‘Lok Man me Kwena Maber-ri Gibitito’
1. Wangeyo nining ni pe tye gin mo ma romo gengo tic me tito kwena-ni?
1 Pe tye gin mo ma twero gengo Jehovah ki cobo yubbe. (Ic. 14:24) Kadi bed ni onongo nen calo Langolkop Gideon kacel ki jone 300 pe gitwero loyo lumony 135,000 pa jo Midian, ento Jehovah owacce ni: “[Ibilaro] jo Icrael ki i cing jo Midian. An kikoma aye acwali.” (Lungol. 6:14) Tic mene ma tye ki cwak pa Jehovah i kareni? Yecu owaco ni: “Lok man me kwena maber me ker pa Lubanga gibitito i wi lobo ducu.” (Mat. 24:14) Pe tye ngat mo ma romo gengo cobbe pa tic man!
2. Pingo waromo bedo ki gen ni Jehovah bikonyo wan ki acel acel i ticwa me pwony?
2 Jehovah Konyo Wan ki Acel Acel: Kadi bed wageno ni Jehovah bikonyo jone macalo gurup, tika waromo bedo ki gen ni Jehovah bikonyo wan ki acel acel? I kare ma lakwena Paulo onongo tye ki peko, Jehovah omiye teko ma owok ki bot Wode, Yecu. (2 Tem. 4:17) I yo acel-lu, waromo bedo ki gen ni Jehovah bigoyo laane i kom tute pa ngat acel acel me tiyo gin ma Lubanga mito.—1 Jon 5:14.
3. Jehovah konyowa ka watye i kit kwo ango?
3 Paro kit me kwo nino ki nino mono weki labongo kero me timo ticwa me pwony-nyi? “En miyo tek bot jo ma goro.” (Ic. 40:29-31) In mono itye ka kemme ki aunauna nyo adegadega? “Kel pekoni ducu bot Rwot [Jehovah], ci en bikonyi.” (Jab. 55:22) Mono inongo ni i kare mukene itye ki lworo dok labongo gen? ‘Citi, abibedo ki dogi.’ (Nia 4:11, 12) Itye ki peko me yot kom ma oweko pe itwero tic tutwal i tic me pwony? Jehovah tye ki pwoc dok en romo miyo tic ma itiyo ki cwinyi ducu-ni nyako nyige kadi bed ni nok.—1 Kor. 3:6, 9.
4. Bedo ki gen i kom Jehovah mono bigudu kwowa nining?
4 Jehovah dong “oryeyo cinge woko, anga kono ma dok bidolone?” (Ic. 14:27) Wek dong wamedde labongo yweyo tito lok me kwena ‘ki tekcwiny, labongo lworo pi twero pa Jehovah’ kun wageno ni en bigoyo laane i kom ticwa me pwony-nyi.—Tic 14:3.