Pwony me 2
Lobo ma Peko Peke Iye
1, 2. Neno mapat ango ma dano mapol gitye kwede?
KI TUNGCEL, dano milion mapol i lobo-ni dok gitye ki neno mapat. Ki i nenogi, anyim pa dano bibedo ma mwonya mada. Gin giwacci cokcok-ki i lobo kany, tim maraco nyo peko mo keken dong bibedo pe. Gitye ki gen ni jami maraco ducu kibikwanyone woko ka lobo dong bidoko manyen. Giwaco bene ni te guti me lobo manyen man dong gitye ka cakone i kare-ni!
2 Jo man gitye ki niye ni lweny, tim gero, turo cik, ngolo kop alenga, ki can bibedo pe i lobo manyen-ni. Ni lobo-ni bibedo labongo two, cwercwiny, pig wang, kacel ki to. Mot mot i kare meno, dano bio i kwo ma pe ki roc ka dong gibikwo nakanaka i lobo me paradic ki yomcwiny. Kadi wa jo muto bene kibicerogi dok gibibedo ki kare me kwo nakanaka!
3, 4. Pingo jo man gitye ki gen i kom nenogi-ni?
3 Bedo ki neno ma kit man pi anyim-mi mono obedo lek mamwa, nyo tam ni kono nene kong twere kono ber? Pe. Neno man tye ocung i kom niye matek ni Paradic-ci wang ma obino. (Jo Ibru 11:1) Pingo jo man pe gitye ki akalakala mo? Pien Lacwec ma obedo won twer ducu aye ma ociko pire.
4 Ma dok i kom cikke pa Lubanga, Baibul waco ni: “Gin mabeco ducu ma yam [Jehovah] Lubangawu ociko piwu gin ducu gucobbe kakare, pe tye acel mo ma pe otimme.” “Lubanga pe dano, ma twero loko goba . . . Ka dong owaco lok mo, ci pe bitiyone? Ka onongo oloko, ci pe cobo kakare?” “[Jehovah] me mony dong okwongo kwong ni, ‘Kit ma dong atyeko yubone kwede con, bitimme bene kit meno, kit macalo atamo kwede bitimme bene dong kumeno.’”—Yocwa 23:14; Wel 23:19; Icaya 14:24.
5. Lapeny ango ma mitte ni omyero kigamgi?
5 Ento, ka yub pa Lubanga onongo tye me loko lobo-ni wek odok paradic ma peko mo pe iye, ci pingo en kong weko ni jami maraco otimme? Pingo en oweko mwaki alip abicel kulu okato nio wa kombeddi-ni ma en peya oyubo jami ma obale? Mono peko ma obedo pi cencwari mapol-li nyuto ni Lubanga ada pe paro piwa, nyo bene ni en peke?