EMHUOGHAẠPH ITUUGHẠ PHỌ 53
Iḍoọgh Abumor—Iḍighi Kristẹn Dị Osi Omhanhanhaạm
“Maạr aphạm loor anạ akparamhị, aḍeenhaan mọ nạ oye ni.”—1 Ki. 2:2.
AḌUỌR PHỌ 135 “Sụ Olhoghi Moọny Amhị”
OGHAẠPH OOKARAGHa
1. Eeghe kụ edị ewạ mọ oḍoọgh onyọ umor aḍighi orue osi omhanhanhaạm?
ODAẠM mọ Devid aroma Solomon mọ: “Maạr aphạm loor anạ akparamhị, aḍeenhaan mọ nạ oye ni.” (1 Ki. 2:1-3) Opọ phọ oroma dị ewạ mọ oomo aKristẹn ḍio arodon osighẹ oḍighinhom. Orue oḍighi iduọn phọ, pọ kewạ mọ tuughạ odaphạn ghan iilhogh phọ Enhaạn kụ aḅilhẹ asighẹ aḍighinhom ghan asinhị iilhogh aBaibul phọ siphẹ oomo adọl aghuḍum mọ anạ. (Luk 2:52) Uḍighi ika kụ ekạr bọ ekpaariọm mọ iḍoọgh abumor oḍighi Kristẹn dị osi omhanhanhaạm?
2-3. Uḍighi ika kụ emhoghi bọ mọ iḍoọgh abumor oḍighi Kristẹn dị osi omhanhanhaạm?
2 Abumor omoọgh ni ibadị iiḍighi dị emhạn maạr siphẹ eghunotu phọ r’isiẹn ookpomhoghan phọ. Idiphọ iḍoọgh, eeni nyinha reetughiạn ghan ni roopoogh phọ idianhaan bọ inyinha epẹ ghisigh. Eeni nạ amoọgh ḍiigbu oḍighi okọy eten opọ oomo amem mọ, odị raloghonhaạn ghan ḍighaạgh ikumor awe phọ, ḅilhẹ roḍighi okumor oye ookpomhoghan ghisigh. Eeni kẹn nạ kawạ ni ophin anhịr omhoọgh ibạm anmụny. (Efẹ. 6:4; 1 Tim. 3:1) Orue oteẹny asiigbu phọ iphẹn phọ, nạ amoọgh oḍighi onyọ aKristẹn dị asi amhanhanhaạm.b
3 Eeghe kụ ketue elhoghonhaạn nyinhạ ḍighaạgh oḍighi onyọ aKristẹn dị asi amhanhanhaạm? Asighalhanyạ edi ni dị emhạn maạr agey dị ewạ mọ moọgh. Kuolọ eeghe kụ edị emhoghi mọ ḍighi nyiidiphọ, orue ookolhobian ilọ omhaạr ophạm iiḍighi phọ rekori bọ nyinhạ ghisigh?
ILỌ OḌIGHI ONYỌ AKRISTẸN DỊ ASI AMHANHANHAẠM
Otuughaạny ghan imạ iikiạ araagharạ phọ aZizọs ketue ni elhoghonhaạn nyinhạ ḍighaạgh oḍighi onyọ umor dị asi amhanhanhaạm (Miịn ekpịgh phọ 4)
4. Iḍighen kụ edị nạ katue amiịn imạ areḍeenhaan otuughaạny? (Miịn kẹn afoto phọ.)
4 Saḅạr igey areḍeenhaan otuughaạny. Ibadị imạ areḍeenhaan edi ni siphẹ aBaibul phọ dị iḍoọgh abumor kotue otuughaạny. Awe iḍiodi phọ abuphẹ phọ uphomhoghiạn Enhaạn kụ omhaạr ghan ophạm ibadị iiḍighi phọ abidị ophogh awe phọ Enhaạn. Nạ katue kẹn ni amiịn imạ areḍeenhaan abumor dị osi omhanhanhaạm siphẹ eghunotu phọ anạ r’isiẹn ookpomhoghan phọ. (Hib. 13:7) Ḅilhẹ r’eḍeenhaan phọ aZizọs Kraist emhunhughan bọ. (1 Pit. 2:21) Iduọn nạ amhiigha bọ loor raaḅeghiọn reḍeenhaan phọ iphẹn phọ, gbon imạ araagharạ phọ abidị. (Hib. 12:1, 2) Kụ asopha ilọ ipẹ nạ katuughaạny bọ bidị.
