Mannyè Jéhova Ka Édé Nou Pou Tjébé Fò

1. Pouki nou ni pou kontiné tjébé fò, èk ki moun ki sa édé nou pou fè sa? (1 Pita 5:10)

NOU KA viv an tan ki byen difisil, èk akòz di sa, nou tout ka soufè. Pou ègzanp, adan di nou malad pou konmen tan. Adan di nou an lapenn paskè nou pèd on moun nou enmen an lanmò. Adan sé fwè èk sè nou-an ka èspéyansé pèsikasyon ében òpozisyon anba lanmen fanmi yo, ében gouvèdman-an. (Maf. 10:18, 36, 37) Èk nou kay ni pou aji épi bagay kon sa, jistan Jéhova mennen on bout pou vyé sistenm sala. Konsa, i byen enpòtan pou nou kontiné tjébé fò. Mé ou sa asiwé, Jéhova sa édé’w pou tjébé fò anba népòt difikilté ou pé èspéyansé.​—Li 1 Pita 5:10.

2. Ki mannyè nou sa kontiné tjébé fò?

² Mé kisa’y vlé di pou tjébé fò? Ében kon nou ja wè, nou ka èspéyansé difikilté. Si nou ka tjébé fò sa vlé di nou ka wèsté fidèl pou Jéhova, èk nou ka kontiné sèvi’y épi djèwté, menm si nou ka èspéyansé difikilté, pèsikasyon, ében nou ka jwenn tantasyon pou fè sa ki pa bon. Osi, nou pa ka pèd èspwa ki, bagay kay vini pli mèyè. Mé ou kay dakò, nou pa sa janmen fè sa pa kò nou. Sèl mannyè nou ka kontiné tjébé fò, sé paski Jéhova ka ban nou fòs-la nou bizwen pou nou fè’y. Anfen Bib-la ka di nou, “tout pouvwa-a menm sé an Bondyé i yé . . . sé pa adan nou.” (2 Kòr. 4:7) Konsa, an atik sala nou kay diskité kat «4» bagay Jéhova ja mété an plas pou édé nou tjébé fò. Èk nou kay wè ki mannyè nou sa byen sèvi sé kat «4» bagay sala.

LAPWIYÈ

3. Pouki nou sa di, lapwiyè sé on bagay ki èstòdinè?

³ Yonn an sé bagay-la Jéhova ja mété an plas pou édé nou tjébé fò, sé lapwiyè. Annèk imajiné sa: Magwé nou tout sé péchè, Jéhova fè’y posib pou nou palé épi’y. (Heb. 4:16) Nou sa pwédyé a népòt lè, an népòt langaj, èk nou sa di Jéhova tout bagay. Nou sa pwédyé an népòt koté nou yé. Wi, menm si ou pa kò’w ében ou an pwizon, ou sa palé épi Jéhova. (Jonna 2:1, 2; Twav. 16:25, 26) Èk si’w ka santi ou tèlman twakasé ou pa sav kisa pou’w di an lapwiyè’w, Jéhova ka konpwann sa ou vlé di. (Ronm 8:26, 27) Vwéman, lapwiyè sé on bagay ki èstòdinè!

4. Ki mannyè nou sav Jéhova kay wéponn lapwiyè nou, lè nou mandé’y pou édé nou tjébé fò?

⁴ An Bib-la, Jéhova ban nou on bèl asiwans. I di: ‘Népòt bagay nou mandé’y, dépi sa nou mandé’y-la sé on bagay ki an ling épi volonté’y, i kay kouté nou.’ (1 Jan 5:14 NWT) Konsa, ès nou sa mandé Jéhova pou édé nou tjébé fò? Ès sa sé on bagay ki an ling épi volonté’y? Absoliman! Paskè, chak fwa nou tjébé fò anba on difikilté, nou ka bay Jéhova on bon wépons pou’y ba moun-lan ki ka pwovoké’y-la. Sa vlé di, Satan Denmou-an. (Pwov. 27:11) Bib-la ka osi di, zyé Jéhova ka pasé toupatou an latè-a, paskè i vlé sèvi fòs li pou édé ‘moun ki ka adowé’y épi tout tjè yo.’ (2 Kw. 16:9) Konsa, nou sa asiwé Jéhova vlé édé nou, èvèk i sa ban nou fòs-la nou bizwen pou nou sa kontiné tjébé fò.​—Izay. 30:18; 41:10; Louk 11:13.

