Pwony me 11
Te Gutti me Lobo Manyen Dong Kitye Ka Cibone
1, 2. Ngo ma tye ka timme i ka wangwa ma tye ka cobo lok pa lunebi me Baibul?
GIN mukene me yomcwiny aye ni, te guti me lobo manyen pa Lubanga dong kitye ka cibone i kare man ma lobo pa Catan tye ka balle medde ameda-ni. Dong Lubanga tye ka coko dano ki i rok ducu ma wan bene watye ka nenone wek gudok te guti me lobo manyen ma bileyo ka wang lobo man ma opong ki apokapoka-ni. I Baibul, i buk pa 2 Petero 3:13, dul pa dano manyen man gilwongogi ni “lobo manyen.”
2 Lok pa lanebi mo me Baibul bene wacci: “I kare ma pud tye anyim [kare man ma watye ka kwo iye-ni] . . . , lwak lurok mapol gibibino gibiwacci, ‘Wubin, waitu i wi got pa Rwot [kabedo me woro me ada pa Jehovah], . . . wek en opwonywa ki kit mere ka wek walub yo mere.’”—Icaya 2:2-3.
3. (a) Lok pa lanebi Icaya dong tye ka cobbe i kom angagi? (b) Buk me agikki me Baibul loko iye ningo?
3 Lok pa lanebi meno dong tye ka cobbe i kom jo ma giwinyo ‘Lubanga dok gitye ka wot kun gilubu yone.’ Buk me agikki me Baibul loko i kom jo meno ma gimaro kuc dok gia ki i twok lobo ducu-ni, ni “lwak dano mapol . . . ma gua ki rok ducu, ki i kaka ducu, ki dano ducu me wi lobo, ki leb ducu,” man ada obedo utmego me lobe ducu ma guribbe kacel i woro Lubanga. Baibul dok tito ni: “Magi aye gin jo ma gua ki i can madit atika.” Ma te lokke ni, gibibwot ki i jwero yub man me lobo marac-ci.—Niyabo 7:9, 14; Matayo 24:3.
Utmego me Ada ma Gia ki i Lobo Ducu
4, 5. Pingo ribbe pa Lucaden pa Jehovah calo utmego acel otwere?
4 Lucaden pa Jehovah milion mapol gitemme ki cwinygi ducu me lubu cik pa Lubanga. Gengi pi kwo ma pe tum cung i kom lobo manyen pa Lubanga. Pi kwo kwogi me nino ducu ma lubbe ki cik pa Lubanga, gin ginyuto ni gitye ki miti me mine i lubu kit yo me loc pa Lubanga kombeddi ki dok i lobo manyen. I kabedo ducu, kadi bed gubedo kaka nyo rangi del kom ango, gilubu en cik acel ma Lubanga oketo i Lokke-ni. Meno aye omiyo gin gubedo utmego me ada me lobo mapat pat, dul dano me lobo manyen ma Lubanga tye ka yubo.—Icaya 54:13; Matayo 22:37, 38; Jon 15:9, 14.
5 Lucaden pa Jehovah pe giwaco ni ribbe pa utmego me lobo ducu-ni obino pi tekogi. Gingeyo ni man obino pi teko pa cwiny pa Lubanga ma tye ka tic i kom dano ma gimine i te cikke. (Tic pa Lukwena 5:29, 32; Galatia 5:22, 23) Lubanga aye ma otiyo man. Kit macalo Yecu otito ni: “Gin man pe twerre ki bot dano, ento ki bot Lubanga twerre.” (Luka 18:27) Dong, Lubanga ma oketo polo ki lobo me cung pi naka-ni en aye bene biweko dul dano me lobo manyen-ni bicung pi naka.
6. Pingo watwero wacci ribbe pa Lucaden pa Jehovah-ni obedo tango me kare man?
6 Dong, yo me loc pa Jehovah i lobo manyen-ni twero nen i gin ma en tye ka timone i kom jo ma kitye ka cokogi me doko te gutti me lobo manyen. Gin ma en otimo i kom Lucadenne, ka ineno mot, obedo tango me kare man. Pingo? Pien oribo Lucaden pa Jehovah me lobo ducu me doko utmego acel, ma apokapoka me rok, kaka, dini, pe twero turo wat ma tye i kingi. Kadi bed wel Lucaden tye wa i milion mapol dok gia ki i lobbe ma romo 235 kulu, ento gitye ki wat matek mada ma pe itwero poko kingi. Utmege me lobo ducu man, ma peya otimme i tekwaro-ni, ada obedo tango ma Lubanga tye ka timone i kare-ni.—Icaya 43:10, 11, 21; Tic pa Lukwena 10:34, 35; Jo Galatia 3:28.
