Wi Lubele ma i LAIBRARI ME INTANET
Wi Lubele
LAIBRARI ME INTANET
Acholi
  • BAIBUL
  • BUKKE
  • COKKE
  • dg pwony me 10 pot 22-28
  • Lobo Manyen Ma Mwonya Ma Lubanga Tye Ka Yubone

Vidio mo pe kany.

Timwa kica, peko mo manok otimme i kom vidio.

  • Lobo Manyen Ma Mwonya Ma Lubanga Tye Ka Yubone
  • Lubanga Tika Ada Paro Piwa?
  • Wi lok matinotino
  • Pwony macok rom
  • Kit ma Atir Bileyo Tim Maraco
  • Yot Kom Dok Bibedo Tye
  • Jo Muto Gibicer
  • Lobo me Kuc Kikome-ni
  • Lobo Bilokke Doko Paradic
  • Kwanyo Jami Macon
  • Kwo i Lobo Manyen me Kuc
    Kwo i Lobo Manyen me Kuc
  • Kare ma Ngec pa Lubanga Bipongo Lobo
    Ngec Ma Terowa i Kwo ma Per Tum
  • Itwero Nongo Kwo me Yomcwiny i Anyim!
    Ngec Ma Terowa i Kwo ma Per Tum
Lubanga Tika Ada Paro Piwa?
dg pwony me 10 pot 22-28

Pwony me 10

Lobo Manyen Ma Mwonya Ma Lubanga Tye Ka Yubone

1, 2. Ngo ma bitimme i nge lweny me Armagedon?

I NGE lweny pa Lubanga me Armagedon, ngo ma dok bitimme? Kwo manyen ma mwonya bicakke. Jo ma gubwot ki i lweny me Armagedon pi nyuto gennegi i kom loc pa Lubanga, gibicako kwo i lobo manyen. Kwo manyen man pud dong bibedo mit mada kit macalo jami mabeco mapol bia ki bot Lubanga kun bino bot dano!

2 I te tela me Ker pa Lubanga, jo mubwot gibicako roco lobo doko paradic. Dano bitic ki kerogi i tiyo tic ma kelo bakacic bot jo ducu ento pe pigi keken. Lobo-ni bicako doko paco ma mwonya, me kuc, ma cwiny dano maro.

Kit ma Atir Bileyo Tim Maraco

3. Yweyo ango ma dano bibedo kwede i nge Armagedon?

3 Magi ducu bitwere ka kijwero lobo pa Catan woko. Dini goba ma poko kin dano, kit yo me kwo pa dano, nyo gamente ma dano aye loyo dong gibibedo peke. Yub goba pa Catan me bwolo dano bigik; jami ducu ma cwako kor tic pa Catan-ni kibijwero tegi woko. Tam kong: Lobo pa Catan ma tye calo awola-ni kibiketo tere woko! Yamo pud dong bikutu dano ma konye pe!

4. Tit kong alokaloka ma bibedo tye i pwony.

4 Tam maraco me loc pa dano kibileyone ki pwony ma dongo dano ma bia ki bot Lubanga. “Litinoni ducu [Jehovah] aye bipwonyogi.” (Icaya 54:13) Miyo pwony matir magi mwaka ki mwaka, biweko “lobo ducu bipong ki ngec pa Rwot macalo pii ma pong i nam.” (Icaya 11:9) Dano ma bibedo i lobo pe dong gibipwonyo tim maraco, ento ‘jo ma bibedo iye gibipwonyo kit ma atir.’ (Icaya 26:9) Tam ki tic ma dongo dano keken aye bibedo tye nino ducu.​—Tic pa Lukwena 17:31; Jo Pilipi 4:8.

5. Ngo ma bitimme i kom tim maraco ki lutim maraco?

5 Pi meno, tim me nek, gero, buto ki mon tek tek, yak, tic mukene me turo cik bibedo peke. Dano mo pe bideno can pi tim maraco pa ngat mukene. Carolok 10:30 tito ni: “Pe tye ngat mo ma bireto dano ma kite atir; dano marac aye pe bibedo i lobo.”

Yot Kom Dok Bibedo Tye

6, 7. (a) Gin ango ma ye iye tek ma Ker-ri bigikone woko? (b) I kare ma Yecu tye i lobo,en otimo ngo me miyo lapor i lok man?

6 I lobo manyen, adwogi maraco ma jemo macon ca okelo kibijwayone woko. Me labolle, loc me Ker meno bikwanyo two ki tiyo woko. Kombeddi kadi bed itye ki yotkom maber adada, ento teke icako ti, wangi cako neno piny yiriyiri, laki cako ony woko, iti cako ding, del komi cako runge doko bel, dul komi ma i iye cako doko goro nio wa i to.

