Dul Lok me Abic

Kit Bedo Agonya ma Luwor Jehovah Gilimo Mitte

1, 2. (a) Kit bedo agonya ango ma Lubanga omiyo bot jo aryo ma okwongo? (b) Tit cik mogo ma omiyo Adam ki Kawa gutimo jammi mogo.

I KARE ma Jehovah ocweyo laco ki dako ma okwongo, gin gulimo bedo agonya makato mo keken ma dano gitye kwede i kare-ni. Pacogi onongo Paradic, poto mamwonya me Eden. Pe tye two mo ma ojuko limo mit pa kwo, kit ma onongo gitye ki tam ki kom ma roc pe iye-ni. To onongo pe tye ka kurogi kit ma tye pi dano ducu cakke wa i kare ca. Dok bene, pe onongo gubedo calo robot ma lubo cik labongo ngeyo piny, ento onongo gitye ki mot me yero gin ma igi mito kit ma gimito kwede, teko me moko tamgi ken-gi. Me medde ki bedo agonya mamwonya ma kit meno, onongo kono, mitte ni guwor cik pa Lubanga.

² Tam kong, macalo labolle, cik pa Lubanga ma oketo ma mako jammi ma tye ki kom ma nen. Ngene kene ni, cik magi romo bedo ni pe onongo giketo piny i lok mapol, ento onongo giyubo Adam ki Kawa i yo ma miyo rwatte i kit ma gitye kwede me lubogi. Kec onongo tugu mitti me cam; orwo onongo weko gimato pii, poto pa ceng onongo kelo mitti me nino. Jehovah bene omiyo botgi tic me atima. Tic meno onongo, i ada, cik pien telogi i gin me atima. Gin onongo myero gunywal lutino, gulo kit kwo ducu me lobo, gumed wang kor me Paradic wek orom lobo ducu. (Acakki 1:28; 2:15) Cik meno onongo pud dong obedo me kica ya! Omiyo botgi tic me yom cwiny atika ma miyo gitiyo ki tamgi ducu i yo maber. Dok bene, onongo kiweko botgi kare me moko tam i kit ma gibitiyo kwede ticgi. Kit gin ango mukene dok ma ngat mo nongo twero penyo pire?

3. Adam ki Kawa onongo giromo pwonnye me tic ki bedo agonya i moko tamgi ki ryeko nining?

³ Kadi bed kimiyo Adam ki Kawa kare me moko tamgi, man pe tyene ni kit gin mo keken ma gimoko bikelo adwogi maber. Bedo agonya me moko tamgi onongo myero otimme ma pe kato wang cik ma Lubanga oketo. Gin onongo gitwero pwonnye i cik magi nining? Ka gubedo ka winyo Lacwecgi ki bedo ka neno kit ticce. Lubanga omiyo bot Adam ki Kawa ryeko ma mitte me keto i tic jammi ma gupwonyo. Kit ma onongo kicweyogi kwede labongo kit roc mo ni, onongo tye i remo-gi ni tam ma gimoko binyuto kit pa Lubanga. Labongo akalakala, onongo gibigwokke matek me timo meno ka ada gipwoyo jammi ma Lubanga otyeko timo pirgi dok ka gimito yomo cwinye.—Acakki 1:26, 27; Jon 8:29.

4. (a) Mono cik ma kimiyo ki Adam ki Kawa pe me camo nyig yat acel-li onongo gengo-gi bedo agonya? (b) Pingo man onongo obedo gin ma mitte?

⁴ Macalo lamigi kwo, Lubanga dong otamo me temo worogi i kome ki ka gimito bedo i te cik ma en emiyo botgi-ni. Jehovah omiyo cik ki Adam ni: “Yadi ducu ma tye i poto, camgi macalo imito; ento yat me ngeyo gin maber ki marac pe icam, pien i nino ma ibicamo iye, en aye ibito iye bene.” (Acakki 2: 16, 17) I nge cweyo Kawa, kiniango en bene ki cik man. (Acakki 3:2, 3) Keto lageng man mono obalo bedo agonya-gi? Pe wacel. Onongo gitye ki cam mapatpat mabeco mapol ata me acama labongo camo nyig yat acel meno. (Acakki 2:8, 9) Onongo rwatte ni gin omyero gunge ni lobo obedo pa Lubanga, kit ma en aye ocweyo-ni. Pi meno en tye ki twero me keto cik ma rwatte ki yubbe dok ma konyo dano.—Jabuli 24:1, 10.

