EMHUOGHAẠPH ITUUGHẠ PHỌ 23
Meera Egey “Ephomoghiạn” Phọ Eemor
“[Ephomoghiạn] reemor ghan idiphọ aniạn onuzạ.”—SONG OF SOL. 8:6.
AḌUỌR PHỌ 131 “What God Has Yoked Together”
OGHAẠPH OOKARAGHa
1. ABaibul phọ agbạ ika egey ephomhoghiạn?
EPHOMOGHIẠN “reemor ghan idiphọ aniạn onuzạ. Amuụm ka/tue aḍime; aḍigho i/lo dị ketue eekpereghiom.” (Song of Sol. 8:6, 7) P’eeghe emạ eten ogbạ egey ephomhoghiạn! Ikpo onhụ phọ iphẹn phọ ekạr kụ rekparamhị ghan burulom r’anmariịr: Oniin katue ni amoọgh ephomhoghiạn dị re/minheen ghan akị esi ophoriphọ.
2. Eeghe kụ edị olom r’anhịr koḍighi omhiịn mọ ephomhoghiạn phọ abidị ii/phoọm?
2 Olom r’anhịr omoghi ni olhọgh inyaạm orue ophamhanhạm ephomhoghiạn siphẹ apinien phọ abidị. Esi omaaniọm, aniạn dị oghị ghisigh rokpoonhị ghan re/ḍim ghan. Kuolọ eḍighi maạr dị u/kpoonhị, pọ moọny amem keḍim ni. Iniin phọ kẹn, kụ edị ephomhoghiạn phọ edi bọ igbo olom r’anhịr kekị ghan ghisigh eemor eḍighi maạr dị bidị olhọgh ikuph—okparamhị ephomhoghiạn phọ abidị. Eeni amem, olom r’anhịr otue ni ologhoma mọ ephomhoghiạn phọ abidị reephoọm, ekạr ekpaariọm mem dị bidị rosoman igbagarạ asidọl idiphọ iiḅaghamhị ikpoki, e/moon obobọ ooḅaghamiạn aloor phọ odi ghan bọ ookonhom ibạm anmụny. Esi iduọn phọ, ika kụ edị olom r’anhịr kotue okị ghisigh okparamhị ephomhoghiạn phọ abidị? Siẹn emhuoghaạph phọ ephẹn phọ, yira kooḅeghiọn iraạr areten dị nạ katue akelhọm aḅilhẹ akparamhị ogọ apinien phọ anạ.b
KIỌM GHISIGH AKPARAMHỊ GHAN SIYA PHỌ ANẠ R’AZIHOVA
Idiphọ aJosef r’aMeri, ewạ ni dị olom r’anhịr komoọgh siya dị ekpạr r’aZihova (Miịn ekpịgh phọ 3)
3. Ika kụ edị amugey amasian r’aZihova alhoghonhaạn ḍighaạgh oniin olom r’anhịr okparamhị ogọ ephomhoghiạn phọ abidị? (Ecclesiastes 4:12) (Miịn kẹn afoto phọ.)
3 Orue okparamhị ephomhoghiạn phọ abidị, ewạ dị olom r’anhịr koḍighi oomo ipẹ bidị kotue bọ okparamhị asiya phọ abidị r’aZihova. Ika kụ edị asiya phọ abidị r’aZihova keloghonhaạn pinien phọ abidị ḍighaạgh? Mem dị olom r’anhịr osereghiạn siya phọ abidị r’Odẹ k’akẹ phọ abidị, bidị koogboronom ghan ni osighẹ oroma phọ odị oḍighinhom, kụ iphẹn phọ keloghonhaạn bidị ḍighaạgh okpạr opu iiḅaghamhị dị ketue ekọm idị ephomhoghiạn phọ abidị keephoọm. (Bạl Ecclesiastes 4:12.) Awe dị omhoọgh siya dị ekpạr r’aZihova rokparaghạ ghan kẹn otuughaạny odị kụ oḍeenhaan raagharạ odị, idiphọ oḍighi ghan iiḅi, okparạm, ḅilhẹ r’osạr owilhenhaạn. (Efẹ. 4:32–5:1) Olom r’anhịr oḍeenhaan ghan raagharạ phọ iphẹn phọ pọ ephomhoghiạn phọ abidị kekị ni ghisigh bịn ekpạr ghan. Onyọ umaranhi dị oghol mọ Lena, dị m’aạl ilhom siẹn 25 asiạ, aḅẹm mọ: “Redugh ghan agey ophomhoghiạn oḅilhẹ olhọgh eegu oye dị amhoogh igey asiya r’aZihova.”