5. Ika kụ edị nạ katue amoọgh iikpọ iitughiạn, kụ uḍighi ika kụ emhạn bọ maạr? (Psalm 119:9)
5 Moọgh kụ aḅilhẹ “aphamhanhạm . . . iikpọ iitughiạn.” (Prov. 3:21) Oye dị amhoọgh igey iikpọ iitughiạn ramiigha ghan loor kaatughiạn kụ agbi oḍighi iyaạr dị odị rawạ oḍighi. Esi iduọn phọ, lọgh ikuph omhiịn mọ nạ amoọgh aḅilhẹ apamanhạm iikpọ iitughiạn. Eeghe kụ iḍighi? Ugheel anmụny dị iitughiạn r’inyuughiom abidị kụ retelheom kụ umuza aḅirinhi phọ. (Prov. 7:7; 29:11) Araraạr phọ roḍeenhaan ghan bọ siphẹ aTV phọ ketue ni emoọgh eboom etirom esi anạ. Esi iduọn phọ, ika kụ idị nạ katue amoọgh iikpọ iitughiạn? Miigh otuughạ asinhị iilhogh aBaibul phọ, kụ agbirima ghan idị ipẹ phọ kengọ nyinhạ suọ. Kụ asighẹ sinhị iilhogh phọ nạ matuughạ bọ alhegheri asophaam ghan osopha dị kaḅeraạn aZihova. (Bạl Psalm 119:9.) Nạ arue ni kụ alhẹm eegharạ phọ ephẹn phọ amiteom, pọ nạ magbatạn edạ dị emhạn maạr oḍighi onyọ aKristẹn dị asi amhanhanhaạm. (Prov. 2:11, 12; Hib. 5:14) Ooḅeghiọn iyạl areten dị oḍighinhom iikpọ iitughiạn ketue engọ nyinhạ suọ: (1) esi eten phọ epẹ nạ razoọm ghan bọ bumaranhi ḅilhẹ (2) r’osopha phọ anạ ilọ iinmenian r’ipẹ nạ raseere ghan bọ loor phọ anạ.
6. Ika kụ edị iikpọ iitughiạn ketue elhoghonhaạn ḍighaạgh oḍoọgh onyọ umor oḍeenhaan olhọgh eegu bumaranhi?
6 Iikpọ iitughiạn kelhoghonhaạn nyinhạ ḍighaạgh olhọgh eegu nmariịr. Eḍighi ni eseeriom dị oḍoọgh onyọ umọr kamoọgh ḍiḅeraạn akị esi umaranhi. Ghalhamọ r’iduọn phọ ni, oḍoọgh onyọ umor dị amhoọgh iikpọ iitughiạn ka/ḍọ iḍọ akị esi onyọ umaranhi dị odị ra/wạ ophin. (1 Tim. 5:1, 2) Eru maạr dị onyọ umaranhi r’odị rokaaphạn ilọ ilhom, onyọ umor phọ kakparaghạ ni omhiịn mọ odị o/phuẹ ḍien onyọ umaranhi phọ. Odị kaḍighi iduọn phọ esi omhiịn ghan mọ bidị otọl ghan ni esi dị abunhọn awe komiịn bidị mem dị bidị omhoọgh raghaạph.—1 Kọr. 6:18.
