EMHUOGHAẠPH ITUUGHẠ PHỌ 18
Oniin Akparamhị Ghan Nyoniin Mem Dị Oru Ituughạ
“lipikian ayira eḍighi ghan ilọ oniin kakologholomị ghan nyoniin.”—HIB. 10:24, 25.
AḌUỌR PHỌ 88 Make Me Know Your Ways
OGHAẠPH OOKARAGHa
1. Uḍighi ika kụ yira ropagharanhaạn ghan bọ ḍipuru mem ituughạ?
UḌIGHI ika kụ yira rokị ghan bọ ituughạ? Ekpanhạ iyaạr phọ pọ, ooseeny aZihova. (Ps. 26:12; 111:1) Yira rokị ghan kẹn ituughạ pidị yira otue okparamhị oniin atum nyoniin siẹn amem mọ ekpạr bọ. (1 Tẹs. 5:11) Yira roḍighi ghan iphẹn phọ mem dị yira ophagharanhaạn ḍipuru.
2. Ighẹn aroopoogh kụ edị yira omhoọgh ophagharanhaạn aḍipuru?
2 Torobọ awiki, yira romoọgh ghan ni eepoogh ophagharanhaạn ghan aḍipuru mem ituughạ. Esi omaạm, siphẹ Ituughạ Otu Okoriom mọ ḅilhe r’agạ Imạ Araraạr Dị Edi Baibul, Ituughạ ABaibul Ookpomhoghan phọ, ḅilhẹ r’inhọn apakirị siphẹ edeọm ituughạ ogboku awiki phọ.
3. Eeghe ipaanhaạn kụ edị yira kotue ni osoman, kụ ika kụ idị aHibru 10:24, 25 kelọgh ḍighaạgh?
3 Yira rowạ ghan ooseeny aZihova ḅilhẹ r’okparamhị abumor r’abumaranhi phọ. Kuolọ araraạr edi ni dị ketue ikikima iyira ongọ ophagharanhaạn. Yira otue ni omoọgh oghiilhaan ongọ ophagharanhaạn, obobọ eeni yira opoophe ikika amem kụ iyira u/mạ. Ika kụ idị yira kotue okaran ipaanhaạn phọ iphẹn phọ? Ipẹ aPọl agẹ bọ aghiọm buọ aHibru phọ ketue ni ilhoghonhaạn iyira ḍighaạgh. Mem dị odị rakaạph iyaạr phọ emhạn bọ maạr oghị ghan ituughạ, odị aḅẹm mọ iipikian ayira eḍighi ghan ghụn ilọ “oniin kakologholomị ghan nyoniin.” (Bạl Hibru 10:24, 25.) Mem dị yira olhọgh elhegh mọ ophagharanhaạn dị aghom kakparamhị ni bunhọn siphẹ ituughạ phọ, pọ yira ko/kạr okiilhaan ophagharanhaạn ghan aḍipuru. Kụ eḍighi maạr dị yira ogbor ophoophe kụ iyira u/mạ, yira komoọgh ni oḅaạl olhoghi mọ abunhọn siphẹ ookpomhoghan phọ omoọgh ni eepoogh ophagharanhaạn aḍipuru.—1 Pit. 3:8.
4. Eeghe iraạr araraạr kụ edị yira kooḅeghiọn?
4 Siẹn emhuoghaạph phọ ephẹn phọ, yira kopụr ooḅeghiọn ipẹ yira kotue bọ okparamhị oniin atum nyoniin ookpomhoghan dị u/bụgh dị awe ophanyanhaạn asipuru oghom. Ipẹ reten, kụ yira ooḅeghiọn idị oniin katue akparamhị nyoniin ookpomhoghan dị abụgh kụ ibadị rowa ghan ophagharanhaạn aḍipuru. Kụ yira okureri esi ooḅeghiọn areten phọ ipẹ yira kotue bọ ongọ ghan ophagharanhaạn dị kakparamhị bunhọn.