5. (a) Adam ki Kawa gurwenyo bedo agonya ma onongo gitye kwede nining? (b) Kit gin ango ma oleyo kaka bedo agonya ma mit ma Adam ki Kawa onongo gitye iye-ni, dok ogudo wan nining?

⁵ Ento gin ango ma otimme? Pi mitti marac, lamalaika mo otiyo ki bedo agonya i yo marac ci odoko Catan, ma tyene ni “Lajemo.” En obwolo Kawa kun niange i kom gin mo ma pe rwatte ki mitti pa Lubanga. (Acakki 3:4, 5) Adam olubo Kawa i turo cik pa Lubanga. Pi kwanyo gin ma pe obedo megi, gin gurwenyo bedo agonya maber atika man. Bal odoko laloc-gi, ci kit macalo Lubanga ociko con, to olo twal obino. Gin aleya ma gumiyo ki lutinogi aye bal, ma nen i cwiny ma tero dano i timo bal. Bal bene okelo goro ma adwogine obedo two, tiyo, ki to. Cakke wacon, cwiny ma tero dano i timo bal, medo i kom teko pa Catan, okelo kit kwo pa dano ma opong ki adegadega, turo cik, keto dic, ki lweny ma dong otyeko kwanyo kwo pa dano milion mapol. Man pud dong pat atika ki bedo agonya ma Lubanga omiyo bot dano i kare me acakki ya!—Nwoyo Cik 32:4, 5; Yubu 14:1, 2; Jo Roma 5:12; Niyabo 12:9.

Kama Bedo Agonya Twero Nonge Iye

6. (a) Bedo agonya me ada kitwero nongone ki kwene? (b) Yecu oloko i kom bedo agonya ango?

⁶ Kit ma piny marac dong oromo kabedo ducu i kare-ni, pe obedo gin me aura ka dano gimito bedo agonya ma okato kare woko. Ento bedo agonya kikome twero nonge kwene? Yecu owaco ni: “Ka wumoko i lokka, ci wun lupwonnyena adada; miyo wubingeyo lok me ada, lok me ada bigonyowu.” (Jon 8:31, 32) Bedo agonya man pe obedo kodi man ma dano tamo ni ginongo ka giloko laloc nyo gamente acel moni pi maro mukene. Ma ka meno, bedo agonya man donyo matut wa i peko pa dano. Gin ma Yecu onongo tye ka lok iye obedo bedo agonya ki i buc pa bal. (Jon 8:24, 34-36) Pi meno, ka ngat mo odoko lalub kor Yecu Kricito, en nongo alokaloka madit i kwone, gonnye!

7. (a) Watwero gonnye ki i bal i kit yo ango i kare-ni? (b) Me limo bedo agonya ma kit meno, omyero watim gin ango?

⁷ Man pe tyene ni i kare-ni Lukricitayo pe dong gibibedo ki kwo anywali ma terogi i tim maraco. Kit ma gin gulako balli, gin pud gitye ki lweny matek pire. (Jo Roma 7:21-25) Ka ngat mo ada kwo ma lubbe ki pwony pa Yecu, en pe dong bibedo opii pa bal. Bal pe bibedo calo laket dic ma golo rukca ma en myero olubi calo lato wang. En pe dong bimoko i kit kwo mo ma pe ki yub ki ma miyo cwinye ngol-le iye kop. En nongo mit pa leng cwiny i nyim Lubanga pien bal macon nongo dong kiweko woko pi bedo ki niye i gitum pa Kricito. Kit cwiny me bal romo bedo ka diye, ento ka en okwero timone pien en po i pwony pa Kricito, en nyuto ni bal dong pe lalocce.—Jo Roma 6:12-17.

8. (a) Kit bedo agonya ango ma dini pa Lukricitayo me ada miyo botwa? (b) Cwinywa omyero obed nining i kom luloc lobo?

⁸ Tam kong bedo agonya ma wan macalo Lukricitayo walimo mitte. Dong kilarowa woko ki i jammi ma pwony goba kelo, i buc me lworo me kwiya piny, ki i tic pi bal. Lok ada madito i kom kit ma jo ma oto gitye kwede ki lok kom cer ogonyowa i lworo lok i kom to. Ngec ni gamente pa dano ma tye ki roc cokcokki kibileyo kakare ki Ker me kit atir pa Lubanga gonyowa ki i bedo labongo gen. (Daniel 2:44; Matayo 6:10) Kadi bed kit meno, lakit bedo agonya-ni pe cwako bedo labongo woro i kom cik kacel ki wegi twero ma i gamente.—Tito 3:1, 2; 1 Petero 2:16, 17.

