Ododo 2

Poto Maber Adada

NEN kong lobo kany! Jami ducu tye mabeco adada! Nen lum ki yadi, ature ki lee ducu. Itwero nyuto lyec gin ki labwor?

Poto maber tutwal-li ocakke nining? Wanenu kong kit ma Lubanga oyubo kwede lobo piwa.

Mukwongo, Lubanga oyubo lum me umo lobo. Dok en oyubo kwai ginapita matino ki yadi mapatpat. Jami magi madongo-ni weko lobo nen maber adada. Ento konygi kato meno woko. Polgi bene miniwa cam ma mit tutwal.

Lacen Lubanga oyubo rec me kwang i pii ki winyo wek gutuk i polo. En oyubo gwogi ki bura ki aguragura; lee madongo ki lee matino. Lee ango ma gikwo cok ki paconi? Omyero pe iwa obed yom ni Lubanga oyubo jami magi ducu piwa?

Me agikki, Lubanga oyubo ka mo acel ki i lobo me doko kabedo mapat adada. En olwongo kabedo man ni poto me Eden. Roc mo onongo pe iye. Gin ducu ma iye onongo ber adada. Lubanga onongo mito ni lobo ducu odok maber tutwal calo poto man ma eyubo-ni.

Nen kong cal poto man dok odoco. Ingeyo gin ma Lubanga oneno ni onongo pe iye? Wanenu kong.

Acakki 1:11-25; 2:8, 9.