KPARAMHỊ ONIIN ATUM NYONIIN OOKPOMHOGHAN DỊ U/BỤGH
5. Ika kụ idị yira kokparamhị oniin atum nyoniin mem dị awe u/bụgh ookpomhoghan phọ ayira?
5 Awe ophanyanhaạn asipuru ro/bụgh ghan ookpomhoghan dị aghom obobọ ebạm egu. Eeni amem, resighẹ ghan ni mem kụ oye phọ ratughemhị bọ agbi omhiịn aḍighaạgh omạ. Ituughạ phọ eeni ke/dụgh, kụ kekpạr ri kụ idọ ituughạ phọ iphẹn phọ ekparamhị oye. Nạ kaḍighi ika? Kookolhobian ghan ophagharanhaạn iboom asipuru. Nạ aḍighi ghan iduọn phọ, pọ nạ kanyu ni bunhọn ophagharanhaạn aani ghan aḍipuru.
6-7. Ika kụ idị yira kotue okpạr opu oghiilhaan ophagharanhaạn ghan aḍipuru?
6 Kokaạph ika eḍighi maạr dị nạ rakiilhaan ophagharanhaạn aḍipuru? Ipẹ phọ remitenhaan aani ghan kẹn ibadị. Kuolọ orue okparamhị abumor r’abumaranhi pọ ewạ mọ owạ reten okpạr opu oghiilhaan phọ opọ phọ? Ika kụ idị yira kotue bọ oḍighi iduọn phọ?
7 Orue omhoọgh olhoghonhaạn aḍighaạgh, nạ atue ni apogh raraạr dị aWatchtower maghaạph ghan ilọ iphẹn phọ.b Esi omaạm, kookolhobian ghan agey. (Prov. 21:5) Nạ amhaạr aakolhobian ituughạ phọ, nạ ka/moọgh oghiilhaan ophagharanhaạn aḍipuru. Ḅilhẹ kẹn, ophagharanhaạn phọ aḍighi key. (Prov. 15:23; 17:27) Oboom oghiilhaan ra/tọl ghan ongọ ophagharanhaạn dị aḍighi key. Ophagharanhaạn dị aḍighi key raḍughanhaan ghan bumor r’abumaranhi phọ onhaghanhạn kapu olọ agorogorọ. Ophagharanhaạn dị aḍighi key raḍeenhaan ghan mọ oye phọ aakolhobian ni agey aḅilhẹ anaghanhạn iyaạr phọ rokaạph bọ.
8. AZihova ramiịn ghan ika ikuph phọ ayira oḍighi ipẹ yira kotue bọ?
8 Kuolọ kokaạph ika eḍighi maạr dị nạ asighẹ ni aḍighinhom oomo oromha phọ iphẹn phọ kụ oghiilhaan phọ anạ u/meera ni mọ pagharanhaạn ḍipuru ghalhamọ mem obobọ iyạl? Pọ kuphom ni owol mọ aZihova asereghiạn ni inyaạm mọ nạ alhọgh bọ oḍighi ipẹ nạ katue bọ. (Luk 21:1-4) Ipẹ yira kotue bọ oḍighi kụ edị aZihova rawạ mọ yira oḍighi. (Fil. 4:5) Sopha oḍighi ipẹ nạ katue bọ, kụ aphighi ḍiigbu, aḅilhẹ aaḅereghị alhọm ophoomhị aloor. Emhiighom mọ, aḍiigbu anạ etue ni eḍighi ongọ oniin ophagharanhaạn dị aḍighi key bịn.
KPARAMHỊ ONIIN ATUM NYONIIN OOKPOMHOGHAN DỊ ABỤGH
9. Eeghe ipaanhaạn kụ ketue emite ogbogh ookpomhoghan?
9 Eḍighi maạr dị abuboom abukaaphọm kụ odi ookpomhoghan anyinha, pọ eeni ipaanhaạn phọ anạ kegbatanhaạn ni. Eeni ibadị amem ropogh ghan kogunhọm ḍighaạgh anạ loor iboom araghaạgh phọ ophoophe bọ. Esi omaạm umaranhi phọ Danielle, agbor ghan ni aphagharanhaạn ḍipuru otu ituughạ.c Odị amiịn mọ eḍighi pakirị iiseeny phọ odị rangọ bọ, eten okparamhị abunhọn, ḅilhẹ r’eten okparamhị omheeraam mọ odị esi igey aBaibul phọ. Kuolọ mem dị odị aḍuạ aghị onhọn ookpomhoghan dị abụgh, u/gbor ghan umạ nyodị ophagharanhaạn aḍipuru, eeni amem u/mạ ghan r’omạ. Odị aḅẹm mọ, “Mị uḅonyonhu ni azuan. Iḅilhẹ eghịgh mudị mị maroph eepoogh arukumuan. Kụ emite iduọn phọ kụ rekiọm ghisigh, nạ kaḅilhẹ aatughiạn mọ olegheri ni kụ roḍighi.”