5. Lè nou pwédyé, kisa Jéhova ka ban nou? (Izaya 26:3)

⁵ Lè nou pwédyé ofon tjè nou, èk nou di Jéhova tout bagay ki ka twakasé nou, Jéhova ka ban nou ‘lapé an tjè nou épi an lidé nou.’ Sa sé on kalité lapé ki si tèlman bon, pyèsonn pa sa fini konpwann li. Èk sé sèlman Jéhova ki sa ban nou lapé sala. (Filip. 4:7) Bon katjilé asou sa, moun ki pa ka adowé Jéhova vlé lapé osi. Èk yo ka fè diféwan bagay pou yo sa wèsté kam. Mé, adan sé bagay-la yo ka fè-a sé bagay ki danjéwé, paskè i ka mété yo anba pouvwa sé vyé lèspwi-a. (Gadé Mafyou 12:43-45.) Konsa, yo pa ka twapé kalité lapé-a Bondyé ka bay-la. Mé nou menm ka pwédyé, paskè sé asou Jéhova nou ka apiyé. Èk i ka ban nou ‘lapé ki pa ka fini.’ (Li Izaya 26:3.) Yon mannyè Jéhova ka ban nou lapé sala, sé lè’y sèvi lèspwi’y pou édé nou chonjé sé lévanjil-la nou ja apwann an Bib-la. Sé lévanjil sala ka kalmé tjè nou épi lidé nou paskè yo ka fè nou chonjé, Jéhova enmen nou an chay èk i vlé édé nou.​—Sam 62:1, 2.

6. Lè’w ka èspéyansé on pwoblenm, kisa ou sa pwédyé pou? (Gadé pòtwé-a osi.)

⁶ Sa ou sa fè. Lè’w ka èspéyansé on pwoblenm, pwédyé. Wi, ‘ladjé tout twaka’w asou Jéhova,’ èk mandé’y pou ba’w lapé. (Sam 55:22) Osi, ou sa mandé Jéhova pou ba’w lasajès-la ou bizwen, pou’w sa konnèt kisa pou’w fè. (Pwov. 2:10, 11) Èk pa obliyé pou wimèsyé Jéhova an lapwiyè’w. (Filip. 4:6) Gadé pou’w wè sé diféwan bagay-la Jéhova ka fè pou édé’w, èk di’y mèsi pou tout sa’y ka fè ba ou. Pa janmen kité sé pwoblenm-lan ou ka èspéyansé, anpéché’w wè sé bennédiksyon-an Jéhova ja ba’w-la.​—Sam 16:5, 6.

BIB-LA

7. Ki mannyè Bib-la sa édé nou pou tjébé fò?

⁷ Jéhova ban nou pawòl li ki an Bib-la pou édé nou tjébé fò. Èk la ni an chay lévanjil ki ka ankouwajé nou, paskè yo ka ban nou asiwans-lan ki, Jéhova kay toujou sipòté nou. Pou ègzanp, Mafyou 6:8 ka di: ‘Papa’w konnèt sa’w bizwen avan ou mandé’y.’ Ében, sé Jézi ki té di sé pawòl sala. Èvèk la pa ni pyèsonn ki konnèt Jéhova pli mèyè pasé Jézi konnèt li. Konsa, lè nou ka soufè nou sa asiwé, Jéhova konnèt sa nou bizwen èk i kay édé nou. Vwéman, Bib-la ni an chay bèl lévanjil ki sa ankouwajé nou, èk ban nou fòs-la nou bouzwen pou nou sa kontiné tjébé fò.​—Sam 94:19.

8. (a) Mansyonnen on konsèy nou ka jwenn an Bib-la, ki sa édé nou pou tjébé fò. (b) Kisa ki kay fè’y pli ézé pou nou chonjé bon konsèy-la ki an Bib-la?

