Nạ Katue Ni Ateẹny Siigbu Aruwaloor Phọ Anạ

1. Ighẹn ipaanhaạn kụ edị ibadị ayira osoman?

NẠ MAPHIGHI ghan ni ḍiigbu aruwaloor kuolọ ekparanhaạn nyinhạ oteẹny ḍughụm?b Eḍighi idiphọ, pọ nạ bịn o/lho. Esi omaạm, aPhilip awạ ghan ni onhighemhị eten iiḅereghị phọ odị ḅilhẹ r’onhụ amem mọ odị raaḅereghị ghan bọ, kuolọ ikparanhaạn ghan ni nyodị omiteom ghan amem ooḅereghị. Erika aphighi ḍiigbu oḅon ghan oghị aani aruupuruan epẹ erugh phọ; kuolọ enighẹ oḅẹm mọ torobọ amem odị o/rue ghan onhuụn osi. ATomáš akparaghạ ghan aạl oomo aBaibul phọ. Odị aḅẹm mọ: “Mị u/kelọm ghan ibạl aBaibul phọ. Mị ukparaghạ ni iraạr amem, kuolọ torobọ amem mọ mị u/ḅeẹny ghan Leviticus.”

2. Uḍighi ika kụ i/wạ bọ mọ oḅonyonhu ozuan eḍighi maạr dị yira ko/rue oteẹny ḍiigbu dị yira ophighi?

² Eḍighi maạr dị nạ amhoọgh ḍiigbu dị nạ ko/rue oteẹny, pọ ka/ḅonyonhu azuan. Aḍiigbu phọ ilọ eghom eghom, rewạ ghan ni mem r’inyaạm. Iduọn nạ aghiọm bọ ni ghisigh rakparaghạ oteẹny aḍiigbu phọ anạ eḍeenhaan mọ nạ amaghamhị ni maạr siya phọ anạ r’aZihova, ḅilhẹ nạ rawạ ni ongọ odị ipẹ enhighẹ bọ epelheghiom. Kụ aZihova asereghiạn ni inyaạm mọ nạ alhọgh bọ. AZihova ra/wạ ḍighaạgh anạ idị nạ ka/tue aḍighi. (Ps. 103:14; Mic. 6:8) Loor iduọn phọ, pighi ḍiigbu dị nạ katue ateẹny edaphạn dọl phọ anạ. Mem dị nạ aphighi ḍiigbu, ika kụ idị nạ katue ateẹny? Ooḅeghiọn iniin araraạr dị nạ katue aḍighi.

IBUỌM EMẠN NI MAẠR

3. Uḍighi ika kụ ibuọm emhạn bọ ni maạr?

³ Ibuọm reḍighi ghan ni ekpanhạ iyaạr obọ yira oteẹny siigbu aruwaloor ayira. Ibuọm dị ekpạr kenyu nyinhạ okuamhị okumuan oteẹny aḍiigbu phọ anạ. Yira kotue ni osighẹ ibuọm otomaạm ookuugh phọ ranyu ghan bọ oghuugh agalaga kaghị epẹ rakị bọ. Kụ ookuugh phọ kụ ebụgh, pọ oghuugh phọ kanuụn ni asi epẹ rakị bọ. Iniin phọ kẹn, ibuọm mọ ayira kụ ebụgh, pọ yira konuụn ni oteẹny siigbu phọ ayira. Onyọ umor dị oghol mọ David, epẹ El Salvador aḅẹm mọ “mem dị nạ amhoọgh ibuọm, bịn nạ malhọgh inyaạm. Nạ ka/meera mọ iyaạr ekikima nyinhạ oteẹny aḍiigbu phọ anạ.” Esi iduọn phọ, nạ kaḍighi ika kụ amoọgh ibuọm?