10. Ika kụ idị yira kobughẹ eepoogh ophagharanhaạn aani aḍipuru mem ituughạ?
10 Nạ malhoghoma ghan ni iphẹn aDanielle alhoghoma bọ ḍughụm? Eḍighi idiphọ, eeni nạ kawạ oḅoorian ghan onhaghạn ipẹ ituughạ phọ rekị bọ bịn. Kuolọ nyinhạ ki/phẹr ophoophe ghan aḍighaạgh. Nạ kaḍighi ika? Ookolhobian ghan ibadị ariisi ophanyanhaạn ketue ni elọgh ḍighaạgh ophagharanhaạn aani aḍipuru. Kụ eḍighi maạr dị k”omạ nyinhạ emhiighom ituughạ phọ, pọ nạ kamoọgh ni roopoogh ophagharanhaạn aani aḍipuru iduọn ituughạ phọ rekị bọ. Mem dị nạ raakolhobian Otu Okoriom mọ, tuutughiạn ni ipẹ torobọ ekpịgh emhoọgh bọ muḅọph r’emhuoghaạph phọ. Nạ aḍighi iduọn phọ, pọ eeni nạ kamoọgh ghan ni imạ ophagharanhaạn oḅarạm kụ ituughạ phọ egbi omhunheen. Oḅarạm isiphẹ, nạ atue ni aakolhobian ophagharanhaạn asiikpịgh dị emhoọgh onhaghạn aḍughụm aBaibul dị aḍiinyan ḅilhẹ akpạr ogbạ oselhe. (1 Kọr. 2:10) Eeghe kụ iḍighi? Loor esi dị eeni ibadị awe ko/kạr opoophe raghaạgh abidị siikpịgh phọ ipẹ phọ. Kokaạph ika eḍighi maạr dị nạ adạph ni iphẹn phọ kụ ko/ngọ ni nyinhạ eepoogh ophagharanhaạn aḍipuru esi ibadị ituughạ dị nạ maghị? Kụ ituughạ phọ egbi omhiigh, nạ atue ni aḅenhị onyọ umor phọ katughemhị bọ ḍipuru dị nạ rawạ ophagharanhaạn.
11. Filipai 2:4 uromha iyira oḍighi ghan ika?
11 Bạl Filipai 2:4. Enhaạn iphum ni otelhedom mọ Pọl oromha aKristẹn mọ bidị owạ ghan ilọ kengọ suọ bunhọn. Ika kụ idị yira kodạph oromha phọ opọ phọ mem dị ophạm ituughạ? Esi ootughiạn ghan mọ abunhọn iduọn ayira rowạ ni ophagharanhaạn aani aḍipuru.
Idiphọ nạ rangọ ghan bọ eepoogh bunhọn oghaạph aani iyaạr mem dị nyinha rekaạph raghaạph, ngọ aani ghan eepoogh bunhọn ophagharanhaạn aani ghan aḍipuru mem ituughạ (Miịn ekpịgh phọ 12)
12. Eeghe kụ eniin emạ eten okparamhị aani abunhọn mem ituughạ? (Miịn kẹn afoto phọ.)
12 Nạ ragbi mọ ketọl ika, eḍighi iyaạr dị oyaghirị anạ r’anạ rekaạph raghaạph kụ eepoogh oghaạph aani iyaạr nyodị nạ u/ngọ? Ke/nighẹ! Nạ kawạ ni mọ odị aghaạph aani iyaạr. Eniin phọ eten phọ, mem dị yira oghị ituughạ rowạ ghan mọ dị edugh ni ibadị ophagharanhaạn aani ḍipuru. Okạr oghaạph, eniin eten dị yira kotue okparamhị bumor r’abumaranhi phọ pọ ongọ aani abidị eepoogh ophagharanhaạn aani aḍipuru. (1 Kọr. 10:24) Ooḅeghiọn idị yira kotue oḍighi iduọn phọ.