Ngeyo Jo pa Lubanga
7. Yecu owacci kibingeyo lulub kore nining?
7 Wan watwero medde ki ngeyo jo ma Lubanga tye ka tic kwedgi calo te guti me lobo manyen-ni nining? Ka ineno mot, angagi aye gitye ka cobo gin ma Yecu owaco i Jon 13:34, 35? En owacci: “Amiyowu cik manyen, ni, wumarre kekenwu; wumarre kekenwu macalo ceng amarowu. Pi man dano ducu bingeyo ni wun lupwonnyena ka mer tye i kinwu.” Lucaden pa Jehovah giye i lok pa Yecu-ni dok giketo i tic. Gin gilubu Lok pa Lubanga ma waco ni, “wumok matek i marre kekenwu.” (1 Petero 4:8) Gin ‘myero gubed ma gupong ki mar, pien mar keken aye tweyo jami ducu, ribogi kacel ma cobo bene maber licwic.’ (Kolocai 3:14) Pi meno mar pa utmego tye calo “tol” ma tweyo ribogi kacel i lobo ducu.
8. 1 Jon 3:10-12 onyuto kit me ngeyo jo pa Lubanga nining?
8 Dok bene 1 Jon 3:10-12 tito ni: “Man aye gin ma bimiyo gineno jo ma gin litino pa Lubanga ki jo ma gin litino pa Catan: ngat ma pe timo gin ma tye atir pe latin pa Lubanga, kadi wa ngat ma pe maro ominne bene. Pien man aye lok ma wuwinyo nia i acakki, ni myero wamarre kekenwa, pe wabed calo Kain ma yam obedo latin pa Larac, ci oneko omine woko.” Pi meno, jo pa Lubanga gubedo utmego ma gia ki i lobo ducu, ma pe giger.
Gin Mukene ma Nyuto
9, 10. (a) Kit tic ango ma miyo kingeyo lutic pa Lubanga i kare me agikki-ni? (b) Lucaden pa Jehovah gucobo lok ma tye i Matayo 24:14 nining?
9 Tye yo mukene ma nyuto lutic pa Lubanga. I lok ma Yecu otito pi kare me agikki me lobo-ni, en otito jami mapol ma binyuto ni kare man obedo kare me agikki. (Nen Pwony me 9.) Gin acel ma pire tek ki i kingi obedo gin ma en otito i lokke i Matayo 24:14 ni: “Dong lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.”
10 Dong ineno mono ni lok-ki tye ka cobbe? Tye ka cobbe do. Nicakke wa i mwaka 1914 ma kare me agikki ocakke kwede, Lucaden pa Jehovah gitye ka tito pi kwena maber me Ker pa Lubanga i but lobo ducu kit ma Yecu ociko kwede ni guwot i paci pa dano. (Matayo 10:7, 12; Tic pa Lukwena 20:20) Lucaden pa Jehovah milion mapol gilimo dano i lobo ducu pi lok kwedgi pi lobo manyen. Man omiyo in bene inongo brocuwa man, pien tic pa Lucaden pa Jehovah kwako wa goyo ki poko bukke bilion mapol ma mako lok kom Ker pa Lubanga. In ingeyo nyo jo mo mukene mapat ma gitito kwena me Ker pa Lubanga kun nongo giwoto i ot ki ot i wi lobo ducu? Marako 13:10 bene onyuto ni lok me kwena ki pwonyo dano-ni myero kong “gikwong” titone ma peya agikki obino.
Miyo Lagam me Pyem Madit me Aryo ma Kikelo
11. Gin ango mukene ma Lucaden pa Jehovah gitye ka cobone ki mine i te loc pa Lubanga?
11 Lucaden pa Jehovah gitye ka cobo gin mukene ki lubu cik pa Lubanga. Gitye ka nyuto ni Catan obedo lagoba i kare ma en opyem ni dano pe giromo gwoko gennegi bot Lubanga ka kiketogi i atematema, ma man omiyo lagam i kom pyem madit me aryo ma kwako gene pa dano. (Yubu 2:1-5) Kit ma Lucaden gubedo dul pa dano milion mapol ma gua ki i lobo ducu-ni, gin ginyuto gennegi bot Lubanga macalo dul acel. Kadi bed ni gitye ki roc, gin gicung tung bot Lubanga i kop madit ma kwako twero pa Lubanga macalo laloc me polo ki lobo, kadi bed Catan tye ka keto lyeto i komgi.
12. Lucaden gitye ka lubu lanen pa angagi ki nyuto niyegi?
12 Kombeddi, Lucaden pa Jehovah ma gitye milion mapol-li gimedo kor lagam ma lucaden me kare macon gumiyo i nyuto gennegi bot Lubanga. Jo manok i kingi obedo Abel, Nua, Yubu, Abraim, Cara, Icaka, Debola, Ruth, Daudi, Daniel. (Jo Ibru cura 11) Baibul tito ni gubedo ‘lwak caden mapol.’ (Jo Ibru 12:1) Jo magi kacel ki jo mukene ma tye iye wa lupwonnye pa Yecu-ni gugwoko gennegi bot Lubanga. Yecu kikome omiyo lanen maber loyo ducu i gwoko genene.