4. Eeghe kụ edị yira kotue olọm aZihova esi iiḅereghị? (Filipai 2:13) (Miịn kẹn afoto phọ.)

⁴ Ḅeeḅereghị ilọ omhoọgh ibuọm dị emhanhạm. Dị eego esi uwaloor iigbia phọ odị, aZihova katue ni angọ nyinhạ ibuọm oteẹny aḍiigbu phọ anạ. (Bạl Filipai 2:13.) Eeni amem yira ropighi ghan ḍiigbu loor esi dị yira ologhoma mọ ekpẹ ni oḍighi, kụ enighẹ ni. Kuolọ eeni yira ko/kạr omoọgh eephuạ oteẹny aḍiigbu phọ. Iphẹn kụ idị emitenhaan oniin onyọ umaranhi dị oghol mọ Norina epẹ Uganda. Odị aphighi ḍiigbu omhiigh otughemhị oye Baibul, kuolọ odị o/mhoọgh ibuọm loor esi dị alhoghoma mọ onọ o/mhaạr itughemhị. Eeghe kụ ilhoghonhaạn nyodị ḍighaạgh? Odị aḅẹm mọ: “Mị umhiigh olhọm aZihova torobọ aḍio ilọ olhoghonhaạn amhị ḍighaạgh obughẹ eephuạ phọ amhị ilọ otughemhị aani oye Baibul. Odaphạn iiḅereghị phọ amhị, mị ukparaghạ ni onhighemhị asighalhanyạ itughemhị phọ amhị. Iphurukpu arunwanyụ reten, bịn mị amhiịn mọ eephuạ phọ amhị mebụgh. Bịn lhạ phọ aḍiphẹ phọ mị umhiigh ni otughemhị iyạl awe Baibul.”

5. Yira kogbirima ghan ilọ eeghe orue obughẹ ibuọm mọ ayira?

⁵ Gbirima ghan ilọ ipẹ aZihova maḍighinhaan bọ nyinhạ. (Ps. 143:5) Otelhedom mọ aPọl agbirima ghan ni ilọ ipẹ aZihova maḍeenhaan bọ nyodị onmạ ighirigiir dị u/kpeanhaạn, kụ iphẹn phọ inyu ni nyodị okuamhị okumu aZihova. (1 Kọr. 15:9, 10; 1 Tim. 1:12-14) Igina phọ kẹn, eḍighi maạr dị nạ aghiọm ghisigh agbirima ghan ilọ ipẹ aZihova maḍighinhaan bọ nyinhạ, iduọn kẹn kụ idị ibuọm oteẹny asiigbu phọ anạ kebụgh ghan. (Ps. 116:12) Miịn iyaạr dị elhoghonhaạn ḍighaạgh oniin onyọ umaranhi epẹ Honduras oteẹny aḍiigbu odị ilọ oḍighi okọy eten oomo amem. Odị aḅẹm mọ: “Mị ugbirima ni ilọ ipẹ aZihova uphomhoghiạn bọ imhị. Odị kụ uḍur imhị alhọgh igbo awe phọ odị. Odị rapogh ghan kaḅilhẹ ughoph imhị. Ogbirima ghan ilọ iphẹn phọ ikparamhị ni ephomhoghiạn phọ amhị esi odị eḅilhẹ ebughẹ ibuọm mọ amhị.”

