Nong Adwogi Maber ki i Kwan Piri Keni
1. Kwan ki lwodo lok kelo botwa adwogi maber ango?
1 Wanongo adwogi maber ka ‘waketo cwinywa tutwal’ i kwan piwa kenwa kacel ki lwodo lok. (Ibru 2:1) Kwano ki lwodo lok i Baibul ki bukkewa bimiyowa kare me weko ada ma i Lok pa Lubanga donyo matut i cwinywa. Man bigudo tamwa ki ticwa dok miyo bedo mupore. Adada, wabinongo yomcwiny i timo tic pa Jehovah. (Jab. 1:2; 40:8) Pi man, myero wapwony kit me keto tamwa i gin acel, ma bikonyowa i kare me kwan. Jami mapol twero wiro tamwa! Jami matino tino—calo ka ngat mo ogoyo cim nyo woo mogo twero dwoyo tamwa woko ki i gin ma watye ka kwano. Nyo kare mukene nongo adamwa tye ki kero me kwan pi cawa manok mo keken. Waromo yubo cwinywa pi kwan, ento ma nongo peya kare malac okato, wacako tamo gin mo mapat. Waromo ‘keto cwinywa tutwal’ i kare me kwano Lok pa Lubanga piwa kenwa nining?
2. (a) Pingo pire tek botwa me yubo kare me kwan piwa kenwa? (b) Inongo cawa nining me kwano Lok pa Lubanga?
2 Bedo ber ka waketo yub piwa me kwan kun wayero kabedo maber loyo ma watwero kwan ki iye. Pi pol pa wan dano, nongo cawa ki dong kabedo ma oling mot ma dano mukene pe iye, pe yot. Wanongo ni ticwa me nino ducu camo cawawa ci wabedo calo pot yat ma pii me kulu tye ka molone oyotoyot. Omyero walweny matek calo dano ma tye ka kwang kun dok tung ka ma pii a ki iye, me wek wanong kare. Pe waromo kuro nio ka kare onen. Me kaka meno, wan aye myero wayeny kare me kwan piwa kenwa. (Ep. 5:15, 16) Jo mukene gitute me nongo kare me kwangi odiko con ma nongo piny opye mot. Mukene ginongo ni otyeno aye obedo kare maber botgi me kwan. Gin ma pire tek ma myero wiwa pe owil iye aye nongo ngec matir i kom Lubanga ki Wode. (Jon 17:3) Pi meno, omyero wayubu kare me kwan piwa kenwa ci wamedde ki lubo yub meno.
3. Lwodo lok obedo ngo, dok watwero nongo adwogi maber ki iye nining?
3 Lwodo lok—ma te lokke gonye ni bedo ka tamo gin ma ikwano i yo matut—pire tek mada. Konyowa me kwanyo tam pa Lubanga ki i bukke ma wakwano ki ketone i cwinywa. Lwodo lok konyowa me ngeyo kit me keto tira me Baibul i tic wek wadok “jo ma keto gin ma giloko i tic, pe . . . jo ma winyo awinya keken.” (Yak. 1:22-25) Medo i kom meno, lwodo lok konyowa me nyiko cok ki Jehovah, pien miyo watamo i kom kite mogo ki dok kit ma kiloko kwede i kom kite magi i buk ma nongo watye ka kwanone.
4. Gin ango ma mitte wek walwod maber lok i kom gin ma wakwano?
4 Me wek wanong adwogi maber ki i kwan ki lwodo lok, omyero wakwany tamwa woko ki i jami mogo ma wiro tamwa. Me weko wiwa obed twolo pi jolo ngec mukene manyen ka watye ka lwodo lok omyero wajuk par mogo me kwo me kare-ni. Timo man cwalo kare dok mito ni ibed keni ka ma oling mot, ento pud, wabiwinyo ni watye agonya ka watye ka mato pii ki camo cam ma i Lok pa Lubanga!
5. (a) Ma lubbe ki kwan piwa kenwa, ngo ma okonyo jo mukene me medo kero me kwangi? (b) Myero wabed ki tam ango ka odok i lok me kwan, dok adwogi maber ango ma waromo nongone ki i yub ma pire tek man?
5 Gin ango ma watwero timone ka adamwa tye ki kero me kwan pi cawa manok keken? Jo mukene gunongo ni gitwero medo kero me kwangi ka gicako ki kwan pi cawa manok keken ci mot mot giromo medo cawa me kwangi. Mitiwa myero obed me tero cawa mapol i kwan ento pe me kwan wiye wiye oyotoyot. Mito wadong mar pi pwony ma nongo watye ka kwanone. Dok waromo kwedo tyen lok mogo kun watiyo ki bukke mapol ma lagwok ot ma lagen ocoyo. Lonyo madit tye i kwano “tam ma Lubanga okano i iye ka matut.” (1 Kor. 2:10) Timo man medo ngecwa i kom Lubanga dok weko wadongo ryekowa me poko gin maber ki gin marac. (Ibru 5:14) Ka wabedo lutino kwan me Lok pa Lubanga ma komgi mit, ci wabibedo jo “ma giromo pwonyo ki jo mukene.”—2 Tem. 2:2.