Pwony me 10

Tim Mogo ma Lubanga Okwero

Yo ango ma myero inen kwede jami ma Lubanga waco ni racu? (1)

Tim kwele ango ma pe atir? (2)

Yo ango ma Lakricitayo myero onen kwede loko lok goba? (3) tuko me goyo cente? (3) kwalo kwo? (3)

tim gero? (4) tim tyet? (5) mero kongo? (6)

Yo ango ma ngati mo twero gonnye kwede ki i tim maraco? (7)

1. Lutic pa Lubanga maro gin mabeco. Ento myero bene gupwonnye me kwero gin marac. (Jabuli 97:10) Man tere ni gigwokke ki i tim mogo ma Lubanga dagi. Tim mogo macalo mene mono?

2. Tim Kwele: Buto ki ngat ma pud pe inyomme kwede, abor, buto ki lee, buto ki wat, buto ki laco lawoti ducu tye bal madongo bot Lubanga. (Lulevi 18:6; Jo Roma 1:26, 27; 1 Jo Korint 6:9, 10) Ka jo aryo pe gunyomme ento gitye kakwo kacel, myero gupokke woko nyo gunyomme i te cik pa gamante kikome.—Jo Ibru 13:4.

3. Goba, Tuko me Goyo Cente, Kwalo Kwo: Lubanga Jehovah pe twero loko lok goba. (Tito 1:2) Jo ma gimito cwak ma mere myero guwek goba obedi. (Caralok 6:16-19; Jo Kolocai 3:9, 10) Tuko me goyo cente i yo mo keken oballe woko ki woro. Pi meno Lukricitayo pe gidonyo i tuko mo keken me goyo cente, calo kalulu, pyem ngwec ki aguragura, ki goyo karata. (Jo Epeco 5:3-5) Dok Lukricitayo pe gikwalo kwo. Pe giwilo gin akwala ma kun gingeyo nyo kadi kwannyo jami labongo twero.—Nia 20:15; Jo Epeco 4:28.

4. Kiniga, Tim Gero: Kiniga ma pe jukke twero tero dano i tim gero. (Acakki 4:5-8) Ngat mager pe twero bedo larem Lubanga. (Jabuli 11:5; Carolok 22:24, 25) Culo kwor rac nyo kadi dwoko marac i kom gin maraco ma jo mukene gwok-nyo gutimiwa.—Carolok 24:29; Jo Roma 12:17-21.

5. Lwit Lugaga ki Tim Tyet: Jo mogo giyenyo teko pa jogi me temo cango two. Jo mukene giketo lwit lugaga i kom lukworgi wek gutwo-ne nyo kadi me nekogi. Teko pa tic magi ducu ocung i kom Catan. Pi meno Lukricitayo myero pe gudony kadi i i acel mo. (Nwoyo Cik 18:9-13) Bedo cok ki Jehovah en aye gwokke ma loyo ducu i kom lwit lugaga ma jo mukene oromo gudowa kwede.—Carolok 18:10.

6. Mero Kongo: Pe balo me mato kongo vino manok, bia, nyo kongo mo mukene ma mero dano. (Jabuli 104:15; 1 Temceo 5:23) Ento mat madongo ki mero aye pe atir i wang Lubanga. (1 Jo Korint 5:11-13; 1 Temceo 3:8) Mat mukato kare twero balo yot-komi dok balo odi. Romo bene teri me jallo komi oyot tutwal i atematema mukene-gu.—Carolok 23:20, 21, 29-35.

7. Jo ma gitimo jami ma Lubanga waco ni racu “ker pa Lubanga pe bibedo megi.” (Jo Galatia 5:19-21) Kace imaro Lubanga ada dok imito yomo cwinye, in itwero gonnye woko ki i tim magi. (1 Jon 5:3) Pwonnye me kwero gin ma Lubanga waco ni rac. (Jo Roma 12:9) Mar bedo ki jo ma gitye ki kit me dini. (Carolok 13:20) Bedo ki Lukricitayo ma guteggi oromo bedo kony acel. (Yakobo 5:14) Makato ducu, jenge i kom kony pa Lubanga i yo me lega.—Jo Pilipi 4:6, 7, 13.

[Cal ma tye i pot karatac 20, 21]

Lubanga dag mero kongo, kwalo kwo, tuko me goyo cente, ki tic me gero