7. Ikạ kụ edị iikpọ iitughiạn ketue eloghonhaạn ḍighaạgh onyọ umor osopha osopha ilọ iinmenian r’eten oseere asilhaạl?
7 Enhọn eten dị onyọ umor katue aḍeenhaan mọ odị amoọgh ni iikpọ iitughiạn pọ eten phọ epẹ odị raanmenian ghan bọ kaḅilhẹ aseerian silhaạl phọ odị. Ibadị abuphẹ rokọl ghan bọ koḅilhẹ aalhaghi rusuomạ rodon u/ḍighi we dị omhoọgh oghiilhaan aZihova, oḍighi ghụn we dị odi ghan dọl ipesi. Kụ iitughiạn phọ abidị ipẹ phọ reḍeenhaan ghan esi ipiiphian piiphian arusuomạ phọ bidị rokọl ghan bọ. Iniin reḍighi ghan idị alhephiri kokịgh nmariịr. Mem dị oḍoọgh onyọ umor raselẹ raraạr dị odị kakpologhiạn, odị kaḍeenhaan mọ odị apoph ni rakị ghisigh ḅilhẹ mọ odị aḍighi ni egey eḍeenhaan siphẹ ookpomhoghan phọ esi omheera mọ asinhị iilhogh aBaibul phọ kụ eeḅakị osopha phọ odị. Odị katue ni apuruan loor mọ: ‘Osopha phọ amhị aḍeenhaan ni mọ mị amoọgh ni iikpọ iitughiạn aḅilhẹ ralọgh ghan eegu bunhọn? Iinmenian phọ amhị reḍeenhaan ghan ni we mọ mị okaraghị ebenhẹ Enhaạn ni?’ (1 Kọr. 10:31-33; Taitọs 2:6) Oḍoọgh onyọ umor dị amhoọgh iikpọ iitughiạn akạr kụ amạn maạr esi abumor r’abumaranhi phọ ḅilhẹ r’Odẹ k’akẹ phọ ayira.
8. Ika kụ edị oḍoọgh onyọ umor katue atuughạ ilọ oḍighi oye dị akpẹ oḍuom olhoghi?
8 Ḍighi oye dị akpẹ oḍuom olhoghi. Onyọ iḍoọgh dị koḍuom olhoghi pọ odị rakuamhị ghan kaḍighi torobọ oḍighi dị ongọ nyodị. (Luk 16:10) Tuutughiạn emạ eḍeenhaan phọ aZizọs. Odị r’amem r’amem o/pheghom ephegh oḍighi phọ odị. Kparipẹ ghụn odị atuụgh ghan ipẹ aZihova aḅenhị bọ nyodị kụ aḍighi, ghalhamọ r’amem dị ekparanhaạn ni nyodị. Odị aphomhoghiạn we—ekạr ekpaariọm butelhedom mọ odị—kụ odị aḅọgh ghuḍum mọ odị angọ bidị dị nyodị u/kpaariọm. (Jọn 13:1) Orue otuughaạny eḍeenhaan phọ aZizọs, pọ lọgh inyaạm oḍighi atorobọ oḍighi dị oḅọgh ongọ nyinhạ. Eḍighi maạr dị nạ u/kạr unaghanhạn ilọ oḍighi, pọ sooromhi loor apuru bumor dị osi omhanhanhaạm ilọ oḍighi. Ka/gbon ghan oḍighi iinyenụm bịn. (Rom. 12:11) Kparipẹ ghụn, kparaghạ ghan omhadạn oḍighi anạ, miịn mọ nạ ‘raḍighinaan Omoọgh-we phọ, nạ ra/ḍighinhaan we bịn.’ (Kọl. 3:23) Ii, nạ o/mhunughan, esi iduọn phọ nạ kapiomạn ghan ni, mem dị ipẹ phọ emite, sooromhi loor, alhọm osạr owilhenhaạn.—Prov. 11:2.
TUUGHẠ SIGHALHANYẠ OROLHỌM
9. Uḍighi ika kụ emoghi bọ dị oḍoọgh onyọ umor katuughạ sighalhanyạ orolhọm?
9 Orue oḍighi onyọ umor dị asi amhanhanhaạm, emoghi mọ moọgh sighalhanyạ orolhọm. Asighalhanyạ phọ iphẹn phọ kelhoghonhaạn nyinhạ ḍighaạgh orue oḍighi iiḍighi phọ anạ siẹn ookpomhoghan phọ, omhoọgh oḍighi ophoghom aloor anạ r’eghunotu anạ, ḅilhẹ r’omhoọgh igey asiya r’abunhọn awe. Ooḅeghiọn iniin asighalhanyạ phọ iphẹn phọ.
