Ophaanyạ Awe Dị Okpetenhaan Muụm Aḍigho

ANoa, r’eghunotu odị, r’inhạm mọ uḍigh ni oghuugh phọ, kụ aJehova aghughi eghuugh phọ. Odị aḍighi idị ogbogh olophiạ amhiigh olhọph. Olophiạ phọ alhọph ni asi esi dị oghuugh phọ amhiigh ophooph, kụ amuụm mọ aakpereghiom torobọ iyaạr dị erọl siẹn ade phọ. Oomo awe phọ abuphẹ u/ḍigh aani bọ oghuugh phọ umhuughu ni. ANoa r’eghunotu phọ odị bịn kụ ukpetenhaan. Olhoghi aNoa r’olhoghi eghunotu phọ odị aḅaạl li loor esi iduọn bidị onhaghanhạn bọ aJehova.

Olophiạ phọ alhọph esi 40 aḍughul otu kụ agbi osorọph. Kụ enụm enụm amuụm mọ amhiigh osoor. Ekureriom mọ, oghuugh phọ amheerạ ni esi eeḅarạph. Loor iduọn ade phọ ke/gharaghạr bọ, aNoa r’eghunotu phọ odị urọl li siphẹ oghuugh phọ dị epel li lhạ.

Enụm enụm, ade phọ igharaghạr ri. Kụ aJehova aḅenhị Noa r’eghunotu phọ odị mọ omite siphẹ oghuugh phọ. Bidị usẹph ni aJehova loor iduọn aphẹl bọ bidị, kụ oḅilhẹ ophighirọn ekiạ ongọ nyodị.

Olhoghi aJehova aḅaạl li loor ekiạ phọ bidị ophighirọn bọ. Kụ odị aguanhaan bidị mọ onọ ka/sighẹ mun muụm aḍigho apiemhiom de phọ. AJehova aḍighi ni idị aghozogh oburukeeny amite epẹ okuaḍio phọ pidị eḍeenhaan ghan oguanhaan phọ odị. Ephẹn kụ eḅẹl amem dị aghozogh oburukeeny amite epẹ okuaḍio phọ. Nạ mamhiịn ghan ni ghozogh oburukeeny?

AJehova aḅilhẹ ni aḅenhị Noa r’eghunotu phọ odị mọ omharaghị omuzeḍi de phọ.