-
Kwityen Ki Vwé Pa Ka Mélé Kò Yo An Zafè Latè-aOu Sa Ni On Bon Lavi Pou Tout Tan!—Annou Wè Sa Bib-la Ka Di
-
-
LISON 45
Kwityen Ki Vwé Pa Ka Mélé Kò Yo An Zafè Latè-a
Jézi di, sé disip li-a “pa menm èk sé jan latè-a.” (Jan 15:19) Konsa, Kwityen ki vwé pa ka mélé kò yo an zafè latè-a. Kisa sa vlé di? Ében, lèʼy vini pou pòlitiks épi ladjè, yo pa ka sipòté ni yonn ni lòt. Mé vwéman, i pa toujou ézé pou fè sa, paski moun pé wi nou ében pwan nou sèvi widitjil. Ki mannyè nou sa moutwé nou pa ka mélé kò nou an zafè pòlitiks ében ladjè? Èvèk ki mannyè nou sa wèsté fidèl pou Jéhova?
1. Ki mannyè Kwityen ki vwé ka gadé gouvèdman lézòm?
Kwityen ki vwé ka wèspèkté sé gouvèdman-an. Alò, nou ka swiv konsèy Jézi pou “bay Wa Siza sa ki ka vini pou li”. Sa vlé di, nou ka obéyi lwa péyi-a, tèl kon lwa-a pou péyé taks. (Mak 12:17) Bib-la ka moutwé, gouvèdman lézòm ka kondwi paski Jéhova ka pèwmité yo pou kondwi. (Ronm 13:1) Konsa, nou sav la ni an limit asou kantité lotowité gouvèdman lézòm ni. Nou ka dépan asou Jéhova épi gouvèdmanʼy pou tiwé tout pwòblenm lézòm.
2. Ki mannyè nou sa moutwé nou pa ka mélé an zafè latè-a?
Menm kon Jézi, nou pa ka pwan pa an zafè pòlitiks. Apwé sé moun-lan té wè yonn an sé miwak Jézi-a, yo té vlé fèʼy wa asou latè, mé i pa kité yo fè sa. (Jan 6:15) Pouki? Sé paski, Jézi té di: “Wéyòm-lan mwen ka kondwi-a pa sòti an latè sala.” (Jan 18:36) Konsa, kon disip Jézi, la ni diféwan mannyè nou ka moutwé nou pa ka mélé kò nou an zafè latè-a. Pou ègzanp, nou pa ka pwan pyès kalité pa an ladjè. (Li Mayka 4:3.) Osi, nou ka wèspèkté bagay ki ka wépwézanté péyi-a tèl kon flag-la, mé nou pa ka adowé yo. (1 Jan 5:21) Èvèk lèʼy vini pou patizan pòlitik ében politisyen, nou pa ka sipòté ni yonn ni lòt. Sa sé déotwa mannyè nou sa moutwé nou ka wèsté fidèl pou gouvèdman Bondyé.
ANNOU APWANN PLI
Apwézan, annou gadé déotwa sitiwasyon ki sa fèʼy difisil pou nou pa pwan pa an zafè latè-a. Osi, nou kay apwann mannyè nou sa fè disizyon ki kay plè Jéhova.
3. Kwityen ki vwé pa ka mélé kò yo an zafè latè-a
Jézi épi sé disip li-a kité an bon ègzanp pou nou. Annou li Ronm 13:1, 5-7 èk 1 Pita 2:13, 14. Apwé, annou gadé VIDIYO-A, Kwityen Ki Vwé Endiféwan—Pwèmyé Pa-a èk nou kay kozé asou sé kwèsyon sala:
Pouki nou ni pou wèspèkté sé gouvèdman-an?
An ki diféwan mannyè nou sa moutwé nou ka wèspèkté yo?
