Ariisi oghị omhiịn ophanyanhaạn asipuru Aḍinyạ Ituughạ Ogboku Awiki Phọ
FEBRUARY 4-10
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | ROM 1-3
“Kiọm Ghisigh Atughemhị Ghan Ooruẹn Olhoghi Phọ Anạ”
(Rom 2:14, 15) lilogh phọ aMozis ruuruen phọ i/kpophonom, kụ torobọ amem lọ ologhi abidị aḍigh kụ oḍighi aani itooghị iilogh phọ, ghạlamọ idiphọ bidị iilogh phọ u/legheri bọ ni, bidị omoọgh ni iilogh orolọm. 15 Aroozọ phọ abidị reḍeenaan ghan mọ ogẹ ni siphẹ iloghi phọ abidị ipẹ iilogh phọ etooghị bọ. litughiạn phọ abidị kụ reḍeenaan ghan mọ iphẹn phọ inẹ ni, loor esi dị iloghi phọ abidị eeni amem regurọgh ghan ni bidị eeni amem kephẹl bidị.
lvs 18 ¶6
Ooruẹn Olhoghi Dị Aḅaạl Ghisigh Enaạn
6 Awe dị roo/ḅereghị ghan aJihova bịn olegheri ni raraạr dị oḍighi eeph r’idị enighẹ. ABaibul phọ aḅẹm mọ: “Iloghi phọ abidị eeni amem regurọgh ghan ni bidị eeni amem kephẹl bidị.” (Rom 2:14, 15) Esi omaạm, Ibadị awe olegheri ni mọ oghiigh oye obobọ imhi i/nighẹ. Eeni bidị ko/legheri mọ bidị ronaghanạn ghan ooruẹn ologhi phọ abidị, opọ raḅenị ghan bọ bidị idị eeph r’idị enighẹ dị aJihova alhọgh siphẹ ilhoghi phọ abidị. Bidị oḅilhẹ kẹn ni rodạph ghan sinị iilogh phọ Enaạn, obobọ ikpanạ igey phọ ipẹ aJihova amiteom bọ olhoghonaạn ayira ḍighaạgh osopha ogey osopha.
(Rom 2:15) Aroozọ phọ abidị reḍeenaan ghan mọ ogẹ ni siphẹ iloghi phọ abidị ipẹ iilogh phọ etooghị bọ. litughiạn phọ abidị kụ reḍeenaan ghan mọ iphẹn phọ inẹ ni, loor esi dị iloghi phọ abidị eeni amem regurọgh ghan ni bidị eeni amem kephẹl bidị.
lvs 19-20 ¶8-9
Ooruẹn Olhoghi Dị Aḅaạl Ghisigh Enaạn
8 Abuniin awe ootughiạn mọ onaghanạn ghan ooruẹn olhoghi abidị remạ ghan odaphạn ghan ipẹ bidị ologhoma bọ. Bidị rootughiạn ghan mọ bidị kotue ni oḍighi torobọ ilọ eḅeraạn bidị eḍighi maạr lọ bidị olhoghoma m’enighẹ ni. Kuolọ ipẹ phọ ketue ni ebi, idị eḍighi bọ yira u/munughan. Ipẹ yira olhoghoma bọ ketue ni ekpạr iboom dị ketue ni etir ooruẹn olhoghi ph’ayira. ABaibul phọ aḅẹm mọ: “Ekpom mọ eḍighi iyaạr iikeleghian epu torobọ iyaạr, kụ ekpạr ophamaghạn. Anhiạn kụ katue bọ apamaghạn?” (Jeremiah 17:9) Esi iduọn phọ, eeni amem yira kotue ni omiịn iyaạr m’enighẹ ghalamọ i/nighẹ ni. Esi omaạm, kụ aPọl agbi bọ oḍighi onyọ aKristẹn, odị agbiphoghọm ghan we phọ Enaạn igey, kụ alhoghoma m’ipẹ odị raḍighi bọ igey ni. Odị aatughiạn ghan mọ, ooruẹn olhoghi odị aḅaạl li. Kụ onyebel roten odị aḅẹm mọ: “Omoọgh-we phọ kụ alegheri akeeI r’apum.” (1 Korịnt 4:4; Iiḍighi 23:1; 2 Timoti 1:3) Mem mọ aPọl alhegheri bọ ipẹ aJihova amiịn bọ iiḍighi ph’odị, odị amhiịn mọ ewạ ni dị odị k’anmia. Eten dị eegholaan, tutụ yira koḍighi iyaạr, ewạ ni mọ opuruan loor mọ; ‘aJihova rawạ mọ mị uḍighi eeghe?’
9 Mem dị nạ aphomhoghiạn oye, nạ k/awạ oḍighi idị kepin esi odị. Loor esi dị yira opomoghiạn aJihova, yira k/owạ oḍighi iyaạr dị kepin esi odị. Oghiilaan phọ ayira oḍighi idị k/epin esi aJihova ewạ ni mọ akpạr. Yira umhiịn iphẹn siphẹ eḍeenhaan phọ aNehemaya. Odị o/meera osighẹ adọl phọ odị idiphọ otooghiạ omhooghọm eelạ. Eeghe kụ iḍighi? Odị aḅẹm mọ “loor esi oghiilaan Enaạn.” (Nehemiah 5:15) ANehemiah o/wạ oḍighi r’iyaạr dị kepin esi aJihova. Idiphọ aNehemaya, yira phọ kẹn rokiilaan ghan oḍighi iyaạr dị kepin esi aJihova. Yira kotue ni otuughạ olegheri ipẹ eḅeraạn bọ aJihova esi aạl ghan aBaibul phọ.
Oguphogh Owạ Imạ Araraạr Dị Edi Siphẹ ABaibul Phọ
(Rom 3:4) K/idiphọ. Ghalamọ idiphọ oomo awe oḍighi bọ ni bugbaạm okpẹ phọ, ilegheri mọ Enaạn re/gbạ ghan okpẹ. ldiphọ ogẹ bọ siphẹ aḍinyạ iigbia phọ mọ, “Ekpẹ ni dị awe komiịn ghan mọ nạ ra/bi ghan ruguan phọ anạ. Ekpẹ ni dị kegheel ghan nyinạ mem lọ osiph nyinạ ologh.”
w08 6/15 30 ¶5
Oghaạph Ookaragh dị Osighẹ Siphẹ Aḍinyạ phọ Ogẹ Bọ Oghiọm we ARom
3:4. Mem dị awe oghaạph idị egbạgh ipẹ Enaạn eghaạph bọ siphẹ Ekpo-onhụ ph’odị, ewạ dị yira koḍeenhaan “mọ Enaạn re/gbạ ghan okpẹ” esi oḍuom ologhi dom aBaibul phọ kụ ozọ ghan idị emoọgh muḅọph r’ogbi phọ Enaạn. Esi ophinom ghan abin r’oophugh oḍighi igbeelom ilọ Omhạr phọ, r’oḍighi oḍighi awe bumatuạn phọ, yira kotue ni ologhonaạn ḍighaạgh bunhọn omhiịn mọ Enaạn re/gbạ ghan okpẹ.
