Kisa Ou Sipozé Fè Lè Moun Maltwété’w Èben Lézòt?

1-2. (a) Kisa an chay moun ka fè lè moun maltwété yo èben lézòt? (b) Kisa nou kay diskité an atik sala?

NOU ka viv adan an latè ki plen enjistis. An chay moun ka maltwété lézòt paski yo pòv, pou lapéti plas-la yo sòti, was yo, mannyè yo ka gadé, ében pou lòt wézon. Osi an chay moun ka soufè paski byen souvan moun ki ni gwo biznis èben moun an gouvèdman sèlman mélé épi mannyè yo sa fè pli lajan. Wi, sé bagay sala ka annékòz ni nou ni lòt moun pou soufè.

² Bon, sé pa dé faché an chay moun ka vin faché lè yo wè moun ka maltwété yo èben lézòt. Wi, tout moun vlé viv adan an latè koté yo ka santi sòv, èk koté moun ka twété yo byen. Èk a kòz di sa, la ni moun ki ka éséyé wanjé sé pwòblenm-lan an péyi yo èben an latè-a. Konsa, yo ka pwotèsté kont sé gouvèdman-an èk sé lwa-a, ében yo ka voté pou politisyen ki ka pwonmèt yo kay wanjé sé pwòblenm-lan. Kanmenm, kon Kwityen nou “pa menm èk sé jan latè-a”. Alò, nou ka èspéyé asou Wéyòm Bondyé ki kay tiwé tout enjistis asou latè-a. (Jan 17:16) Mé magwé nou konnèt sa, délè nou ka santi twis èk jis faché lè nou ka wè moun ka maltwété lézòt. Èk nou pé mandé kò nou: ‘Lè mwen wè enjistis, kisa mwen sipozé fè? Ès la ni anyen mwen sa fè apwézan?’ Bon, pou édé nou wéponn sé kwèsyon sala, annou wè mannyè Jéhova èk Jézi ka santi lè yo wè moun ka maltwété lézòt.

JÉHOVA ÈK JÉZI HAYI ENJISTIS

3. Pouki nou ka santi faché lè nou wè moun ka maltwété lézòt? (Izaya 5:7)

³ Bon. Bib-la ka di nou pouki i ka distwé nou lè moun maltwété nou èben lè nou wè moun ka maltwété lézòt. Èvèk sa sé paski Bib-la ka di nou Bondyé “enmen sa ki dwèt èk i pa ni pwéféwans”. Èk i fè nou épi abilité-a pou swiv ègzanp li. (Sam 33:5; Jen. 1:26) Wi, Bondyé pa ka janmen maltwété moun, èk i pa vlé moun maltwété yonn a lòt! (Dito. 32:​3, 4; Mic. 6:8; Zèk. 7:9) Pou ègzanp, an tan pwòfèt Izaya, Jéhova té tann an chay sé jan Izwayèl-la ‘ka hélé pou soukou’, paski lòt jan Izwayèl té ka maltwété yo. (Li Izaya 5:7.) Konsa Jéhova pini sé jan Izwayèl-la ki té ka dézobéyi lwa’y, èk ki té ka maltwété lézòt.—Izay. 5:​5, 13.

4. Ki mannyè Jézi ka santi lè’y wè moun ka maltwété lézòt? (Gadé pòtwé-a osi.)

⁴ Bon, menm kon Jéhova, Jézi enmen sa ki dwèt èk i hayi enjistis. Pou ègzanp, yon jou Jézi wè on nonm ki té ni an lanmen enfim. Sa fè tjè’y fè’y mal, alò i djéwi nonm-lan. Mé lè sé mèt wilizyon-an wè sa, yo vin faché. Yo di Jézi té ka kasé lwa Sabaf-la. Èk yo pa té menm kontan nonm-lan pa té ka soufè ankò. Bon, ki mannyè sa té fè Jézi santi? Èben lévanjil-la di, “yo té [ka] fè’y lapenn, paski tjè yo té tèlman wèd”.—Mak 3:​1-6.

5. Pouki nou pa sipozé wèsté faché lè nou wè enjistis?

⁵ Wi, ni Jéhova ni Jézi ka santi faché lè yo wè moun ka maltwété lézòt. Alò, nou pa ka péché si nou ka santi faché lè nou wè enjistis. (Èfés. 4:26) Mé kanmenm, nou ni pou kontwolé waj nou, paski nou pa sa doubout enjistis. Anfen, si nou wèsté faché pou an chay tan, nou kay vini dékonpòté, èk nou sa jis tonbé malad. (Sam 37:​1, 8; Jémz 1:20) Konsa, kisa nou sipozé fè lè nou ka wè moun ka maltwété lézòt? Èben annou apwann hòd ègzanp Jézi.

