Nong Yomcwiny I Kwo Me Ot

Twere adada pi odi me bedo ki yomcwiny? Yo mene ma miyo twere?

Nong yomcwiny i kwo me ot

Ingeyo odi mo ma jone giribbe dok cwinygi yom calo magi ma nen i karatacci? Odi i kabedo ducu jone gitye kayec calo wang bongo. Ket keny, ritwenymen, par pa lunyodo ma gitye ken-gi, wang-cwiny—magi ducu bamo peko abama. Ladiro mo i kom kwo me ot okok ni: “I kareni, byekko pi tur pa ot pe welo bot ngati-mo keken.”

Pingo odi me kare-ni giyokke ki peko maraco macalo magi? Yo ango ma watwero limo kwede yomcwiny me kwo me ot?

Kit ma Kwo me Ot Ocakke Kwede

Me gamo lapeny magi, mitte ni wange acakki te nyom ki kwo me ot. Pien kace gitye ki Lacak tergi—Lacwecgi—ci jo ma i ot myero gulokke bote pi tela, kit macalo en gire ngeyo maloyo ducu yo ma watwero nongo kwede yomcwiny mupong me kwo me ot-ti.

Bedo me aura, jo mapol gitamo ni yub me ot Lacak tere peke. The Encyclopedia Americana wacci: “Jo mogo mukwano gilengo ni acakki me nyom obino pien lee matino kato dano gibedo aryo aryo.” Kun, Yecu Kricito oloko i kom cwec pa laco ki dako. Okwanyo pwonnye ki i coc macon me Baibul calo twero kun wacci: “Gin ma Lubanga oribo kacel, dano pe opok kingi.”—Matayo 19:4-6.

Ada Yecu Kricito oloko atir. Lubanga maryek ocweyo dano ma gukwongo yo ka oyubo kwo me ot me yomcwiny. Lubanga okelo jo aryo mukwongo kacel i nyom ka owaco ni laco “moko [i] kom dakone likang, gin aryo gidoko kom acel.” (Acakki 2:22-24) Oromo bedo ni, pe mono, peko me ot me kareni gubino pi yenyo yo me kwo ma turo cik ma Lacwec oryeyo i Lokke, i Baibul?

Yo Mene ma Adwogi-ne Ber?

Macalo gwok in bene ingeyo, lobo me kareni tero dano i mitigi ken-gi ki yomcwinygi keken-gi. “Miti madongo ber,” man lapok lim mo aye owaco bot lutino kwan ma gutyeko kwan-gi i Amerika. “Itwero bedo lamiti kun pud iwinyo ni itye maber.” Ento yenyo jami me miti pe tero dano maber. Miti jami, i adane, obedo gin acel i kin jami ma kelo lworo i kwo me ot pien ridde balo wat maber woko dok mayo cawa ki lim pa dano. Ma ka man, tam kit ma carolok aryo keken i Baibul konyowa kwede me neno gin ma pire tek pi yomcwiny.

“Camo pot dek i paco pa jo ma gimari ber kato camo ringo twon ma moo i paco pa jo ma gidagi.”

“Kwon mangic mo ma icamo ki kuc ber kato karama ma icamo i ot ma opong ki daa.”

Carolok 15:17; 17:1.

Pe gigwar mada? Tam keken kit ma wi lobo oromo bedo pat kwede ka nene ot acel acel ocung i lok magi wi ati! Baibul bene miyo tela ma konyo i kom yo ma jo ma i ot myero guter kwede lawotgi. Tam kong tela manok keken ma en miyo.

Co: ‘Wumar monwu macalo wumaro komwu kenwu.’—Jo Epeco 5:28-30.

Tidi mo, ento tiyo tutwal! Baibul bene telo laco me ‘miyo deyo bot dakone.’ (1 Petero 3:7) En timo man ki paro pire i yo mamalo, ma tye iye mwolo, niang, ki pak. Dok bene paro pi tamme ma winyo doge bene. (Por ki Acakki 21:12.) Pe iye ni ot mo keken bibedo maber ka laco tero dakone ma paro pire, i kit ma en laco kikome mito ni giter ki en kwede?—Matayo 7:12.

Mon: ‘In dako bene myero inen ni iworo cwari matek.’—Jo Epeco 5:33.

Dako medo yomcwiny me ot ki konyo cware me cobo ticce mapek-gu. Man aye kit ma con kiyubo, kit macalo Lubanga omiyo dako me bedo “lakony pi en, me pongo kore.” (Acakki 2:18, NW) Pe itwero pwoyo yomcwiny me kwo me ot kace dako nyuto woro bot cware ki cwakko tamme kacel ki notte kwede i yub ma kimoko i ot?

Jo ma Gunyomme: “Jo ducu myero guket deyo i kom nyom.”—Jo Ibru 13:4.

Kace gitimo kit meno, kwo me ot bedo maber. Abor pol kare keto ot aketa. (Carolok 6:27-29, 32) Ki ryeko madit, Baibul cuko cwiny ni: “[“Bed ki yomcwiny,” New World Translation] i kom dakoni ma inyomo ka tinoni. . . . Pingo ikwako kor dako ma lakwele?”—Carolok 5:18-20.

Lunyodo: “Pwony [latin-ni] con ma nongo en pud tidi kit yo ma myero en obed kwede.”—Carolok 22:6.

Kace lunyodo gimiyo cawa ki kare bot lutino, kwo me ot wang ma oyubbe. Kit meno, Baibul cuko cwiny lunyodo me pwonyo litinogi pwony ma atir ‘ka gubedo i odigi, ka gitye ka wot i yo, ka gubuto piny ki ka gua malo.’ (Nwoyo Cik 11:19) Baibul bene waco ni lunyodo myero gunyut ni gimaro litinogi ki pwod me tirogi.—Jo Epeco 6:4.

Litino: “Litino, wuwiny lunyodowu i Rwot.”—Jo Epeco 6:1.

Ada, i lobo man me tim maraco-ni, pe kare ducu yot me winyo lunyodoni. Ento, pe iye ni bedo me ryeko me timo gin ma Lacak te kwo me ot waciwa? En ngeyo gin maber makato ducu wek kwo me otwa yomcwinnye okat mukene-ni. Pi meno tem ki tek me winyo lunyodoni. Mok matek me bwot ki i atematema me lobo me timo gin marac.—Carolok 1:10-19.

Yelle ma ngat acel acel i ot lubo kwede tam me Baibul, en aye bene ber pa kwo me ot enu. Kwo me ot pe bibedo maber i kareni keken ento bibedo ki gen maber me anyim i lobo manyen ma Lubanga ociko. (2 Petero 3:13; Niyabo 21:3, 4) Pi meno lok odok tic i ot me kwano Baibul kacel! Milion pa jo me odi ma orumo lobo ducu gunongo tela ma gimiyo i buk ma cal mabeco tye iye ma gilwongo ni The Secret of Family Happiness macalo gin makonnye dit mada.

Ka pe dok kinyuto mapatte, lok duc gikwanyo ki i Baibul me leb Acholi me mwaka 1985 pa Bible Society of Uganda, kun gitiyo ki nukuta me kareni.