Pli pasé kat san «400» lanné apwé yo wibati sé masonn-lan oliwon Jérouzalèm, yon pwèt yo té ka kwiyé Zèkaraya èvèk madanm li Élizabèt, té ka wèsté toupwé vil-la. Yo té ja mayé pou konmen tan, mé yo pa té ni pyès ich. Yon jou, paditan Zèkaraya té ka bwilé lansan an Kay Bondyé-a, on nanj pawèt douvan’y. Non nanj-lan sété Gabwiyèl. Lè Zèkaraya wè nanj-lan, tjè’y soté èk i vini pè. Mé nanj-lan di’y: ‘Zèkaraya ou pa bizwen pè, paski Bondyé ban mwen bon nouvèl pou mennen ba’w. Madanm ou Élizabèt kay fè on gason, épi ou ni pou kwiyé tibway-la, Jan. Jéhova ja chwazi Jan pou’y fè on twavay ki byen spésyal.’ Zèkaraya mandé nanj-lan: ‘Ki mannyè mwen sa kwè sa’w ka di mwen-a, lè mwen épi madanm mwen ja gwan moun? Nou twò vyé pou nou fè ich.’ Nanj-lan di Zèkaraya: ‘Sé Bondyé ki voyé mwen pou ba’w bon nouvèl sala, mé ou pa kwè mwen. Konsa, ou kay vini moumou, èk ou pa kay palé ankò, jistan ti bébé-a fèt.’

Bon, sé moun-lan té dèwò-a ka èspéyé Zèkaraya, épi yo té ka katjilé ki mannyè i té ka wèsté tèlman lontan andidan Kay Bondyé-a kou sala. Finalman, Zèkaraya sòti dèwò èk sé moun-lan té vlé konnèt kisa ki té wivé’y. Mé i té ka annèk fè sin ba yo épi lanmenʼy, paskè i pa té sa palé. Konsa yo wéyalizé, Zèkaraya té wisouvwè on konmisyon hòd Bondyé.

On ti tan apwé sa, Élizabèt twapé kò’y gwo bouden èk i fè on ti gason, menm kon nanj-lan té di. Fanmi’y épi jan’y vini wè ti bébé-a, èk yo sélébwé épi’y paski yo té tèlman kontan. Élizabèt di yo: ‘Non ti bébé-a sé Jan.’ Yo di Élizabèt: ‘Mé ou pa ni pyèsonn an fanmi’w ki ni non sala. Pouki ou pa ka bay tibway-la menm non épi papa’y? Kwiyé’y Zèkaraya.’ Lè sala, Zèkaraya ékwi, ‘nonʼy sé Jan,’ asou on bagay. Èk lamenm, Zèkaraya koumansé palé ankò! Nouvèl sala simen toupatou an péyi Joudiya. Sé moun-lan té ka di an tjè yo: ‘Kisa ti manmay sala kay yé lè’y vini gwan?’

Lè sala, Lèspwi Bondyé pozé asou Zèkaraya, èk i koumansé palé sé pawòl-la Bondyé té ba’y pou palé-a. I di: ‘Annou glowifyé Jéhova paskè i té pwonmèt Abrahanm, i té kay voyé on Sovè. Sa vlé di, i té kay voyé Mèsaya-a pou délivwé nou. Jan kay wann sèvis kon yon pwofèt, èk i kay fè moun konnèt, Mèsaya-a ka vini.’

Bon, Élizabèt té ni on kouzin yo té ka kwiyé Mari. Mari sala èspéyansé on bagay ki té byen èstòdinè osi. Mé nou kay apwann konsèné sa, an lòt lison-an.

Élizabèt té ni on ti kouzin ki té ka wèsté an vil Nazawèt an Galili. Non’y sété Mari, èk i té kay mayé épi on chapantyé yo té ka kwiyé Jozèf. Lè Élizabèt té sis «6» mwa gwo bouden, nanj Gabwiyèl alé oti Mari. Lè nanj-lan wivé, i di Mari: ‘Bèl bonjou, Mari. Ou ni favè Bondyé.’ Mé sé pawòl sala distwé lèspwi Mari, èk i té vlé konnèt kisa nanj-lan té vlé di pa sa. Konsa nanj-lan di’y: ‘Ou pa bouzwen pè Mari paskè, ou ni favè Bondyé. Ou kay vini gwo bouden, ou kay fè on ti gason, èk ou kay ni pou kwiyé’y, Jézi. I kay kondwi kon Wa, èk Wéyòm li kay diwé pou tout tan.’

Mari di nanj-lan: ‘Mé ki mannyè sa kay fèt, lè mwen p’òkò kouché épi pyès nonm?’ Nanj-lan di’y: ‘Pou Bondyé, tout bagay posib. Lèspwi Bondyé kay vini anlèʼw, èk pouvwa Bondyé kay kouvè’w kon yon lonbwaj. Ou kay twapé kò’w gwo bouden, èk ou kay fè on gason. Fanmi’w Élizabèt gwo bouden osi.’ Lè sala, Mari di nanj-lan: ‘Mwen sé sèvant Bondyé. Kité tout bagay fèt menm kon ou di-a.’

Apwé sa, Mari pwépawé kò’y èk i pati alé adan on vil an sé mòn-lan an péyi Jouda, pou’y wè Élizabèt. Lè’y wivé, i di Élizabèt bonjou. Kon Élizabèt tann vwa Mari, ti bébé-a ki té an bouden’y-lan soté, èk a menm lè-a Élizabèt wisouvwè Lèspwi Bondyé. I di Mari: ‘Jéhova benni’w. I sé on lonnè pou mwen wisouvwè manman Senyè mwen lakay mwen.’ Mari di Élizabèt: ‘Mwen ka glowifyé Jéhova épi tout tjè mwen.’ Èk Mari wèsté lakay Élizabèt pou twa «3» mwa. Apwé sa, i witounen lakay li an Nazawèt.

Bon, lè Jozèf vini konnèt Mari té gwo bouden, i pa té vlé mayé épi Mari ankò. Mé apwé i fini katjilé asou sa, on nanj pawèt douvan’y adan on wèv, épi nanj-lan di’y: ‘Jozèf, ou pa bizwen pè pou’w mayé épi Mari, paskè sé pa anyen mové i fè. Sé lèspwi Bondyé ki fè’y ansent.’ Konsa Jozèf mayé Mari, èk i mennen’y lakay li.