Délè lè dé (2) nasyon ka goumen, sé lòt nasyon-an ka di yo pa ka sipòté ni yonn ni lòt, mé an menm di tan yo ka asisté toulédé sé nasyon-an ki ka goumen-an. Konsa, kisa i vwéman vlé di pou pa mélé kòʼw an zafè latè-a? Annou li Jan 17:16. Apwé, annou gadé VIDIYO-A, Kwityen Ki Vwé Endiféwan—Dézyenm Pa-a èk nou kay kozé asou kwèsyon sala:
Kisa i vlé di pou pa mélé kòʼw an zafè latè-a?
Délè gouvèdman-an pé pasé an lwa ki ka mandéʼw pou fè kéchòy ki kont lwa Bondyé. Kisa ou kay fè si sa fèt? Annou li Twavay 5:28, 29. Apwé, annou gadé VIDIYO-A, Kwityen Ki Vwé Endiféwan—Twazyenm Pa-a èk nou kay kozé asou sé kwèsyon sala:
Konsa, si gouvèdman-an mandéʼw pou fè kéchòy ki pa an ling épi lwa Bondyé, kisa ou kay fè?
Ès la ni pyès sitiwasyon koté an Kwityen pa kay obéyi gouvèdman-an?
4. Pa mélé kòʼw an zafè latè-a, ni an katjil ou ni an aksyonʼw
Annou li 1 Jan 5:21. Apwé, annou gadé VIDIYO-A, Wézon Kwityen Ki Vwé Bizwen Kouwaj—Pou Yo Wèsté Endiféwan èk nou kay kozé asou sé kwèsyon sala:
An vidiyo-a, pouki fwè-a fè lidéʼy pou pa mélé kòʼy épi an patizan pòlitik ében an sélébwasyon nasyonnal, tèl kon salwé flag-la?
Ès ou kwè fwè-a té fè on bon disizyon?
Ki lòt sitiwasyon ki sa fèʼy difisil pou nou pa mélé kò nou an zafè latè-a? Annou gadé VIDIYO-A, Lison Nou Apwann Hòd Gad-la—Wèsté Endiféwan Adan An Latè Ki Pa Ni Lilyon èk apwé nou kay kozé asou sé kwèsyon sala:
Lè nou ka gadé diféwan nasyon jwé spò kont yonn a lòt, ki mannyè nou sa moutwé nou pa ka sipòté ni yonn ni lòt?
Menm si sé disizyon-an politisyen fè ka afèkté nou, ki mannyè nou sa moutwé nou pa ka mélé kò nou an zafè latè-a?
Ki mannyè jan nou ében sa nou tann an nouvèl-la sa fèʼy difisil pou nou pa mélé kò nou an zafè latè-a?
An ki diféwan sitiwasyon an Kwityen pa sipozé mélé kòʼy an zafè latè-a, ni an katjil li ni an aksyonʼy?
ADAN MOUN PÉ MANDÉ: “Pouki ou pa ka salwé flag-la ében chanté chanson nasyonnal-la?”
Ki mannyè ou té kay wéponn?
CHONJÉ SÉ PWEN SALA
Kwityen ki vwé ni pou fè gwo éfò pou pa mélé kò yo an zafè latè-a an katjil yo, an pawòl yo, épi an aksyon yo.
Annou Wivizé Sa Nou Ja Apwann
Ki mannyè nou sipozé gadé sé gouvèdman-an?
Pouki nou pa ka mélé kò nou an zafè latè-a?
Ki sitiwasyon ki pé fèʼy difisil pou nou pa mélé kò nou an zafè latè-a?
LÒT ENFÒMASYON OU SA GADÉ
Kisa nou pé ni pou fè pou nou pa mélé kò nou an zafè latè-a?
Kisa fanmi sa fè pou pa mélé kò yo an zafè latè-a?
Lè an moun ka fè défans pou péyiʼy, pouki sa pa pli gwan lonnè-a i sa ni?
Apwann mannyè pou pa mélé kòʼw an zafè latè-a lèʼw ka gadé pou twavay.
-
-
Ou Sa Wèsté Fidèl Lèʼw Ka Èspéyansé PèsikasyonOu Sa Ni On Bon Lavi Pou Tout Tan!—Annou Wè Sa Bib-la Ka Di
-
-
Kon Kwityen ki vwè, nou tout kay èspéyansé òpozisyon. Anfen, moun kay jis pèsikité nou. Mé, ès sa sipozé fè nou pè?