6. Eeghe kụ keḅilhẹ etue ebughẹ ibuọm mọ ayira?

⁶ Gbon suọ dị oteẹny aḍiigbu phọ kengọ nyinhạ. Lọgh elhegh iyaạr phọ elhoghonhaạn bọ ḍighaạgh Erika, oghol bọ epẹ omhạn, oteẹny aḍiigbu phọ odị ilọ oḅon ghan. Odị aḅẹm mọ: “Mị uru ni alhọgh elhegh mọ mị ratoph ni ibadị araraạr iduọn mị ra/teẹny ghan bọ ruupuruan epẹ erugh phọ. Kuolọ mị aḅon asi, mị kamoọgh ni eepoogh ooḍikuan abumor r’abumaranhi phọ. Mị aḅilhẹ kẹn anaghạn ighiọm ilhoghi dị kilhoghonhaạn imhị ḍighaạgh oghelhọm r’onhighemhị asighalhanyạ oghaạph phọ amhị epẹ erugh phọ.” Erika agbon suọ dị oḅon ghan kangọ nyodị, bịn odị ateẹny ḍiigbu phọ odị. Eeghe asuọ kụ edị nạ kagbon? Eḍighi maạr dị aḍiigbu phọ anạ eḍighi aạl aBaibul obobọ ooḅereghị, pọ tuutughiạn ipẹ kelhoghonhaạn bọ nyinhạ ḍighaạgh okparamhị asiya phọ anạ r’aZihova. (Ps. 145:18, 19) Eḍighi maạr dị aḍiigbu phọ anạ eḍighi omhoọgh eegharạ onyọ aKristẹn, pọ gbọn ipẹ kenighemhị bọ siya phọ anạ r’abunhọn awe. (Kọl. 3:14) Nạ atue ni agẹ amiteom oomo ariphigh phọ nạ atụ bọ rawạ oteẹny aḍiigbu phọ anạ. Gbor ghan aphogh ipẹ nạ agẹ bọ. ATomáš, oghol bọ epẹ omhạn aḅẹm mọ: “Mem dị ariphigh phọ mị atuạn bọ rawạ oteẹny aḍiigbu phọ ebụgh kụ idị mị kakuamhị alọgh inyaạm oteẹny aḍiigbu phọ.”

7. Eeghe kụ ilhoghonhaạn ḍighaạgh Julio r’anhịr odị oteẹny aḍiigbu phọ abidị?

⁷ Ḍiiḍikuan ghan we dị kokparamhị nyinhạ oteẹny aḍiigbu phọ anạ. (Prov. 13:20) Miịn iyaạr dị elhoghonhaạn ḍighaạgh Julio r’anhịr odị oteẹny aḍiigbu phọ abidị ilọ obughẹ arukumuan phọ abidị epẹ erugh phọ. Odị aḅẹm mọ: “Yoor usaḅạr righirị dị ukparamhị ghan iyoor oteẹny aḍiigbu phọ ayoor, kụ yoor oghaaphạn ghan bidị ilọ aḍiigbu phọ ayoor. Ibadị abidị mophorogh ni idọ phọ asiigbu phọ iphẹn phọ oteẹny, kụ bidị uroma ghan iyoor ilọ oḍighi. Bidị upuru ghan iyoor kẹn ipẹ igbiighi phọ ayoor rekị bọ, kụ oḅilhẹ ukparamhị ghan iyoor mem lọ ewạ.”

MEM DỊ YIRA U/MOỌGH IBUỌM

8. Eeghe kụ ketue emite eḍighi maạr dị yira okumuan ghan oteẹny aḍiigbu ayira ogina amem dị yira omhoọgh ibuọm bịn? (Miịn kẹn afoto phọ.)

