Gud Cwiny Dano ka i Tye ka Pwony
1. Tic ki Lok pa Lubanga i ticwa me pwony i yo mucwiny pol kare kwako timo gin ango?
1 Calo lakwena Paulo, lutit kwena mucwiny gingeyo ni “tero lok me ada i yo atir” pe obedo mere kwanyo lok ki i Ginacoya Maleng keken. (2 Tem. 2:15) Wan waromo gudo cwiny nyo ‘ywayo tam’ pa dano nining ka watye ka tic ki Lok pa Lubanga i pwonywa?—Tic 28:23.
2. Waromo konyo dano me dongo worogi i kom Lok pa Lubanga nining?
2 Wek Lok pa Lubanga Aye Olok Botgi: Mukwongo, tir tam pa dano i Baibul i yo ma miyo gijolo dok giworo ryeko pa Lubanga ma tye iye. Gen ma watye kwede i kom Lok pa Lubanga romo miyo ngat ma tye ka winyowa-ni keto cwinye ka watye ka kwano ginacoya. (Ibru 4:12) Waromo wacci: “Anongo ni ber tutwal me niang tam pa Lubanga i kom lok man. Nen kong ngo ma Lokke waco.” Ka ce twere, wek Lok pa Lubanga aye olok botgi kun i kwano atir ki iye.
3. Inge kwano ginacoya moni, ngo ma kiromo timone me konyo ngat ma tye ka winyowa-ni me niang tere?
3 Me aryo, tit te ginacoya ma i kwano-ni. Jo mukene ginongo tek tutwal me niang te tyeng moni ka kikwano botgi pi tyen mukwongo. Omyero pol kare watit kit ma ginacoya moni konyo kwede. (Luka 24:26, 27) Wek nyig lok ma pigi tego gucung ka maleng. Penyo lapeny acel romo konyowa me moko ka ce ginacoya ma wakwano-ni oniange.—Car. 20:5; Tic 8:30.
4. Yo me agikki mene ma mitte wek wagud cwiny dano i pwonywa?
4 Lok Matut i kom Ginacoya: Me adek, temme me gudu tam kacel ki cwiny rwod ot. Kony rwod ot me niang kit ma tyeng moni tye me kony kwede bote. Lok matut i kom Ginacoya romo gudu cwiny ngat moni me loko tamme. (Tic 17:2-4; 19:8) Me laporre, i nge kwano Nia 3:15, waromo lok matut i kom kit ma ngeyo nying ngat moni pire tek kwede wek wadong wat kwede. Ci ingeye iromo penye ni, “In itamo ni ngeyo nying Lubanga romo miyo legani pire bedo tek?” Kubo ginacoya ki kwo pa rwod ot i yo ma kit man nyutu ni ginacoya meno tye me kony. Tic ki Lok pa Lubanga me gudu cwiny dano i pwonywa kit man konyo jo ma cwinygi atir me woro Jehovah, Lubanga me ada dok ma kwo.—Jer. 10:10.