⁸ Bon konsèy-la ki an Bib-la sa édé nou pou tjébé fò, paskè si nou swiv yo, nou kay sa fè bon disizyon. (Pwov. 2:6, 7) Pou ègzanp, mi on bon konsèy Bib-la ka ban nou: ‘Pa pwan twaka denmen épi mété’y asou twaka jòdi.’ Lè nou swiv konsèy sala nou ka ni mwens strès, paskè pito nou twakasé kò nou konsèné sa ki pé fèt denmen, nou ka dépan asou Jéhova. (Maf. 6:34) Mé si nou fè éfò pou li ében kouté on pòsyon an Bib-la touléjou, èvèk nou ka mèdité asou sa nou apwann, i kay pli ézé pou nou chonjé sé bon konsèy-la ki an Bib-la lè nou bouzwen’y. Pou ègzanp, lè nou ka èspéyansé pwoblenm, ében lè nou ni on disizyon pou fè.

9. Ki mannyè sé wakont-lan ki an Bib-la ka édé nou?

⁹ On lòt bon bagay nou ka jwenn an Bib-la, sé bèl wakont konsèné diféwan moun ki té mété konfyans yo an Jéhova, èk nou ka apwann mannyè Jéhova té édé yo. (Hib. 11:32-34; Jémz 5:17) Lè nou katjilé asou sé wakont sala, sa ka fòtifyé konfyans nou ki, Jéhova kay toujou édé nou. Kon lévanjil-la ka di, “sé [Jéhova] ki tout kouway nou, sé li ki ka pwotèkté nou, èk i toujou pwé pou édé [nou] lè nou an twaka.” (Sam 46:1) Èk lè nou chonjé mannyè sèvant Bondyé an tan pasé té fidèl magwé yo té ka soufè, sa ka ankouwajé nou pou wèsté fidèl èk kontiné tjébé fò.​—Jémz 5:10, 11.

10. Kisa’w sa fè pou Pawòl Bondyé édé’w tjébé fò?

¹⁰ Sa ou sa fè. Li ében kouté Bib-la touléjou, èk lè’w jwenn vèwsé ki ka ankouwajé’w, éséyé pou apwann yo pa tjè. Ou sa jis ékwi sé vèwsé sala adan on ti liv. Mannyè sala ou kay ni Pawòl Bondyé an tjè’w épi an lidé’w, èk sa kay édé’w pou tjébé fò. An chay fwè èk sè ka li tèks-la pou jounen-an toulé bonmaten, paskè sa ka ba yo bon bagay yo sa katjilé asou diwan lajounen-an. Yon sé yo ka kwiyé Mariea di, sé sa ki té édé’y pou tjébé fò lè’y té ni pou otjipé manman’y épi papa’y. Yo dé-a té byen malad épi kansè a menm lè-a. Sè Marie di: “Toulé bonmaten, mwen té ka li lévanjil-la pou tèks-la pou jounen-an, èk mwen té ka pwan tan mwen pou katjilé asou’y. Mannyè sala, mwen té ka fiksé lidé mwen asou Jéhova èk asou sé bèl bagay-la ki an Pawòl li, pito pou mwen fiksé sèlman asou mové sitiwasyon manman mwen èk papa mwen.”​—Sam 61:2.

SÉ FWÈ ÈK SÈ-A

11. Lè nou chonjé sé fwè èk sè nou-an ka tjébé fò magwé yo ka soufè, ki mannyè sa ka édé nou?

¹¹ On lòt bèl bagay Jéhova ban nou pou édé nou tjébé fò, sé fwè èk sè oliwon latè-a. Lè nou chonjé sé fwè èk sè nou-an ka tjébé fò, magwé yo “ka soufè menm kon nou,” sa ka ankouwajé nou pou kontiné tjébé fò. (1 Pita 5:9) Wi, nou sa kontiné tjébé fò anba népòt sitiwasyon, menm kon sé fwè èk sè nou-an ka fè oliwon latè-a.​—Twav. 14:22.