⁸ Ogbạ agey, asiḍio retọl ghan ni dị yira ro/moọgh ghan ibuọm oḍighi iyaạr. Iphẹn phọ remạ ghan mọ yira ko/tue okparaghạ oteẹny ḍiigbu ayira ḍughụm? Eeye. Esi oghaạph omaaniọm: Ookuugh amoọgh ni iikpọ dị katue anyu oghuugh agalagạ akimọm epẹ rakị bọ. Kuolọ iikpọ phọ regbaranhaạn ghan ni, eeni aḍio kẹn ookuugh dị amhoọgh iikpọ onyu oghuugh phọ ka/tọl r’orọl. Iphẹn phọ remạ mọ ozoghiọm mọ ka/kị ghisigh ḍughụm? I/ḍighi idiphọ. Esi omaạm, iniin arughuugh agalaga emoọgh enzịn; inhọn emoọgh ilhọm. Ozoghiọm mọ katue ni aḍighinhom raraạr phọ iphẹn phọ osi epẹ odị rakị bọ. Kotue ni otomaạm ibuọm mọ ayira ookuugh; k/oomo aḍio kụ edị yira romoọgh ghan ibuọm oḍighi iyaạr. Eeni aḍio yira ko/moọgh r’omhoọgh ibuọm okumuan ilọ oteẹny aḍiigbu phọ ayira. Kụ iḍighi kụ, eḍighi maạr dị yira okumuan ghan oteẹny aḍiigbu phọ ayira mem dị yira omhoọgh ibuọm bịn, pọ yira ko/moọgh ekol. Kuolọ idiphọ ozoghiọm mọ raḍighinhom ghan bọ ni inhọn areten osi epẹ odị rakị bọ, yira kotue ni okumuan oteẹny aḍiigbu phọ ayira ghalhamọ yira u/moọgh ni ibuọm. Okạr agey, ke/dugh oḍighi iduọn phọ, kuolọ nạ kamoọgh ni oḅaạl olhoghi mem dị nạ ateẹny ḍiigbu phọ anạ. Kụ ogbi oghaạph idị yira kotue oḍighi, ophụr ophagharanhaạn ḍiniin aḍipuru dị ketue ni emite.

9. Ebeeph ni oghiọm aghisigh okumuan ghan oteẹny aḍiigbu ghalhamọ r’amem dị iyira i/nyu ḍughụm? Gbạ.

⁹ AZihova rawạ mọ okumu nyodị r’oḅaạl olhoghi eten dị iyira u/kpaariọm. (Ps. 100:2; 2 Kọr. 9:7) Esi iduọn phọ, yira kokiọm ni ghisigh okumuan ghan oteẹny aḍiigbu ghalhamọ r’amem dị iyira i/nyu ḍughụm? Ooḅeghiọn eḍeenhaan otelhedom mọ Pọl. Odị aḅẹm mọ: “Mị ragiphighạ ghan okparamiạn r’ophamaghạn aloor phọ amị.” (1 Kọr. 9:25-27) APọl akpaariọm ghan ni loor odị oḍighi ipẹ enhighẹ bọ ghalhamọ r’amem dị u/moọgh ni ibuọm oḍighi iduọn phọ. Arukumuan phọ aPọl iḅeraạn ni aZihova ḍughụm? Ii! Kụ aZihova asẹph ni Pọl ilọ inyaạm mọ odị alhọgh bọ.—2 Tim. 4:7, 8.

10. Okumuan oteẹny aḍiigbu ghalhamọ r’amem dị yira u/moọgh ni ibuọm remiteom ghan eeghe asuọ?

¹⁰ Egina phọ eten phọ, reḅeraạn ghan ni aZihova omhiịn dị yira rokumuan oteẹny aḍiigbu ayira ghalhamọ r’amem dị yira u/moọgh ni ibuọm. Reḅeraạn ghan ni nyodị loor esi dị ghalhamọ r’iduọn eeni odighi phọ opọ phọ iyira u/ḅeraạn bọ ni, yira roḍighi ni loor ipẹ yira ophomhoghiạn bọ nyodị. Idiphọ aZihova asẹph bọ Pọl, Odị kusẹph aani ni iyira ilọ inyaạm mọ yira olhọgh bọ. (Ps. 126:5) Iduọn yira romhiịn bọ ḍisẹph phọ aZihova, bịn eeni yira komiigh ni omhoọgh ibuọm. Oniin onyọ umaranhi epẹ Poland dị oghol mọ Lucyna aḅẹm mọ: “Eeni amem, mị ra/wạ ghan omite epẹ erugh phọ, ekạr ekpaariọm mem dị aloor amhị medugh. Toroboiperolbọ, ibo phọ mị raloghomha ghan bọ mem dị mị akparạm amite eḍighi ni iikiạ inmo.” Omiịn ipẹ yira kotue bọ oḍighi mem dị yira u/moọgh ibuọm.