Otuughạ omhaạr aạl r’ogẹ ketue ni engọ nyinhạ r’ookpomhoghan phọ suọ (Miịn siikpịgh phọ 10-11)
10-11. Eeghe asuọ kụ edị olhegheri ilọ aạl r’ogẹ ketue engọ oḍoọgh onyọ umor r’ookpomhoghan phọ? (Psalm 1:1-3) (Miịn kẹn afoto phọ.)
10 Tuughạ aạl r’ogẹ. ABaibul phọ aḅẹm mọ ibo edianhaan ghan oye dị ratuughạ ghan Ekpo Onhụ phọ Enhaạn kụ mọ torọ iyaạr dị odị aḅọgh renighenhaạn ghan ni nyodị. (Bạl Psalm 1:1-3.) Esi aạl ghan aBaibul phọ torobọ aḍio, kụ edị odị kalegheri akuphom owol eten iitughiạn phọ aZihova. Kụ ipẹ phọ keloghonhaạn nyodị ḍighaạgh olhegheri ilọ osighẹ oroma aBaibul phọ oḍighinhom agey. (Prov. 1:3, 4) Okạr kụ omoghi odọ abumor phọ abuẹn phọ siẹn ookpomhoghan phọ. Eeghe kụ iḍighi?
11 Abumor r’abumaranhi phọ ayira omoghi olhoghonhaạn aḍighaạgh abumor dị kotue osighẹ Baibul phọ otughemiọm oḅilhẹ ongoọm bidị oroma. (Taitọs 1:9) Eru maạr dị nạ katue ni abạl aḅilhẹ agẹ, pọ kedughanhaan ni nyinhạ ookolhobian oghaạph r’ongọ ophagharanhaạn dị katue akparamhị omheeraam awe. Ketue kẹn ni elhoghonhaạn nyinhạ ḍighaạgh orue ogẹ aani iyaạr dị nạ atuughạ mem dị oghị ituughạ, ookpomhoghan eghir, ḅilhẹ r’eephugh. Araraạr phọ nạ agẹ bọ ketue ni ekparamhị omheeraam mọ anạ eḅilhẹ elhoghonhaạn nyinhạ ḍighaạgh okparamhị abunhọn.
12. Eeghe kụ ketue elhoghonhaạn nyinhạ ḍighaạgh olhegheri ilọ omhaạr oghaaphạn ghan awe?
12 Tuughạ ilọ oghaaphạn ghan awe egey eten. Ewạ mọ onyọ aKristẹn atuughạ ilọ omhaạr oḅaanhaạn ghan awe. Onyọ umor dị amhaạr oghaaphạn awe raler ghan rurụ kangọ kaḅilhẹ anhaghanhạn ḍiitughiạn ḅilhẹ r’idị abunhọn olhoghoma. (Prov. 20:5) Odị katue ni alegheri idị abunhọn olhoghoma siphẹ eḍọgh phọ, eseeriom aghisigh, idị aloor phọ abidị edi. Nạ ka/tue alegheri iphẹn phọ eḍighi maạr dị nạ ra/miteom ghan mem orolhạn abunhọn. Eru maạr dị torobọ amem kụ nạ odianhaan ghan ogeeghị adom afon, pọ kekparanhaạn ni nyinhạ omhoọgh aḍighalhanyạ oḅaanhaạn ghan awe ghisigh r’aghisigh. Esi iduọn phọ, kparaghạ owạ ghan aroopoogh oḅaanhaạn ghan awe ghisigh r’aghisigh.—2 Jọn 12.
