Jeremia Pe Ojuko Lok i kom Jehovah

I kare mukene dano nyerowa nyo gikeco i komwa ka waloko kwedgi i kom Jehovah. Man romo miyo wajuko lok i kom Lubanga woko. In dong iwinyo kumeno?— Baibul tito botwa lok i kom awobi mo ma maro Jehovah mada ento i nino mo otamo ni myero pe dong elok i kom Jehovah. Nyinge onongo Jeremia. Kong wapwonyu lok i kome.

I kare ma Jeremia onongo pud awobi, Jehovah owacce ni myero ocik dano wek guwek timo jami maraco. Man obedo tic matek pi Jeremia, dok en onongo lwor. En owaco bot Jehovah ni: ‘An pe angeyo gin ma myero awacci. An pud latin mamwa.’ Ento Jehovah owacce ni: ‘Pe ibed ki lworo. Abikonyi.’

Ci Jeremia ocako ciko dano ni Jehovah bipwodogi ka pe guloko kitgi. Itamo ni dano gulubo lok ma Jeremia owaco-ni?— Pe. Gucako nyero en dok gukeco i kome. Jo mukene onongo gimito neke woko! Itamo ni Jeremia owinyo nining?— Lworo omake ci owacci: ‘Pe dong abiloko i kom Jehovah matwal.’ Ento mono en ojuko lok?— Ku, en pe ojuko lok. Jeremia onongo maro Jehovah mada ma pe twero juko lok i kome. Kit macalo Jeremia pe ojuko lok, Jehovah olare.

Me labolle, i nino mo acel jo ma kitgi raco gubolo Jeremia i bwur matut ma opong ki coto. En obedo labongo cam nyo pii amata. Jo meno onongo gimito ni Jeremia oto i bwur kunu. Ento pi kony pa Jehovah, en obwot!

Ngo ma itwero pwonyone ki i lanen pa Jeremia?— Kadi bed kare mukene en obedo ki lworo, en pe ojuko lok i kom Jehovah. Ka iloko i kom Jehovah, kare mukene dano nyeri nyo gikeco i komi. Lewic nyo lworo twero maki. Ento pe ijuk lok i kom Jehovah. Jehovah bimedde ki konyi, kit macalo okonyo Jeremia.