(Rom 3:24, 25) Kụ Enaạn engọ ni onmạ ighirigiir phọ odị oopho, etuạn Jizọs Kraist phọ atagharạn bọ bidị, esighenọm mọ bidị awe aruukuan ni. 25 Enaạn imiteom Kraist obalele mọ iḅaạl phọ odị egbuurogh ghelhẹ phọ onọ eḍighi dị buphẹ omeeraam bọ komoọgh osạr owilenaạn. Enaạn iḍighi iphẹn phọ ilọ oḍeenaan aruukuan phọ odị. Gediidi phọ odị akparạm ni aphogh ghan ikarạph lọ awe oḍighi bịn aḅoorian.
w08 6/15 29 ¶6
Oghaạph Ookaragh dị Osighẹ Siphẹ Aḍinyạ phọ Ogẹ Bọ Oghiọm we aRom
3:24, 25—Ika kụ idị ekiạ etagharạn phọ aJizọs Kraist erue ekpẹ iikpiạ dị eekpereghi aani “ikarạph lọ awe oḍighi” gediidi phọ? Iḅẹl imiịn ilọ aMesaya phọ ogẹ bọ pạ Genesis 3:15, imhunhughan 33 C.E. mem mọ oghiigh bọ Jizọs pạ oreeny iminimiịn phọ. (Gal. 3:13, 16) Toroboiperolbọ, mem mem mọ aJihova aḅạ bọ ikpo-onhụ phọ ipẹ phọ, ighịgh mudị mokpẹ etagharạn phọ odaphạn eten phọ epẹ odị rapogh ghan bọ raraạr, loor esi dị iyaạr ke/tue esophoghom Enaạn omhunhenhi arigbiom m’odị. Loor esi ekiạ phọ epẹ aJizọs Kraist kapighirọn bọ ghisigh, aJihova katue ni asạr abilhenhaạn ikarạph anmụny Adạm lọ omhoọgh omheeraam oghị esi oguanaan phọ opọ phọ. Ekiạ etagharạn phọ eḅilẹ kẹn eḍighi idị koḅeton aani buẹn omuughu bọ kụ egbi oteẹny orụgh aKristẹn phọ.—Iiḍighi 24:15.
Ibạl ABaibul
(Rom 1:1-17) Mị aPọl onyọ oḍighi phọ aJizọs Kraist Enaạn esaḅạr bọ emạgh mọ aḍighi otelhedom aghaạph ghan ooḅi oghaạph phọ kụ ugẹ bọ ḍinyạ phọ aḍiẹn riruomaan inyina. 2 Enaạn iguanaan ni ooḅi oghaạph phọ, eḅenị riil phọ odị k’aḍiodiidi mọ ogbeelom. Ogẹ kẹn ni siphẹ aḍinyạ iigbia phọ ilọ oguan phọ ophọn. 3 Iphẹn phọ ekpulughiọm Jizọs Kraist Oọny phọ odị, Omoọgh-we phọ ayira. Siẹn eye phọ, umạr ri nyodị k’eemarạ aDevid. 4 Esi aroozọ aruukuan phọ, idiphọ Enaạn esighẹ bọ iboom iikpọ kụ eḅetenom bọ nyodị siphẹ aḍuugh phọ eḍeenaan mọ odị kụ Oọny phọ onọ ni. 5 Enaạn ituạn nyodị kụ inmạ bọ imị ighirigiir mọ mị uḍighi otelhedom aKraist pidị okomọm we oomo areelhe phọ omeeraam aani oḅilẹ onaghanạn. 6 Nyina phọ abuphẹ Enaạn memạgh bọ epẹ Rom eḍighi buọ aJizọs Kraist eḍighom aani ni. 7 Kụ mị agẹ ratuomaan oomo phọ anyina abuphẹ Enaạn ephomoghiạn bọ kụ memạgh bọ eḍighi buọ odị epẹ Rom. Aḍisẹph r’eephọ k’Enaạn Odẹ phọ r’aJizọs Kraist Omoọgh-we phọ irolonaạn inyina! 8 Emiighom mọ, mị akol Jizọs Kraist rasephenaạn oomo phọ anyina Enaạn phọ amị, idị eḍighi bọ odụ omeeraam mọ anyina maaleghaan oomo aḅirini phọ. 9 Enaạn phọ mị asighẹ bọ oomo ologhi raḍighinaan oḍighi oghaạph ghan ooḅi oghaạph ilọ Oọny phọ odị, elegheri ni mọ iphẹn mị rakaạph bọ igey ni, mọ mị ra/soph ghan mem oghol anyina 10 torobọ amem lọ mị raaḅereghị. Mị ralọm ghan mọ Enaạn emeera ni mọ egi phọ ephẹn ke/goronaan mun oru oteẹny anyina. 11 Edi ni ologhi amị iboom omiịn anyina, obọ mị aḍighi dị nyina kemoọgh aani ḍisẹph phọ Enaạn, ekparamiọm ruwaloor phọ anyina. 12 Emụ oghaạph phọ amị iduọn mọ omeeraam mọ amị r’opọ anyina kaloghonaạn ni ḍighaạgh oomo phọ ayira. 13 Buọ asiya, ikiọm ologhi mọ ibadị amem mị magbiighi ni oru, kụ iyaạr regbororian ghan ni. Mị rawạ aani ni we oḅaranaạn aKraist siphẹ ogbo phọ anyina, idiphọ mị mamoọgh bọ ogbo abuerị phọ aruuruen phọ. 14 Mị ale omụgh oḍighi oḍighi phọ ongọ oomo awe, m’abuọ aGris r’abuọ areelhe dị eḅula omạn, m’abulọ omaạr ḍinyạ r’abulọ ḍinyạ u/maạr 15 Esi iduọn phọ, mị amị, aloor amị repiigha ni oghaạph ooḅi oghaạph phọ oḅenị aani anyina phọ edi bọ epẹ Rom. 16 Mị ooḅi oghaạph phọ ra/kiilom umugholoor. Enaạn retuạn ghan iikpọ ooḅi oghaạph phọ kụ kephẹl oomo abuphẹ omeeraam bọ, emiigh k’abuọ aJu phọ kụ eteẹny ruuruen phọ. 17 Ooḅi oghaạph phọ kụ raḍeenaan ghan mọ Enaạn retuạn ghan omeeraam dị omạn u/pogh kụ kesighẹ buphẹ omeeraam bọ mọ abuọ aruukuan ni. ldiphọ aḍinyạ iigbia phọ eḅẹm bọ mọ, “Oye dị Enaạn metuạn omeeraam kụ esighenọm mọ oye aruukuan ni kamoọgh ni ghuḍum.”
FEBRUARY 11-17
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | ROM 4-6
“Enaạn Iḍeenhaan Iyira Odọ Ephomhoghiạn Phọ Odị”
(Rom 5:8) Kụ idiphọ aKraist ughol bọ ni iyira aphiemi ghuḍum mọ odị k’amem dị yira odi ni ekụ ikarạph kụ iḍeenaan bọ odọ ephomoghiạn phọ Enaạn iphomoghiạn bọ iyira.