11. Ika kụ idị aZihova kulhoghonhaạn iyira ḍighaạgh okparamhị eegharạ ophamaghạn aloor phọ ayira?

¹¹ Ḅeeḅereghị alhọm ophamaghạn aloor. Ophamaghạn aloor pọ orue ophamaghạn olhoghoma r’iḍighinhom araraạr oye phọ. Rogbor ghan koḍighinhom mem dị rokaạph ilọ ophamaghạn aloor oye phọ esi oḍighi ikarạph. Toroboiperolbọ, ewạ kẹn ni ophamaghạn aloor orue oḍighi ghan igey, ekạr ekpaariọm mem dị iyaạr phọ ikparanhaạn iyira oḍighi obobọ yira u/moọgh ibuọm. Tuutughiạn mọ, ophamaghạn aloor aḍighi pakirị eemuma uwaloor iigbia phọ, kụ iḍighi kụ lọm aZihova uwaloor iigbia olhoghonhaạn anạ ḍighaạgh omhoọgh eegharạ phọ ephẹn emhạn bọ ni maạr iboom. (Luk 11:13; Gal. 5:22, 23) ADavid, oghaạph bọ oghol epẹ omhạn, aghaạph ni idị iiḅereghị elhoghonhaạn nyodị ḍighaạgh. Odị awạ ghan okạr ogbor ghan ophạm ituughạ ogina odị. Odị aḅẹm mọ: “Mị ulhọm ghan aZihova olhoghonhaạn amhị ḍighaạgh omhoọgh eegharạ ophamaghạn aloor. R’olhoghonhaạn aḍighaạgh odị, mị urue ni amhiigh edeọm ituughạ dị mị uu/sophion ghan.”

12. Ika kụ idị aḍinhị olhogh phọ edi bọ Ecclesiastes 11:4 kilhoghonhaạn iyira ḍighaạgh oteẹny asiigbu ayira?

¹² Ka/kori sidọl dị enhighẹ. Siẹn aḅirinhi phọ ophọn, kekpạr ri kụ yira omoọgh sidọl dị ekạr bịn enhighẹ. Kụ iḍighi kụ yira orọl okori ghan asidọl dị enhighẹ, yira ko/teẹny ḍiigbu phọ ayira. (Bạl Ecclesiastes 11:4.) Onyọ umor dị oghol mọ Dayniel aḅẹm mọ: “Asidọl dị ekạr enhighẹ i/lo ghan. Yira kụ kolẹm omiteom mem dị yira omhiigh.” Onyọ umor olọ Uganda dị oghol mọ Paul akaạph kẹn ni enhọn ephigh dị eḍeenhaan mọ oḅorion ghan oḍighi iyaạr i/nighẹ: “Mem dị yira omhiigh etigheri ḍikparaminheẹn adọl, aZihova kulhoghonhaạn ni iyira ḍighaạgh.”—Mal. 3:10.

13. Eeghe asuọ kụ odi esi omhiighom ibạm asiigbu?

¹³ Miigh enụn enụm. Eeni yira ko/moọgh ibuọm loor esi dị eeni ekịgh mudị aḍiigbu phọ ayira ekpạr oteẹny. Eḍighi idiphọ pọ nạ ragbi mọ ke/nighẹ ophụr oghome aḍiigbu phọ anạ ḍughụm? Eḍighi maạr dị aḍiigbu phọ anạ eḍighi ilọ omhoọgh emạ eegharạ, pọ ke/nighẹ owạ areten oḍeenhaan ghan enụm enụm ḍughụm? Eḍighi maạr dị aḍiigbu phọ anạ eḍighi aạl aBaibul emhiighom osi eekunha, ke/nighẹ ookolhobian ilọ aạl ghan enụm enụm ḍughụm? ATomáš, oghaạph bọ oghol epẹ emhiighom mọ, akparaghạ ghan aạl oomo phọ aBaibul phọ esi alhạ. Odị aḅẹm mọ: “Mị umhiịn ni mọ edeọm mọ mị aakolhobian bọ ikpạgh ghan ni imhị. Kụ mị asopha oḅilhẹ omhiigh, kuolọ nyiidiphọ, mị uukolhobian aạl ghan iphurukpu asiikpịgh torobọ aḍio kụ okuanhị ogbirima. Bịn eḍighi idị mị amhiigh oghelhọm ibạl phọ amhị.” Idiphọ aTomáš’ rakelhọm bọ ibạl phọ odị, bịn odị amhiigh aạl ghan iboom. Esighẹ rekị bịn odị aạl oomo phọ aBaibul phọ amhạn.c

