Ododo 49

Ceng Ocung Mot

NEN kong Yocwa. En tye ka wacci: ‘Ceng, cung mot!’ Dok ceng ocung mot. Obedo malo i dye polo kenyo pi nino acel kulu. Jehovah omiyo otimme! Wanenu kong pingo Yocwa mito ni ceng obed ka ryeny aryenya.

Ka kabaka abic maraco me Kanaan gucako lweny i kom Lugibeon, Lugibeon gucwalo laco mo ka penyo kony ki bot Yocwa. En owaco ni: ‘Bin botwa oyot! Larwa! Kabaka ducu ma i lobo ma i wi cere gubino woko ka lweny i kom luticci.’

Yocwa ki lumonnye gutugi cito woko cut. Guwoto i dyewor benebene. I kare ma guo i Gibeon, lumony pa kabaka abic ca gudoko lwor ci gucako ngwec woko. Ci Jehovah omiyo pee madongo opoto ki malo, pee ocelo oneko lumony mapol ma loyo ma lumony pa Yocwa guneko.

Yocwa oneno ni ceng dong cok poto. Piny obidoko col, dok pol lumony pa kabaka abic maraco-ni gubingweco woko. Meno aye gin mumiyo Yocwa olego bot Jehovah ni: ‘Ceng, cung mot!’ Pi meno pien ceng obedo ka ryeny aryenya, Luicrael gutyeko loyo lweny.

Pud tye kabaka mukene mapol i Kanaan ma gidag jo pa Lubanga. Yocwa ki dul monnye gutero kare ma romo mwaka abicel me loyo lweny i kom kabaka 31 i lobo me Kanaan. I kare ma gutyeko timo meno, Yocwa omiyo kipoko lobo me Kanaan woko bot kaka ma onongo pud gimito kabedo.

Mwaka mapol okato, ci lacen Yocwa oto ma mwaka me ditte tye 110. I kare ma en ki lureme pud gikwo, lwak guwinyo Jehovah. Ento ka co magi mabeco-ni guto woko, lwak gucako timo jami maraco dok gupoto i peko. Man aye kare ma onongo gimito iye kony pa Lubanga adada.

Yocwa 10:6-15; 12:7-24; 14:1-5; Lungolkop 2:8-13.