagh phọ ọdi, kụ ạsighe ḍụnhugh ạmhi ạḅoghom riisi phọ ịpe phọ ạḅilhe ạsighe ḍịghaagh ạmhi ạḅoghom ịkpurugaany phọ ọdi, mị kátue ni bịn ameeraam.”
26 Ọphaanya aḍughul otu reten kụ ạbumatuan phọ ọḅilhe ookpomhoghan eniin esi, kụ ạ Tọmọs ạrol aani ni r’ạbidi. Kụ a Jizọs amite sịphe igbo phọ ạbidi ghạlhamo r’ịduon ọkasaghi bọ rughuugh phọ, kụ ạḅenhi bịdi mọ: “Ẹepho ịrolhonhaan inyinha.” 27 Kụ ọdi ạḅenhi Tọmọs mọ: “Sịghe ḍụnhugh ạna ạḅoghom rạghaagh ạmhi, ạḅilhe ạsighe ḍịghaagh ạna ạḅoghom ịkpurugaany ạmhi, kụ amheeraam ạwilhe ookia.” 28 Kụ ạ Tọmọs ạḅem mọ: “Uwo Ẹmhoogh ạmhi rạ Ẹmhugh ạmhi!” 29 Kụ a Jizọs ạḅenhi nyọdi mọ: “Nạ mamheeraam nụun nyịidipho nạ mụmhiin bọ ịmhi? Ọḅaal olhoghi kụ odianhaan bụphe kọ̋mhiin bọ kụolo omheeraam bọ ni.”
30 Ọkar ọghaaph, a Jizọs aḍighi ni ịnhon ịbadi ịiḍaany ghisigh ạbumatuan phọ dị ụ́ge aani sịen aḍikpooghinheen ạḍinya phọ ạḍien phọ. 31 Kụolo ụtuan mọ imeeraam mọ a Jizọs kụ ạ Krạịst phọ, Ọony phọ Ẹnhaan, kụ ọge bọ ịphen ọge bọ, pịdi nyinha etue ẹmoogh ghuḍum dị eego esi aḍien phọ ọdi.