SA JÉZI TÉ FÈ, LÈ’Y TÉ WÈ MOUN TÉ KA MALTWÉTÉ LÉZÒT

6. Lè Jézi té asou latè-a ki enjistis i té wè? (Gadé pòtwé-a osi.)

⁶ Lè Jézi té asou latè-a i té wè an chay enjistis. Pou ègzanp, i té wè mannyè sé mèt wilizyon-an té ka fè lavi sé moun-lan difisil, paski yo té ka mété an chay wèg asou yo. (Maf. 23:​2-4) I té osi wè mannyè sé kondwitè Ronm-lan té ka maltwété sé moun-lan. Wi, an chay sé Jwif-la té vlé sòti anba kondwit Ronm. Anfen, adan di yo té jis fè gwoup pou goumen kont Ronm. Mé Jézi pa té ka sipòté pyès gwoup ki té vlé goumen pou chanjé gouvèdman-an. Èvèk lè sé moun-lan té vlé fè’y wa, i pa té vlé sa pyès. Anfen, lévanjil-la di, “i pati ankò an sé mòn-an pa kòʼy yonn.”—Jan 6:15.

7-8. Pouki Jézi pa té éséyé tiwé tout soufwans padan i té asou latè-a? (Jan 18:36)

⁷ Bon, Jézi pa té mélé kò’y an pòlitik pou éséyé wanjé sé pwòblenm-lan i té ka wè asou latè-a. Mé poutji? Ében sa sé paski, Jézi té sav lézòm pa ni dwa-a ében abilité-a pou kondwi lézòt. (Sam 146:3; Jér. 10:23) An plis di sa, lézòm pa sa tiwé sé dé «2» bagay-la ki ka annékòz soufwans. Pwèmyéman lézòm pa sa tiwé Satan. Satan sé kondwitè latè-a, i méchan, èk an chay moun ka swiv li. (Jan 8:44; Èfés. 2:2) Èvèk dézyenman, lézòm pa sa tiwé péché. Èk sa sé wézon-an menm si moun bon, èben janti, yo pa sa wanjé sé pwòblenm-lan an latè-a, paski yo pa ka toujou fè sa ki jis.—Éklé. 7:20.

⁸ Jézi té sav sé sèlman Wéyòm Bondyé ki kay tiwé tout sé pwòblenm nou-an, èk sé bagay-la ki ka annékòz yo. Èk sa sé wézon-an i té twavay si tèlman wèd, pou “pwéché Bon Nouvèl-la konsèné mannyè Bondyé [kay] kondwi sé moun li-an”. (Louk 8:1) An mannyè sala Jézi soulajé sé moun-lan ki té ka èspéyé an bout pou soufwans èk movèzté. (Maf. 5:6; Louk 18:​7, 8) Kanmenm, pyès gouvèdman lézòm pa sa fè sé chanjman sala, sé sèlman Wéyòm Bondyé. Èk Wéyòm Bondyé “pa sòti an latè sala”.—Li Jan 18:36.

LÈ OU WÈ MOUN KA SOUFÈ, FÈ MENM KON JÉZI

9. Pouki ou ni konfyans-lan ki, sé sèlman Wéyòm Bondyé ki kay tiwé tout soufwans?

⁹ Nou ka viv an “dènyé tan-an”, konsa la ni plis pwòblenm èk soufwans pasé lè Jézi té asou latè-a. Mé menm kon an tan Jézi, sé Satan èk sé moun-lan ki ka swiv li-a ki ka annékòz moun pou soufè. (2 Tim. 3:​1-5, 13; Wév. 12:12) Bon. Menm kon Jézi, nou sav sé sèlman Wéyòm Bondyé ki kay détwi Satan èk tiwé tout movèzté. Konsa, nou pa ka ni sipòté ni pwotèsté kont pyès gouvèdman pou doubout enjistis. Pito sa, nou ka mété tout konfyans nou an Wéyòm Bondyé. Annou konsidiwé ègzanp Stacy.a Avan Stacy apwann lavéwité-a, byen souvan i té ka pwotèsté kont enjistis. Kanmenm apwé an tan, i pa té asiwé si sa’y té ka fè té kay vwéman édé moun, èben wanjé sé pwòblenm-lan. Stacy di: “Délè lè mwen té ka pwotèsté, mwen pa té asiwé si sa té kay vwéman wanjé pwòblenm-lan. Mé apwézan mwen ni konfyans-lan ki, Wéyòm Bondyé kay wanjé tout pwòblenm. Wi, Jéhova kay fè sa mwen pa sa janmen fè, i kay mennen an bout pou tout soufwans.”—Sam 72:​1, 4.

