Tika Dong Iwinyo Calo Itye Keni dok Ilwor?

Nen kong latin awobi ma tye i cal-li. En nen calo tye kene dok lwor adada, pe kumeno? In mono dong iwinyo kit meno?— Wan ducu wawinyo kit meno i kine mukene. Baibul oloko i kom lurem Jehovah ma bene guwinyo calo gitye kengi dok gilwor. Ngat acel obedo Elia. Kong wapwonyu lok i kome.

Elia obedo i Icrael wacon, ma peya kinywalo Yecu. Akab, kabaka me Icrael, onongo pe woro Jehovah, Lubanga me ada. Akab ki dakone, Jejebel, onongo giworo Baal ma obedo lubanga me goba. Pi meno, Luicrael mapol bene gucako woro Baal. Daker Jejebel onongo kite rac adada dok onongo mito neko dano ducu ma giworo Jehovah, kadi wa Elia! Ingeyo ngo ma Elia otimo?—

Elia oringo woko! En oringo wa i dye tim ka mabor ci okanne woko i boro mo. Pingo itamo ni en oringo woko?— Kakare, en onongo lwor. Ento Elia onongo myero pe obed lwor. Pingo? Pien onongo ngeyo ni Jehovah twero konye. Jehovah onongo dong onyuto tekone bot Elia. I kare mo, Jehovah ogamo lega pa Elia kun cwalo mac ki i polo. Dong Jehovah onongo twero konyo Elia i cawa meno bene!

I kare ma Elia tye i boro, Jehovah oloko kwede kun penye ni: ‘Ngo ma itye ka timone kany?’ Elia ogamo ni: ‘An kena aye pud aworo in. Dong adong kena, dok alworo ni kibineka woko.’ Elia onongo tamo ni luwor Jehovah mukene-ni ducu dong kinekogi woko. Ento Jehovah owaco bot Elia ni: ‘Ku gire, meno pe ada. Tye dano 7,000 mukene ma pud giwora. Bed ma cwinyi tek. Atye ki tic mapol piri me atima!’ Itamo ni Elia onongo cwinye yom i kare ma owinyo lok meno?—

Ngo ma itwero pwonyo ki i gin mutimme i kom Elia?— Pe myero iwiny calo idong keni ma ilwor. Itye ki lurem ma gimaro Jehovah dok gimari bene. Jehovah bene tye ki teko madwong, dok en bikonyi kare ducu! Cwinyi mono yom me ngeyo ni Jehovah bibedo kwedi kare ducu?—