Ma Matayo Ocoyo
26 I kare ma Yecu otyeko loko lok magi ducu, en owaco bot lupwonnyene ni: 2 “Wungeyo ni i nge nino aryo, wabikwero kwer me Kato, dok kibimiyo Wod pa dano i cing lumonene wek kigure i kom yat.”
3 I kare meno, lulamdog madito* ki ludongo pa lwak gugure kacel i dyekal pa lalamdog madit ma nyinge Kayapa, 4 ci gupiro lok kacel me mako Yecu i wi diro wek gineke woko. 5 Ento gubedo ka waco ni: “Pe myero wamake i nino madit, wek woo obed pe i kin lwak.”
6 I kare ma Yecu onongo tye i Betania i ot pa Cimon ma ladobo, 7 dako mo ma tye ki cupa* me moo ma ngwece kur dok welle dit obino bot Yecu, ci ocako onyo moo meno i wi Yecu ma en tye ka cam. 8 Ma lupwonnyene guneno man, cwinygi ocwer ci guwaco ni: “Pingo kibalo moo-ni abala? 9 Pien onongo kitwero catone i wel madit ci kimiyo centene bot lucan.” 10 Ma Yecu ongeyo gin ma gitye ka wacone, en owaco botgi ni: “Pingo wutye ka yelo dako man? En otimo gin maber i koma. 11 Pien kare ducu wubibedo ki lucan i kinwu, ento pe wubibedo kweda kare ducu. 12 I kare ma en oonyo moo ma ngwece kur-ri i koma, en otimo meno pi yubo koma me ayika. 13 Ada awaco botwu ni, ka mo keken i wi lobo-ni ma kibitito iye kwena maber-ri, gin ma dako-ni otimo bene kibititone me po pire.”
14 I nge meno, Juda Lakeriot, ma en ngat acel i kin jo apar wiye aryo-ni, ocito bot lulamdog madito 15 ci owaco ni: “Wubimiya gin ango wek ami en i cingwu?” Gin guye culle nyig cente me ryal 30. 16 Dong cakke i cawa meno, en obedo ka yenyo kare maber me miyo Yecu i cinggi.
17 I nino mukwongo me Kwer me Mugati ma Tobi Pe Iye, lupwonnye gubino bot Yecu ci guwacce ni: “Ka kwene ma imito ni wacit wayub iye cam me Kato?” 18 En owaco botgi ni: “Wucit i Jerucalem bot Ngadi ci wuwacce ni, ‘Lapwony owaco ni: “Karena dong onyiko cok; abicamo cam me Kato kacel ki lupwonnyena i paconi.”’” 19 Pi meno, lupwonnyene gutimo kit ma Yecu ocikogi kwede ci guyubo jami ducu ma mitte pi kwer me Kato.
20 Ma dong piny oyuto, en obedo piny kacel ki lupwonnyene 12. 21 I kare ma gitye ka cam, en owaco ni: “Ada awaco botwu ni, ngat acel i kinwu bimiya i cing lumonena.” 22 Lupwonnyene cwinygi ocwer matek pi lok man, ci gin ducu ki acel acel gucako penye ni: “Rwot, an ce?” 23 En ogamo ni: “Ngat ma tye ka gweyo dek i atabo kacel kweda aye bimiya i cing lumonena. 24 Ada, Wod pa dano bicito gire, kit ma yam kicoyo kwede i kome, ento can i wi ngat ma bimiye i cing lumonene! Onongo bibedo ber ma loyo ka onongo pe kinywalo dano meno.” 25 Juda, ma en aye ngat ma onongo cok keto lok roro i kome-ni openye ni: “Rabbi, an ce?” Yecu owaco bote ni: “Tye kit ma iwaco-ni.”
