Sé Bèl Wépons-lan Ki An Bib-la Té Touché Tjè Mwen

LAVI MWEN AN TAN PASÉ:

Mwen té fèt an Székesfehérvár, Hungary. Vil sala ni an bèl listwa ki plis pasé an mil «1000» lanné. Malèwèzman, mwen ka chonjé mannyè dézyenm gwo ladjè-a détwi vil sala.

Mwen té lévé épi gwan pawan mwen. Mwen ka chonjé yo byen, sitou gwanmanman. Non’y sété Elisabeth. I enstwi mwen pou ni lafwa an Bondyé. Anfen, dépi mwen té twazan, mwen té ka wépété Lapwiyè Nòtwipè-a toulé swè épi’y. Magwé sa, sé sèlman lè mwen té apipwé twant «30» lanné mwen té vini konpwann lapwiyè sala.

Lè mwen té piti, gwan pawan mwen té ka otjipé mwen paski manman mwen èk papa mwen té ka twavay lajouné kon lannwit. Ou wè, pawan mwen té vlé séwé lajan pou achté an kay. Kanmenm, dé fwa an mwa-a, tout fanmi mwen té ka vini ansanm pou manjé an wipa. Pa dé kontan mwen té ka kontan lè nou tout té ka vin ansanm kon sa.

An lanné mil nèf san senkant ywit «1958», pawan mwen achté an kay. Alafen, mwen té kay viv épi yo. Mwen té si tèlman kontan. Malèwèzman, djèwté sala pa té diwé pou lontan paski sis mwa apwé papa mwen mò épi kansè.

Sa kwazé tjè mwen. Apwé papa mwen mò mwen té ka pwédyé bay Bondyé: “Pouki ou pa té wéponn lapwiyè mwen? Mwen mandé’w pou édé papa mwen èk mwen di’w mwen té bizwen’y.” Vwéman, mwen té vlé sav ki koté papa mwen té yé. Konsa, mwen té ka katjilé: ‘Ès papa mwen alé an syèl? Ében ès i fini pou tout tan?’ Wi, mwen té ka mantjé papa mwen an chay. Èk lè mwen wè lòt manmay épi papa yo, mwen té ka jalou.

Pou konmen lanné, mwen té ka alé an senmityè-a toulé jou. Èvèk mwen té ka ajounou douvan tonm papa mwen èk mwen té ka pwédye: “Bondyé, souplé, mwen vlé sav ki koté papa mwen yé.” Osi, mwen mandé Bondyé pou édé mwen konpwann pou ki wézon nou asou latè-a.

Lè mwen té twèz «13» lanné, mwen désidé pou apwann langaj Almany. Konsa, an lanné mil nèf san swasant sèt «1967», mwen koumansé étidyé langaj sala an vil Jena, an Almany. Mwen té fè sa paski mwen té kwè, mwen té kay twapé sé wépons-lan pou sé kwèsyon-an mwen té ni-an an sé liv Almany-lan. Mwen té li tout sé liv-la mwen té sa twapé. Mé mwen té vwéman entéwésé an sé liv-la ki té ka palé konsèné wézon-an nou asou latè-a. Magwé adan sé liv sala té di sèten bagay ki té ka fè sans, m’a té satisfè épi wépons yo. Alò, mwen kontiné mandé Bondye pou édé mwen twapé sé wépons-lan.

MANNYÈ BIB-LA CHANJÉ LAVI MWEN:

An lanné mil nèf san swasant dis «1970» mwen viwé Hungary. An tan sala, Hungary té anba gouvèdman Konminis. Bon. Mwen jwenn Rose an menm lanné sala. An ti tan apwé nou té mayé, nou pati ay Austria. Mé dézi nou sété pou alé wèsté Sydney, Australia, koté-a tonton mwen té ka wèsté.

