Wulub Lanen pa Lunebi—Kocea
1. Oromo bedo ni dong ipenyo lapeny ango?
1 ‘Ngo ma atye atera me dyero bot Jehovah?’ Gwok nyo in dong ipenyo lapeny meno i kare ma itye ka lwodo i kom ber pa Lubanga, ki kicane madit atika-ni. (Jab. 103:2-4; 116:12) Lanebi Kocea oye timo gin ma Jehovah ocike kadi bed onongo mito dyero jamine mogo. Waromo lubo lanen pa Kocea nining?
2. Watwero lubo lanen pa Kocea me diyo cwinywa i tito kwena nining?
2 Tit Lok i Kare Marac: Kwena pa Kocea obedo tutwalle bot kaka apar me Icrael, ka ma onongo kijuko iye woro me ada woko. Kabaka Jeroboam II otimo gin marac i wang Jehovah kun medde ki cwako woro cal lutino twoni ma Jeroboam I ocako-ni. (2 Luker 14:23, 24) Kabaka ma gulube bene gumedde ki rwenyo woro me ada i kin kaka apar me Icrael nio wang ma kijwero Icrael woko i mwaka 740 K.M.P. Ento, kadi bed ni woro me goba onongo onya ka weng, Kocea omedde ki tic kun gwoko genene pi mwaka 59 nyo makato. Tika wan bene watye atera me tito kwena mwaka ki mwaka kadi wakemme ki miti manok nyo aunauna magwa?—2 Tem. 4:2.
3. Kwo pa Kocea’s onyuto kica pa Jehovah nining?
3 Ket Cwinyi i kom Kica pa Jehovah: Jehovah ociko Kocea ni ocit onyom “nyako ma lakwele.” (Koc. 1:2) Kadi bed ni dakone Gomer onywalo latin laco bot Kocea, lacen en dok onywalo lutino aryo me kwele. Bed atera pa Kocea me timo kica ki dakone onyuto kica madit pa Jehovah bot Luicrael ma lujemo i kare ma gungut balgi. (Koc. 3:1; Rom. 9:22-26) Tika wan ki acel acel watye atera me jalo mitiwa wek wami kica pa Jehovah ongene bot kit dano ducu?—1 Kor. 9:19-23.
4. Jami ango ma watwero jalone wek wati pi Jehovah?
4 Lutic pa Jehovah mukene dong gujalo dog tic ma kelo lim mabup wek gicwal cawa malac i tic me pwony. Mukene gibedo labongo nyomme nyo lutino ma megi pi tiyo tic me Ker-ri. Ka walwodo kwo pa Kocea, waromo tamo kekenwa ni, ‘An pe onongo atwero timo gin ma en otimo-ni matwal.’ Ento, ka wawoto ki dongo pwocwa pi kica pa Jehovah ma pe wapore pire-ni, kun wajenge i kom cwiny mere maleng, en twero tic kwedwa i yo ma onongo pe watamo ni twere, macalo Kocea.—Mat. 19:26; Pil. 2:13.