Ma Matayo Ocoyo
1 Man buk ma tito lok* kom Yecu Kricito. En wod* pa Daudi ki wod pa Abraim:
2 Abraim onywalo Icaka;
Icaka onywalo Yakobo;
Yakobo onywalo Juda kacel ki omegine;
3 Juda ki Tamar gunywalo Perej ki Jera;
Perej onywalo Kejeron;
Kejeron onywalo Ram;
4 Ram onywalo Aminadab;
Aminadab onywalo Naacon;
Naacon onywalo Calmon;
5 Calmon ki Rakab gunywalo Boaj;
Boaj ki Ruth gunywalo Obed;
Obed onywalo Yece;
6 Yece onywalo kabaka Daudi.
Daudi ki dako pa Uria gunywalo Solomon;
7 Solomon onywalo Rekoboam;
Rekoboam onywalo Abija;
Abija onywalo Aca;
8 Aca onywalo Yekocapat;
Yekocapat onywalo Jekoram;
Jekoram onywalo Ujia;
9 Ujia onywalo Yotam;
Yotam onywalo Akaj;
Akaj onywalo Kejekia;
10 Kejekia onywalo Manace;
Manace onywalo Amon;
Amon onywalo Yocia;
11 Yocia onywalo Yekonia kacel ki omegine i kare ma kitero Lujudaya i opii i Babilon.
12 Lacen ma dong kiterogi woko i Babilon, Yekonia onywalo Calatiel;
Calatiel onywalo Jerubabel;
13 Jerubabel onywalo Abiud;
Abiud onywalo Eliakim;
Eliakim onywalo Ajor;
14 Ajor onywalo Jadok;
Jadok onywalo Akim;
Akim onywalo Eliud;
15 Eliud onywalo Eleajar;
Eleajar onywalo Matan;
Matan onywalo Yakobo;
16 Yakobo onywalo Yucepu cwar Maliam, ma onywalo Yecu, ma bene kilwongo ni Kricito.
17 Kwari pa Kricito ducu nicakke ki i kom Abraim nio i kom Daudi obedo 14, dok nicakke ki i kom Daudi nio wa i kare ma kiterogi i Babilon obedo 14, ki dong nicakke i kare ma kiterogi i Babilon nio wa i kom Kricito obedo 14.
18 Man aye gin mutimme ma pud peya kinywalo Yecu Kricito: l kare ma minne Maliam dong oye me nyomme ki Yucepu, ento ma peya gucako bedo kacel, kinongo ni Maliam ogamo ic pi teko pa cwiny maleng. 19 Ento, kit macalo cware Yucepu onongo kite atir dok pe mito leyo wi Maliam i nyim lwak, en omoko tamme me keto kenygi woko i wi mung. 20 Ento, ma en dong otyeko tamo lok magi ducu, nen! lamalaika pa Jehovah* onyutte bote i wang lek ci owacce ni: “Yucepu, wod pa Daudi pe ilwor tero dakoni Maliam gang, pien en ogamo ic pi teko pa cwiny maleng. 21 En binywalo latin laco dok ibicako nyinge ni Yecu,* pien en bilaro dano ki i balgi.” 22 Jami magi ducu otimme me cobo lok ma Jehovah otito kun tiyo ki lanebine, ni: 23 “Nen! Anyaka ma peya obedo ki laco biyac ci binywalo latin laco, dok kibicako nyinge ni Immanuel,” ma te lokke gonnye ni, “Lubanga Tye Kwedwa.”
24 I nge meno, Yucepu oco ki i wang nino dok otimo gin ma lamalaika pa Jehovah owacce, ci otero dakone gang. 25 Ento en pe orwatte kwede i buto nio ka dong onywalo latin laco, ci Yucepu ocako nyinge ni Yecu.