Touswit apwé nou wivé Austria, mwen té twapé twavay. Yon jou, on moun an plas twavay mwen di mwen, mwen sa twapé wépons pou tout kwèsyon mwen an Bib-la. Apwé sa, i ban mwen déotwa liv ki bazé asou Bib-la. Mwen li sé liv-la byen vit èk mwen té kontan sa mwen té ka li-a. Konsa, mwen té vlé apwann pli. Alò, mwen ékwi Témwen Jéhova èk mwen mandé yo pou voyé mwen pli liv.

Asou pwèmyé annivèwsè mawiyaj nou, on jenn Témwen vizité mwen èk Rose. I té mennen sé liv-la ban mwen, épi i ofè mwen an létid Bib èk mwen dakò. Èvèk paski mwen té vlé apwann pli, mwen désidé pou étidyé dé fwa pa simenn. Èk chak létid Bib té ka diwé pou kat nèditan!

Pa dé kontan mwen té kontan sa sé Témwen-an té ka enstwi mwen an Bib-la. Mwen té sipwi lè yo moutwé mwen non Bondyé, Jéhova, an Bib mwen. Pou di’w lavéwité-a, i ni venn sèt «27» lanné dépi mwen té ka alé légliz, èk pa yon fwa mwen janmen tann yo mansyonnen non Bondyé. Bon. Sé bèl wépons-lan ki an Bib-la té touché tjè mwen. Pa ègzanp, mwen apwann moun ki mò pa konnèt anyen, sé konmsi yo ofon sonmèy. (Ékléziyastis 9:​5, 10; Jan 11:11-​15) Osi, mwen apwann konsèné latè nèf-la koté “la pa kay ni lanmò ankò.” (Wévélasyon 21:​3, 4) Wi, mwen ka gadé pou tan-an lè mwen kay wè papa mwen ankò paski an latè nèf-la, moun “kay wésisité.”​—Twavay 24:15.

Apwé an tan, Rose koumansé étidyé Bib-la èk i té ka vwéman enjwi’y. Nou fini étidyé piblikasyon-an an dé mwa! Osi, nou té ka atandé tout sé mitin-lan. Sé mitin sala té bèl, èk sa ki vwéman touché tjè nou sé lanmityé-a èk lilyon-an nou wè anpami sé Témwen-an.​—Jan 13:34, 35.

An lanné mil nèf san swasant sèz «1976», nou alé wèsté Australia. Lè nou wivé la, nou fè kontak épi Témwen Jéhova. Sé Témwen-an byenvini nou èk yo fè nou santi konfòtab. Èvèk an lanné mil nèf san swasant dizwit «1978», nou vini Témwen Jéhova.

MANNYÈ MWEN TWAPÉ BENNÉFIS:

Alafen, mwen twapé wépons pou sé kwèsyon-an ki té ka twakasé lidé mwen pou an chay tan. An plis di sa, mwen ni an bon wilasyon épi Jéhova. Èk i ja vini Papa mwen. (Jémz 4:8) Osi, mwen ni an bèl èspwa pou tan ki ka vini. Wi, mwen ka èspéyé pou tan-an lè mwen kay wè papa mwen ankò an latè nèf-la.—Jan 5:​28, 29.

An lanné mil nèf san katwiven nèf «1989», mwen èk Rose viwé Hungary. Nou désidé pou fè sa paski nou té vlé patajé bon nouvèl-la épi fanmi nou, jan nou épi lézòt moun. Nou té ni bèl pwivilaj-la pou étidyé Bib-la épi plizyè san moun. Èk pli pasé swasant dis «70» di yo té dèdiké lavi yo bay Jéhova, èk anpami yo sé manman mwen.

Pou disèt «17» lanné mwen té ka pwédyé pou wépons pou sé kwèsyon-an mwen té ni. I ni twant nèf «39» lanné dépi mwen batizé èk mwen ka pwédyé toujou. Mé apwézan, mwen ka wimèsyé Jéhova, Papa mwen ki an syèl paski i wèponn sé kwèsyon-an mwen té ni dépi mwen té an tibway.