7 Dong, adwogi maraco ma walako ki bot lunyodowa mukwongo dong cok bibedo jami mukato. Wi po i kom jami ma Yecu otimo macalo lapor i kom two i kare ma en pud tye i lobo? Baibul tito ni: ‘Ci lwak dano gukelo bote luput ki lungolo, jo ma telebgi oto ki lutowang, ki lutwo mukene mapol gupyelogi piny ka tyen Yecu, ci en ocangogi. Mumiyo lwak guuro tutwal ka guneno lutelebgi oto guloko jo ma cingi okwe gucang jo ma tyengi ongol guwoto kadi wa lutowang bene guneno piny.’​—Matayo 15:30, 31.

8, 9. Tit kong yomcwiny ma bibedo tye i lobo manyen-ni ka yotkom odwogo.

8 Bibedo me yomcwiny madit me kwo i lobo manyen labongo kit peko mo! Arem ma bino pi lok kom peko me yotkom bene dong bibedo pe. “Pe tye dano mo ma bedo i lobowa ma biwaco ni, an ‘koma lit.’” “I kare meno lutowang wangi biyabbe, jo ma itgi oding bene itgi biyabbe. I kare meno lungolo bipye malo calo til, ki jo ma te lebgi oto gibicako wero wer ki yomcwiny.”​—Icaya 33:24; 35:5, 6.

9 Itamo ni pe bibedo me yomcwiny mada me co odiko nino ducu kun inongo ni yotkomi tye ka medde ameda? Pe bibedo ber mada bot jo ma guti me nongo ni tekogi dok odwogo macalo i kare me bulugi dok ni gibibedo labongo roc mo macalo Adam ki Kawa kong gubedo kwede? Baibul ciko ni: “Ci ringo kome biroc bidoko nyen macalo pa latin.” (Yubu 33:25) Pud dong bibedo me yomocwiny me neno ni jami mogo calo maraya wang, lamed dwan ma luding it ruko i itgi, odo komo, lela pa lungolo, yadi me two dong gipe! Odi yadi, dokto-gi, daktar lak-gu, ducu pe gibimitte matwal.

10. Ngo ma obitimme i kom to?

10 Dano ma gitye ki yotkom ma kit meno dong pe gibimito ni gito. Dok pe gibito, pien dano nongo dong pe gitye i opii pa bal alaka ki to. Kricito “myero obed ka loc, nio ka Lubanga biketo lukworre ducu piny i te tyene. Lakwor ma gibityeko woko me agikki en aye to.” “Ento mot ma Lubanga miyowa en aye kwo ma pe tum.”​—1 Jo Korint 15:25, 26; Jo Roma 6:23; nen bene Icaya 25:8.

11. Niyabo dolo te lok i kom mot mabeco ma bibedo i lobo manyen-ni nining?

11 Buk me agikki me Baibul odolo lok i kom mot mabeco ma Lubanga bimiyone ki dano i paradic, ni: “[Lubanga] bijwayo pi wangi woko ducu. To bene dong bibedo pe kadi kumo nyo koko, nyo arem, pien gin macon dong ducu gurwenyo woko matwal.”​—Niyabo 21:3, 4.

Jo Muto Gibicer

12. I yo ma nining ma Yecu onyuto kwede twerone ma Lubanga omiye me cero dano?

12 Yecu pe ocango lutwo ki lugoro keken. En bene ocero wa jo muto ki i lyel. En otimo meno me nyuto teko madit me cero dano ma Lubanga omine. Wi po i kare mo ma Yecu obino i ot pa laco mo ma nyare onongo oto woko? Yecu owaco bot anyaka muto meno ni: “Latin anyaka awacci ni, a malo!” Adwogine obedo ningo? “Oyotoyot nyako oa malo, owoto.” Dano guneno ci “guuro matek mada.” Yomcwinye omito balo wigi woko!​—Marako 5:41, 42; nen bene Luka 7:11-16; Jon 11:1-45

13. Kit dano ango ma kibicerogi?

13 I lobo manyen-ni, “gibicero, jo ma kitgi atir wa jo ma kitgi pe atir.” (Tic pa Lukwena 24:15) I kare meno Yecu bitic ki twero ma Lubanga omiye me cero jo muto ma lubbe ki lok ma en owaco ni, “An nicer ki kwo; ngat ma ye an, kadi oto, dok bikwo.” (Jon 11:25) En bene owacci: “Jo ducu ma tye i lyel [ma wi Lubanga po pigi] biwinyo iye dwane [Yecu] ci gibikatti woko.”​—Jon 5:28, 29.

