Pwony me 6
Gin Mumiyo Lubanga Oye Ni Peko Obed Tye
1, 2. Lunyodowa mukwongo gubalo kwo maber ma Lubanga omiyogi nining?
NGO ma obedo marac? Ngo mutimme ma obalo kwo maber ma Lubanga omiyo bot lunyodowa mukwongo i Paradic i Eden? Ngo mumiyo tim maraco ki peko aye dok onya oromo kin piny pi mwaki alip mapol me ka bedo ki kuc ki ribbe kacel i Paradic?
2 Man obedo pien Adam ki Kawa gutiyo ki mic me moko tam pigi kengi-ni marac. Wigi owil woko ni kicweyogi me lubu cik pa Lubanga. Gukwero bedo i te loc pa Lubanga, kun gitamo-ni man biyubo kwogi bedo maber. Pi meno gin gukalo wang-co ma Lubanga oketo i tic ki mic me moko tam pigi kengi woko.—Acakki, cura 3.
Pyem i kom Twero me Loc Mamalo
3-5. Pingo Lubanga pe oneko Adam ki Kawa ka dok ocweyo dano mukene?
3 Pingo Lubanga pe oneko Adam ki Kawa woko ka dok ocweyo dano mukene? Pien kikelo pyem i kom twerone mamalo me loc, twerone me loc ma pe kitwero lokone.
4 Dong lapeny onongo tye ni: Anga ma tye ki twero me loc, ki dong loc pa anga aye mupore? Kit ma en obedo Lubanga mamalo twal dok Lacwe jami ducu-ni, en aye nongo tye ki twero me loyogi. Kit ma en aye won ryeko-ni, locce aye ber pi ginacweya ducu. Ento kikelo pyem i kom loc pa Lubanga. Ki dok, gin mo mono onongo rac ki cwecce dano? Wabineno lacen kit ma lok kom gene pa dano bene kubbe kwede.
5 Kit ma dano dong pe gitye i te loc pa Lubanga-ni, lapeny ma pud odong aye ni: Tika dano twero kwo maber kengi ka pe Lubanga aye loyogi? Lacwec onongo ngeyo lagam meno, ento gin maber loyo aye onongo me weko dano bedo agonya kit ma gimito. Gin guyero me lubo yo meno pigi kengi, pi meno Lubanga oye ki gin.
6, 7. Pingo Lubanga oweko kare malac ki dano me bedo agonya?
6 Pi weko kare malac bot dano me temo jami ducu ma kwakke ki bedo agonya kwicikwici, Lubanga biweko nen ka maleng kicel pi kare ducu ka ce dano twero bedo maber ite locgi nyo ite locce. Dok kare man myero obed malac wek omi kare ki dano me dongo dirogi i lok me wibye, tet, cayan, kacel ki lok me cango two, nio wa i agikkine.
7 Pi meno, Lubanga oye ni dano gulone kengi wa i kare-ni pi nyutu labongo akalakala mo ka ce dano twero lone kengi labongo en. Dong dano twero yero cwiny me kica nyo gero, mar nyo adegadega, kit matir nyo kit ma pe atir. Dano bene myero oyubbe pi adwogi me gin ma gin guyero: bedo maber kacel ki kuc nyo tim maraco ki dong peko.
Jemo pa Cwec ma Gubedo Cwiny
8, 9. (a) Jemo ango ma ocakke i kabedo me cwiny? (b) Angagi mapat ki Adam ki Kawa ma Catan bene obwologi me jemo?
8 Tye gin mukene ma omyero wanen. Lunyodowa mukwongo keken aye pe gujemo i kom loc pa Lubanga. Ento jo mene ma onongo dong gikwo i kare meno? Cwec ma gubedo cwiny. Ma peya Lubanga ocweyo dano, en ocweyo kwo madok tye i rwom ma lamal adada, lumalaika mapol me kwo i polo. Kicweyogi bene ki mic me moko tam pigi kengi ki dok miti me mine i te loc pa Lubanga.—Yubu 38:7; Jabuli 104:4; Niyabo 5:11.
9 Baibul nyutu ni jemo mukwongo ocakke i kabedo me cwiny. Cwec mo me cwiny onongo mito bedo agonya kwicikwici. En bene onongo mito ni dano guwore. (Matayo 4:8, 9) Cwec me cwiny man aye oloko tam pa Adam ki Kawa me jemo, kun loko lok goba ni Lubanga tye ka kano gin mo maber ki botgi. (Acakki 3:1-5) Man omiyo kilwonge ni Larac (Lakwot Nying) ki Catan (Lajemo). Lacen en bene obwolo cwec me cwiny mukene me jemo. Gin dong kilwongi ni jogi.—Nwoyo Cik 32:17; Niyabo 12:9; 16:14.
10. Adwogi ango ma obino pi jemo pa dano kacel ki cwec me cwiny?
10 Kit macalo dano gujemo i kom Lubanga-ni, gin gumine me lubu tam pa Catan kacel ki jogine. Man aye omiyo Baibul lwongo Catan ni “lubanga me lobo man” ma ‘oumo tam pa jo ma pe giye-nu.’ Lok pa Lubanga tito ni “lobo ducu tye i te loc pa Larac.” Yecu olwongo Catan-ni “lalo lobo man.”—2 Jo Korint 4:4; 1 Jon 5:19; Jon 12:31.
Lok Madito Aryo
11. Lok mukene ango ma Catan opyem kwede ki Lubanga?
11 Catan okelo pyem mukene dok i kom Lubanga. Rom aroma ma en owacci yo ma Lubanga ocweyo ki dano pe ber dok ni pe tye ngat mo ma bitimo gin matir ka ce kiketo i lyeto. En opyem ni ka kitemogi ci giyeto Lubanga woko. (Yubu 2:1-5) I yo man, Catan okelo akalakala i kom gene pa dano.
12-14. Kare binyutu nining ada pa lok madito aryo ma Catan okelo-ni?
12 Pi man, Lubanga omiyo kare muromo pi cwecce ducu maryek wek gunen kit ma pyem man kacel ki pyem i kom twero me locce kibicobone kwede. (Nen Nia 9:16.) Gin ma nongo bitimme i tekwaro pa dano nongo binyutu ada pa lok aryo magi.
13 Mukwongo, kare mono onongo binyutu gin ango i lok ma kwako twero me loc mamalo, nyo pore pa loc pa Lubanga? Dano tika romo lone kengi maber ma loyo Lubanga? Tika loc mo keken pa dano mapat ki pa Lubanga twero kelo lobo me yomcwiny labongo lweny, turo cik ki ngolo kop alenga? Tika mo twero jwayo can kun kelo lonyo i cing dano ducu? Tika mo tye ma twero giko two, tiyo ki to? Loc pa Lubanga onongo kiketo me timo jami magi ducu.—Acakki 1:26-31.
14 Ma lubbe ki pyem me aryo-ni, kare onongo binyutu nining ber pa dano macalo ginacweya? Mono onongo obedo bal kitung bot Lubanga me cweyo dano i kit ma en ocweyo kwede-ni? Tika dano mo onongo romo timo gin ma atir ka kiketo i atematema? Tika jo mo onongo binyutu ni gimito loc pa Lubanga me kaka dano ki lone kengi?
[Cal ma tye i pot karatac 13]
Lubanga omiyo kare ki dano me dongo dirogi nio wa i agikkine
[Ka ma cal oa ki iye]
Shuttle: Based on NASA photo