13. Ika kụ edị yira kotue ongọ aani eepoogh ibadị ophagharanhaạn aḍipuru?
13 Eniin eten pọ, ongọ ghan ophagharanhaạn dị akper, pidị yira ongọ aani bunhọn eepoogh oghaạph aani iyaạr. Ikumor awe phọ r’abunhọn dị olhegheri iyaạr phọ mabụgh siẹn igey phọ, otue ni oḍighi egey eḍeenhaan ilọ iphẹn phọ. Ghalhamọ nạ ungọ ni ophagharanhaạn dị akper, miịn ni mọ na oo/karagh ibadị araraạr. Nạ aghaạph oomọ ipẹ edi bọ siphẹ ekpịgh phọ, abunhọn awe ko/miịn iyaạr oghaạph aani. Esi omaạm, ekpịgh phọ kụ eghaạph ilọ iyạl araraạr dị ewạ mọ oḍighi—omhiịn mọ yira ongọ ophagharanhaạn dị akper ḅilhẹ ku/kaạph uukaragh ibadị araraạr. Eḍighi maạr dị nạ kụ aḍighi oḅẹl dị omạ, nạ atue ni akaạph ilọ eniin iyaạr bịn.
Apụr amem kụ edị eeni ke/wạ mọ ophoophe ḍighaạgh ayira otu ituughạ? (Miịn ekpịgh phọ 14)f
14. Eeghe kụ kelhoghonhaạn nyinhạ ḍighaạgh olhegheri amem ophoophe aḍighaạgh anạ? (Miịn kẹn afoto phọ.)
14 Sighẹ olhoghi anạ aaḅeghionhọm ilọ onhụ amem mọ nạ kapagharanhaạn ghan bọ ḍipuru. Yira ophoophe yogh ghan ḍighaạgh iboom, kekpaariọm opọ aphạm bọ ituughạ phọ omạ ghan ogina ayira ghalhamọ abunhọn ko/phagharanhaạn aani ni. Iphẹn phọ ketue ni eḍighi idị abunhọn ko/wạ mun ophoophe.—Eccl. 3:7.
15. (a) Ika kụ edị ewạ mọ omhegheron mem dị iyira u/mạ aani? (b) Ika kụ edị opọ ratughemhị bọ kaḍeenhaan ogbolhomaam torobọ oye? (Miịn igbe phọ “Eḍighi Maạr Dị Nạ Kụ Ratughemhị.”)
15 Mem dị ibadị ophoophe ḍighaạgh, eeni yira ko/tue opagharanhaạn onhụ amem mọ yira rowạ bọ. Kụ eeni amem iyira ko/mạ r’omạ. Ipẹ phọ etue ni iḅonyon iyira ezu, kuolọ ku/tuạn iphẹn phọ u/kaghạm oye olhoghi.—Eccl. 7:9.
16. Ika kụ edị yira kotue okparamhị bulọ ophagharanhaạn ḍipuru?
16 Eḍighi maạr lọ nạ u/tue upagharanhaạn onhụ amem mọ nạ rawạ bọ, pọ ler rurụ angọ mem dị abunhọn ropagharanhaạn pidị ituughạ phọ emhunheen nạ asẹph bidị. Ipẹ abumor r’abumaranhi phọ musereghiạn bọ ophagharanhaạn phọ anạ, kụ edị bidị kosereghiạn aani ḍisẹph phọ anạ. (Prov. 10:21) Enhọn eten dị yira kotue okparamhị bunhọn pọ osẹph ghan abidị.
INHỌN ARETEN DỊ ONIIN KAKPARAMHỊ NYONIIN
17. (a) Ika kụ edị aburudẹ r’aburunhiin kotue ologhonhaạn ḍighaạgh ibạm anmụny phọ abidị ookolhobian ophagharanhaạn dị akasiạn bidị? (b) Odaphạn vidio phọ, eeghe kụ inya aradạ orue ookolhobian ophagharanhaạn? (Miịn kẹn afoto phọ.)