4. Uḍighi ika kụ aZihova asaḅạr bọ Josef r’aMeri mọ oḍighi odẹ r’onhiin aMesaya phọ?
4 Ooḅeghiọn eniin eḍeenhaan. Mem mọ aZihova rasaḅạr bọ we phọ koḍighi bọ Odẹ r’onhiin aMesaya phọ, Odị asaḅạr Josef r’aMeri esi ibadị siphẹ eemharạ emharạ phọ aDevid. Eeghe kụ iḍighi? Iyạl phọ abidị umhoọgh siya dị ekpạr r’aZihova, kụ aZihova akuphom ni owol mọ bidị kosighẹ ni ephomhoghiạn phọ odị kụ omeremhị idiphọ eḅẹl iyaạr siphẹ apinien phọ abidị. Olom r’anhịr kotue ni otuughạ ibadị araraạr esi Josef r’aMeri.
5. Eeghe kụ edị aburulom kotue otuughạ esi aJosef?
5 AJosef adaphạn ni itọ phọ aZihova, kụ iḍighi ni idị odị aḍighi omạ olom. Dị eeni epel li iraạr amem, Enhaạn angọ ni nyodị itọ dị egbolhomaam eghunotu phọ odị. Kụ oomo phọ asimem mọ iphẹn phọ, odị aagboronhom ni odaphạn itọ phọ, ghalhamọ r’amem dị ekpạr ri oḍighi iduọn phọ. (Mat. 1:20, 24; 2:13-15, 19-21) Kụ odaphạn ghan itọ phọ Enhaạn, ilhoghonhaạn ni nyodị ḍighaạgh omhaạr ophogh oḅilhẹ oghoph aMeri. Gbiom olhoghi idị iḍighinhom araraạr phọ aJosef ebughẹ ghan ephomhoghiạn phọ ḅilhẹ r’olhọgh eegu phọ aMeri esi odị! Burulom, nyinha ketue ni etuughaạny Josef esi osighẹ ghan oḍighinhom oromha aBaibul phọ siphẹ eghunotu phọ anyinha.c Mem dị nạ asighẹ aḍighinhom oromha aBaibul phọ, ghalhamọ r’amem dị emhoghi ooḅenhion araraạr, pọ nạ raḍeenhaan ghan ephomhoghiạn anhịr phọ anạ. Kụ ipẹ phọ rekparamhị ghan ogọ apinien phọ anyinha. Onyọ umaranhi epẹ Vanuatu, dị m’aạl ilhom siẹn 20 asiạ, aḅẹm mọ: “Mem dị olom amhị asighẹ aḍighinhom iiḅakiọm mọ aZihova, rebughẹ ghan ni eegu phọ mị amhoọgh bọ aghị esi odị. Mị raloghoma ghan ni oghoph, kụ mị ramoọgh ghan ni oḍuom olhoghi mem dị odị asopha osopha.”
