Lok Pa Lunebi Ma Tye Iye Gene

“Gin mabeco ducu ma yam Rwot Lubangawu ociko piwu gin ducu gucobbe kakare, pe tye acel mo ma pe otimme.”​—YOCWA 23:14.

PINGO BAIBUL DOK PAT? Jo mogo i kare macon gucoyo jami ma nyweno wi dano ni bitimme i kare me anyim dok onongo geno lokgi tek, ento i kare-ni bene kodi jo magi pud gitye. Jo ma gitito jami ma bitimme i anyim gitito ma lubbe ki jami ma nongo tye ka timme dok jo magi pe gitito gin ma bitimme mwaki miya acel anyim. Ento, lok pa lunebi me Baibul gitito jami ducu kore ki kore dok gicobe kakare, dok bene ‘ginyuto kit ma gin moni bitimme kwede ki kit ma bigik kwede bene.’​—Icaya 46:10.

LABOL: I cencwari me abicel K.M.P., lanebi Daniel oneno i ginanyuta kit ma lobo Grik bituro kwede oyotoyot loc pa Media ki Percia. Dok bene otito ni i kare ma kabaka me Grik nongo ‘pud tek,’ kerre ‘bitur woko.’ Ci anga ma bileyone? Daniel ocoyo ni: ‘ker angwen bia ki i rokke, ento tekogi pe bibedo rom ki mere.’​—Daniel 8:5-8, 20-22.

GIN MA LUCOC ME TEKWARO GUWACO: Mwaki 200 i nge to pa Daniel, Alegijanda Muywek odoko kabaka me Grik. I kine ka mwaka apar me locce, Alegijanda oturo Ker me Media ki Percia ci omedo Ker me Grik wa i Indus River [lobo Pakistan]. Ento en oto atura ma mwakane onongo tye 32 keken. Me agikkine, i lweny mo ma obedo cok ki caro me Ipsus, i lobo Turkey, kiketo te kerre woko. Lacen, lutela wi monye angwen gupoko Ker me Grik i kingi. Ento, pe tye ngat mo i kingi ma tekone oo i kom pa Alegijanda-ni.

IN ITAMO NINGO? Tika tye buk mo keken ma tye ki lok pa lunebi ma gucobbe kit ma tye kwede i Baibul-li? Nyo kece Baibul dok pat?

[Boro buk i pot karatac 4]

“Lok pa lunebi . . . gipol i Baibul ma miyo pe watwero wacone ni gucobbe i wiye atura.”​​—LOK PA IRWIN H. LINTON, LAPILIDA MA OKWEDO BAIBUL

[Ka ma cal oa ki iye i pot karatac 4]

© Robert Harding Picture Library/SuperStock