KA/ḄONYONHU AZUAN MEM DỊ ARARAẠR REWẠ OḌIGHI IDỊ KEKPARANHAẠN NYINHẠ OTEẸNY AḌIIGBU PHỌ ANẠ

14. Eeghe araraạr kụ ketue ni ekọm idị kikparanhaạn iyira oteẹny aḍiigbu ayira?

¹⁴ Idị eḅilhẹ bọ eeph, ilọ oye phọ akparaghạ akparaghạ obobọ alhiọm loor, araraạr dị keḍighi idị kekparanhaạn oye phọ oteẹny aḍiigbu oye phọ kemite ni. Esi omaạm, “araraạr dị u/seere olhoghi” ketue ni esighẹ mem mọ oye phọ agbiighi bọ oteẹny aḍiigbu phọ. (Eccl. 9:11) Yira otue ni osoman iiḅaghamhị dị kekọm oḅonyonhu ozuan ḅilhẹ ikporokporomhị iyira. (Prov. 24:10) E/munughan phọ ayira etue ni ekọm idị yira kopiomạn bịn ikparanhaạn iyira oteẹny aḍiigbu phọ ayira. (Rom. 7:23) Obobọ aloor oye phọ bịn kụ idugh. (Mat. 26:43) Eeghe kụ kilhoghonhaạn iyira ḍighaạgh okpạr opu araraạr dị rewạ oḍighi idị kikparanhaạn iyira oteẹny aḍiigbu ayira?

15. Eḍighi maạr dị yira osoman raraạr dị rewạ ghan okikima ayira oteẹny aḍiigbu pọ remạ ghan mọ yira ko/tue mun oteẹny ḍiigbu phọ ayira ḍughụm? Gbạ. (Psalm 145:14)

¹⁵ Legheri mọ araraạr etue ni eḍighi iyaạr dị kekparanhaạn nyinhạ ophorogh aḍiigbu phọ anạ, kuolọ ipẹ phọ re/mạ ghan mọ nạ ka/tue ateẹny. ABaibul phọ akaạph ni mọ yira kosoman ghan ni iiḅaghamhị mem emhạn mem. Toroboiperolbọ, aBaibul phọ aḅilhẹ ni akaạph agananamhi mọ yira kotue ni oḅetenhu omeerạ, r’olhoghonhaạn aḍighaạgh aZihova. (Bạl Psalm 145:14.) Umor phọ Philip, oghaạph bọ oghol epẹ omhạn, aghaạph ni iyaạr idị egbolhomaam omhoọgh ekol. Odị aḅẹm mọ: “Esi amhị omhoọgh ekol pọ k/onhụ amem mọ mị u/tue bọ uteẹny ḍiigbu phọ amhị. Kparipẹ ghụn, omhoọgh ekol pọ onhụ amem mọ mị aḅilhẹ bọ aru aḅetenhu ophorogh oteẹny aḍiigbu phọ amhị.” ADevid, oghaạph bọ oghol epẹ omhạn, aḅẹm mọ: “Mem dị araraạr rewạ oḍighi idị kikparanhaạn imhị oteẹny aḍiigbu amhị, mị ra/sighẹ ghan mọ araraạr dị rikikima imhị, kuolọ mị ramiịn ghan idiphọ eepoogh oḍeenhaan aZihova idị mị aphomhoghiạn nyodị.” Kụ iḍighi kụ, mem dị nạ aghiọm ni ghisigh aphorogh ghan ḍiigbu phọ anạ etigheri raraạr dị rewạ okikima anạ, pọ nạ raḍeenhaan ghan aZihova mọ nạ rawạ ni oḍighi idị eḅeraạn nyodị. P’eeghe idị olhoghi aZihova kaḅaạl mem dị odị amhiịn dị nạ aghiọm ni ghisigh rakparaghạ oteẹny aḍiigbu phọ anạ!

