Pingo Myero Ibed ki Miti i Kom Ker pa Lubanga?

Dano milion mapol i twok lobo lung guketo gengi i kom Ker pa Lubanga. Gin gilubo lanen pa Yecu ma opwonyo lulub kore me lega ni: “[Wek] ker meri obin; giti gin ma imito i lobo.”—Matayo 6:10.

Kadi bed ni dano mapol gitye ki miti madit i kom Ker pa Lubanga, ento pol pa dini pe gitamo pire. Ma lubbe ki man, lakwed lok me tekwaro ma nyinge H. G. Wells owaco ni tye me ur ni Yecu “oketo cwinye adada i tito lok madok i kom Ker me Polo kun inongo ni kanica mapol pe gitero pwony man calo gin ma pire tek.”

Lucaden pa Jehovah gipat ki kanica magi pien gitero Ker pa Lubanga calo gin ma pire tek adada. Tam kong: Magajinwa ma pire tek loyo ma itye ka kwanone kombeddi-ni kigoyo i leb ma romo 220. Man aye magajin ma pud dong kipoko loyo i lobo ducu pien kigoyo kopi ma romo milion 46 dwe ki dwe. Kwena ango ma pire tek ma tye iye? Magajin man kilwongo ni: Wi Lubele Tito pi Ker pa Jehovah.a

Pingo Lucaden pa Jehovah gitute matek me tito pi Ker pa Lubanga? Pien wan waye ni Ker pa Lubanga aye pen lok ma tye i Baibul, buk ma pire tek loyo i lobo. Medo i kom meno, waye ki cwinywa ducu ni Ker pa Lubanga keken aye bicobo pekki ma dano gitye ka denone i kareni.

Lucaden pa Jehovah gitye ka tute me lubo lanen pa Yecu kun gitito kwena madok i kom Ker pa Lubanga. I kare ma Yecu pud tye i lobo, en oketo pi Ker pa Lubanga macalo gin ma pire tek loyo i kwone ki dok ticce me pwony. (Luka 4:43) Pingo Yecu otero Ker-ri calo gin ma pire tek adada? Adwogi maber ango ma Ker-ri twero keli? Nen kong pwony ma gilubo man me niang kit ma Baibul gamo kwede lapeny magi.