12. Kisa nou sa fè pou édé yonn a lòt tjébé fò? (2 Kòrint 1:3, 4)

¹² Pa pawòl nou épi aksyon nou, nou sa ankouwajé yonn a lòt pou kontiné tjébé fò. Zapòt Pòl té èspéyansé sa. An sé liv-la i ékwi-a, i mansyonnen sé fwè èk sè-a ki té édé’y lè’y té an pwizon lakay li, èvèk i té ka toujou wimèsyé yo. Sé fwè èk sè sala té ka sèvi pawòl yo pou ankouwajé zapòt Pòl, èk yo té ka fè asiwé i té ka jwenn sa’y té bouzwen. (Filip. 2:25, 29, 30; Kòl. 4:10, 11) Jòdi jou, sé fwè èk sè nou-an ka soulajé nou, èk yo ka édé nou pou tjébé fò anba difikilté. Èk nou ka fè menm bagay-la ba yo.​—Li 2 Kòrint 1:3, 4.

13. Kisa ki édé sè Maya pou tjébé fò?

¹³ An lanné dé mil ven «2020», polis antwé lakay on sè yo ka kwiyé Maya, an péyi Russia, èk yo fouyé kay-la. Apwé sa, yo mennen sè-a douvan lodyans senpliman paski i té ka pwéché. Sè-a di, diwan tan difisil sala, sé fwè èk sè-a ankouwajé’y an chay. I di: “A lè sala mwen té las, mwen té antjèt, èk mwen té twis. Mé, sé fwè èk sè-a té ka kwiyé mwen. Èk adan di yo té ka ékwi mwen lèt, pou fè mwen chonjé yo enmen mwen an chay. Mwen té toujou konnèt, sé fwè èk sè-a sé fanmi mwen, èk yo enmen mwen an chay. Mé, dépi apwé sa yo fè ban mwen an lanné dé mil ven «2020», mwen ka apwésyé sa pli.”

14. Lè nou ka èspéyansé difikilté, kisa i enpòtan pou nou fè? (Gadé pòtwé-a osi.)

¹⁴ Sa ou sa fè. Lè nou ka èspéyansé difikilté, i enpòtan pou nou wèsté pwé sé fwè èk sè-a. Èk pa fè kòlonng pou’w mandé sé ansyen-an pou èd. Chonjé, ‘sé ansyen-an menm kon on plas pou moun séwé hòd van-an. Èk yo menm kon on plas moun sa twapé pwotèksyon lè la ni gwo lapli.’ (Izay. 32:2) Osi, i bon pou chonjé, sè fwè èk sè nou-an ka èspéyansé difikilté menm kon nou. Konsa fè sa’w pé pou’w édé lézòt, paskè sa kay ba’w tjè kontan. Èk tjè kontan sala kay édé’w pou kontiné tjébé fò anba sé difikilté-a ou ka èspéyansé-a.​—Twav. 20:35.

BÈL ÈSPWA-A NOU NI-AN

15. Ki mannyè èspwa-a Jézi té ni-an té édé’y, èk ki mannyè èspwa-a nou ni-an ka édé nou? (Hibrou 12:2)

¹⁵ Jéhova ban nou on bèl èspwa, èk èspwa sala sa édé nou pou tjébé fò anba difikilté. (Ronm 15:13) Chonjé, bèl èspwa-a Jézi té ni-an édé’y pou tjébé fò anba tout sé difikilté-a i èspéyansé-a avan’y mò. (Li Hibrou 12:2.) Wi, Jézi té ni èspwa, fidèlité’y anba tès té kay tiwé wipòch asou non Papa’y. I té osi ni èspwa pou viwé jwenn Papa’y an syèl, èk pli ta pou’y kondwi an Wéyòm-lan ansanm épi sé fwè’y-la. Sé bèl bagay-la Jézi té ka èspéwé-a, fòtifyé’y. Ében Jéhova ban nou on bèl èspwa osi. Nou kay ni bon santé, èk nou kay viv pou tout tan an latè nèf-la. Bèl èspwa sala sa édé nou pou tjébé fò anba népòt difikilté.