(Rom 5:12) Oniin oye kụ aphạm bọ ikarạph phọ arumom siẹn aḅirini phọ, kụ ikarạph phọ odị iphamạm ni ḍuugh. Kụ aḍuugh phọ metuạn bọ ikarạph phọ odị eetura oomo aḅirini phọ dị oomo awe moḍighi aani ikarạph—.
w11 6/15 12 ¶5
Enaạn Iḍeenhaan Iyira Ephomhoghiạn Phọ Odị
5 APọl amạ amiteom iyaạr phọ, esi omiighom ephigh phọ ephẹn mọ: “Oniin oye kụ aphạm bọ ikarạph phọ arumom siẹn aḅirini phọ, kụ ikarạph phọ odị iphamạm ni ḍuugh. Kụ aḍuugh phọ metuạn bọ ikarạph phọ odị eetura oomo aḅirini phọ dị oomo awe moḍighi aani ikarạph.” (Rom 5:12) Yira omoọgh ni eepoogh onaghanạn iphẹn phọ loor esi dị Enaạn emoọgh ni igẹ dị eghaạph ipẹ aghuḍum oye amiigh bọ. AJihova alhẹm iyạl awe, Adạm r’Iv. Olemiạ phọ amunughan ni, iduọn kẹn kụ idị oḅẹl odẹ r’onhiin phọ ayira omunughan. Enaạn igbiemi bidị eniin iyaạr, kụ aḅenhị mọ eḍighi maạr lọ bidị opel iiḅakiọm mọ ipẹ phọ pọ kekọm ooruẹn aḍuugh engọ bidị. (Gen. 2:17) Toroboiperolbọ, bidị usaḅạr ozọ ilọ amuphe, bịn okạ iiḅakiọm osụ ologhi phọ Enaạn, esi iduọn phọ bidị ughel nyodị idiphọ Ongoọm iilogh r’Uw-emoọgh itooghị.—Deut. 32:4, 5.
(Rom 5:13, 14) Ikarạph irọl li aḅirini phọ kụ aMozis agbi bọ ongọ iiIogh phọ. Kụ esi Iọ iilogh i/lo, ro/soroghu ghan iilogh. 14 Emiigh orụgh Adạm kụ eteẹny orụgh aMozis, aḍuugh ikpobiom ni oomo awe, ghaIamọ r’abuphẹ ikarạph phọ abidị i/kịgh aani bọ idiphọ ipẹ Adạm mọ akạ bọ itooghị phọ Enaạn. Adạm kụ oogho oye phọ opọ katu bọ.
w11 6/15 12 ¶6
Enaạn Iḍeenhaan Iyira Ephomhoghiạn Phọ Odị
6 Adạm maḍighi ikarạph phọ kụ agbi omiigh emariạ, kụ asighẹ ikarạph r’iikpiạ phọ ateneghi oomo phọ abidị. Anmụny phọ Adạm k/okạ olhogh Enaạn idiphọ Adạm, esi iduọn phọ u/siph aani bidị oniin phọ olhogh phọ Adạm asoor bọ; obobọ u/ngọ bidị olhogh odaphạn mem mọ opọ phọ. (Gen. 2:17) Ghalamọ r’iduọn phọ ni, anmụny phọ Adạm ole ni erua ikarạph. Esi iduọn phọ, ikarạph r’aḍuugh ikpobiom ni oomo awe tutụ k’amem mọ opọ Enaạn engọ bọ Izrạl olhogh phọ, ipẹ phọ ekạr bọ eḍeenhaan mọ bidị abuḍighinom ikarạph (Bạl Rom 5:13, 14.) Eghạ ikarạph phọ olhe bọ erua phọ kosighẹ omaaniọm idiphọ ezẹgh obobọ eghạ dị omarạm oye, idiphọ ezẹgh dị oye phọ aḍighima iyaạr esi iḅaạl phọ re/soph ghan. Eeni nạ managhạn ghan ni mọ Alexis, oọny Czar Nicholas II olọ aRussia r’Alexandra, umarạm ezẹgh phọ ephẹn phọ iḅaạl phọ re/soph ghan bọ. Ii, ghalamọ isiphẹ arughun otu phọ iphẹn phọ bịn abuniin ibạm anmụny phọ r/omiinọm aani ghan ezẹgh phọ, kuolọ edi ni pạ aloor phọ. I/lo aani idiphọ r’ikarạph. Eghạ ikarạph phọ olhe bọ erua ḍighaạgh Adạm ko/tue okpetenaan. Oomo awe omeel li oḍighanaan. Eḍighi elọ aḍuugh aḍuugh. Kụ m’oteneghi oomo ibạm anmụny phọ. Kotue ni okpetenaan iiḅaghamị phọ iphẹn phọ ḍughụm?
(Rom 5:18) Esi okpere, idiphọ oniin opiomạn kụ akọm bọ erugh apum mọ aseenaan oomo awe kụ idị eniin eḍighinom iyaạr dị eekuan kesighẹ ni akeeI r’aghuḍum etuomaan oomo awe.
(Rom 5:21) Loor iphẹn phọ, idiphọ ikarạph esighẹ bọ ḍuugh phọ kụ edaạm kụ idị onmạ ighirigiir phọ Enaạn rasighẹ ghan ruukuan kụ kadaạm, aḅiIẹ atuạn Jizọs Kraist Omoọgh-we phọ ayira urorori iyira asiemi ghuḍum k’agee-pọ.
w11 6/15 13 ¶9-10
Enaạn Iḍeenhaan Iyira Ephomhoghiạn Phọ Odị
9 Eeghe kụ onaghanạn aḍughụm ikpo onhụ aGrik phọ ogbạ bọ mọ “kesighẹ ni akeeI” ḅilẹ “ogbeelom abidị idiphọ abuọ elhiom eḍighinhom iyaạr”? Oniin odị ragbạ ghan Baibul phọ agẹ iduọn ilọ aḍiitughiạn phọ aḍiẹn mọ: “eḍighi osighẹ otomaạm iyaạr dị edaphạn ologh dị u/kạr u/moọgh iikpọ. Re/kaạph ghan ilọ onmia oye ologhi phọ, kuolọ rekaạph ghan ilọ onmia odọl oye phọ r’Enaạn . . . Iyaạr phọ otomaạm bọ eḍeenhaan Enaạn idiphọ oogboom iiruẹn dị masopha oghaạph idị kenighenaạn nyopọ phọ osighẹ bọ oru siphẹ otu iiruẹn phọ Odị r’ologh asipioghọm dị osiph. Bịn kụ Enaạn ewilenaạn idiphọ bịn.”
10 Aloor Emhụ eeghe kụ edị “Oogboom iiruẹn oomo isiẹn ade” phọ aḍighi bọ oye elhiom eḍighinom iyaạr, awilenaạn bọ oye asipioghọm mọ? (Gen. 18:25) Omiighom, loor esi ephomhoghiạn Enaạn irom ni ogina-oọny phọ odị oru isiẹn ade phọ. AJizọs aḍighi ni ogbi Odẹ phọ odị akuamị, etigheri odẹgh ophogh kirokirọ, igbagarạ arigilaạm, r’aroofola. Odị aphamanạm ni dọl aruukuan ph’odị tutụ amugh loor oreeny iminimiịn. (Hib. 2:10) Esi osighẹ aghuḍum m’odị amunughan bọ ophighironhọm ekiạ, aJizọs angọ etagharạn dị ketue epẹl, obobọ eekpọ nmụny phọ Adạm esighẹ esi ikarạph r’aḍuugh.—Mat. 20:28; Rom. 5:6-8.