16. Eeghe kụ edị nạ katue atuughạ esi aḍiigbu dị nạ u/tue uteẹny?

¹⁶ Tuughạ iyaạr esi ipẹ eḍighi bọ kụ nạ u/tue bọ uteẹny ḍiigbu phọ anạ. Kiririom aphogh iyaạr phọ ekọm bọ, kụ apuruan loor mọ, ‘Mị kaḍighi eeghe omhiịn mọ iphẹn phọ i/mite mun?’ (Prov. 27:12) Kuolọ eeni amem, kụ aḍiigbu phọ ekpạr iboom oteẹny pọ reḍeenhaan ghan mọ aḍiigbu phọ epel nyinhạ loor. Eḍighi maạr lọ ekpạr iboom ophorogh oteẹny, pọ kewạ mọ ḅilhẹ akiririom aphogh ḍiigbu phọ anạ omhiịn mọ nạ katue ni aporogh ateẹny.d AZihova ka/sighẹ mọ nạ o/moọgh maạr oḍighinhom loor esi dị nạ orue o/teẹny ḍiigbu dị epel nyinhạ loor.—2 Kọr. 8:12.

17. Eeghe kụ iḍighi kụ yira koseerian bọ ni olhoghi ipẹ yira moḍighi ghan bọ?

¹⁷ Ka/bula ipẹ nạ marue bọ aḍighi ateẹny. ABaibul phọ aḅẹm mọ “Enaạn k/oye, dị kabula oḍighi phọ nyinha eḍighi bọ.” (Hib. 6:10) Esi iduọn phọ, nạ kẹn ka/bulạ ipẹ nạ maḍighi bọ. Gbirima ilọ araraạr phọ ipẹ nạ maḍighi ghan bọ, idiphọ omhoọgh asiya r’aZihova, oghaạph oḅenhị abunhọn ilọ odị, obobọ oḍiiny amuụm. Iduọn nạ maghị bọ ni ghisigh ateẹny siigbu phọ anạ epẹ omhạn, kụ edị nạ katue kẹn ni akị ghisigh aporogh ghan ḍiigbu phọ nạ amhoọgh bọ nyiidiphọ.—Fil. 3:16.

18. Eeghe kụ edị ewạ mọ ku/bula oḍighi ghan iduọn yira rokparaghạ bọ oteẹny aḍiigbu phọ ayira? (Miịn kẹn afoto phọ.)

¹⁸ R’olhoghonhaạn aḍighaạgh aZihova, nạ katue ni ateẹny ḍiigbu phọ anạ, idiphọ okiilhom oghuugh umuụm rasi ghan bọ epẹ odị rakị r’oḅaạl olhoghi. Kuolọ legheri mọ, ibadị abukiilhom oghuugh umuụm rokelhọm ghan kẹn izoghị phọ bidị rozoghị bọ oghị epẹ bidị rokị bọ. Igina phọ kẹn, iduọn nạ aghiọm bọ ghisigh raḍighi ipẹ nạ katue bọ oteẹny aḍiigbu aruwaloor phọ anạ, ka/bulha oghelhọm omhiịn ghan ipẹ aZihova rasẹph bọ kaḅilhẹ alhoghonhaạn nyinhạ ḍighaạgh oteẹny aḍiigbu phọ anạ. (2 Kọr. 4:7) Eḍighi maạr dị nyinhạ i/phẹr, nạ kamoọgh ni ḍisẹph kirokirọ dị epu siphẹ.—Gal. 6:9.