LOK MA I POK NGEYE | KIT MA BAIBUL—OBWOT KWEDE

Baibul Obwot Pe Oballe

ARIYA: Jo ma gucoyo Baibul gubedo ka tic ki kolo [obaya] ki lar [pyen].a (2 Temceo 4:13) Jami ma kitiyo kwede me coyo lok me Baibul-li onongo twero bedo macalo ariya nining?

Kolo twero yec, ngico mako dok kalane lokke woko oyotoyot adada. Richard Parkinson ki Stephen Quirke ma gukwano matut lok i kom tekwaro, dini ki leb pa Luejipt guwaco ni: “Kolo top ci doko yugi keken. Ka kigwoko ma kidolo kacel ngico mako ci top woko, oyo nyo bye bene gicamo woko ka kiyiko piny.” Kolo mogo i kare ma kinongogi, kiketogi ka malyet nyo i ngico, dok man oweko guballe woko oyotoyot adada.

Lar rii loyo kolo, ento lyeto nyo ngico balo woko oyotoyot adada.b Lar twero kelo kwidi mapol. Pi meno, buk me Everyday Writing in the Graeco-Roman East, waco ni: “Onongo pe twere me gwoko coc macon wek pe guballe.” Ento kono onongo coc me Baibul oballe, kono bene kwenane orwenyo woko.

KIT MA BAIBUL OBWOT KWEDE: Cik pa Lujudaya onongo mito ni kabaka acel acel ‘oco lok me Cik ducu kun kwanyo ki i bukke’ abic ma gukwongo ki i Baibul. (Nwoyo Cik 17:18) Medo i kom meno, ludiro ma gikobo coc onongo dong gukobo Ginacoya mapol adada i kine ka cencwari me acel K.M., dok man oweko Ginacoya magi onongo dong ginonge i ot pa Lubanga ma gitye i Icrael ducu wa ki Makedonia! (Luka 4:16, 17; Tic pa Lukwena 17:11) Coc magi macon-ni gubwot nining wa i kare-ni?

1. Agulu; 2. But Ginacoya ma kinongo ki i Dead Sea — Ginacoya ma kinongo ki i *Dead Sea* orii pi kare malac i agulu ma onongo kikano i boro ka mutwo

Boro ka ma kinongo iye ginacoya mogo macon

Philip W. Comfort ngat ma okwano matut lok madok i kom Cik Manyen me Baibul owaco ni: “Lujudaya onongo gingene pi gwoko Ginacoya i agulu.” Dok nen calo Lukricitayo bene gumedde ki timone kit meno. Ki lok ada, pud kitye ka nongo Ginacoya mogo ma kigwoko i agulu i boro ki kabedo mutwo.

ADWOGINE: But Ginacoya me Baibul alip mapol—mogo ma dong gukato mwaki 2,000 kulu—gubwot watin. Pe tye buk mo keken me kare macon ma tye ki kopi mapol dok orii pi kare malac kuman.

a Kolo onongo kitongo ki i pii. Lar onongo kinongo ki i kom lee ma kineko.

b Me labolle, coc ma tito pi loc ken pa lobo Amerika [U.S Declaration of Independence] ma ludongo me lobo meno guketo cinggi i iye onongo tye i kom lar. Ma peya oo mwaka 250, coc magi onongo dong pe nen dok pe kwane.