LAPENY ME 5

Ka Atye ka Nongo Ayela i Cukul Kono?

GIN MUMIYO PIRE TEK

Kit ma idok kwede i kom ayela ma kiketo i komi romo weko jami doko ber nyo balo abala.

NGO MA ONONGO IN IBITIMO?

Go kong ni: Thomas pe mito wot i cukul tin. Kadi diki, nyo i nino mo mukene. Pekone ocakke dwe adek angec i kare ma lutino kwan luwote gucako loko anii i kome. Gucako lwonge ki nying mogo maraco. I kare mukene ngat moni romo dipo Thomas, reto bukke ma i cinge woko piny ci timme calo pe otimo akaka, nyo latin mo ma tye i gurup i ngeye romo core, ci ka Thomas olokke en pe twero ngeyo ngat ma ocore. Laworo, ayela man omedde odoko rac atika i kare ma ngat moni ocwale lok me bwura ki i Intanet . . .

Kono in aye Thomas, ngo ma onongo ibitimo?

TAM KONG!

Olo itye ki teko mo! Adada, itwero loyo ngat ma keto ayela i komi labongo lweny. I yo ma nining?

PE IDOK IYE: Baibul waco ni: “Laming loko ki teko me dwane ducu ka kiniga omako, ento dano maryek juko kinigane motmot.” (Carolok 29:11) Ka itemo bedo ma komi opye mot kun pe inyuto kiniga ki lworo ka maleng, luyela magi gurumo weko yeli.
PE ICUL KWOR. Baibul waco ni: “Pe wucul wang gin marac ki gin marac i kom dano mo.” (Jo Roma 12:17) Culo kwor bibalone abala.
PE IYENY PEKO. Baibul waco ni: “Dano ma wiye tiyo ka oneno gin marac bino i kome, kanne woko.” (Carolok 22:3) Ka twere, gwokke ki jo ma luyela ki kabedo ma kiromo keto ayela i komi.
MI LAGAM MA CUNGO WI LAYELA WOKO. Baibul waco ni: “Gam me mwolo kweyo kiniga woko.” (Carolok 15:1) Itwero waco gin mo ma tugo nyero. Me labolle, ka layela mo owacci ni icwe tutwal, iromo gamo ni “Gwok nyo atwero dwoko kilona piny!”
A WOKO. Anyaka mo ma tye ki mwaka 19 ma nyinge Nora owacci “Ling alinga nyuto ni iteggi dok itek loyo ngat ma tye ka yelli-ni. Nyuto bene ni idongo kit me jukke keni, ma layela-ni pe kwede.”—2 Temceo 2:24.
BED KI GEN I KOMI KEKENI. Luyela pol kare giyenyo jo ma gibwone kekengi dok pe gitwero cung matek i kom ayela. Ki tungcel, pol pa luyela giweki woko ka guneno ni pe ilworogi
WAC PEKONI BOT DANO MO. Ngat mo ma yam obedo lapwony owacci: “Acuko cwiny ngat mo keken ma tye ka nongo ayela me tito pekone woko. Man gin ma atir me atima, dok romo konyo jo mukene bene.”

Awobi mo tye ka kemme ki labwura ki tekcwiny — Bedo ki gen i komi kekeni bimiyo boti teko mo ma layela-ni pe kwede

**LAPENY MADOK I KOM YELO DANO**
ADA NYO GOBA	LAGAM
1 Kibedo ka yelo dano dong pi mwaki alip mapol.	1 Ada. Me labolle, Baibul tittiwa lok i kom jo Nepil—cog co mogo ma nyinggi te lokke ni “Jo ma Gireto Dano i Ngom.”—Acakki 6:4.
2 Yelo dano obedo tuko mamwa. Pe obedo gin marac.	2 Goba. Bulu mapol gidene woko pien nongo jo mukene gubedo ka keto ayela i komgi.
3 Yo maber loyo me juko ngat ma tye ka yeli aye me lweny kwede.	3 Goba. Luyela pol kare komgi tek loyo jo ma giyelo, ma nyutti temo lweny i komgi pe binyako nyige
4 Ka ineno kitye ka yelo ngati mo, myero pe iket iye tammi.	4 Goba. Ka otimme kit meno, in bene ibedo labal. Ka ineno kitye ka bwuro ngat moni ci iling woko, in bene idoko labal ma ka konyo me cobo peko man.
5 Luyela pol kare gipe ki gen i komgi kekengi kadi bed doggi dwong.	5 Ada. Kadi bed luyela mogo giwakke tutwal, ento pe gitye ki gen i komgi kekengi dok gibwuro jo mukene wek guwiny maber.
6 Luyela giromo loko kitgi.	6 Ada. Ka luyela gunongo kony, ci giromo loko tamgi ki kitgi.