Enighẹ agey otuughạ aḍighalhanyạ dị ketue eloghonhaạn nyinhạ ḍighaạgh omhoọgh oḍighi (Miịn ekpịgh phọ 13)
13. Eeghe kụ inhọn araraạr dị emhoghi dị oḍoọgh onyọ umor katuughạ? (1 Timoti 5:8) (Miịn kẹn afoto phọ.)
13 Tuughạ ilọ ophogh aloor anạ. Onyọ umor dị asi amhanhanhaạm pọ odị katue apogh loor odị r’eghunotu odị. (Bạl 1 Timoti 5:8.) Iniin arikpisi, iḍoọgh abumor rotuughạ ghan oḍighi aḍighaạgh esi odẹ obobọ siya abidị. Inhọn arikpisi, iḍoọgh rotuughạ ghan iiḍighi aḍighaạgh ruutu askul dị rotughemhị ghan iiḍighi aḍighaạgh, abunhọn rokpẹ ghan ikpoki esi kụ otuughạ. Torobọ idị edi ghan ekpisi anyinha, omhoọgh oḍighi aḍighaạgh kelhoghonhaạn nyinhạ ḍighaạgh omhoọgh iyaạr oḍighi. (Iiḍighi 18:2, 3; 20:34; Efẹ. 4:28) Ḍighi ipẹ nạ katue bọ dị kolhegheriom nyinhạ idiphọ oye dị akpạr ḍighaạgh ḅilhẹ ramadạn ghan oḍighi dị nạ amhiigh. Nạ aḍighi odọ oye phọ opọ phọ, pọ nạ ka/toph oḍighi dị nạ amhoọgh. Araagharạ phọ r’asighalhanyạ phọ yira mooḅeghiọn bọ ketue kẹn ni eloghonhaạn ḍighaạgh onyọ umor orue ophạm iiḍighi dị odị kamoọgh ghisigh.
KOOKOLHOBIAN ILỌ AGHISIGH PHỌ ANẠ
14. Ika kụ edị oḍoọgh onyọ umor katue aakolhobian oḍigh arukumuan oomo amem mọ?
14 Arukumuan oomo amem mọ. Ibadị abumor dị osi omhanhanhaạm umhiigh rukumuan oomo amem mọ mem dị bidị oḍighi iḍoọgh. Arukumuan okọy eten reloghonhaạn ghan ḍighaạgh iḍoọgh olhegheri ilọ okumuan r’awe kirokirọ. Keloghonhaạn kẹn ḍighaạgh onyọ iḍoọgh olhegheri ilọ olheom ikpoki r’osụ-olhoghi. (Fil. 4:11-13) Emạ eten omhiigh arukumuan oomo amem mọ pọ osighẹ ghan okọy eten opọ ekulha amem mọ. Ibadị usighẹ ghan okọy eten opọ ekulha amem mọ kụ ogbi oḍigh arukumuan opọ oomo amem mọ. Ipẹ phọ rekughuronhaan ghan bidị inhọn imạ aroopoogh idiphọ oḍighi oniin odị ralọgh ghan ruutu oḍighom mọ obobọ okumu epẹ Betẹl.
15-16. Eeghe kụ ketue eloghonhaạn ḍighaạgh oḍoọgh onyọ umor oḍighi odị raloghonhaạn ghan ḍighaạgh ikumor awe phọ obobọ oḍighi aani okumor oye?
