Nicer Twere pi Ginkok-ki

Kwer me Nipo miniwa kare maber me tamo pi mot ma wabinongone i anyim pi ginkok-ki, ma i kine tye iye nicer. Pe obedo yub pa Jehovah ni dano myero guto. Man aye gin mumiyo arem me cola pi to pa ngat ma wamaro bedo lit adada. (1Kor 15:26) Cwiny Yecu ocwer matek adada i kare ma oneno lupwonyene gitye ka kumo pi to pa Lajaro. (Jon 11:33-35) Kit ma Yecu nyuto kit pa Wonne kikome-ni, watwero bedo labongo akalakala mo ni Jehovah bene cwinye cwer me neno ka wakumo pi to pa jowa me amara. (Jon 14:7) Jehovah tye ka kuro ki miti madit kare ma en bicero iye luticce ki i to, dok wan bene omyero wabed ki miti acel-lu.​—Yubu 14:14, 15.

Kit ma Jehovah pe obedo Lubanga ma kelo anyobanyoba-ni, watwero moko ni nicer bitimme kore ki kore. (1Kor 14:33, 40) Ma ka bedo ki yub me yik, oromo bedo ni wabibedo ki pati me jolo jo ma gucer. Tika ikwanyo kare me lwodo lok i kom nicer, tutwalle ka itye ka kumo pi to pa dano-ni me amara? (2Kor 4:17, 18) Tika ipwoyo Jehovah pi mic me ginkok ki pi nyuto botwa i Ginacoya ni jo muto gibikwo doki?​—Kol 3:15.

• Anga ki i kin luremi ki wadini ma itye ki miti madit me neno doki?

• Jo mene ma gukwo i kare me Baibul ma itye ki miti madit me rwatte ki me lok kwedgi?