Oguphogh Owạ Imạ Araraạr Dị Edi Siphẹ ABaibul Phọ
(Rom 6:3-5) Nyina i/Iegheri ḍughụm, mọ oomo phọ ayira [“oḍiiny bọ muụm” NW ] mọ oḅophoghạn Jizọs Kraist, oḅarạm aani ni oḅophoghạn omugh aḍuugh phọ odị? 4 Mem mọ [“uḍiinye” NW ] bọ iyira muụm mọ, yira uphin aani ni bin aḍuugh phọ aKraist kụ oreIhean nyodị oḍigh aani oḍi phọ odị, obọ yira otuạn idiphọ iikpọ eghuan Odẹ phọ eḅeton bọ Kraist siphẹ aḍuugh phọ omoọgh aani kumoom aghuḍum. 5 Kụ idiphọ yira moḅophoghạn bọ nyodị omugh aani ḍuugh dị eghịgh ḍiphẹ odị, yira koḅophoghạn kẹn ni r’odị oḅerenu aani eḅetenuom dị eghịgh nyepẹ odị.
w08 6/15 29 ¶7
Oghaạph Ookaragh dị Osighẹ Siphẹ Aḍinyạ phọ Ogẹ Bọ Oghiọm we aRom
6:3-5—Remạ ghan eeghe oḅophoghạn aJizọs Kraist oḍiiny amuụm r’oḅophoghạn omugh aḍuugh phọ odị? Mem mọ aJihova asagharạn bọ bumatuạn phọ aKraist uwaloor iigbia phọ, bidị uḅophoghạn r’aJizọs bịn oḍighi buọ ookpomoghan phọ, eḍighi bọ loor phọ aKraist, iduọn odị kụ aḍighi bọ Uw-emụ. (1 Kọr 12:12, 13, 27; Kọl 1:18) Ophọn kụ oḅophoghạn aJizọs Kraist oḍiiny amuụm mọ abidị. AKristẹn phọ abuphẹ osagharạn bọ uwaloor phọ oḅilhẹ kẹn “oḅophoghạn [Kraist] omugh” loor esi dị bidị odi dọl osighẹ aghuḍum ophighironhọm ekiạ, kụ oḍuom ologhi abidị o/lo mun orọl isiẹn ade phọ k’agee-pọ. Aḍuugh phọ abidị esi iduọn phọ, eḍighi ḍiọ ophighironhọm ekiạ idiphọ aḍiẹn aJizọs, kuolọ i/ḍighi ḍiọ etagharạn. Aḍuugh phọ bidị oḅophoghạn bọ Kraist omugh kemunughan mem dị bidị omuughu kụ oḅerion ongọ ghuḍum epẹ k’akẹ.
(Rom 6:7) Oye phọ romugh bịn makpetenaan iikpọ phọ ikarạph emoọgh bọ.
w14 6/1 11 ¶1
Eeghe Oḍuom Ologhi kụ Odianaan Burudẹ Aburudẹ phọ Amhị?
Mem dị koḅerion bọ buọ ekeeny eḍighinom iyaạr phọ, kodạph ni igbaany iiḍighi phọ abidị kụ osophonaan bidị ooruẹn ḍughụm? Eeye. ARom 6:7 eḅẹm mọ: “Oye phọ romugh bịn makpetenaan iikpọ phọ ikarạph emoọgh bọ.” Esi aḍuugh phọ abidị abuọ ekeeny iḍighinom araraạr phọ mokpẹ ikarạph phọ abidị. Esị iduọn phọ, ooruẹn phọ abidị kadaphạn esi ipẹ bidị koḍighi bọ mem mọ koḅeton bọ bidị siphẹ aḍuugh phọ, k/odaphạn ipẹ bidị oḍighi ghan bọ r’adọl e/legheri kụ ogbi bọ omugh phọ. Ika kụ idị bidị komooghọm suọ?
Ibạl ABaibul
(Rom 4:1-15) Yira kokaạph eeghe ilọ Ebraham, ogbogh odẹ phọ ayira siẹn ade awe phọ? 2 Mọ Enaạn ighol iiḍighi phọ odị kụ esighenọm bọ mọ odị oye aruukuan, obọ odị mumoọgh ni iyaạr ootumaam. Kụ ghisigh Enaạn Ebraham o/moọgh iyaạr dị emanạm ootumaam. 3 Aḍinyạ iigbia eḅẹm mọ, “Ebraham ameeraam ni Enaạn kụ Enaạn etuạn omeeraam mọ odị kụ esighẹ nyodị mọ oye aruukuan ni.” 4 Oḍighinom oḍighi rale ghan ni ikpoki. Ikpoki dị esi ni nyodị ole, k/aruunmo. 5 Opọ u/ḍuom bọ ologhi mọ iiḍighi kụ kepẹl nyinọ phọ kụ ameeraam ni nyopọ rabilenaạn ghan bọ bulọ oḍighi ikarạph, Enaạn kebalạm omeeraam mọ odị kụ esighẹ mọ odị oye aruukuan ni. 6 Ephẹn kụ emụ oghaạph phọ aDevid aghaạph bọ ilọ ibo oye phọ opọ Enaạn i/tuạn bọ iiḍighi kụ aalạm bọ mọ oye aruukuan ni: 7 “lbo k’Enaạn edianaan ni buphẹ dị mawilenaạn bọ sipioghọm mọ abidị, ḅilẹ r’abuphẹ dị maakpereghi bọ ikarạph phọ abidi 8 lbo edianaan ni oye phọ opọ Omoọgh-we phọ ikarạph phọ odị ka/balạm bọ.” 9 lbo phọ iphẹn aDevid aghaạph bọ aghol ilọ abuphẹ moḍuna bọ bịn ḍughụm? Eeye. Buphẹ odimom bọ oodu phọ omoọgh aani ni. Tọ, yoor momạ ni esi aḍinyạ iigbia phọ dị eḅẹm mọ, “Ebraham ameeraam ni Enaạn kụ Enaạn etuạn omeeraam mọ odị kụ esighẹ nyodị mọ oye aruukuan ni.” 10 lphẹn phọ imite pụr amem? lmite mem dị moḍun Ebraham ḍughụm? lmite mem dị odị odimom oodu. 11 U/nuụn uḍun nyodị. Oḍuna phọ Ebraham aḍighi elegh oḍeenaan mọ Enaạn ituạn omeeraam mọ odị kụ esighẹ bọ mọ odị oye aruukuan ni, mem dị odị odimom oodu. Loor iphẹn phọ Ebraham kụ odẹ oomo abuphẹ omeeraam bọ kụ Enaạn mesighẹ bọ mọ awe aruukuan ni phọ, ghalamọ idiphọ bidị odimom bọ ni oodu phọ. 12 Odị phọ kẹn kụ odẹ abuphẹ moḍuna yogh bọ, o/tuạn mọ bidị oḍuna yogh phọ bịn, atuạn ghụn dị bidị otuụgh odi aani dọl omeeraam mọ Ebraham ogbogh odẹ phọ ayira arọl bọ kụ agbi bọ osopha oodu phọ.13 Enaạn iguanaan ni Ebraham r’eemarạ phọ odị mọ bidị komoọgh aḅirini phọ. Oguanaan bọ oguan phọ ophọn u/tuạn idị Ebraham aako ghan iilogh phọ. Enaạn ikọm esi omeeraam mọ kụ esighẹ bọ nyodị mọ oye aruukuan phọ. 14 Eḍighi iyaạr dị buphẹ rooko ghan bọ iilogh phọ kụ komoọgh ipẹ Enaạn eguanaan bọ, omeeraam mọ oye eepua ni bịn, ḅilẹ oguan phọ Enaạn oopho ni. 15 lilogh phọ rekọm ghan ghelhẹ phọ Enaạn keseere, kụ esi lọ iilogh i/lo, osoroghu iilogh ra/tọl ghan.
