Bute me 1

Cwec Nio wa i Pii Aluka

Polo ki lobo gua ki kwene? Ceng, dwe ki lakalatwe, kacel ki jami mapol i lobo-ni, gucako bedo tye nining? Baibul miyo lagam ma atir ka waco ni Lubanga aye ocweyogi. Pi meno bukwa cakke ki ododo me Baibul i kom cwec.

Wakwano ni, cwec pa Lubanga mukwongo obedo jo me cwiny ma gical ki en. Gin lumalaika. Ento lobo kicweyo pi dano calo wan. Pi meno Lubanga oyubo laco ki dako dok olwongogi ni Adam ki Kawa ci oketogi i poto maber adada. Ento gin gukwero winyo Lubanga ci gurwenyo twerogi me bedo kwo.

Me a ki i cweyo Adam nio wa i Pii Aluka madit-ti, kare ducu ma okato romo mwaka 1,656. Jo maraco mapol gukwo i kare man. I polo onongo tye jo me cwiny ma komgi pe nen, Catan ki lumalaikane. I lobo onongo tye Kain ki jo maraco mukene mapol, co mogo ma gitek mukato kare woko bene onongo gitye. Ento jo mabeco bene onongo gitye i lobo​—Abel, Enoka, ki Nua. I Dul me ACEL wabikwano lok i kom jo magi ducu kacel ki jami mutimme.