Pwony me 4
Lubanga Titiwa pi Yubbe
1, 2. Wangeyo nining ni Lubanga miyo lagam bot jo ma penyo peny ki cwinygi ducu?
LUBANGA ma lamar tito pi yubbe bot jo ma yenye ki cwinygi ducu. En miyo lagam bot jo ma gipenyo lapeny mogo i kom tyen lok mumiyo en oye ni peko obed can.
2 Baibul waco ni: “Ka ce iyenyo [Lubanga], ci in ibinongo kome.” “Ento tye Lubanga mo i polo ma nyuto kit mung ducu mukanne.” “Rwot Lubanga [Jehovah] pe timo gin mo labongo yabo munge bot luticce ma lunebi.”—1 Tekwaro 28:9; Daniel 2:28; Amoc 3:7.
Lagam Magi Nonge Kwene?
3. Waromo nongo lagam pi lapeny i kom tyen lok mumiyo Lubanga oye ni peko obed tye, ki kwene?
3 Lagam pi lapeny i kom tyen lok mumiyo Lubanga oye ni peko obed tye ki dok ngo ma en bitimone ducu tye i rekod ma en oweko kicoyo piny me konyowa. Rekod meno aye Lokke, Baibul Maleng. “Ginacoya ducu ma yam gicoyo, gicoyo pi teko pa Cwiny pa Lubanga. Konyo me pwony, me juko dano, me tiro kit pa dano, me nyebo dano wek gulub kit ma atir, wek dano pa Lubanga obed muteggi, ma bene oyubbe i yo ducu, ma romo tiyo kit tic mo maber ducu.”—2 Temceo 3:16, 17.
4, 5. Ngo ma omiyo Baibul obedo buk mo ma kite dok pat mada?
4 Baibul ada obedo buk mo ma dok kite pat. Tye ki lok matir ma mako tekwaro pa dano dok tito bene gin mutimme ma onongo peya kicweyo dano. Baibul pud tiyo wa i kare-ni bene, pien lok pa lunebine nyuto jami ma tye ka timme i karewa-ni ki ma bitimme i anyim.
5 Pe tye buk mo ma tye ki lok ma genne me tekwaro loyo Baibul. Me labolle, coc ma kicoyo i kare macon ca manok keken aye pud gitye wa i kare-ni. Ento coc macon mapol me Baibul, ma mukene tye bute keken ki mukene tye ma kulo pud gitye: Ginacoya me leb Ibru tye ma romo 6,000 kulu (bukke 39 me “Cik Macon”) ki me leb Grik tye ma romo 13,000 kulu (bukke 27 me “Cik Manyen”).
6. Pingo watwero bedo labongo akalakala ni Baibul me kare-ni rom aroma ki ma con ma Lubanga omiyo kicoyo ca?
6 Lubanga Won Twer Ducu ma omiyo kicoyo Baibul-li, oweko kigwoko cocce i buk adola ki kite ma pe kiloko. Pi man Baibulwa me kare-ni rom ki ma kikwongo coyone i kare ca. Tyen lok mukene ma miyo waye lok man aye ni coc macon me Ginacoya me leb Grik mogo kicoyogi wacon, cokcok mwaka miya acel keken inge coyo ma obedo kome ki kome-ni. Kopi me coc macon ma lucoc ata-gu gucoyo, ma pud gitye-ne polle nongo kikobogi i cencwari mapol ata inge coyo ma obedo kome kikome-ne.
Mic pa Lubanga
7. Wel Baibul ma kipoko dong dwong ma rom mene?
7 Baibul aye obedo buk mo ma pud dong kipoko oromo kin piny loyo. Dong kityeko goyone ma romo bilion angwen kulu. Pe tye buk mo keken mapol rom meno. Baibul dong kityeko gonyone ducu nyo bute keken i leb makato 2,350 kulu. Pi meno, kibyeko ni pacen makato 90 pa dano me wi lobo-ni kulu giromo neno nyo kwano Baibul.
8-10. Tyen lok ango ma omiyo pore botwa me kwano Baibul?
8 Kit ma buk man ada oa ki bot Lubanga dok gin ma nyuto ni lok man tye ada nonge i iye ki mukene a ki woko-ni, pore botwa me kwanone.a Baibul tittiwa tyen lok mumiyo kwo tye, gin mumiyo lobo tye kit man, ki dong kit ma anyim bibedo kwede. Pe tye buk mo mapat ma romo timo meno.
9 Adada, Baibul obedo buk ma Lubanga tiyo kwede me lok ki dano. En otiyo ki tekone, nyo cwiny mere maleng me miyo dano ma romo 40 kulu me coyone. Ada Lubanga loko kwedwa kun tiyo ki Lokke, Baibul Maleng. Lakwena Paulo ocoyo ni: “Cakke ma wugamo lok pa Lubanga ma wuwinyo ki botwa, pe wugamo macalo lok pa dano, ento macalo lok pa Lubanga.”—1 Jo Tecalonika 2:13.
10 Abraham Lincoln, preciden me 16 me United States owaco ni Baibul obedo “mic mo ma pud dong ber loyo ma Lubanga omiyo bot dano . . . Pien labongo buk man onongo pe waromo poko kin gin maber ki marac.” Dong, mic man maber atika-ni tittiwa gin ango i kom kit ma peko ocake kwede, pingo Lubanga oye ni peko obed tye, ki dok ngo ma en bitimone pire?
[Lok ma tye piny]
a Pi ngec mapol ma nyuto ni Baibul obedo buk maleng, nen buk me The Bible—God’s Word or Man’s?, ma Lucaden pa Jehovah aye mucoyo i mwaka 1989.
[Cal ma tye i pot karatac 10]
Baibul kicoyo pi teko pa Lubanga, obedo yone me kubbe ki dano