Cwec me Aura Nyuto Deyo pa Lubanga

Jo mapol ginongo yomcwiny i neno ki ngiyo ginacweya. Ento jo manok i kingi keken aye giniang ni ginacweya magi nyuto tam ki cwiny pa Lacwecwa. (Rom. 1:20) Yam con, Daudi onongo ngec i kom Jehovah ki i Lokke. Ento en bene ‘oneno’ dok onyiko cok ki Jehovah ki lwodo lok i kom ginacweya. (Jab. 8:3, 4) Vidio ma wi lokke tye ni The Wonders of Creation Reveal God’s Glory twero konyo lutinowa ki lutino kwanwa me Baibul me ngiyo cwec pa Jehovah wek guniang kit pa Lacwecwa, ci macalo adwogine gin gibinyikke cok bote. I nge neno vidio man, kong wunen ka wuromo miyo lagam i kom lapeny magi.

(1) Dit pa polo ki lobo, ki yub ma tye iye medo pwocwa pi Jehovah nining? (Ic. 40:26) (2) Ka wangiyo pii, pwony ango ma wanongo i kom Ngat ma ladiro ma ocweyo? (Yabo. 14:7) (3) Dit pa lobo ki cok-ke ki ceng nyuto ryeko pa Jehovah i yo ango? (4) Dwe tye ki kony ango? (Jab. 89:37) (5) I yo ango ma Jehovah ocweyo dano wek gunong yomcwiny i kwo? (6) DNA obedo gin ango? (Jab. 139:16) (7) Dano dok pat ki cwec mukene me lobo-ni nining? (Acak. 1:26) (8) Gin ango ma ibimito timone i lobo manyen?

Jami Mukene ma Tye Vidio Man: (9) Kala mapatpat mono gia ki kwene? (10) Pii ngayo gravity [teko ma ywayo jami dwoko i ngom] ci ito cito wa i wi yat nining? (11) Pii tye ki tic ango i kom dano? (12) Mi lanen ma nyuto ni cwec mapat pat gikwo maber kacel? (13) Ginacweya cako niang nining kit me moko wat ki luwotgi? (14) Cital me cweyo jami mogo ma kilwongo ni “golden angle,” obedo gin ango dok nen nining i ginacweya?

“Wunen” Maber Tic Cing Jehovah: Yecu ocuko cwinywa ni “kong wunen winyo me polo” ki “kong wutam pi lenga me tim.” (Mat. 6:26, 28) Timo kit meno miyo wadongo niye ki genwa i kom Lacwec, dok miyo wabedo ki pwoc pi ryeko pa Jehovah, tekone me lara, ki marre. Ma ka weko ni jami me lobo man owir tammi, jal kareni dok itute me ngiyo cwec me aura pa Jehovah, kun ilwodo gin ma gitittiwa i kom Lubangawa.—Jab. 19:1.