Ka Ngat ma Imaro Oto

Bebe onongo tye ki wat macok adada ki wonne. Laremgi mo ma paro pigi aye okwile lok meno, ento Bebe onongo ni lok man dok omedo cwercwinye ameda ma ka cuko cwinye. En obedo ka wacone teretere ni, “tone pe obedo gin maber kulu.” Onongo dong onen ka maleng ni i kare ma Bebe ocoyo gin man mutimme-ni i buk, mwaki mogo mukato angec, en onongo pud tye ka kumo.

Kit ma Bebe oniang kwede, twero tero kare malac adada wek ngat moni ojuk kumo, tutwalle ka ngat muto-ni onongo cok kwede adada. I Baibul, kiwacci to aye “Lakwor  . . . me agikki.” (1 Jo Korint 15:26) To ka otimme nyweno kwowa, dok ngat mo pe twero jukone. Pe tye ngat mo ma twero bwot ki i adwogi marac ma to kelo. Dong pe tye me ur ka pe wangeyo kit me kanyo arem ka ngat mo oto ki dok i nge to meno.

Oromo bedo ni dong ipenye kekeni ni: ‘Mono tero kare ma rom mene me lweny ki kumo? Dano mono twero nongo kwecwiny i kare me kumo nining? An atwero kweyo cwiny jo ma gurwenyo danogi i to nining? Gen mo tika tye pi jowa me amara ma guto?’