FEBRUARY 18-24
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | ROM 7-8
“Nạ Akim Ni Owol Rakori Ghan?”
(Rom 8:19) Oomo araraạr phọ oIẹm bọ ekim ni owol rekori ghan mem mọ Enaạn kegananami bọ nmụny phọ odị.
w12 7/15 11 ¶17
Meera AJihova Arorori Nyinhạ Aghị Angọ Egey Eereẹgh
17 Rakaạph bọ ilọ eereẹgh phọ epẹ aJihova aseenaan bọ rebenẹ phọ odị siẹn ade phọ, aPọl agẹ mọ: “Oomo araraạr phọ oIẹm bọ ekim ni owol rekori ghan mem mọ Enaạn kegananami bọ nmụny phọ odị.” Kụ aḅilhẹ apumom mọ: “eniin aḍio komiteom ni oomo araraạr phọ oIẹm bọ siphẹ adọI arebenẹ phọ bịn ko/mugh mun oḅọr, kụ bidị opin aani bin eegu phọ Enaạn idiphọ anmụny odị dị mokpetenaan.” (Rom. 8:19-21) “Oomo araraạr phọ olẹm bọ” remạ ghan omhạr awe phọ abuẹn omoọgh bọ oḍuom ologhi orọl isiẹn ade phọ, buphẹ komooghọm bọ suọ mem mọ Enaạn “kegananami” bọ nmụny phọ Odị osagharạn bọ uwaloor phọ. Ogananami phọ ophọn phọ kamiigh mem dị “anmụny” phọ abuẹn koḅerion bọ oḍighi ruwaloor, oḍighan r’aKraist ogbuurogh ikarạph osighẹ siẹn ade phọ kụ ooko oseere “siadạm awe” siphẹ emoom eghimoghọm araraạr phọ.—Ogan. 7:9, 14.
(Rom 8:20) Idị eḍighi bọ uronyon ni mọ oomo phọ abidị u/moọgh iyaạr oḍighinom. Iphẹn phọ kụ i/ḅeraạn bidị, itooghị Enaạn. Kụ oḍuom oIoghi phọ ophọn arọI Ii mọ
w12 3/15 23 ¶11
Omhoọgh Ibo Loor Oḍuom Olhoghi phọ Ayira
11 “Oḍuom oIoghi phọ ophọn” aJihova kụ angọ omhạr awe mem mọ odị aguanaan bọ otagharạn abidị osighẹ ḍighaạgh “egbaany ekarạph iyaạr phọ,” oghol bọ mọ Eru ḅilhẹ r’aSetan, dị eego esi “eemuma” phọ oguanaan bọ. (Ogan. 12:9; Gen. 3:15) Oḅẹl apakirị “Eemuma” phọ epẹ phọ pọ aJizọs Kraist. (Gal. 3:16) Dị eego esi aḍuugh r’oḅeton phọ odị, aJizọs amiteom iphighiom dị ekpạr, ilọ oḍuom ologhi phọ omhạr awe omoọgh bọ dị kotagharạn bidị osighẹ esi oḍighi ebenẹ ongọ ikarạph r’aḍuugh. Omunughan oḍuom ologhi phọ ophọn phọ emoọgh muḅọph r’ipẹ “Enaạn kegananami bọ nmụny phọ odị.” Abuẹn osagharạn bọ uwaloor phọ, moghueni bọ, kụ apakirị “eemuma” phọ emuneniom bọ iyạl. ‘Kogananami’ bidị mem dị bidị kopinom aani bin r’aKraist ophiemi ekarạph eghimoghọm araraạr phọ aSetan. (Ogan. 2:26, 27) Iphẹn phọ kesighẹ pelieẹny kụ etuomaan ḍierị phọ aḍita iyool phọ kokpetenaan bọ igbogh iiḅaghamị phọ.—Ogan. 7:9, 10, 14.
(Rom 8:21) Eniin aḍio komiteom ni oomo araraạr phọ oIẹm bọ siphẹ adọI arebenẹ phọ bịn ko/mugh mun oḅọr, kụ bidị opin aani bin eegu phọ Enaạn idiphọ anmụny odị dị mokpetenaan.
w12 3/15 23 ¶12
Omhoọgh Ibo Loor Oḍuom Olhoghi phọ Ayira
12 Eeghe etagharạn kụ ketolonaạn “oomo araraạr phọ olẹm bọ” mem Itooghị Oonịr Asiạ phọ aKraist! Mem mọ amuphẹ phọ, ‘anmụny phọ Enaạn’ abuphẹ moghueni bọ kokạr ri ‘ogananami’ mem mọ bidị koḍighi bọ bupinyọn rikiạ r’aKraist, ongọ asuọ ekiạ etagharạn phọ aJizọs omhạr awe. Idiphọ abudị odi eeḍiạn Omhạr k’akẹ phọ, “oomo araraạr phọ olẹm bọ” kemiigh ni olhoghoma etagharạn esi ikarạph r’aḍuugh. Omhạr awe phọ abuẹn onaghanạn bọ Enaạn enụm enụm bịn kotagharạn ni “siphẹ adọI arebenẹ phọ bịn ko/mugh mun oḅọr.” Eḍighi maạr dị bidị ophamanạm ni dọl dị ekpẹ oḍuom ologhi esi aJihova siphẹ Oonịr asiạ phọ, r’odẹgh ophogh phọ asughanam bọ omạn phọ kadaphạn bọ, pọ kogeeghị siḍien abidị dị ko/gbuurogh mun pạ “aḍinyạ abuphẹ odi bọ.” Kụ bidị oḍigh aani “eegu phọ Enaạn idiphọ anmụny odị dị mokpetenaan.” (Ogan. 20:7, 8, 11, 12) P’eeghe imạ oḍuom ologhi eghuan!
Oguphogh Owạ Imạ Araraạr Dị Edi Siphẹ ABaibul Phọ
(Rom 8:6) Aḍuugh edianaan ni buphẹ ikarạph aruuphuạ bịn kụ edi ghan bọ iIoghi phọ abidị. Aghuḍum r‘eephọ edianaan ni buphẹ ipẹ eḅeraạn bọ Uwaloor Iigbia phọ kụ edi ghan bọ iloghi phọ abidi.
w17.06 3
Nạ Aatughiạn Ni?