6. Eeghe kụ edị anmariịr kotue otuughạ esi aMeri?
6 AMeri amhoọgh aani ni siya dị ekpạr r’aZihova, odị amhoọgh ni omheeraam olọ odị. Odị alhegheri agey Igẹ Iigbia phọ. Odị awạ ghan kẹn ni mem agbirima ilọ ipẹ odị matuughạ bọ. (Luk 2:19, 51) Dị iikia i/lo, asiya phọ aMeri amhoọgh bọ r’aZihova iḍighi ni idị odị aḍighi omạ ookiạ anhịr. Rodon, ibadị anmariịr rokparaghạ ni otuughaạny aMeri. Esi omaạm, onyọ umaranhi dị oghol mọ Emiko aḅẹm mọ: “Mem mọ mị k/aạl bọ ilhom, Mị umhoọgh ghan ni edeọm ituughạ ilọ ogina amhị. Kuolọ mị r’aạl ilhom, bịn mị aru amhiịn mọ iduọn olom mọ amhị kụ raaḅereghị ghan bọ kaḅilhẹ aḍiemhiom siphẹ iiseeny eghunotu phọ, mọ mị mamhiigh rabeḍenhọm nyodị oḍighinhaan amhị raraạr phọ iphẹn phọ. Kụ mị aru amhiịn mọ ewạ ni dị mị r’aloor kalọgh ikuph okparamhị asiya phọ amhị r’aZihova. Kụ mị asaḅạr mem aseere ooḅereghị ghan, aạl, r’ogbirima ipẹ mị aạl bọ siphẹ aBaibul phọ.” (Gal. 6:5) Nmariịr, iduọn nyinha eghị bọ ghisigh rekparamhị siya phọ anyinha r’aZihova kụ edị aburulom mọ anyinha komoọgh ghan ibadị ariphigh otuạn ooseeny r’ophomhoghiạn anyinha.—Prov. 31:30.
7. Eeghe kụ edị olom r’anhịr kotue otuughạ esi aJosef r’aMeri ilọ oḅophoghạn okumu aZihova?
7 AJosef r’aMeri ukumuan ni idiphọ olom r’anhịr okparamhị asiya phọ abidị r’aZihova. Bidị ulhọgh ni elhegh mọ emạn ni maạr dị bidị kokumu ghan aZihova idiphọ eghunotu. (Luk 2:22-24, 41; 4:16) Dị iikia i/lo, iḍighi ni ipaanhaạn oḍighi iduọn phọ loor esi dị bidị umhoọgh egbogh eghunotu, kuolọ bidị uḍighi ni. P’eeghe emạ eḍeenhaan dị aburulom r’anmariịr omhoọgh rodon! Eḍighi iyaạr dị nạ amhoọgh ibạm anmụny, idiphọ aJosef r’aMeri, eeni eḍighi ni ipaanhaạn ogbor ghan oghị ituughạ r’omhoọgh edeọm iiseeny eghunotu. Kụ rekpạr ghan ni kẹn idiphọ olom r’anhịr, owạ ghan amem ooḅereghị r’otuughạ aBaibul phọ. Kuolọ, ka/bulha mọ oḅophoghạn okumu aZihova, kụ kekparamhị oḅophonhụ phọ anyinha. Esi iduọn phọ, isighẹ iiseeny phọ aZihova kụ eḍighi eḅẹl.
8. Eeghe kụ edị olom r’anhịr dị omhoọgh iiḅaghamhị pinien abidị koḍighi orue oghelhọm iiseeny eghunotu phọ abidị?
8 Kokaạph ika eḍighi maạr dị iiḅaghamhị edi siphẹ apinien phọ? Ophạm iiseeny eghunotu phọ re/dugh ghan. Eḍighi iduọn phọ pọ iwạ iyaạr lọ nyinha kekelhọm ḅilhẹ ke/sighẹ mem, iyaạr dị iyạl phọ anyinha emheeraam ooḅeghiọn. Iphẹn phọ ketue ni ekparamhị ogọ ephomhoghiạn phọ anyinha r’eephuạ phọ anyinha oḅophoghạn ooseeny aZihova.
IMITEOM GHAN MEM EGHAAPHẠN GHAN
9. Eeghe kụ iḍighi kụ olom r’anhịr komiteom ghan bọ mem okaaphạn ghan?
9 Burulom r’anmariịr, nyinha ketue ni ekparamhị ephomhoghiạn phọ anyinha esi omiteom ghan amem oghaaphạn. Nyinha eḍighi ghan iduọn phọ oniin ka/bilẹ nyoniin—iphẹn phọ keḍighi idị oniin kalegheri ipẹ ophodiphọ raatughiạn bọ aḅilhẹ alhoghoma. (Gen. 2:24) Lọgh elhegh iyaạr dị aLilia r’aRuslan omhiịn mem mọ purukụ bidị aalhạn bọ, 15 asiạ epẹ omhạn, umaranhi phọ aḅẹm mọ: “Yoor uru ni omhiịn mọ yoor u/tue ghan mun u/moọgh mem orọl ude oghaaphạn ipẹ yoor ogbiighi ghan bọ. Iiḍighi phọ ayoor, arukumuan olhoghotu phọ r’ibạm anmụny phọ ikạr kụ esighẹ ghan mem mọ ayoor. Kụ yoor oru omhiịn mọ eḍighi maạr dị yoor u/miteom ghan mem ukaaphạn ghan idiphọ olom r’anhịr, pọ amuḅọph phọ ayoor kadugh ni.”
