Abraim Laco Ma Obedo Mwol

Abraim obedo mot i dog kemane i kare ma piny lyet adada. I kare ma otingo wange malo, Abraim oneno ki ka mabor co adek ma gubino ka limo kabedo meno.a Cutcut, en oringo me rwatte kwedgi, dok bene okwayogi ni myero kong guywe manok dok gunong yomcwiny i pacone. En owacci ebikelo botgi “kwon mo manok,” ento en okelo kom cam kikome medo ki capat matitino ma pud kia ka tedone ateda, cak lukulu ki cak malibo nyo alepa, ki ringo ma kitedo mayom dok mamit. I miyo ginacama man bot welene-ni, Abraim pe onyuto cwiny me jolo welo keken, ento kit ma wabineno kwede, en onyuto mwolo me ada.​—Acakki 18:1-8.

MWOLO OBEDO GIN ANGO? Mwolo te lokke ni bedo labongo wakke nyo gero. Ngat mamwol ye ni olo tye gin mo ma jo mukene giloye iye. (Jo Pilipi 2:3) En winyo tam pa jo mukene, dok tye atera me timo tic ma rwomme lapiny pi jo mukene.

ABRAIM ONYUTO MWOLO NINING? Abraim otiyo pi jo mukene. Kit ma waneno kwede i acakki-ni, i kare ma Abraim oneno wele adek-ki, cutcut en ocako yenyo jami ma mitte pi welene. Dakone Cara bene cutcut ocako bolle i jokon ka tedo cam. Nen kong nga ma onongo tye ka timo pol pa tic: Abraim oringo ka jolo wele, en omingi gin mo me ojoga, en oringo i adwol nyo awi ci oyero lee me aneka, dok en aye okelo cam inyim wele. Ma ka weko jami ducu icing luticce, laco man mamwol-li otimo tic ma rwomme lapiny. En pe otamo ni rwomme dit dok pe epore me tic pi jo mukene.

Abraim owinyo tam pa jo ma en loyogi. Boko lok i kin Abraim gin ki Cara pe kicoyo tyen mapol i Baibul. Ento wakwano ni tyen kiryo kulu Abraim owinyo tam pa Cara dok olubo tamme ducu. (Acakki 16:2; 21:8-14) I nino mo acel ma Cara tye ka miyo tamme, “cwiny Abraim ocwer” matek i acakkine. I kare ma Jehovah oloko ki Abraim, Abraim omwolle ci otimo gin ma Cara mito pien oneno ni tamme ni kara ber.

PWONY ANGO MA WANONGO? Ka ada watye ki cwiny me mwolo, ci wabitic pi jo mukene ki yomcwiny. Wabibedo ki yomcwiny me timo gin mo keken ma kerowa twero wek kwogi obed mayot.

Wanyuto mwolo ka wajolo tam pa jo mukene ka ce guminiwa. Ma ka kwero tam moni pien ni wan aye pe wamiyo, omyero wajolu tam ma jo mukene gimiyo. (Carolok 15:22) Bedo atera me jolo tam konyo tutwalle jo ma gitye olo ki twero mo manok. Ladit tic mo acel ma nyinge Jon owacci: “Anongo ni ladit tic ma kite ber miyo kare ki luticce me loko tam ma i cwinygi.” En omedde ni: “Mwolo mitte wek iye ni ngat moni ma tye i te locci-ni tye ki ngec me timo tic moni loyo in. Ento pe tye ngat mo ma miyo tam maber keken kare ducu kadi wa ladit tic.”

Ka walubo lanen pa Abraim dok bene wawinyo tam ma jo mukene giminiwa kun watimo tic mogo ma watamo ni rwomme tye lapiny, ci wabinongo cwak pa Jehovah. Kit ma wangeyo kwede, “Rubanga kwero jo ma giwakke, ento miyo gum [mot] bot jo mamwol.”​—1 Petero 5:5, Baibol pa Katoli.

[Lok ma tye piny]