Cente Aryo ma Welle Tidi

Yo acel ma pire tek ma waromo miyo kwede cwak pi ticwa me Ker-ri obedo miyo mot me cente pi tic me tito kwena ma kwako wi lobo ducu-ni. Ento ka ibedo lacan kono?

Nino mo acel Yecu oneno ka dato mo ma lacan tye ka bolo cente aryo ma nyige ma welle tidi adada i canduk lim. Mar pi Jehovah aye oweko en “obolo limme ducu ma en tye kwede, ma onongo konyo kwone.” (Mar. 12:41-44) Kit ma Yecu oloko i kom wel lim ma en obolo-ni, man onyuto ni obedo me wel madit i wang Lubanga. Lukricitayo me cencwari mukwongo bene gutero tic me miyo mot calo gin me deyo. Lukricitayo ma lucan kacel ki lulonyo lung gumiyo mic ma gitwero miyone. Lakwena Paulo omiyo lanen pa omege me Makedonia ma kadi bed ni onongo gitye “i dye can madit mada . . . gin gulegowa ma gibako doggi ni watim ber, waye gin giribbe kwedwa i konyo jo pa Lubanga.”—2 Kor. 8:1-4.

Pi man, ka wan bene watwero miyo mot ma rom ki ‘cente aryo ma welle tidi-ni’ myero wange ni cente manok ka kiribo kacel twero doko cente ma welle dit. Mic ma wamiyo ki cwinywa ducu yomo cwiny Wonwa me polo ma cinge yot-ti, “pien Lubanga maro ngat ma miyo jamine ki yomcwiny.”—2 Kor. 9:7.