10. Ika kụ edị olom r’anhịr kotue osighẹ oḍighinhom oromha phọ odi bọ Efesọs 5:15, 16?
10 Olom r’anhịr koḍighi eeghe omhiịn mọ bidị omoọgh ni mem orọl oghaaphạn? Kewạ mọ iwạ mem eseere eghaaphạn ghan. (Bạl Efesọs 5:15, 16.) Onyọ umor olạ aNigeria dị oghol mọ Uzondu aḅẹm mọ: “Mem dị mị raakolhobian raraạr dị mị kaḍighi, mị raloghọm ghan ni mem dị anhịr amhị r’amhị kotọl ude okaaphạn aani.” (Fil. 1:10) Ooḅeghiọn idị Anastasia, anhịr opoghom eghir epẹ Moldova, amhaạr aḍighinhom mem mọ odị. Odị aḅẹm mọ: “Mị ukparaghạ ghan ni aḍighi oomo araraạr dị mị amhoọgh oḍighi mem mọ opọ olom amhị raḍighi bọ ipẹ odị. Iphẹn phọ iḍighi ni idị yoor omhoọgh ghan mem oghaaphạn.” Kuolọ kokaạph ika eḍighi iyaạr dị iiḍighi phọ anyinha i/meera mọ imoọgh mem orọl ude oghaaphạn?
Eeghe araraạr kụ edị nyinha ketue ni eḅophoghạn eḍighi idiphọ olom r’anhịr? (Miịn siikpịgh phọ 11-12)
11. Eeghe araraạr kụ edị Akuila r’aPrisila oḅophoghạn ghan oḍighi?
11 Aburulom r’anmariịr kotue ni otuughaạny aani eḍeenhaan phọ Akuila r’aPrisila, olom r’anhịr dị aKristẹn oḅẹl okuron asiạ phọ osereghiạn ghan. (Rom. 16:3, 4) Ghalhamọ r’iduọn aBaibul phọ u/kaạph bọ ni ibadị araraạr ilọ apinien phọ abidị, aBaibul phọ akaạph ni mọ bidị uḅọph ghan okumuan, oghaạph ilọ Omhạr phọ oḅilhẹ olhoghonhaạn bunhọn awe ḍighaạgh. (Iiḍighi 18:2, 3, 24-26) Torobọ amem dị aBaibul phọ aghaạph aghol Akuila r’aPrisila, o/ghol ghan nyoniin kụ awilhẹ nyooriphọ.
12. Eeghe kụ edị olom r’anhịr kotue oḍighi orue omhoọgh aani ghan amem oghaaphạn ghan? (Miịn kẹn afoto phọ.)
12 Ika kụ edị aburulom r’anmariịr kotuughaạny eḍeenhaan phọ Akuila r’aPrisila? Tuutughiạn ilọ araraạr phọ iyạl phọ anyinha emhoọgh bọ oḍighi. Nyinha etue ni eḅophoghạn eḍighi raraạr kparipẹ r’oḍighi akirokirọ ḍughụm? Esi omaạm, Akuila r’aPrisila uḅophạn ghan ni oghaạph ilọ Omhạr phọ. Nạ ragbor ghan ni kamiteom mem oḍighi aani iniin phọ? Akuila r’aPrisila uḅophạn ghan kụ okumuan siphẹ oḍighi phọ abidị. Iyạl phọ anyinha eeni ke/moọgh oniin phọ oḍighi phọ, kuolọ nyinha ke/tue eḅophoghạn eḍighi raraạr siphẹ olhoghotu phọ ḍughụm? (Eccl. 4:9) Iphẹn phọ keḍighi idị nyinha kemaạr eḅophạn, kụ eḅilhẹ ingọ inyinha eepoogh oghaaphạn ghan. ARobert r’aLinda m’aalhạn bọ siẹn 50 asiạ. Kụ aRobert aḅẹm mọ: “Ogbạ agey, yoor u/kạr u/moọgh muboom amem oghiighị imạ ariisi umoore. Kuolọ iyạl ayoor roḅophoghạn ghan ni kụ ootol sigbagbạ ḅilhẹ okoọr erugh phọ ayoor mem dị eḍu. Oḅophoghạn ghan oḍighi araraạr phọ iphẹn phọ rekparamhị ghan ni siya phọ ayoor. Ephomhoghiạn phọ ayoor ekị ni ghisigh repoph.”