16. Kisa nou sa apwann an ègzanp sè Alla?

¹⁶ Pou édé nou wè mannyè èspwa-a nou ni-an ka fòtifyé nou, annou pwan ègzanp yon sè ki ka viv an péyi Russia. Non sè-a sé Alla. Yo awété mawi’y, èk yo mété’y an pwizon paditan i té ka èspéwé pou yo mennen’y douvan lodyans. Sa té byen difisil pou yo, mé bèl èspwa-a nou ni-an ka édé sè-a pou tjébé fò. I di: “Mwen ka palé épi Jéhova konsèné sé bèl bagay-la i kay ban nou an tan pou vini. Mwen ka tjenn sé bèl bagay sala an lidé mwen, èk sa ka ankouwajé mwen an chay. Paskè, mwen asiwé Jéhova kay détwi tout sé lèlmi’y-lan, èk i kay ban nou tout sé bon bagay-la i pwonmèt pou ban nou-an. Konsa bagay kay vini pli mèyè.”

17. Ki mannyè nou sa moutwé nou ka apwésyé bèl èspwa-a Jéhova ban nou-an? (Gadé pòtwé-a osi.)

¹⁷ Sa ou sa fè. Toujou pwan tan pou’w katjilé asou sé bèl bagay-la Jéhova pwonmèt pou ban nou-an. Wi, imajiné kò’w ka enjwi bennédiksyon Jéhova an latè nèf-la. Èk chonjé, tout sé twakasman-an nou ka èspéyansé apwézan, sé “pou an ti tan tousèl.” (2 Kòr. 4:17) Osi, éséyé pou mété kò’w an plas sé moun-lan ki ka viv an vyé sistenm sala, san bèl èspwa-a nou ni-an. Ès ou sa imajiné mannyè yo ka soufè? Konsa, fè tout sa’w pè pou’w palé épi lézòt konsèné sé bèl bennédiksyon-an Wéyòm Bondyé kay mennen touswit. Délè, ou sa annèk di on moun yonndé ti mo pawòl, èk sa pé ankouwajé yo pou moutwé lantéwé an Pawòl Bondyé.

18. Kisa nou sa apwann an ègzanp Jòb?

¹⁸ Jòb èspéyansé an chay pwoblenm an lavi’y. Mé, i wèsté fidèl anba tout. Èk apwé sa i di Jéhova: “Apwézan, mwen konnèt ou sa fè tout bagay, èk la pa ni anyen ou vlé fè, ki enposib pou’w fè.” (Jòb 42:2) Wi, Jòb apwann, lè Jéhova di i kay fè on bagay, la pa ni anyen ki sa anpéché’y fè’y. Si nou chonjé bèl ti pwen sala, sa kay fòtifyé nou, èk nou kay sa tjébé fò anba népòt difikilté. Pou édé nou konpwann sa, annou pwan yon ilistwasyon. Annou di, on madanm byen malad, èk i byen dékouwajé paskè i p’òkò jwenn pyès dòktè ki sa édé’y. Mé yon jou, i jwenn on bon dòktè. Apwé dòktè-a ègzanminé madanm-lan i di’y kon sa, i konnèt kisa ki ka fè’y malad. Èk i di’y, i kay pwan on ti tan, mé wimèd-la i kay ba’y-la kay djéwi’y. Bon, madanm-lan malad toujou, mé la menm i ka santi i sa kontiné tjébé fò anba maladi-a, paskè i ni èspwa i kay djéwi. An menm mannyè-a, Jéhova p’òkò mennen latè nèf-la. Mé nou asiwé, i kay fè’y. Wi, nou ni èspwa bagay kay vini twòp pli mèyè. Èk èspwa sala ka édé nou pou kontiné tjébé fò anba tout sé twaka-a nou ka èspéyansé apwézan.

19. Kisa ki kay édé nou pou kontiné tjébé fò?

¹⁹ Bon, kisa nou apwann an atik sala? Ében, nou gadé kat «4» bagay Jéhova ban nou, pou édé nou tjébé fò. I ban nou: lapwiyè, Pawòl li, sé fwè èk sè nou-an, èk on bèl èspwa pou tan ki ka vini. Si nou byen sèvi sé kat «4» bagay sala, gwanmèsi èd Jéhova, nou kay sa tjébé fò jistan nou wivé an latè nèf-la.​—Filip. 4:13.