Eeghe kụ ogbaranaạn abuẹn “ikarạph bịn kụ edi ghan bọ iloghi phọ” r’abuẹn “ipẹ eḅeraạn bọ Uwaloor Iigbia phọ kụ edi ghan bọ iloghi phọ abidị”? (Rom. 8:6)
Abuẹn ikarạph phọ bịn kụ edi ghan bọ iloghi phọ, oomo amem rogbon ghan ruuphuạ iphulupul phọ abidị i/munughan bọ, rogbor ghan koghaạph oḅilhẹ oghueni raraạr iphulupul phọ. Kụ opọ raḍighi ghan bọ ipẹ eḅeraạn bọ uwaloor phọ, ragbon ghan ghuḍum mọ ilọ araraạr r’iitughiạn Enaạn, onyọ aKristẹn dị arọl iduọn phọ uwaloor iigbia phọ kụ raḍiemiom ghan. Ilọ iphulupul phọ etorori rengọ ḍuugh, ipẹ uwaloor phọ etorori rengọ ghuḍum r’eephọ.—w16.12, pp. 15-17.
(Rom 8:26, 27) Igina phọ kẹn kụ idị UwaIoor phọ ratu ghan kaIoghonaạn ḍighaạgh okparamị oodugha omeeraam mọ ayira. R’iIọ ooḅereghị ghan bịn yira u/kạr uIegheri. UwaIoor phọ r’aIoor odị kụ rakụph ghan ikụph dị anem ke/tue ekaạph kụ kugbaanaạn iyira ghisigh Enaạn. 27 Enaạn phọ reeḅeghiọn ghan bọ iIoghi phọ awe kephogh eIegheri ni ipẹ edi bọ oIoghi UwaIoor phọ, idị eḍighi bọ UwaIoor phọ asighẹ ni iitughiạn phọ Enaạn kụ ragbạ ghan bọ ophelọm awe phọ Enaạn.
w09 11/15 7 ¶20
Iiḅereghị Phọ Anạ Eḍeenhaan Eeghe Ilọ Anạ?
20 Eeni amem, yira ro/legheri ghan iyaạr oghaạph siphẹ iiḅereghị phọ ayira. “R’iIọ ooḅereghị ghan bịn yira u/kạr uIegheri.” iphẹn kụ idị aPọl aghaạph, “UwaIoor phọ r’aIoor odị kụ rakụph ghan ikụph dị anem ke/tue ekaạph. Enaạn phọ reeḅeghiọn ghan bọ iIoghi phọ awe kephogh eIegheri ni ipẹ edi bọ oIoghi UwaIoor phọ.” (Rom. 8:26, 27) AJihova aḍighi ni idị ogẹ ibadị iiḅereghị siphẹ aBaibul phọ. Odị amiịn iiḅereghị phọ ipẹ odị aphum bọ kụ ogẹ idiphọ ilọm dị yira kolọm aani ni nyodị, kụ raḍighi ghan k’ungọ iyira, ghalamọ ramem dị yira ko/lhọm ni. Enaạn ulegheri ni iyira r’emhụ araraạr phọ ipẹ odị aḍighi bọ idị uwaloor iigbia phọ aghaạph dị eego esi abugeọm aBaibul phọ. AJihova rapagharanaạn ghan ni ilọm mọ ayira mem dị uwaloor phọ “ugbaanaạn” iyira. Kuolọ iduọn yira oru bọ okuamị olegheri Ekpo-onhụ phọ Enaạn, bịn ipẹ yira kooḅereghị bọ retu ghan ni siphẹ iloghi phọ ayira.
Ibạl ABaibul
(Rom 7:13-25) Kụ ekịgh mudị ipẹ enighẹ bọ kụ ikọm bọ ḍuugh phọ amị eseere ḍughụm? K/idiphọ. Ikarạph kụ ikọm bọ. Ikarạph isighẹ ipẹ enighẹ bọ kụ ekomọm bọ ḍuugh phọ iruom imị, obọ eganana omiịn omạn iyaạr dị ikarạph eru. Esi ikaIạ iiIogh phọ, ikarạph dị iIọ omaạm i/Io meeweleghiạn Ioor. 14 Yira olegheri ni mọ iilogh phọ iIọ UwaIoor, kụ minạ oopho iḅaạl r’iphuIupuI dị osighẹ idiphọ ebenẹ aala ikarạph. 15 Mị u/Iegheri emụ iIọ mị raḍighi, idị eḍighi bọ mị ra/ḍighi ghan ipẹ iḅeraạn bọ imị oḍighi phọ. Mị raḍighi ghan ghụn ipẹ ikia bọ imị. 16 Mị aḍighi ipẹ mị u/wạ bọ oḍighi phọ, ekasiạn ghụn ni bịn egbaanyạn mọ mị ameeraam ni mọ iiIogh phọ enighẹ ni. 17 Iduọn phọ, mị kụ ra/kạr ghan bọ kaḍighi iphẹn phọ, ikarạph phọ ghụn erugh bọ Ioor phọ amị kụ reḍighi ghan bọ iphẹn phọ. 18 Mị aIegheri ni mọ igey Ioor amị i/tugh, mị uḅẹm ghụn mọ siẹn igbaany aroozọ phọ amị. Obọ riphụ ghan ni imị oḍighi ghan igey, kụ mị ra/tue ghan bọ kaḍighi. 19 Mị ra/ḍighi ghan igey phọ mị rawạ ghan bọ oḍighi phọ. Mị raḍighi ghan ghụn ikarạph phọ mị ra/wạ ghan ḅo oḍighi phọ. 20 Mọ mị aḍighi ipẹ mị u/wạ bọ oḍighi phọ, pọ mị kụ ra/ḍighi ghan bọ, ikarạph phọ erugh bọ loor phọ amị ghụn kụ reḍighi ghan bọ. 21 Mị mawạ amiịn iIọ oIogh phọ ophọn phọ mọ mem lọ mị rawạ oḍighi igey, ikarạph ghụn kụ retu ghan kegbororian. 22 IiIogh phọ Enaạn eḅeraạn ni iitughiạn phọ ami. 23 Kụ mị aḅiIẹ ramiịn ghan onọn ologh dị ragir siphẹ aIoor phọ amị, ologh dị amooghọm iikpaIaghiạn r’opọ aḅeraạn bọ ologhi phọ amị. Uphaḍị ni imị bịn aseenaan ologh ikarạph phọ regir bọ Ioor phọ amị. 24 Pọ eeghe aagiạ dị mị aḍigh! Anhiạn kụ kuphẹI bọ imị amiteom siẹn aIoor phọ aḍiẹn phọ mirorori bọ imị rekiọm ḍuugh? 25 Aḍisẹph edianaan ni Enaạn, idiphọ odị matuạn bọ Jizọs Kraist Omoọgh-we phọ ayira kụ muphẹl bọ imị. Ḍiẹn phọ kụ adọI phọ mị odi bọ: uwiIẹ imị r’iitughiạn phọ amị bịn, mị kasighẹ ni ologhi phọ amị aakoom iiIogh phọ Enaạn, kụ olọ iphuIupuI phọ amị ekumu ghan rengọ oIogh ikarạph phọ.