13. Lok ada ango ma Yecu oloko i kom Catan ma ocobbe kakare?
13 Man nyuto ni lok ma Yecu ma owaco i kom Catan bot lutela dini-ni obedo ada, ni: “Ento koni wumito neka, an dano ma atittiwu lok me ada ma awinyo ki bot Lubanga. . . . Wun wua ki bot wonwu, Catan wumito cobo gin ma wonwu mito. Nia i acakki piny en con lanek, pe cung i ada, pien lok me ada pe i iye. Ka en loko lok goba, en loko macalo kite tye, pien en lagoba, dok won goba.”—Jon 8:40, 44.
In Icung Tung Kwene?
14. Ngo ma tye ka timme i kom te guti me lobo manyen i kare-ni?
14 Te gutti me lobo manyen ma Lubanga tye ka ketone, ma obedo Lucaden pa Jehovah ma gia ki i lobe mapat pat-ti tye ka medde ameda. Mwaka ki mwaka dano alip mapol ata gimoko tamgi pigi kengi me jolo loc pa Lubanga kun gijenge i kom ngec matir. Gidoko but jo ma gibikwo i lobo manyen, gicung tung bot Lubanga i kop madit ma dok i kom loc pa Lubanga ma kwako kabedo ducu-ni, ki me nyuto ni Catan obedo lagoba.
15. Tic me pok ango ma Yecu bitimone?
15 Pi yero tela pa Lubanga, gin bibedo jo mupore me bedo i ‘tung cing me lacuc’ pa Kricito i kare ma nongo en tye ka poko kin ‘romi’ ki ‘dyegi.’ I lok pa Yecu pi kare me agikki, en otito ni: “Rok ducu bicokke kacel i nyime, en bipoko kingi woko patpat, kit macalo lakwat poko kwede romi ki i kom dyegi. Biketo romi yo tung cinge ma lacuc, ento dyegi en biketo yo tung cinge ma lacam.” Romi cung pi jo ma mwol ma giribbe dok gimiyo cwak bot utmegi Kricito, dok gimine i te tela pa Lubanga. Dyegi cung pi jo ma lujemo ma gikwero Kricito ki utmegine dok pe gimiyo cwak i kom loc pa Lubanga. Adwogine tye ningo? Yecu owaco ni: ‘Dyegi gibicito woko i to me labed naka, ento jo ma kitgi atir romi bicito i kwo ma pe tum.’—Matayo 25:31-46.
16. Ngo ma myero itim ka imito bedo i Paradic ma tye ka bino-ni?
16 Adada, Lubanga gire paro piwa! Cokcok-ki en bikelo lobo ma mwonya me paradic. In imito bedo i Paradic meno? Ka imito, ci nyut pwocci i kom mic pa Jehovah ki nongo pwonye i lok kome ki dok keto gin ma ipwonyo i tic. “Wuyeny [Jehovah] i kare ma en pud twero nonge, wukok bot [bote] ma pud en tye cok. Latim marac myero obwot timme marac, ki dano ma pe kite atir bene owek tamme ma pe ber-ri; olokke odwog cen bot [Jehovah], wek [Jehovah] otime kica.”—Icaya 55:6, 7.
17. Pingo kare peke me abala i yero ngat ma myero wawore?
17 Kare peke me abala. Agikki me yub me jami ma kareni dong tye cok mada. Lok pa Lubanga pwonyowa ni: “Pe wumar lobo, kadi gin ma tye i lobo. Ka dano mo maro lobo, nongo mar pa Lubanga pe i iye. . . . Lobo tum woko ki mitine ducu; ento ngat ma tiyo gin ma Lubanga mit ri nakanaka.”—1 Jon 2:15-17.
18. Timo gin ango ma bimiyo in bene ibedo ki gen me kwo i lobo pa Lubanga ma mwonya-ni?
18 Dong kitye ka pwonyo jo pa Lubanga pi kwo me labed naka i lobo manyen. Gin gitye ka nongo pwonye i kom jami me cwiny kacel ki diro mukene ma bikonyogi me yubo lobo wek odok paradic. Wacuko cwinyi me yero Loc pa Lubanga kacel ki miyo cwak i kom tic me laro kwo ma en oweko gitye ka timone kombeddi i lobo ducu-ni. Kwan Baibul ki Lucaden pa Jehovah, wek ibed ki ngec i kom Lubanga ma paro piri dok bikelo agikki i kom pekki ducu-ni. I yo ma kit man in bene ibibedo but te gutti me lobo manyen-ni. Man bimiyo ibedo ki gen me nongo mot pa Lubanga me bedo pi naka i lobo manyen ma mwonya ca.
[Cal ma tye i pot karatac 31]
Lucaden pa Jehovah gitye utmego ma gia ki i lobo duc
[Cal ma tye i pot karatac 32]
Te guti me lobo manyen pa Lubanga dong kitye ka cakone i kare-ni