1. Ki mannyè nou sav moun kay pèsikité nou?
Bib-la di a klè: “Tout moun ki vlé viv an lavi ki nèt, menm kon Jézi Kwi moutwé yo pou fè, kay jwenn pèsikasyon.” (2 Timòfi 3:12) Yo té pèsikité Jézi paski i pa té menm épi sé jan latè-a. Nou osi pa menm épi sé jan latè-a. Konsa, i pa ka sipwi nou lè ògannizasyon fo wilizyon, épi sé gouvèdman-an ka pèsikité nou.—Jan 15:18, 19.
2. Kisa nou sa fè pou pwépawé pou pèsikasyon?
Pou pwépawé pou pèsikasyon nou ni pou fòtifyé konfyans nou an Jéhova apwézan. Konsa, pwan tan chak jou pou palé épi Jéhova an lapwiyè, épi pou li an pòsyon an Bib-la. Osi, atandé sé mitin-lan wéglé. Si nou fè sé bagay sala, nou kay ni fòs-la épi kouwaj-la pou wèsté fidèl anba pèsikasyon, menm si sé fanmi nou ki ka pèsikité nou. Zapòt Pòl té èspéyansé an chay pèsikasyon. Mé an Hibrou 13:6 i di: “Sé [Jéhova] ki ka édé mwen, mwen pa kay pè.”
An lòt bagay nou sa fè pou édé nou ni pli kouwaj, sé pou pwéché wéglé. Lè nou ka pwéché, nou ka apwann pou mété konfyans nou an Jéhova, épi pou ganyen a bout pèwèz lézòm. (Pwovèb 29:25) Alò, siʼw dévlopé kouwaj-la pou pwéché apwézan, ou kay byen pwépawé pou kontiné pwéché, menm si gouvèdman-an vlé doubout twavay pwèchman-an.—1 Tèsalonnika 2:2.
3. Lè nou wèsté fidèl anba pèsikasyon, ki bennéfis nou ka twapé?
Pyèsonn pa kontan pèsikasyon. Mé lè nou wèsté fidèl anba pèsikasyon, lafwa nou ka vini pli fò. Osi, nou ka vini pli pwé Jéhova, paski nou ka wè mannyè i ka édé nou lè nou ka santi nou fèb. (Li Jémz 1:2-4.) Kanmenm, i ka fè Jéhova lapenn lèʼy wè nou ka soufè. Mé, lèʼy wè nou ka tjenbé fò èk nou pa ka ladjé, i ka kontan. Bib-la di: “Si ou soufè paski ou fè bon épi ou pwanʼy dousman, Bondyé kay benniʼw.” (1 Pita 2:20) Konsa, si nou wèsté fidèl anba pèsikasyon, Jéhova kay ban nou lavi étonnèl an pawadi-a. A lè sala nou kay sa adowé Jéhova san pyès òpozisyon.—Mafyou 24:13.
ANNOU APWANN PLI
Apwézan, annou apwann pouki ou sa ni konfyans ou sa wèsté fidèl pou Jéhova lèʼw ka èspéyansé pèsikasyon. Osi, ou kay apwann mannyè Jéhova kay benniʼw pou fidèlitéʼw.
4. Ou sa wèsté fidèl lè fanmiʼw ka opozéʼw
Jézi té sav délè fanmi nou pa té kay sipòté disizyon nou pou sèvi Jéhova. Annou li Mafyou 10:34-36, èk apwé nou kay kozé asou kwèsyon sala:
Kisa fanmi nou pé di ében fè, lè nou fè disizyon-an pou sèvi Jéhova?
Pou wè yon ègzanp an sa fanmi nou pé fè ében di, annou gadé VIDIYO-A, Jéhova Té Anmasé Nou èk apwé nou kay kozé asou kwèsyon sala:
Kisa ou kay fè si an moun an fanmiʼw ében an jan vlé anpéchéʼw sèvi Jéhova?