FEBRUARY 25–MARCH 3
ARUPHUA DỊ OSIGHẸ SIPHẸ EKPO-ONHỤ PHỌ ENAẠN | ROM 9-11
“Oghaạph Omaaniọm Oreeny Olịv Phọ”
(Rom 11:16) OḅẹI opherepẹ abrẹd phọ kụ oseenaan Enaạn, pọ oomo eeḅoghoḍi abrẹd phọ eIọ odị aani ni. ḄiIẹ sinị oreeny phọ kụ oseenaan Enaạn, pọ iIạ phọ iIọ odị aani ni.
w11 5/15 23 ¶13
‘P’eeghe Idị Osụ-ologhi Phọ Enaạn Aleeny!’
13 Otelhedom mọ aPọl aghị ghisigh kụ asighẹ buẹn oḍighi bọ pakirị eemuma phọ Ebraham atomaạm ilạ oreeny olịv phọ omaaniọm bọ. (Rom. 11:21) Oreeny olịv phọ ophọn ozụph bọ ramạ ghan omunughan ogbi phọ Enaạn idị emoọgh muḅọph r’iyọ phọ Ebraham. Aḍinị oreeny phọ remạ ghan aJihova idiphọ odị angọ ghuḍum Izrạl aruwaloor phọ k’Enaạn. (Isa. 10:20; Rom. 11:16) Ogboku phọ remạ ghan Jizọs idiphọ oḅẹl apakirị eemuma phọ Ebraham. Ilạ phọ remạ ghan oomo “aḍita” abuẹn odi aani bọ pakirị eemuma phọ Ebraham emuneniom bọ iyạl phọ.
(Rom 11:17) Moḅonyon iniin ilạ oIịv phọ ozụph bọ otoph, osighẹ oniin oIạ oIịv eIegheḍum otu otuIom. Nạ ooruen phọ akịgh oIịv eIegheḍum mọ kụ nyiidiphọ nạ rapin aani bin eeḍiom amayạgh asinị aghuḍum abuọ aJu phọ.
(Rom 11:20, 21) Iduọn phọ ni, uḅonyon bidị oroph idị eḍighi bọ bidị u/meeraam, kụ nạ phọ mameeraam bọ odi ni esi phọ anạ. BiIeeghị obaga phọ, gona ghụn Ioor. 21 Idiphọ Enaạn i/biIenaạn bọ buọ aJu phọ oghịgh bọ ilạ dị emite ni Ioor oreeny phọ, nạ ragbi mọ odị kawiIenaạn ni nyinạ ḍughụm?
w11 5/15 24 ¶15
‘P’eeghe Idị Osụ-ologhi Phọ Enaạn Aleeny!’
15 AJihova aḍighi eeghe nuụn omuneni ogbi phọ odị? APọl aghaạph mọ osighẹ ilạ oreeny olịv elegheḍum mọ, otulom opọ ozụph bọ kụ ilạ phọ eḅonyonu bọ (Bạl Rom 11:17, 18.) Esi iduọn phọ, aKristẹn phọ abuẹn osagharạn bọ uwaloor phọ oḍighi bọ ruuruen phọ, abuniin orọl aani bọ siphẹ ookpomoghan phọ aRom, eten dị omaaniọm otulom oreeny olịv phọ osighẹ bọ otomaạm. Eten phọ ephẹn phọ kụ edị bidị oḍighi aani pakirị eemuma phọ Ebraham. Okạr eḅẹl amem mọ bidị uḍighi ghan idiphọ ilạ olịv elegheḍum mọ, dị u/moọgh aani eepoogh oḍighom apakirị iyọ phọ iphẹn phọ egbatanaạn bọ. Kuolọ aJihova angọ ni bidị eepoogh oḍighi aani aJu eten aruwaloor.—Rom. 2:28, 29.
(Rom 11:25, 26) Buọ asiya, mị inyina kaa/ghinaạn iyaạr ibooghiạn phọ ephẹn, obọ nyina kepe ghan bọ oIoghi eetughiạn iIọ oIegheri-iyaạr phọ anyina. IIegheri mọ oḅaạr emụ aweye phọ IzrạI o/righeeI bịn, katọI Ii tutụ aḍita aruuruen phọ kodạph bọ Enaạn emunughan. 26 Iduọn kụ idị kopẹl bọ oomo aweye phọ IzrạI otene. Idiphọ ogẹ bọ pạ aḍinyạ iigbia phọ mọ, “OpeIiạ phọ kamite Zayọn. Siphẹ eemarạ phọ aJekọb, odị kasighẹ ni oomo elegheri Enaạn.
w11 5/15 25 ¶19
‘P’eeghe Idị Osụ-ologhi Phọ Enaạn Aleeny!’
19 Ii, ogbi phọ aJihova idị egbolomaam “Izrạl phọ Enaạn” remunughan ni eekiạ eten. (Gal. 6:16) Idiphọ aPọl aḅẹm bọ, “kopẹl oomo aweye phọ IzrạI otene.” (Rom. 11:26) Amem mọ aJihova eteẹny, “oomo aweye phọ Izrạl”—iduọn phọ pọ, oomo onhụ abạl Izrạl aruwaloor phọ—koḍighi ruw-emạ r’abupinyọn rikiạ epẹ k’akẹ. Iyaạr dị kesophoghom ogbi aJihova i/lo!
Oguphogh Owạ Imạ Araraạr Dị Edi Siphẹ ABaibul Phọ
(Rom 9:21-23) Omaạr ogbiighi, oIemọm roko phọ kụ aIegheri iIọ oḍighinom aḅạy phọ. Odị katue ni asịghẹ eniin eḅọI aḅạy aIẹm iyạl aroko, nyoniin anighemị, nyoorị phọ abeephemi. 22 Iduọn phọ kẹn kụ idị Enaạn eḍighi bọ. Odị awạ oḍeenaan agheIhẹ phọ odị, ḅiIẹ r’oleenye eleeny iikpọ phọ odị. Kụ odị abigh ni ekpom akparạm ghan eḍighinom iyaạr abuphẹ rokạgh bọ oIoghi phọ odị kụ megeanaạn bọ eseere mọ ophiemi phọ. 23 Odị awạ kẹn ni ogananami eeIạ eegu phọ dị mukpoIonaan bọ iyira phọ dị manmạ bọ ighirigiir phọ, yira phọ dị maakoIobian bọ aseere mọ ophin aani bin eegu phọ odị.
w13 6/15 25 ¶5
Meera Ilioghọm mọ AJihova Eḅọl Nyinạ
5 Kokaạph ika eḍighi maạr dị awe r’oḅom emhụ kụ u/meera mọ Ogbogh Oḅolọm mọ aḅọl bidị? Ika nuụn kụ edị odị kaḍighinom iikpọ phọ odị idiphọ Enaạn? Gbiom ologhi ipẹ kemitenaan bọ aḅạy phọ, eḍighi maạr lọ u/nighẹ oḍighinom iyaạr phọ otuạn bọ kụ oḅọl. Oḅolọm mọ katue ni asighẹ aḍighinom onhọn oko obobọ kẹn atoph! Mem lọ aḅạy phọ kụ aphụ, roḅẹm ghan mọ oḅolọm mọ kụ aphuẹ. Kuolọ Oḅolọm mọ ayira o/rọl idiphọ. (Deut. 32:4) Eḍighi maạr lọ oye phọ u/meera mọ aJihova aḅọl nyodị, pọ opiomạn phọ olọ oye phọ. AJihova raḍighinom ghan iikpọ phọ odị idiphọ oḅolọm, esi ozoọm ghan awe eten dị edaphạn ipẹ awe phọ omegheron bọ oghị esi eḅolọm mọ odị. Buphẹ omegheron bọ eten dị ekpeanaạn roḅọl ghan ni eten dị kengọ suọ. Esi omaạm, aKristẹn phọ abuẹn osagharạn bọ uwaloor phọ oḍighi roko dị odị ‘manmạ ighirigiir’ aḅọl “anighemị.” Ḍierị phọ aḍighaạgh phọ, buphẹ oḅom bọ emhụ kụ ogbagharạn Enaạn oḍighi idiphọ aroko dị Enaạn eḅọl “eseere mọ ophiemi.”—Rom. 9:19-23.