10. Silon Mafyou 5:​43-48, pouki nou pa ka éséyé chanjé lwa èk gouvèdman? (Gadé pòtwé-a osi.)

¹⁰ Jòdi jou, an chay moun ka fòmé gwoup ki ka éséyé pou chanjé gouvèdman. Mé, an chay sé moun sala ka vini si tèlman faché, yo ka kasé lwa péyi-a èk yo ka jis blésé moun. Kanmenm, Jézi pa janmen enstwi nou pou fè sa. (Èfés. 4:31) Yon fwè yo ka kwiyé Jeffrey di: “Lè moun ka pwotèsté i ézé pou yo vini faché, èk yo ka koumansé détwi èk vòlè bagay èk jis blésé moun.” Kanmenm Jézi enstwi nou pou twété moun épi lanmityé, jis moun ki pa ka dakò épi nou èben moun ki ka pèsikité nou. (Li Mafyou 5:​43-48.) Konsa, kon Kwityen nou ka fè tout sa nou pé pou fè menm kon Jézi.

11. Pouki délè i difisil pou swiv ègzanp Jézi?

¹¹ Bon. Magwé nou sav Wéyonm Bondyé kay tiwé tout soufwans konplètman, délè i difisil pou swiv ègzanp Jézi lè moun ka maltwété nou. Anfen sa sé mannyè-a yon sésé, Janiya, té ka santi, lè moun té ka maltwété’y a kòz di was li. I di: “Sa sé moun-an di mwen fè mwen santi byen twis, èk mwen té si tèlman faché mwen té vlé yo péyé pou sa. Osi mwen té jis kwè mwen té kay santi pli mèyè si mwen té sipòté an gwoup ki té ka pwotèsté kont moun ki té ka maltwété lézòt a kòz di kilti yo èk was yo.” Kanmenm apwé an lè Janiya wéyalizé i té ni pou chanjé katjil li. I di: “Mwen wéyalizé mwen té ka mété konfyans mwen an moun pito mwen mété konfyans mwen an Jéhova. Èvèk mwen doubout asosiyé épi sé moun-an ki té ka pwotèsté-a.” Wi, sé vwé, nou ka santi faché lè moun maltwété nou, èben lè nou wè yo ka maltwété lézòt. Mé nou ni pou pwan pokosyon pou kontwolé waj nou, èk pou pa janmen mélé ko nou an zafè latè-a.—Jan 15:19.

12. Pouki nou ni pou pwan pokosyon épi sa nou ka li, gadé, ében kouté?

¹² Bon. Kisa ki sa édé nou pou wèsté kam lè moun maltwété nou ében lézòt? Ében nou sa pwan pokosyon épi sa nou ka li, gadé, ében kouté. Mé poutji? Ében sa sé paski, byen souvan, moun ka mété bagay asou intannèt-la pou enflouwansé imosyon moun, èk pou pòté plent kont gouvèdman-an. Osi délè, sé moun-lan ki ka bay nouvèl-la ka bay lopinyon yo pito sa ki té vwéman fèt. Èvèk menm si enfòmasyon-an aplon, mandé kò’w: ‘Si mwen kontiné li ében kouté nouvèl-la, ès sa kay wanjé pwòblenm-lan?’ An plis di sa, si nou pasé an chay tan ka kouté èben li nouvèl konsa, sa sa jis ban nou tèt cho, fè nou santi twis, èben faché. (Pwov. 24:10) Apa di sa, nou sa jis obliyé sé Wéyòm Bondyé ki kay wanjé tout sé pwòblenm-lan ki an latè-a. Èk nou sa jis doubout mété Wéyòm Bondyé pwenmyé an lavi nou.

13. Lè nou li ében kouté Bib-la touléjou, ki mannyè sa ka édé nou ni an bon atitid lè nou wè moun ka maltwété lézòt?

¹³ Lè nou li ében kouté Bib-la touléjou, èk nou fè tan pou mèdité asou sa nou li èben kouté, sa ka édé nou pou konnèt sa pou fè lè moun maltwété nou, èben lè nou wè moun ka maltwété lézòt. Bon, annou konsidiwé ègzanp sésé Alia. Lè Alia té ka wè moun té ka maltwété lézòt sa té ka fè’y santi byen twis. Èk i té ka osi santi byen faché lè’y wè sé moun sala pa té ka twapé pinisyon. I di: “Mwen té ni pou asiz èk mandé kò mwen: ‘Ès mwen vwéman kwè Jéhova kay wanjé tout sé pwòblenm sala?’ Èvèk mwen wéyalizé, si mwen té vwéman kwè Jéhova kay wanjé tout sé pwòblenm sala, mwen té ni pou chanjé katjil mwen. Èk sété diwan tan sala mwen li Jòb 34:​22-29. Wi, sé vèwsé sala fè mwen chonjé Jéhova ka wè tout bagay, èk sé sèlman Jéhova ki kay jijé moun dwèt, èk ki kay wanjé tout pwòblenm nou.” Kanmenm, kisa nou sa fè padan nou ka èspéyé asou Wéyòm Bondyé pou tiwé tout enjistis?