14. Kit ma to dong bibedo peke-ni, jami ango ma bibedo pe?

14 I lobo ducu dano bibedo ki yomcwiny madit mada me neno gurup ki gurup pa dano mapol ma nongo kicerogi pi dwogo me rwatte ki jogi me amara! Ripot me to ma dok kelo kumu bot jo mubwot dong bibedo pe. Ma ka meno, dano dok biwinyo ripot ma tye olung tukke calo: kwena i kom jo ma pud ocer nyen ma nongo kelo yomcwiny bot jo me amaragi. Pi meno, yik, limu nyo ka wango lyel ducu dong bibedo peke!

Lobo me Kuc Kikome-ni

15. I yo ma nining ma lok pa lanebi Mika bicobbe kwede maber?

15 I kabedo ducu dano bilimo kuc kikome. Lweny ki yweko pi lweny, kacel ki yubo jami lweny ducu bibedo jami mukato. Pingo? Pien cwiny me apokapoka me lobo, kaka, rangi del kom birweny woko. Man tere ni, “rok mo pe bitingo pala lucwan i kom rok wadgi, pe dong gibimedde ki pwonyo lweny.”​—Mika 4:3.

16. Lubanga bineno ni lweny myero ogik woko nining?

16 Lok man twero bedo me aura mada pien lweny obedo ka timme teretere i tekwaro pa dano. Man obedo ka timme pien dano obedo i te loc pa dano ki pa jogi. Man aye lwongo ma bibedo tye me neno gin ma bitimme i lobo manyen, i te loc me Ker-ri: “Bin inen gin ma [Jehovah] otiyo . . . En juko lweny woko i wi lobo ducu; turo atum-gu dok nginyo wa tong woko, wango lwak kwot [wa gadigadi lweny-gu] woko liweng ki mac.”​—Jabuli 46:8, 9.

17, 18. I lobo manyen, kit wat ango ma bibedo tye i kin dano ki lee?

17 Lee ki dano bene gibibedo kacel ki kuc, kit ma gubedo kwede con i Eden. (Acakki 1:28; 2:19) Lubanga owacci: “Dok i nino meno abiketo gicikke piwu kun acikke ki lee tim, kacel ki winyo me polo, ki gin ma lak alaka i ngom . . . wek ami wubut piny ki kuc.”​—Kocea 2:18.

18 Kucce biromo piny ma rom mene? ‘Orudi bibedo kacel ki latin romo, kwac ki latin dyel bene gibibuto piny kacel, roya ki labwor gibidongo kacel, latin matidi aye ma bitelogi.’ Lee mo pe bibedo ger i kom dano nyo i kom lee wadgi. Kadi “labwor bicamo lum calo twon”!​—Icaya 11:6-9; 65:25.

Lobo Bilokke Doko Paradic

19. Lobo bilokke bedo nining?

19 Lobo ducu bidoko paco me paradic ma dano bibedo iye. Meno aye omiyo Yecu ocikke bot laco mo ma obedo ki niye i kome ni: “Wabibedo kwedi i Paradic.” Baibul tito ni: “Lobo mutwo kacel ki tim bibedo ki yomcwiny, ature bituru iye calo lenga . . . Pien pii bimwoco piny woko i dye tim, ki kulu bene piine bibedo ka mol i lobo mutwo.”​—Luka 23:43; Icaya 35:1, 6.

20. Pingo kec pe dong bineko dano?

20 I Ker pa Lubanga, kec pe dong bineko dano milion mapol ata. “Cam myero ocek mabup i lobone, opong wa i wi godi-gu woko ducu.” “Yadi ducu me tim binyako nyiggi, ki lobo bene bimiyo ginapita ma gipuro iye cek nya mabup, man miyo gibedo i lobogi labongo ayela mo.”​—Jabuli 72:16; Ejekiel 34:27.

21. Ngo ma bitimme i lok kom bedo labongo gang, odi ma ongine kacel ki kabedo maraco?

21 Can, jo ma gangigi peke, odi pa lucan ma nongo gungine kacel, ki kabedo ma nongo opong ki lutim maraco bibedo peke. “Dano gibigero odigi ci gibed i igi gibipuro poto olokgi, ci gibicamo nyige bene. Pe gibigero odigi ci giweko ngat mukene aye bedo iye pe gipuro poto olokgi ci giweko ngat mukene aye dok camo nyige.” “Ngat acel acel bibedo i te olokke ki i te odurone pe tye ngat mo ma bimiyo gibedo lwor.”​—Icaya 65:21, 22; Mika 4:4.