(Rom 10:2) Mị katue ni amaaghị idị bidị oghoI Enaạn roophughemian Ioor, kụ opu ni iyaạr bịn roḍighi aani,
it-1 1260 ¶2
Oophugh
Oophugh Dị Agbọl. Oye katue ni amoọgh oophugh oḍighinom iyaạr, kuolọ iyaạr phọ odị amhoọgh bọ oophugh oḍighi phọ i/ḅeraạn Enaạn. Umiịn ipẹ phọ esi ibadị abuọ aJu phọ orọl bọ siphẹ oḅẹl okuron asiạ phọ. Bidị uwạ ghan oḍighi awe aruukuan dị eego esi iḍighinom araraạr phọ abidị eeḍiạn Olhogh phọ aMozis. Kuolọ aPọl aḍeenhaan mọ bidị m’ogbọl, loor e/moọgh olhegheri iyaạr phọ amunughan bọ. Esi iduọn phọ, Enaạn i/sighenhọm aani bidị idiphọ awe aruukuan. Iwạ mọ bidị ologhoma opiomạn phọ abidị kụ ooghiraan osoman Enaạn dị eego esi aKraist omoọgh aani adọl aruukuan r’eereẹgh dị Ologh phọ ka/guulemi mun bidị. (Rom 10:1-10) ASọl opọ aTasọs arọl aani ni iduọn phọ, odị aaphughemi ghan eḍighinom iyaạr abuọ aJu phọ, aḅilẹ aḍiemiom ghan we oghị “ogbiphoghọm r’ilọ ophiemi abuọ asiosị phọ Enaạn.” R’iboom inyaạm odị aako ghan ni ologh phọ, dị “maạr u/piọm ghan.” (Gal 1:13, 14; Fil 3:6) Kuolọ oophugh phọ odị ilọ ekụ iiḅereghị abuọ aJu phọ oo/leeny. Odị amoọgh ologhi dị amoon, kụ aJihova atuạn iduọn phọ kụ aḍeenhaan bọ nyodị onmạ ighirigiir dị u/kpeanaạn dị eego esi aKraist, okiton odị olọgh isiẹn igey phọ.—1Tim 1:12, 13.
Ibạl ABaibul
(Rom 10:1-15) Buọ asiya, obọ ophẹl aani awe phọ amị otene kụ ikpanạ iitughiạn oIoghi phọ amị r’idị mị aghoI ghan bọ bidị raaḅereghị Enaạn. 2 Mị katue ni amaaghị idị bidị oghoI Enaạn roophughemian Ioor, kụ opu ni iyaạr bịn roḍighi aani, 3 idị eḍighi bọ bidị k”oIegheri reten phọ Enaạn resighenọm ghan bọ mọ buẹn awe aruukuan ni phọ. Bidị roIẹm eḍighinom iyaạr eIọ abidị, u/sooromi Ioor abidị ungọ reten phọ Enaạn eseere bọ. 4 Idiphọ edi bọ, aKraist mamuneni IiIogh phọ bịn i/moọgh mun iikpọ, kụ Enaạn rẹsighẹ ghan torobọ oye Iọ ameeraam keḍighi oye aruukuan. 5 Iphẹn kụ idị aMozis agẹ iIọ ooko ghan IiIogh phọ kụ Enaạn kegbi osighẹ mọ ophọn oye aruukuan ni: “Oye Iọ aako ghan iiIogh phọ iiIogh phọ keḍighi ni dị odị kamoọgh ghuḍum.” 6 Kụ iphẹn kụ idị aruukuan phọ Enaạn rengọ ghan bọ oye Iọ amoọgh omeeraam eḅẹm: “U/ḅẹm mọ nạ kakị k’akẹ kụ awạ Kraist apạm atigheeIom ologhonaạn anạ ḍighaạgh.” 7 ḄiIẹ kẹn, “U/ḅẹm mọ nạ kakị omạr iḍim aḅeton Kraist siphẹ aḍuugh phọ.” 8 Reḅẹm ghan ghụn mọ aruukuan phọ yoor rokaạph ghan bọ mọ Enaạn rengọ ghan ni oye Iọ ameeraam “mekpuIạn ni nyinạ, meḍạgh ni iidoronụ phọ anạ, eḍigh oIoghi phọ anạ.” 9 Nạ asighẹ ni iidoronụ phọ anạ aghaaphọm amiteom mọ aJizọs kụ Omoọgh-we phọ, nạ aḅiIẹ ni ameeraam siphẹ ologhi phọ anạ mọ Enaạn iḅeton ni nyodị siphẹ aḍuugh phọ, kophẹI Ii nyinạ otene. 10 Oye lọ ameeraam ni r’oIoghi phọ odị, Enaạn kesighẹ ni mọ odị oye aruukuan ni. Oye lọ aghaaphọm iidoronụ phọ odị amiteom, kopẹI Ii otene. 11 Aḍinyạ iigbia phọ eḅẹm mọ, “Amabi ka/toIonaạn torobọ oye Iọ ameeraam nyodị.” 12 Iphẹn phọ eIoghọm ni oomo awe. Ogbaranaạn o/Io esi abuọ aJu r’aruuruen phọ. Eniin phọ Enaạn phọ kụ imoọgh ni oomo awe phọ, ḅiIẹ resẹph ghan ni kebalabaIamị oomo abuIọ rọmạgh ghan ḍien phọ odị. 13 Aḍinyạ iigbia phọ eḅẹm mọ, “Torobọ oye lọ ramạgh ghan ḍien Omoọgh-we phọ kamoọgh ni peIieẹny.” 14 Bidị komạgh bọ ika ḍien oye phọ bidị k”omeeraam bọ? Bidị komeeraam bọ ika dị bidị oghaạph phọ u/naghạn? Bidị konaghạn bọ ika dị oye oghaạph ghan oḅenị abidị u/Io? 15 Kụ kokaạph ghan ika oghaạph phọ dị aKraist u/tom we mọ oghị? Idiphọ ogẹ bọ pạ aḍinyạ iigbia phọ mọ, “Eekiạ enighẹ dị aradạ aruwoI abuphẹ oru bọ rokaạph ghan ooḅi oghaạph phọ enighẹ.”