BAGAY NOU SA FÈ PADAN NOU KA ÈSPÉYÉ WÉYÒM BONDYÉ POU WANJÉ SÉ PWÒBLENM-LAN KI AN LATÈ-A

14. Kisa nou sa fè apwézan lè nou wè moun ka maltwété lézòt? (Kòlòsé 3:​10, 11)

¹⁴ Bon. Nou pa sa chanjé mannyè moun ka twété lézòt, mé nou sa fè asiwé nou ka twété moun byen. Wi, kon nou ha apwann, lè nou moutwé moun lanmityé nou ka swiv ègzanp Jézi. Konsa nou ka éséyé pou moutwé tout moun jantiyès, jis moun ki ka pèsikité nou. (Maf. 7:12; Ronm 12:17) Èvèk lè nou twété tout moun épi jantiyès sa ka bay Jéhova tjè kontan.—Li Kòlòsé 3:​10, 11.

15. Ki mannyè nou ka wédé moun lè nou di yo konsèné sa Bib-la ka enstwi?

¹⁵ Bon. Pli mèyè mannyè-a nou sa édé moun sé lè nou enstwi yo konsèné Jéhova. Alò, pouki nou ka di sa? Ében sa sé paski, lè moun apwann konsèné Jéhova èk yo vlé plè’y, yo ka fè chanjman an lavi yo, èk yo ka koumansé twété moun épi jantiyès èk lanmityé. (Izay. 11:​6, 7, 9) Pou ègzanp, annou konsidiwé èspéyans fwè Jemal. Avan Jemal vini an Témwen Jéhova i té adan an gwoup ki té ka goumen pou chanjé gouvèdman-an an péyi-a. Paski an lopinyon yo, gouvèdman sala pa té bon. Jemal di: “Lè ou goumen kont moun, ou pa kay chanjé yo. Mé lè moun apwann sé lavéwité-a ki an Bib-la yo sa fè chanjman. Èk sé sa ki édé mwen pou chanjé.” Wi, sa Jemal apwann pousé’y pou doubout goumen. Konsa, lè nou enstwi moun sé lavéwité-a ki an Bib-la, nou ka ankouwajé yo pou twété lézòt moun byen.

16. Pouki nou vlé di moun konsèné sa Wéyonm Bondyé kay fè?

¹⁶ Bon. Menm kon Jézi, nou anvi di moun Wéyòm Bondyé kay tiwé tout soufwans pou tout tan. Wi, èspwa sala sa ankouwajé moun lézòt ka maltwété. (Jér. 29:11) Pou ègzanp, Stacy nou té palé konsèné pli bonnè-a di: “Paski mwen sav Bondyé kay tiwé tout soufwans, mwen sa wèsté kam lè moun ka maltwété mwen, èben lè mwen wè yo ka maltwété lézòt. Wi, Jéhova ka sèvi konmisyon-an ki an Bib-la pou soulajé moun.” Konsa, nou vlé toujou pawé pou sèvi sé pwonmèt-la ki an Bib-la pou bay moun èspwa. Alò i enpòtan pou nou byen konnèt èk pou nou konfyé sa Bib-la ka di konsèné soufwans. Èk si nou fè sa, nou kay sa enstwi moun poutji nou ka soufè èk sa Jéhova kay fè pou doubout soufwans.b

17. Ki mannyè Jéhova ka édé nou lè moun ka maltwété nou?

¹⁷ Bon. Nou sav tout tan Satan “ka kondwi latè” sala, moun kay kontiné soufè. Mé nou ni èspwa, paski Jéhova ha pwonmèt nou i kay édé nou apwézan, èk i kay tiwé Satan èk tout movèzté an tan pou vini. (Jan 12:31) Pou ègzanp, Jéhova ka di nou an Bib-la pouki la ni si tèlman soufwans. Èk an plis di sa, i ka moutwé nou i mélé épi moun ki ka èspéyansé enjistis. (Sam 34:​17-19) Osi, i ban nou ègzanp Jézi pou moutwé nou sa nou ni pou fè lè moun ka maltwété nou. Èk mannyè Wéyòm li kay tiwé enjistis pou tout tan. (2 Pita 3:13) Alò annou kontiné fè tout sa nou pé pou pwéché bon nouvèl-la konsèné Wéyòm Bondyé. Èk annou kontiné gadè douvan pou tan-an lè tout latè-a kay plèn épi ‘jistis èk ladwati.’—Izay. 9:7.