13. Eeghe kụ edị olom r’anhịr koḍighi oghelhọm ogey amuḅọph?
13 Kuolọ lọgh elhegh mọ, koo/pho orọl ghan eniin esi bịn kụ relọgh ghan kephophe muḅọph igbo olom r’anhịr. Oniin anhịr ilhom epẹ Brazil aḅẹm mọ: “Rodon, ibadị araraạr oḍighi edi ni, esi iduọn phọ, oye atue ni amiigh ootughiạn mọ oopho orọl eniin esi kụ resighẹ ghan kụ eru muḅọph. Mị maru amiịn mọ oḍighi omhoọgh odọ amuḅọph phọ ophọn phọ mapel orugh eniin esi bịn. Kuolọ mị amoghi ni ongọ amem mọ amhị olom mọ amhị.” Lọgh elhegh iyaạr dị aBruno r’anhịr phọ odị Tays, oḍighi ghan oru omhoọgh ghan amem oghaaphạn. ABruno aḅẹm mọ: “Mem dị yoor moḍighi omhạn raraạr phọ yoor omhoọgh bọ oḍighi yogh, yoor roseere ghan ni sifon ayoor ogbạl kụ oḅophạn okelhọm mem mọ ayoor.”
14. Olom r’anhịr dị ro/kelhọm ghan mem dị iyạl abidị bịn odi, koḍighi eeghe kụ okelhọm ghan?
14 Toroboiperolbọ, kokaạph ika eḍighi iyaạr lọ anhịr phọ anạ obobọ olom mọ anạ ra/kelhọm ghan omhoọgh amem r’anạ? Eeni araraạr dị eḅeraạn nyinhạ ka/raraạr dị eḅeraạn nyodị, obobọ eeni oniin raḍighi ghan iyaạr dị repin ghan esi ophoriphọ. Nạ kaḍighi ika? Tuutughiạn ilọ egu aniạn phọ oghaạph bọ epẹ omhạn. Eemorom aniạn phọ re/bụgh ghan mem mem mọ. Romiighom ghan olhọgh ipoḍi ipẹ kụ esighẹ rekị kụ otumughi igbogh arukulha ipẹ. Eniin phọ eten phọ kẹn, nạ atue ni amiigh omhoọgh ghan ekulha amem r’odị torobọ aḍio. Miịn ni mọ iyaạr phọ nyinha reḍighi bọ eḍighi ni iyaạr dị eḅeraạn ni iyạl phọ anyinha, k/iyaạr dị kepin olhoghi oniin. (Jems. 3:18) Nạ amhiighom eenyenụm, eeni nạ kamiigh ni osumeẹny ephomhoghiạn phọ anyinha.