22. Baibul otito mot mapol ma bibedo i te loc pa Lubanga nining?

22 Dano gibinongo mot me jami magi ducu, ki mukene mapol i Paradic. Jabuli 145:16 waco ni: “In [Lubanga] iyabo cingi ci imiyo gin makwo ducu giyeng.” Pe obedo me ur ni lok pa lanebi mo me Baibul waco ni: “Ento jo mamwol aye gibicamo lobo; gibibedo iye ki yomcwiny ki lonyo madwong ma gibilimo. . . . Jo ma kitgi atir gibicamo lobo, dok gibibedo iye matwal.”​—Jabuli 37:11, 29.

Kwanyo Jami Macon

23. Ker pa Lubanga birwenyo can ducu ma dano gulimo nining?

23 Ker pa Lubanga birwenyo can ma dano gulimo pi mwaki alip abicel mukato angec-ci woko ducu. Yomcwiny ma dano bibedo kwede bibedo dwong loyo can ma dano gulimo. Tamo jami maraco mutimme angec pe bibalo mit pa kwo. Tam ki tic ma dongo dano ma dano bibedo kwede i kwogi nino ducu birucu tam i kom arem macon mot mot.

24, 25. (a) Ngo ma Icaya oloko ni bitimme? (b) Pingo watwero bedo ki gen ni jami maraco ma nongo tye i tamwa ducu birweny woko?

24 Lubanga ma lapar otito ni: ‘Pien nen, aketo polo manyen [gamente manyen me polo ma biloyo dano] ki lobo manyen [dano ma kitgi atir]; pe dong gibipo pi jami macon, pe bene dano mo bitamo pigi. Ento myero cwinywu obed yom kun wubedo ki yomcwiny nakanaka i kom jami magi ma aketogi-ni.’ “Lobo dong oywe mot tye ma okwe mot, jo ma bedo iye dong gimoro wer keken.”​—Icaya 14:7; 65:17, 18.

25 Lubanga biloko piny ma oballe dok orii pi kare malac tutwal-li woko kun tiyo ki Ker mere. En bigwokowa pi naka kun miyowa mot mapol ata ma biumo kit peko mo keken ma nongo yam walimo. Peko ma walimo i kare mukato angec mot mot birweny woko ki i wiwa ma wiwa dong pe bipo iye.

26. Lubanga biculowa pi peko ma walimo angec nining?

26 Meno aye kit ma Lubanga biculo kwede wang peko ma nongo walimo i lobo i kare man. En ngeyo ni nywalowa ki roc-ci pe obedo pi balwa, ento ni walako alaka ki bot lunyodowa mukwongo. Nywalowa i lobo pa Catan-ni pe obedo balwa bene pien ka Adam ki Kawa onongo gugwoko gennegi, kono kinywalowa i paradic. Dong, ki twon kica madit, Lubanga biculo wang jami maraco magi ma kikelo akela i komwa-ni.

27. Lok pa lunebi mene ma bicobbe i lobo manyen?

27 I lobo manyen, dano bilimo yomcwiny me bedo angonya kit ma kitito pire i Jo Roma 8:21, 22 ni: “Gibigonyo ginaketa woko ki i opii me bedo gin ma top, wek gunong kuc ki deyo ma gimiyo ki litino pa Lubanga. Wangeyo ni jami ducu ma giketogi aketa, gubedo ka cur acura ki arem nio wa i kare-ni.” Dano bineno ki wangi cobbe pa jami ducu ma kiloko i lega man ni: “Ker meri obin; giti gin ma imito i lobo kit ma gitiyo i polo.” (Matayo 6:10) Kwo ma mwonya ma bibedo i lobo Paradic-ci binyuto kodi kwo ma nongo tye i polo.

[Cal ma tye i pot karatac 23]

I lobo manyen, kom jo muti biroc doko calo kom bulu

[Cal ma tye i pot karatac 24]

Two ki goro ducu kibijwayo woko ki i lobo manyen

[Cal ma tye i pot karatac 25]

I lobo manyen, Jo muto kibicerogi woko

[Cal ma tye i pot karatac 26]

‘Pe dong gibipwonyo lweny doki’

[Cal ma tye i pot karatac 27]

Dano ki lee ducu kibibedo kacel ki kuc i paradic

[Cal ma tye i pot karatac 27]

‘Lubanga biyabo cinge ci miyo gin makwo ducu yeng’

[Cal ma tye i pot karatac 28]

Ker pa Lubanga biculo wang can ma walimo ducu, dok makato

    Gin akwana i leb Acholi (1996-2024)
    Kat Woko
    Dony i Iye
    • Acholi
    • Nywakki
    • Jami ma imito
    • Copyright © 2025 Watch Tower Bible and Tract Society of Pennsylvania
    • Cik pi Tic Kwede
    • Privacy Policy
    • Privacy Settings
    • JW.ORG
    • Dony i Iye
    Nywakki