Otu Anyụ Phọ ABabẹl

Amuụm aḍigho phọ aten bọ, anmụny phọ aNoa r’anmariịr phọ abidị umharaghị ni nmụny. Iphẹn phọ iḍighi ni idị arughunotu phọ abidị emhiigh obụgh. Esi iduọn phọ, bidị umhiigh ni olhoghoḍi aruutu rikpisi kirokirọ siẹn ade phọ, idiphọ aJehova aḅenhị bọ bidị.

Kuolọ iduọn eghunotu phọ aNoa rebụgh bọ, abuniin awe dị omite siphẹ eghunotu phọ aNoa usopha mọ bidị ko/naghanhạn aJehova. Bidị uupuruan kụ oḅẹm mọ: ‘Olhọgh ogbogh otu dị kapoph asi epẹ okuaḍio phọ, kụ orọl siphẹ phọ. Iphẹn phọ keḍighi idị aḍien ayira keelheghaan.’

Olhoghi aJehova o/ḅaạl loor otu phọ bidị rolọgh bọ, esi iḍuọn phọ odị aḍighi idị bidị ko/lọgh otu phọ omạn. Nạ alegheri ni iyaạr dị odị aḍighi? Odị aḍighi idị bidị omhiigh oḅạ akirokirọ arunhụ, bịn oniin o/nhaghanhạn mun nyoniin. Kụ ipẹ phọ eḍighi idị bidị u/lọgh mun otu phọ kụ owalhalhạ. Ughol esi phọ bidị omhiigh bọ olhọgh otu phọ mọ aBabẹl, kụ remạ ghan “Igbaragbarạ.” Ghalhamọ r’iduọn phọ, bidị uḅilhẹ ni omhiigh oḍighi yogh ikarạph araraạr epẹ bidị oghị bọ. Kuolọ awe urọl li dị ophomhoghiạn aJehova ḍughụm? Yira komiịn ni ophagharanhaạn phọ siphẹ esi ituughạ phọ etum bọ siẹn.