17 Eghẹn kụ enhọn eten dị yira kotue okparamhị bunhọn siphẹ ituughạ phọ? Aburudẹ r’aburunhiin kotue ni ologhonhaạn ḍighaạgh ibạm anmụny phọ abidị ookolhobian ophagharanhaạn dị akasiạn bidị. (Mat. 21:16) Eeni amem, emhuoghaạph phọ etue ni egbon iiḅaghamhị olom r’anhịr obobọ ilọ aroozọ dị esererẹ r’inhọn, kuolọ ghalhamọ r’iduọn phọ ni bịn, asiikpịgh ketọl li dị eeni ibạm anmụny kotue opagharanhaạn aani. Ḅilhẹ kẹn, loghonhaạn ḍighaạgh ibạm anmụny phọ anạ onhaghanhạn mọ ka/torobọ amem dị bidị ophoophe ḍighaạgh kụ edị komạ bidị. Iphẹn phọ keḍighi idị bidị ko/ḅonyonhu ozuan mem dị omạ aani bunhọn.—1 Tim. 6:18.d
18. Ika kụ idị yira kotue okel oḍeenhaan aloor mem dị yira ropagharanhaạn ḍipuru? (Proverbs 27:2)
18 Oomo ayira kotue ni ookolhobian ophagharanhaạn dị kakuenhi aZihova aḅilhẹ akparamhị bumor r’abumaranhi phọ. (Prov. 25:11) Ghalhamọ r’iduọn eeni amem yira kotue bọ ni okaạph idị imitenhaan iyira, omhiịn ni mọ yira u/ḍeenhaan loor ayira. (Bạl Proverbs 27:2; 2 Kọr. 10:18) Kparipẹ ghụn, ogbon aZihova, Ekpo Onhụ phọ odị, ḅilhẹ r’awe phọ odị. (Ogan. 4:11) Toroboiperolbọ, aḍipuru phọ kụ eḅẹm mọ oghaạph idị imitenhaan iyira, pọ kenighẹ ni oḍighi iduọn phọ. Eniin eḍeenhaan ilọ iphẹn phọ edi ekpịgh phọ etum bọ siẹn.
19. (a) Eeghe kụ kemite mem dị yira ongọ aani eepoogh bunhọn mem ituughạ? (Rom 1:11, 12) (b) Eeghe iyaạr kụ edị nạ akạr asereghiạn ilọ ophagharanhaạn ghan aḍipuru otu ituughạ?
19 Ghalhamọ r’iduọn iilhogh i/lo bọ ni ilọ ipẹ oye kangọ bọ ophagharanhaạn phọ odị, oomo ayira okparaghạ ni okparamhị abunhọn. Kụ iphẹn phọ kemoghi ogbor ghan ongọ ophagharanhaạn. Obobọ eeni ongọ aani ghan abunhọn eepoogh ongọ ophagharanhaạn kụ osereghiạn abidị. Mem dị nạ agbon ilọ kengọ suọ bunhọn siphẹ ookpomhoghan phọ, pọ nạ “kaloghonaạn ni ḍighaạgh oomo” awe.—Bạl Rom 1:11, 12.
AḌUỌR PHỌ 93 Bless Our Meeting Together
a Ophagharanhaạn phọ ayira rakparamhị ghan ni oniin atum nyoniin. Kuolọ, abuniin rokiilhaan ghan ni ophagharanhaạn aḍipuru. Abunhọn rokelhọm ghan agey, kuolọ rowạ ghan mọ omạ ghan bidị mem mem mem. Esi iduọn phọ, ika kụ idị yira kongọ aani ghan eepoogh bunhọn pidị oomo ayira ogholhoghọl? Ika kụ idị yira kotue ongọ ophagharanhaạn dị kanyu bunhọn oḍeenhaan aani ephomhoghiạn r’iiḅi iiḍighi? Emhuoghaạph phọ ephẹn phọ kekaạph ni.
b Orue omhiịn inhọn iromhoghiom, ḅeeḅeghiọn Watchtower aJanuary 2019 ipoḍi phọ 8-13, ḅilhẹ r’aWatchtower aSeptember 1, 2003, ipoḍi phọ 19-22.
c Monme ḍien phọ.
d Pogh vidio phọ Ḍighi Oyaghirị AZihova—Kookolhobian Ilọ Ophagharanhaạn siphẹ jw.org.
f ILỌ AFOTO: Onyọ umor dị odi ookpomhoghan dị abụgh kụ maphagharanhaạn ni ḍipuru o/phoophe mun ḍighaạgh odị orue ongọ aani eepoogh bunhọn ophagharanhaạn aani aḍipuru.