ONIIN ALHỌGH GHAN NYONIIN EEGU
15. Uḍighi ika kụ olhọgh ghan eegu emhạn bọ maạr oḍighi idị ephomhoghiạn olom r’anhịr keemor ghan bịn?
15 Olhọgh ghan eegu nyoniin siphẹ apinien phọ emạn ni maạr agey. Kotomaạm olhọgh eegu idiphọ ookugh phọ raḍighi ghan bọ idị egu aniạn keemor agey. Ookugh kụ o/lho, aniạn phọ keḍim egina amem. Eniin phọ eten phọ kẹn, eḍighi maạr dị olhọgh eegu nyoniin ku/lo igbo olom r’anhịr pọ ephomhoghiạn phọ abidị keḍim ni egina amem. Ḍieriphọ aḍighaạgh phọ, olom r’anhịr dị rokparaghạ ghan oḍeenhaan olhọgh eegu nyoniin roḍighi ghan idị ephomhoghiạn phọ abidị keemor ghan bịn. Toroboiperolbọ, lọgh elhegh mọ ki/dị nạ alhoghoma mọ nạ alọgh ni eegu, kuolọ anhịr phọ obobọ olom mọ anạ kụ alhoghoma mọ nạ alọgh ni nyodị eegu. Penny r’Aret m’aalhạn bọ siẹn 25 asiạ r’opeel. APenny aḍighi bọ anhịr phọ aḅẹm mọ: “Loor iduọn mị alhọgh bọ olom mọ amhị eegu odị ulhọgh aani imhị kẹn eegu, ephomhoghiạn kụ imuza siphẹ olhoghotu phọ ayoor. Yoor omoọgh ni eereẹgh oghaạph araghaạph loor esi dị oniin amaghamhị ni maạr ḍiitughiạn ophoriphọ.” Esi iduọn phọ, nạ kaḍighi eeghe olhoghonhaạn aḍighaạgh olom mọ anạ obobọ anhịr phọ anạ olhoghoma mọ nạ alọgh ni nyodị eegu? Tuutughiạn reḍeenhaan phọ Ebraham r’aSera.
Ewạ dị onyọ aKristẹn dị aḍighi olom kaḍeenhaan ghan olhọgh eegu ipẹ anhịr phọ odị raloghoma ghan bọ, esi olher ghan arurụ ongọ odị (Miịn ekpịgh phọ 16)
16. Eeghe iyaạr kụ edị aburulom kotuughạ siphẹ eḍeenhaan phọ Ebraham? (1 Pita 3:7) (Miịn kẹn afoto phọ.)
16 Ebraham alhọgh ni Sera eegu. Odị asighẹ ghan ni ḍiitughiạn aSera aḅilhẹ amhoọgh ogbolhomaam aghị esi olhoghoma phọ odị. Eniin amem, iyaạr iiḅaghamhị ni Sera kụ odị aghaạph ipẹ odị alhoghoma bọ aḅenhị nyodị, kụ akpalhạm kẹn Ebraham. Ebraham amhooghaam ni nyodị siphẹ ophagharanhaạn phọ odị ḍughụm? Eeye. Odị alhegheri ni mọ aSera aḍighi anhịr dị asooromhi loor aḅilhẹ abakị nyodị. Ebraham anhaghanhạn ni nyodị kụ akparaghạ oolemhi iiḅaghamhị phọ. (Gen. 16:5, 6) Yira otuughạ eeghe? Burulom, nyinha emoọgh ni iikpọ osopha ghan osopha siphẹ eghunotu phọ. (1 Kọr. 11:3) Ghalhamọ r’iduọn phọ ni, emạ iyaạr oḍighi pọ ḅeeḅeghiọn aani ghan aphogh ḍiitughiạn anhịr phọ anạ kụ agbi osopha, ekạr ekpaariọm mem dị osopha phọ agbolhomaam aani ni nyodị. (1 Kọr. 13:4, 5) Eeni anhịr phọ anạ amoọgh iyaạr dị reeḅaghamhị nyodị iboom kụ rawạ oḅenhị anạ ipẹ odị alhoghoma bọ. Nạ kalọgh ni eegu olhoghoma phọ odị aler rurụ angọ nyodị ḍughụm? (Bạl 1 Pita 3:7.) Angela r’aDmitry, m’aalhạn ni dị remạn ni 30 asiạ. Angela anhịr phọ aghaạph ni idị olom mọ odị raḍighi ghan idị odị raloghoma ghan olhọgh eegu. Odị aḅẹm mọ: “Oomo amem aDmitry aakolhobian ni onhaghanhạn amhị mem dị iyaạr riiḅaghamhị imhị obobọ mem dị mị rawạ dị yoor kokaạph raghaạph. Odị ramoọgh ghan ni okparạm karu esi amhị, ghalhamọ r’amem dị mị u/miigha loor ukaạph.”