15 Odị raloghonhaạn ghan ḍighaạgh ikumor awe phọ obobọ okumor oye. Iḍoọgh abumor ophighi ḍiigbu osi omhanhanhaạm okumu abumor r’abumaranhi phọ idiphọ ikumor awe ookpomhoghan. ABaibul phọ aḅẹm mọ, “oye lọ azuạ oḍighi opoghom asiosị phọ, pọ azuạ ni ephigh oḍighi.” (1 Tim. 3:1) Tutụ oye kaḍighi okumor oye ookpomhoghan, oye phọ kapụr aḍighi odị raloghonhaạn ghan ḍighaạgh ikumor awe phọ. Abuẹn phọ rologhonhaạn ghan ikumor awe phọ ḍighaạgh ophogh abumor r’abumaranhi phọ odi bọ siẹn ookpomhoghan phọ. Ikumor awe phọ r’abuphẹ rologhonhaạn ghan bọ ḍighaạgh ikumor awe phọ rosooromhi ghan loor kokumu bumor r’abumaranhi phọ koḅilhẹ ophinhom aani bin r’oophugh epẹ erugh phọ. Kotue ni omạ oḍoọgh onyọ umor dị odi igbo 17 r’ 19 asiạ dị asianhaan oḍighi odị raloghonhaạn ghan ḍighaạgh ikumor awe phọ. Ḅilhẹ kẹn otue ni omạ oḍoọgh onyọ umor dị mamhạn ni 20 asiạ kụ eghị ḅilhẹ asi ni amhanhanhaạm oḍighi okumor oye ookpomhoghan.
16 Ika kụ edị nạ katue asi amananaạm omhoọgh aroopoogh phọ iphẹn phọ? ABaibul phọ agọ ni raagharạ dị nạ amhoghi. Kụ oomo phọ araagharạ phọ iphẹn phọ ekpasị siphẹ aBaibul phọ ḅilhẹ r’ephomhoghiạn phọ nạ amhoọgh bọ aghị esi aZihova, eghunotu anạ, ḅilhẹ rookpomhoghan phọ. (1 Tim. 3:1-13; Taitọs 1:6-9; 1 Pit. 5:2, 3) Kparaghạ idị nạ kanaghanhạn raagharạ phọ ipẹ phọ. Kụ aaḅereghị alhọm olhoghonhaạn aḍighaạgh aZihova.c
AZihova rawạ mọ olom aphomhoghiạn anhịr odị kụ amhaạr aphogh ghan nyodị, aḍighi ogbogh oyaghirị odị, kụ dị emhạn maạr epu, alhoghonhaạn nyodị ḍighaạgh omhoọgh asiya dị ekpạr r’aZihova (Miịn ekpịgh phọ 17)
17. Ika kụ edị oḍoọgh onyọ umor katue aakolhobian oḍighi olom r’oḍiemiom eghunotu? (Miịn kẹn afoto phọ.)
17 Olom r’oḍiemiom eghunotu. Idiphọ aZizọs aghaạph bọ, abuniin abumor dị osi omhanhanhaạm u/pinhogh nmariịr. (Mat. 19:12) Kuolọ, eḍighi maạr dị nạ asopha ophin anhịr, nạ kamoọgh ni inhọn iiḍighi idiphọ olom r’oḍiemiom eghunotu. (1 Kọr. 11:3) AZihova rawạ mọ olom aphomhoghiạn anhịr odị kụ amhaạr aphogh nyodị, aḍighi ogbogh oyaghirị odị, ḅilhẹ alhoghonhaạn nyodị ḍighaạgh omhoọgh asiya dị ekpạr r’aZihova. (Efẹ. 5:28, 29) Araagharạ phọ r’asighalhanyạ phọ moghaạph bọ oghol epẹ omhạn, idiphọ omhoọgh iikpọ iitughiạn, olhọgh eegu nmariịr, oḍighi oye dị akpẹ oḍuom olhoghi, ketue ni elhoghonhaạn nyinhạ ḍighaạgh idiphọ olom. Oomo phọ iphẹn phọ keekolhobian nyinhạ orue oḍighi okuamhị iiḍighi phọ anạ idiphọ olom r’oḍiemiom eghunotu.
