Mafyou

6 “Lè’w ka fè bon bay lézòt, fè asiwé ou pa annèk fè’y pou moun admiwé’w. Paski si ou fè sa, Papa’w ki an syèl pa kay benni’w. 2 Alò, lè’w ka fè sa ki bon bay moun, pa fè’y pou tout moun sav, menm kon moun ki enmen sonnen klòch yo. Paski sé sa sé ipokwit-la ka fè an sé légliz yo-a èk an lawi. Yo ka fè sa pou moun onnowé yo. Mwen ka di’w, yo pa kay twapé anyen pasé sa. 3 Mé ou menm, lè ou ka fè sa ki bon bay moun, pa kité lanmen gòch ou sav sa lanmen dwèt ou ka fè. 4 Pa kité pyèsonn wè sé bon bagay-la ou ka fè-a, kon sa Papa’w ki ka wè tout sa’w ka fè-a kay wékonpansé’w. 5 “Osi, lè’w ka pwédyé pa fè menm kon sé ipokwit-la. Lè yo ka pwédyé, yo enmen doubout an sé légliz yo-a èk an kwen gwan chimen pou tout moun sa wè yo. Mwen ka di’w, yo pa kay twapé anyen pasé sa. 6 Mé ou menm, lè ou ka pwédyé, antwé an chanm ou, fèmé lapòt ou èk pwédyé bay Papa’w. Pyèsonn pa sa wè Papa-a, mé i ka wè tout sa ki ka fèt. Sé li ki kay wékonpansé’w. 7 Lè’w ka pwédyé, pa wépété menm bagay-la chak lè. Sé moun ki pa konnèt mannyè pou adowé Bondyé ki ka pwédyé kon sa. Yo kwè Bondyé kay kouté yo paski yo ka fè lapwiyè ki lonng. 8 Kon sa pa fè kon yo, paski Papa’w konnèt sa’w bizwen avan’w mandé’y. 9 “Mi sé kon sa ou ni pou pwédyé: “‘Papa nou ki an syèl, nou ka pwédyé pou moun pòté non’w gwan wèspé. 10 Nou ka pwédyé pou gouvèdman’w kondwi latè èk pou volonté’w fèt asou latè menm kon i ka fèt an syèl. 11 Souplé, ban nou manjé-a nou bizwen pou jòdi-a. 12 Èk pawdonnen nou lè nou péché, menm kon nou ja pawdonnen moun ki péché kont nou. 13 Èk souplé, édé nou lè tantasyon vini douvan nou èk pwotéjé nou anba lanmen Denmou-an.’ 14 “Wi, si ou pawdonnen moun lè yo péché kont ou, Papa’w ki an syèl kay pawdonnen’w tou. 15 Mé, si ou pa pawdonnen moun lè yo péché kont ou, Papa’w pa kay pawdonnen’w lè ou fè sa ki pa bon. 16 “Lè’w chwazi pou wèsté san manjé, pa mouté désann épi fidji’w lonng menm kon sé ipokwit-la ka fè. Yo ka fè fidji yo lonng pou lòt moun sav yo ka wèsté san manjé. Mwen ka di’w, yo pa kay twapé anyen pasé sa. 17 Mé ou menm, lè ou chwazi pou wèsté san manjé, wanjé chivé’w èk lavé fidji’w. 18 Lè sala, moun pa kay sav ou ka wèsté san manjé. Sé Papa’w ki an syèl sèlman ki kay sav ou ka fè sa. Kon sa, Papa’w ki ka wè tout sa ou ka fè-a kay wékonpansé’w. 19 “Pa lasé kò’w ka sanblé wichès èk pozèsyon asou latè, paski ti bèt èk lawouj sa détwi yo, èk vòlè sa kasé antwé pou vòlè yo. 20 Pito sa, twavay wèd pou fè sé bagay-la ki ni valè an zyé Bondyé; paski ti bèt èk lawouj pa sa détwi yo, èk vòlè pa sa kasé antwé pou vòlè yo. 21 Anfen, sé bagay-la ou apwésyé pli-a, sé yo ki kay pli pwé tjè’w. 22 “Zyé’w menm kon lanp ki ka ba ou klèté. Alò, si ou fiksé zyé’w asou sa ki dwèt, ou kay ni tout klèté-a ou bizwen-an. 23 Mé si ou fiksé zyé’w asou sa ki mové, ou kay an gwo nwèsè. Alò, pa dé téwib i kay téwib si klèté-a ou ni-an sé vwéman nwèsè! 24 “Pyèsonn pa sa sèvi dé mèt. Paski si i enmen yonn i kay hayi lòt-la, èk si i fidèl pou yonn i kay déwèspèkté lòt-la. Alò, si sé lajan ki pli enpòtan pou ou, ou pa kay sa sèvi Bondyé. 25 “Sé pou wézon sala n’a di’w, las bay kò’w mal tèt pou sa’w kay manjé ében sa’w kay bwè. Èk las twakasé lidé’w pou sa’w kay mété asou’w. Ès lavi’w pa pli enpòtan pasé manjé? Ès kò’w pa pli enpòtan pasé had? 26 Véyé sé jibyé-a. Yo pa ka planté, yo pa ka wékòlté èk yo pa ka sanblé pou denmen. Magwé sa, Papa’w ki an syèl ka ba yo manjé. Ès ou pa ni twòp pli valè pasé jibyé? 27 Lè’w twakasé lidé’w asou sé bagay sala, ès sa kay fè’w viv yon nèditan an plis? 28 Osi, pouki ou ka bay kò’w mal tèt pou sa’w kay mété asou’w? Gadé sé flè-a an savann-nan. Yo pa ka ni twavay wèd ni fè had pou kò yo. 29 Mé n’a di’w, pa menm Wa Sòlomonn épi tout wichès li ki té abiyé bèl kon yonn an sé flè sala. 30 Alò, Bondyé fè sé flè sala tèlman bèl, mé yo la pou yon jou èk tan pou denmen, yo ka vini sèk èk moun ka fè boukan épi yo. Ès Bondyé pa kay fè twòp pli pasé sa ba ou, menm si sé an ti lafwa ou ni? 31 Kon sa, pa janmen bay kò’w mal tèt èk di: ‘Ki sa nou kay manjé?’ ében, ‘Ki sa nou kay bwè?’ ében, ‘Ki sa nou kay mété asou nou?’ 32 Paski sé moun ki pa konnèt Bondyé ki ka bay kò yo mal tèt pou sé bagay sala. Papa’w ki an syèl ja konnèt ou bizwen tout sé bagay sala. 33 “Fè gouvèdman Bondyé bagay-la ki pli enpòtan an lavi’w. Toujou obéyi Bondyé èk i kay ba ou tout sé bagay-la ou bizwen-an. 34 Alò, pa janmen bay kò’w mal tèt pou denmen, paski la kay ni asé pwòblenm lè denmen wivé. Pa pwan twaka denmen épi mété’y asou twaka jòdi.