Pwony me 9
Lutic pa Lubanga Myero Gubed Leng
Pingo myero wabed leng i yo ducu? (1)
Te lokke ningo me bedo leng i yo me cwiny? (2)
i kitwa? (3) i tamwa? (4) i komwa? (5)
Kit leb mene ma cilo ma myero wagwokke iye? (6)
1. Lubanga Jehovah lalengo dok leng. En mito ni jo ma wore gutik bedo maleng—i yo me cwiny, i kitgi, i tamgi, ki i komgi. (1 Petero 1:16) Tic matek mitte mada me bedo maleng i wang Lubanga. Wakwo i lobo me cilo. Watye bene ki lweny i kom cwinywa ma terowa i timmo bal. Ento myero pe waol.
2. Lengo i Yo me Cwiny: Ka wamito wati pi Jehovah, pe watwero moko i pwony mo nyo kwer mo me dini goba. Myero waa woko ki i dini goba dok pe wacwak i yo mo keken. (2 Jo Korint 6:14-18; Niyabo 18:4) Tek dong wapwonyo ada i kom Lubanga, myero wagwokke pe jo ma pwonyo goba gubwolwa.—2 Jon 10, 11.
3. Lengo i Yo me Weko Bal: Jehovah mito luwor en me kwo calo Lukricitayo me ada i cawa weng. (1 Petero 2:12) En neno jami ducu ma watimo, kadi i mung. (Jo Ibru 4:13) Myero wagwokke ki i abor ki tim mukene me cilo me lobo-ni.—1 Jo Korint 6:9-11.
4. Lengo me Tamwa: Kace wapongo tamwa ki tam maleng, ma olil, kitwa bene bibedo leng. (Jo Pilipi 4:8) Ento ka watiko ri ki tam macilo, man biterowa i tim maraco. (Matayo 15:18-20) Myero wagwokke ki namo mo keken ma oromo cido tamwa. Watwero pongo tamwa ki tam maleng i yo me kwano Lok pa Lubanga.
5. Lengo me Komwa: Pien gin cung calo luwang Lubanga, Lukricitayo myero gugwok komgi ki bongi-gi maleng. Myero walwok cingwa i nge a ki i coron, dok myero walwok cingwa me cako cam nyo gudo dek mucek. Ka ipe ki coron mo maber, ci cet myero giyik i ngom. (Nwoyo Cik 23:12, 13) Gwokke me lengo medo yotkom. Paco pa Lakricitayo myero onen maber dok maleng i iye ki woko bene. Myero onen mapat i kin pa jo mukene-ni macalo labol maber.
6. Leb Maleng: Lutic pa Lubanga myero kare ducu gulok lok ada. Lugoba pe bidonyo i Ker pa Lubanga. (Jo Epeco 4:25; Niyabo 21:8) Lukricitayo pe gitiyo ki leb maraco. Pe giwinyo nyo giwaco lok ore malik nyo titto lok ma cilo. Pi lebgi maleng, gipokke mapat i dog tic nyo i gang kwan ki i kin jirani-gi.—Jo Epeco 4:29, 31; 5:3.
[Cal ma tye i pot karatac 18, 19]
Lutic pa Lubanga myero gubed leng i yo mo ducu