26 Ma pud gitye ka cam, Yecu okwanyo mugati, olego lega me pwoc, oturo iye, ci omiyo ki lupwonnyene kun waco ni: “Wukwany dok wucam. Man cung pi koma.” 27 Dok okwanyo kikopo, olego lega me pwoc ci omiyo botgi kun waco ni: “Wun ducu wumat man, 28 pien man cung pi ‘remona me gicikke,’ ma kibionyone pi weko bal pa jo mapol. 29 Ento awaco botwu ni: Nicakke tin, pe dong abimato kongo vino nio wa i nino ma dok abimato manyenne kacel kwedwu i Ker pa Wora.” 30 Lacen, i nge wero wer me pak,* gucito i wi Got Jeituni.
31 Ci Yecu owaco botgi ni: “Wun ducu wubipoto woko pi gin ma bitimme i koma i dyewor man, pien yam kicoyo ni: ‘Abigoyo lakwat, ci romi ma i dwolle gibiket woko ata.’ 32 Ento ka dong kicera, abitelo nyimwu me cito i Galilaya.” 33 Ci Petero ogamo ni: “Kadi bed jo mukene-ni ducu gibipoto pi gin ma bitimme i komi, an pe abipoto matwal!” 34 Yecu owaco bote ni: “Ada awaco boti ni, i dyewor man, ma peya twon gweno okok, nongo dong ityeko kwera woko tyen adek.” 35 Petero owaco bote ni: “Kadi bed mitte ni ato kacel kwedi, pe abikweri matwal.” Lupwonnye mukene-ni bene guwaco gin acel-li.
36 I nge meno, Yecu ocito kacel kwedgi i kabedo ma kilwongo ni Getecemane, ci en owaco bot lupwonnyene ni: “Wubed piny kany, wek an kong acit kuca ka lega.” 37 En owoto ki Petero kacel ki awobe pa Jebedayo aryo-ni, ci ocako kumo dok cwinye ocwer matek. 38 Pi meno, en owaco botgi ni: “Cwinya tye ka cwer matek ma mito neka woko. Wubed kany ci wubed ka kiyo piny kacel kweda.” 39 Ento en owoto anyim manok, oryebbe piny, okulo wiye wa i ngom ci ocako lega ni: “Wora, ka ce twere, kwany kikopo man woko ki bota. Kadi bed kit meno, wek otimme kit ma in imito ento pe kit ma an amito.”
40 En odok bot lupwonnyene ci onongo gunino woko, dok owaco bot Petero ni: “Onongo pe wutwero kiyo piny kacel kweda kadi pi cawa acel keken? 41 Wubed ka kiyo piny dok wumedde ki lega, wek pe wudony i abita. Cwiny gire mito, ento kom aye goro.” 42 En dok ocito tyen me aryone ci olego ni: “Wora, ka ce kikopo man pe twero kato ma pe amato gin ma iye, ci wek gin ma imito otimme.” 43 En odok bot lupwonnyene ci onongo gunino woko, pien nino onongo onurogi matek. 44 Pi meno, en owekogi ci ocito tyen me adekke ka lega, kun nwoyo lega acel-li. 45 Ci en odwogo bot lupwonnyene dok owaccigi ni: “I cawa ma kit man pud wutye ka nino ki yweyo? Nen! Cawa dong oromo wek kimi Wod pa dano i cing lubalo. 46 Dong wua malo, wacitu. Nen! Ngat ma biketo roro i koma dong tye cok.” 47 Ma en pud tye ka lok, nen! Juda, ngat acel i kin jo apar wiye aryo-ni obino kacel ki lwak mapol ma lulamdog madito ki ludongo pa lwak aye ocwalogi. Gin gubino ma gumako pala lucwan ki odoo i cinggi.
