Pwony me 7

Nyiko Cok bot Lubanga i Lega

Pingo pire tek me lega kare ki kare? (1)

Omyero waleg bot nga, ki nining? (2, 3)

Ngo maber me bedo wi lok me lega? (4)

Omyero ileg awene? (5, 6)

Lubanga mono winyo lega ducu? (7)

1. Lega obedo lok i yo me mwolo bot Lubanga. Omyero ileg bot Lubanga kare ki kare. Ka dong iromo winnyo ni itye cok ki en calo larem me amara. Jehovah dit mada dok tek tutwal, ento en winyo legawa! In ilego bot Lubanga kare ki kare?—Jabuli 65:2; 1 Jo Tecalonika 5:17.

2. Lega obedo yo acel me worowa. Pi meno, omyero waleg bot Lubanga keken, bot Jehovah. I kare ma Yecu onongo tye i lobo, en pol kare olego bot Wonne, pe bot ngat mo mukene. Wan myero watim marom aroma. (Matayo 4:10; 6:9) Ento, legawa ducu myero wawac i nying Yecu. Man nyuto ni wan waworo rwom pa Yecu ki dok ni watye ki niye i kom tyer ma en omiyo calo gin-kok.—Jon 14:6; 1 Jon 2:1, 2.

3. Ka walego myero walok bot Lubanga kun a ki i cwinywa. Pe myero wawacu legawa ki wic nyo wakwan akwana ki i buk lega. (Matayo 6:7, 8) Waromo lega ma nongo watye i kit mo keken me mwolo, cawa mo keken, ki i kabedo mo keken. Lubanga bene romo winnyo lega lalingling ma nongo waloko ki i cwinywa. (1 Camuel 1:12, 13) Ber me nongo kabedo ma oling mot ma bor ki jo mukene me lega piwa kenkenwa.—Marako 1:35.

4. Ngo ma romo bedo wi lokki me lega? Gin mo keken ma romo ballo laremwu ki en. (Jo Pilipi 4:6, 7) Lanen maber me lega nyuto ni myero waleg pi nying Jehovah ki yub mege. Watwero bene pennyo wek jamiwa me kom ononge, wek balwa kiwek, ki pi kony me jemo i atematema. (Matayo 6:9-13) Legawa pe myero obed pi mitiwa kenwa. Omyero waleg pi jami ma rwatte ki miti pa Lubanga keken.—1 Jon 5:14.

5. Itwero lega tekke cwinyi omito ni ipwo nyo ipak Lubanga. (1 Tekwaro 29:10-13) Omyero ileg ka itye ki peko ma niyeni kitye ka temone. (Jabuli 55:22; 120:1) Rwatte me lega ma peya icamo cammi. (Matayo 14:19) Jehovah lwongo wan me lega “i kare duc.” —Jo Epeco 6:18.

6. Mitte tutwal ni waleg ka watimo bal marac. I kare ma kumeno myero wabak dogwa bot Jehovah pi kica-ne ki pi weko bal. Ka wadoto balwa bot en ki watemme ki tekowa ducu pe me nwoyogi, Lubanga tye ma ‘oterre me wekko bal.’—Jabuli 86:5; Carolok 28:13.

7. Jehovah winyo lega pa jo ma kitgi atir keken. Wek Lubanga owiny legani omyero ibed ka temme ki tekki ducu me kwo kun ilubo cikke. (Carolok 15:29; 28:9) Omyero ibed ma imwolle ka ilego. (Luka 18:9-14) Omyero iti matek i kom gin ma ilego pire. Ibinyuto ni nongo itye ki niye ki bene ni ada itimo gin ma iloko. Ka itimo meno aye bimiyo Jehovah gamo lega-ni.—Jo Ibru 11:6.