18. Ika kụ edị oḍoọgh onyọ umor katue aakolhobian oḍighi odẹ?
18 Odẹ. Nạ aphin anhịr, nạ atue ni aḍighi odẹ. Eeghe kụ edị nạ katue atuughạ esi aZihova ilọ oḍighi ogey odẹ? Ibadị araraạr otuughạ edi ni. (Efẹ. 6:4) AZihova aḅenhị ni Zizọs, Oony phọ odị esi ogbo mọ odị apomoghiạn ni nyodị kụ mọ iḍighinhom araraạr phọ odị eḅeraạn ni nyinhọ iboom. (Mat. 3:17) Kụ nạ aḍighi odẹ, miịn mọ nạ agbor ghan ni aḅenhị ibạm anmụny phọ anạ mọ nạ apomoghiạn ni bidị. Kụ agbor ghan asẹph bidị esi imạ araraạr phọ bidị roḍighi ghan bọ. Aburudẹ dị otuughaạny eḍeenhaan phọ aZihova rologhonhaạn ghan ḍighaạgh ibạm anmụny phọ abidị oḍighi aKristẹn dị osi omhanhanhaạm. Nạ katue ni aakolhobian nyiidiphọ oḍighi ogey odẹ esi oḍeenhaan ghan ephomhoghiạn r’omhaạr ghan ophogh buọ eghunotu phọ anạ ḅilhẹ r’abuọ ookpomhoghan phọ ḅilhẹ r’otuughạ oḅenhị ghan abidị mọ nạ apomoghiạn ni aḅilhẹ asereghiạn bidị. (Jọn 15:9) Iphẹn phọ kelhoghonhaạn nyinhạ ḍighaạgh oḍighi ogey olom r’odẹ epẹ ghisigh. Kuolọ nyiidiphọ, aZihova, eghunotu anạ, ḅilhẹ rookpomhoghan phọ kokạr kụ osereghiạn nyinhạ.
EEGHE KỤ EDỊ NẠ KAḌIGHI NYIIDIPHỌ?
Ibadị iḍoọgh dị otughemhị Baibul phọ kụ osighẹ ipẹ bidị otuughạ bọ oḍighinhom moḍighi Kristẹn dị osi omhanhanhaạm (Miịn siikpịgh phọ 19-20)
19-20. Eeghe kụ keloghonhaạn ḍighaạgh iḍoọgh abumor oḍighi aKristẹn dị osi omhanhanhaạm? (Miịn afoto oḅẹl opoḍi phọ.)
19 Iḍoọgh abumor, emoghi ni igey phọ ikuph orue oḍighi onyọ aKristẹn dị asi amhanhanhaạm. Ewạ mọ moọgh igey areḍeenhaan otuughaạny, amhoọgh iikpọ iitughiạn, aḍighi oye dị kotue oḍuom olhoghi, atuughạ sighalhanyạ orolhọm, kụ aakolhobiạn ilọ iiḍighi dị rekori nyinhạ ghisigh.
20 Eeni amem nạ atue ni aatughiạn mọ iiḍighi phọ rekori bọ nyinhạ ghisigh epughạn, mọ nạ ka/tue aḍighi ateenyẹ. Kuolọ nạ katue ni. Ka/bula mọ aZihova akạr kụ rawạ olhoghonhaạn anạ ḍighaạgh. (Isa. 41:10, 13) Kụ kẹn, abumor r’abumaranhi phọ odi ni olhoghonhaạn anạ ḍighaạgh. Mem dị nạ ateẹny ḍiigbu phọ anạ oḍighi onyọ umor dị akạr asi amhanhanhaạm, olhoghi anạ kakạr kụ aḅaạl kụ nạ aloghoma ogbaanyạn. Iḍoọgh abumor, yoor iphomhoghiạn ni inyinha agey! AZihova aghị ni ghisigh asẹph ikuph phọ anyinha oḍighi abumor dị osi omhanhanhaạm.—Prov. 22:4.
AḌUỌR PHỌ 65 Move Ahead!
a Yira omoghi bumor dị osi omhanhanhaạm siphẹ arookpomhoghan phọ. Siẹn emhuoghaạph phọ ephẹn phọ, yira kooḅeghiọn idị iḍoọgh abumor kotue oḍighi Kristẹn dị osi omhanhanhaạm.
b Miịn “Ekpo Onhụ Dị Ogbạ” emhuoghaạph phọ 52.
c Miịn ḍinyạ phọ Organized to Do Jehovah’s Will, rumhuoghaạph phọ 5-6.