17. Nmariịr ilhom, eeghe kụ edị nyinha etuughạ siphẹ eḍeenhaan phọ aSera? (1 Pita 3:5, 6)
17 ASera alhọgh ghan ni Ebraham eegu esi obakị ghan osopha phọ Ebraham. (Gen. 12:5) Eniin amem, Ebraham asopha ni okọ igoni ruuruen dị odị u/seere olhoghi. Kụ odị aḅenhị Sera mọ awilhẹ torobọ iyaạr dị odị raḍighi aghị aakolhobian eḍien dị kemanhạm. (Gen. 18:6) Egina amem aSera adaphạn ni osopha phọ Ebraham. Nmariịr ilhom, ituughaạny eḍeenhaan phọ aSera esi obakị ghan osopha aburulom mọ anyinha. Nyinha eḍighi ghan idiphọ, pọ nyinha rekparamhị ghan pinien phọ anyinha. (Bạl 1 Pita 3:5, 6.) ADmitry, oghaạph bọ oghol siphẹ ekpịgh phọ eten bọ, aghaạph ni idị anhịr phọ odị raḍighi ghan idị odị raloghoma ghan olhọgh eegu. Odị aḅẹm mọ: “Mị rasereghiạn ghan ni ikuph phọ Angela ralọgh ghan bọ obakị osopha amhị, ghalhamọ r’amem dị aḍiitughiạn phọ ayoor i/ḍighi iniin. Eḍighi maạr dị osopha phọ amhị u/miteom iyaạr phọ yoor rowạ bọ, odị imhị ru/kpalhạm ghan.” P’eeghe idị redugh ghan ophomhoghiạn oye dị alhọgh oye phọ eegu!
18. Olom r’anhịr komoọgh ika suọ eḍighi maạr dị bidị oghiọm ghisigh oḍighi ghan idị ephomhoghiạn phọ abidị keemor ghan bịn?
18 Ḍio phọ arodon, aSetan rawạ ghan oḍimighi ephomhoghiạn phọ edi ghan bọ sipinien aKristẹn phọ. ASetan alegheri mọ eḍighi maạr dị ephomhoghiạn olom r’anhịr kụ i/kpạr, pọ bidị komiigh ni oḍuraan oḍuạ esi aZihova. Toroboiperolbọ, iyaạr i/lo dị ketue eḍime egey ephomhoghiạn! Esi iduọn phọ, eḍighi idị ephomhoghiạn phọ edi bọ siphẹ apinien phọ anạ keḍighi aani nyephẹ oghaạph bọ siphẹ aḍinyạ phọ aSong of Solomon. Sopha osighẹ aZihova kụ oḍiemhiom isiphẹ apinien phọ anạ, moọgh ghan mem r’olom mọ anạ obobọ anhịr phọ anạ, kụ alhọgh ghan eegu olhoghoma r’atorobọ iyaạr dị olom mọ anạ obobọ anhịr phọ anạ rawạ. Nạ aḍighi iphẹn phọ, apinien phọ anạ kasighẹ rughuenhian kụ atuomaan Zin egey ephomhoghiạn phọ, Zihova. Kụ idiphọ aniạn dị reemor agey, ephomhoghiạn phọ anạ keemor ghan bịn.
AḌUỌR PHỌ 132 Now We Are One
a Apinien aḍighi inmo k’aZihova, kụ inmo phọ iphẹn phọ reḍighi ghan idị olom r’anhịr phọ komoọgh eekiạ ephomhoghiạn siphẹ igbo phọ abidị. Kuolọ eeni amem, ephomhoghiạn phọ ephẹn phọ reephoọm ghan ni. Eḍighi iyaạr dị nạ maphin anhịr obobọ m’aạl ilhom, pọ emhuoghaạph phọ ephẹn phọ kelhoghonhaạn nyinhạ ḍighaạgh okparamhị ephomhoghiạn phọ edi bọ siphẹ apinien phọ kụ oḅilhẹ oghelhọm.
b Ghalhamọ opọ r’anạ aalhạn bọ o/ḍighi ni onyọ Ogbaanhaạn AZihova, araraạr phọ komaaghị bọ siẹn phọ ketue ni elhoghonhaạn nyinhạ ḍighaạgh okparamhị ogọ apinien phọ anạ.—1 Kọr. 7:12-14; 1 Pit. 3:1, 2.
c Esi omaạm, nạ katue ni amiịn oromha dị nạ katue asighẹ aḍighinhom siphẹ asikoọl arumhuoghaạph phọ “Olhoghonhaạn Aḍighaạgh Olọ Arughunotu,” edi bọ siphẹ jw.org r’isiphẹ JW Library®.