Ododo 13

Abraim—Larem Lubanga

KABEDO acel ma dano bene gucito ka kwo iye i nge Pii Aluka onongo kilwongo ni Ur. Odoko boma madit ma pire tek ma onongo tye ki odi mabeco iye. Ento jo ma kunnu onongo giworo lubanga mapol me goba. Meno aye gin ma gubedo ka timone i Babel bene. Jo ma i Ur ki Babel onongo pe gubedo calo Nua gin ki wode Cem, ma gumedde ameda ki tic pi Jehovah.

Lacen, i nge mwaka 350 ma pii aluka onongo dong otimme woko, Nua ma lagen-ni oto. Laco ma itye ka neno i cal-li kinywalo mwaka aryo i nge tone. En onongo ngat ma pire tek tutwal bot Lubanga. Nyinge Abraim. En okwo kacel ki jo me ode i boma me Ur.

Nino mo acel Jehovah oloko ki Abraim ni: ‘A iwek Ur kacel ki wadini, ci icit i lobo ma abinyutti.’ Abraim mono owinyo Lubanga ci oweko kwo mamit ma onongo tye i Ur-ri? Ada, en owinyo. Pien Abraim kare ducu onongo winyo Lubanga oweko en dong ongene calo larem Lubanga.

Wadi pa Abraim mogo bene guwoto kacel kwede i kare ma en oweko Ur. Wonne Tera ocito kacel kwede. Okeyone Lot bene ocito. Ngene ni Cara dako pa Abraim bene ocito. Motmot gin ducu guo i kabedo ma kilwongo ni Karan, ka ma Tera oto iye. Gin onongo dong gitye ka mabor tutwal ki Ur.

I nge kare mo Abraim kacel ki jo me ode guweko Karan ci gucito i lobo ma kilwongo ni Kanaan. Ki kunnu, Jehovah owacce ni: ‘Man aye lobo ma abimiyo bot lutinoni.’ Abraim obedo i Kanaan kun kwo i kema.

Lubanga ocako konyo Abraim ci oweko en onongo lwak romi ki lee mukene mapol kacel ki lutic miya mapol. Ento en gin ki Cara onongo gipe ki lutino ma megi.

I kare ma mwaka me dit pa Abraim dong oo 99, Jehovah owacci: ‘Acikke ni in ibidoko won rok pa jo mapol.’ Ento man onongo twero timme nining, kit ma Abraim gin ki Cara onongo dong guti tutwal ma pe giromo nywalo latin-ni?

Acakki 11:27-32; 12:1-7; 17:1-8, 15-17; 18:9-19.