48 Ngat ma onongo biketo roro i kome-ni onongo omiyo botgi lanyut, kun waco ni: “Ngat ma abinoto leme aye en kikome; wumake woko.” 49 En ocito atir bot Yecu, owacce ni: “Rabbi itye?” ci onoto leme. 50 Ento Yecu owaco bote ni: “Jal, ibino kany ka timo gin ango?” Ci lwak gubino gumako Yecu dok gukwanye woko ki bot lupwonnyene. 51 Ento nen! ngat acel i kin jo ma gitye kacel ki Yecu owoto pala lucwanne, otongo opii pa lalamdog madit, ci ongunu ite woko. 52 Ci Yecu owaco bote ni: “Dwok pala lucwanni i akurane, pien jo ducu ma gitiyo ki pala lucwan, kibinekogi bene ki pala lucwan. 53 Itamo ni pe atwero lego Wora wek ocwala lumalaika makato buca* mony 12 i cawa man? 54 Ento ka atimo meno, ci Ginacoya ma waco ni myero otimme kit man bicobbe nining?” 55 I cawa meno, Yecu owaco bot lwak ni: “An layak ce ma wubino kany ka maka ki pala lucwan ki odoo-ni? Nino ki nino abedo ka pwony i ot pa Lubanga, ento pe wumaka do! 56 Ento jami magi ducu otimme wek lok* ma yam lunebi gucoyo ocobbe kakare.” I cawa meno, lupwonnye ducu guweke ci guringo woko.
57 Jo ma gumako Yecu gutere bot lalamdog madit Kayapa, ka ma onongo lupwony cik ki ludongo gugure iye. 58 Ento Petero obedo ka lubo kore ki ka mabor bor, nio wa i dyekal pa lalamdog madit. Dok ma en oo kunnu, obedo kacel ki lutic wek enen gin ma bitimme.
59 Lulamdog madito ki jo ducu ma i Lukiko gubedo ka yenyo lucaden ma gitwero loko lok goba i kom Yecu wek gineke woko. 60 Ento pe gunongo lok mo ma gitwero tic kwede kadi bed lucaden mapol ma lugoba gubino. Lacen, lucaden aryo gubino 61 ci guwaco ni: “Laco man owaco ni, ‘Atwero reto ot pa Lubanga piny, ci agero odoco i nino adek keken.’” 62 Pi meno, lalamdog madit oa malo ci openye ni: “Pe ibigamo gin mo? Gin ango ma itwero wacone i kom adot ma joni gukelo i komi?” 63 Ento Yecu oling alinga. Pi meno, lalamdog madit owacce ni: “Amito ni itit botwa ma ikwongnge i nying Lubanga makwo ka ce in aye Kricito ma Wod pa Lubanga!” 64 Yecu owacce ni: “Tye kit ma iwaco-ni. Ento awaco botwu ni: Cakke kombeddi, wubineno Wod pa dano ma obedo tung cing ma lacuc pa Ngat Matek* dok tye ka bino i wi pol me polo.” 65 Cutcut, lalamdog madit oyeco bongone, kun waco ni: “En oyeto Lubanga! Pud dok wamito caden mukene pingo? Nen! Dong wuwinyo kit ma en oyeto kwede Lubanga. 66 Wutamo ningo?” Gugamo ni: “Balle romme to.” 67 Ci gungulo laa i wange dok gudonge. Jo mukene gudongo leme, 68 kun giwaco ni: “In Kricito, ka in lanebi ada tit botwa! Anga ma odongi?”
69 I cawa meno, Petero onongo obedo woko i dyekal, ci anyaka mo ma latic obino bote dok owacce ni: “In bene onongo itye kacel ki Yecu Lagalilaya-ni!” 70 Ento en okwero woko i nyim gin ducu, kun waco ni: “Pe angeyo gin ma itye ka lok iye.” 71 Ma en ocito cok ki doggang, anyaka mukene dok onene ci owaco bot jo ma gitye kunnu ni: “Laco man onongo tye kacel ki Yecu Lanajaret.” 72 En dok okwero woko kun kwongnge akwonga ni: “An pe angeyo laco meno!” 73 Ma pe orii, jo ma onongo gucung cok gubino bot Petero ci guwacce ni: “Ki lok ada, in bene itye i kingi, pien kit ma iloko kwede doti woko.” 74 Ci en ocako kwongnge kun lamme kekene ni: “An pe angeyo laco meno!” Cutcut twon gweno otugi kok. 75 Ci wi Petero opo i kom lok ma Yecu owacce, ni: “Ma peya twon gweno okok, nongo dong ityeko kwera woko tyen adek.” Pi meno en okato woko dok okok matek.