Annou li Sam 27:10 èk Mak 10:29, 30. Apwé nou li chak lévanjil, nou kay kozé asou kwèsyon sala:
Siʼw ka èspéyansé òpozisyon hòd an moun an fanmiʼw ében an jan, ki mannyè lévanjil sala sa édéʼw?
5. Kontiné adowé Jéhova magwé ou ka èspéyansé pèsikasyon
Nou bizwen kouwaj pou kontiné adowé Jéhova lè lézòt moun ka éséyé anpéché nou adowéʼy. Annou gadé VIDIYO-A, Kontiné Moutwé Kouwaj Magwé Pèsikasyon èk apwé nou kay kozé asou kwèsyon sala:
Kisa ou apwann an sé ègzanp-lan an vidiyo-a, ki sa édéʼw pou ni pli kouwaj?
Annou li Twavay 5:27-29 èk Hibrou 10:24, 25. Apwé nou li chak lévanjil nou kay kozé asou kwèsyon sala:
Pouki i si tèlman enpòtan pou nou kontiné adowé Jéhova, menm si gouvèdman-an di nou pou pa pwéché ében pou pa atandé mitin?
6. Jéhova kay édéʼw wèsté fidèl
Témwen Jéhova oliwon latè-a, ni sa ki jenn ni sa ki an laj, ka kontiné wèsté fidèl pou Jéhova magwé yo ka èspéyansé pèsikasyon. Pou wè sa ki ka édé yo wèsté fidèl, annou gadé VIDIYO-A, Dyé Jéhova Kay Fòtifyé Mwen èk apwé nou kay kozé asou kwèsyon sala:
Kisa ki té édé sé fwè-a épi sé sè-a an vidiyo-a pou wèsté fidèl?
Annou li Ronm 8:35, 37-39 èk 2 Kòrint 4:7. Apwé nou li chak lévanjil, nou kay kozé asou kwèsyon sala:
Ki mannyè lévanjil sala ka baʼw asiwans-lan ki, ou sa wèsté fidèl anba népòt difikilté?
Annou li Mafyou 5:10-12, èk apwé nou kay kozé asou kwèsyon sala:
Pouki ou sa ni tjè kontan magwé ou ka èspéyansé pèsikasyon?
Plizyè milyon Témwen Jéhova ka wèsté fidèl magwé yo ja èspéyansé òpozisyon. Ou sa wèsté fidèl tou!
ADAN MOUN KA DI: “Mwen pa kwè mwen kay sa andiwé anba pèsikasyon.”
Ki diféwan lévanjil ou sa sèvi pou édé moun-lan ni konfyans-lan ki, yo sa andiwé anba pèsikasyon?
CHONJÉ SÉ PWEN SALA
Magwé nou ka èspéyansé pèsikasyon, Jéhova ka apwésyé tout éfò nou ka fè pou sèviʼy. Épi èd Jéhova, nou sa wèsté fidèl!
Annou Wivizé Sa Nou Ja Apwann
Ki mannyè nou sav nou kay èspéyansé pèsikasyon?
Kisa ou sa fè apwézan pou pwépawé pou pèsikasyon?
Kisa ki sa édéʼw ni konfyans-lan ki, ou sa wèsté fidèl pou Jéhova anba népòt difikilté?
LÒT ENFÒMASYON OU SA GADÉ
Yo té mété an jenn fwè an pwizon, paski i pa té ka mélé kòʼy an zafè ladjè. Gadé mannyè Jéhova té édéʼy andiwé.
Pou plizyè lanné an fwè épi madanm li té èspéyansé òpozisyon. Gadé sa ki té édé yo wèsté fidèl.
Apwann mannyè ou sa ni kouwaj lè ou ka èspéyansé pèsikasyon.
Lè fanmi nou ka opozé nou, kisa nou sipozé chonjé? Èvèk kisa nou sa fè pou tjenn lapé èk wèsté fidèl pou Jéhova?
“Lavéwité-a Pa Ka Mennen Lapé, I Ka Mennen Divizyon” (Gad-la, Òktòb 2017)
-