9. (a) Jehovah konyowa ki mar me nongo mit pa bedo agonya madit ma tye pi dano i kare-ni nining? (b) Watwero moko tam me ryeko nining?

⁹ Jehovah pe weko waniang yo maber me kwo ki temo yo moni ka ber nyo rac. En ngeyo kit ma kicweyowa kwede, jammi ma keliwa yomcwiny kikome, ki ma konyowa pi naka. En ngeyo tam ki tic ma twero balo wat pa ngat moni ki en ki i kom dano luwote, nyo bene juko dano meno me bedo i lobo manyen-ni. Ki mar, Jehovah niangowa ki jammi magi ducu ki i Baibul kacel ki i dul kacokkene ma nen. (Marako 13:10; Jo Galatia 5:19-23; 1 Temceo 1:12, 13) Ci dong obedo ticwa me tic ki bedo agonya ma Lubanga omiyo-wa me moko tamwa ki ryeko. Ka wan waketo cwinywa i jammi ma Baibul wacciwa, wabimoko tam me ryeko pe calo kit ma Adam otimo-ni. Wabinyuto ni bedo ki wat maber ki Jehovah aye obedo gin ma pire tek loyo i kwowa.

Mito Kit Bedo Agonya Mapat

10. Kit bedo agonya ango ma jo mukene ma gubedo Lucaden pa Jehovah gimito nongone?

¹⁰ Kare mukene, jo mogo matino ma gin Lucaden pa Jehovah kadi wa ludito guromo winyo ni gimito kit bedo agonya mo mapat. Jammi me lobo oromo nen mwonya tutwal, dok ka tamgi bedo ka medde i iye, bedo ka medo mitigi me timo tim ma pe pa Lukricitayo ma pirgi oywek i lobo. Jo ma kit meno pe guromo tic ki yat calo jayi-gu, matte matek, nyo timo abor. Ento gicako ribbe ki jo mukene ma pe gubedo Lukricitayo me ada, me mito ni kijolgi. Gutwero bene cako poro kit lok ki timmegi.—3 Jon 11.

11. Bita me timo gin marac kine mukene bino ki kwene?

¹¹ I kine mukene, bita me timo tim ma pe pa Lukricitayo bino ki bot ngat mo ma nongo timme ni en ebedo latic pa Jehovah. Meno bene obedo gin ma otimme i kin Lukricitayo macon, dok gin acel-li twero timme i karewa-ni. Jo ma kit meno pol kare gimito timo jammi ma ginongo ni miyogi yomcwiny, ento jammi-ne nongo turo cik pa Lubanga. Gicuko cwiny jo mukene me nongo ‘kwo me kuc.’ Gin ‘gicikke me miyo jo mukene me bedo agonya, kun gin ki komgi nongo gitye opii pa gin ma balogi.’—2 Petero 2:19.

12. Jammi maraco ango ma kit maraco me turo cik ki pwony madito pa Lubanga kelo?

¹² Kit ma meno obedo turo cik pa Lubanga-ni, gin ma lakodi bedo agonya ma kit meno kelo kare ducu rac. Me labolle, buto ma cik okwero twero kelo par madito, two, to, gamo ic ma pe mitte, ki kine mukene ket keny. (1 Jo Korint 6:18; 1 Jo Tecalonika 4:3-8) Tic ki jammi calo jayi twero kelo wang ic oyot, dwale pa te leb, neno piny yiriyiri, nyonge pa kom, miyo yweyo bedo tek, kelo cal jammi ma pe ka timme, ki to. Romo kwinyo bur woko i kom ngati moni-ni ma miyo wekone twero bedo tek, kadi medde ki kwo me tic ki kongo i yo marac bene. (Carolok 23:29-35) Jo ma gitimo lakit tim magi giromo tamo ni gilone kengi, ento ginongo lacen ni gin gidoko opii pa bal. Bal pud dong laloc marac ya! Bedo ka nyammo lok man i kareni twero konyo me gwokowa ki i lakit kwo meno.—Jo Galatia 6:7, 8.

Ka ma Peko a Iye

13. (a) Mitti ma kelo peko pol kare cakke nining? (b) Me niang gin ma “bedo ki jo maraco” obedo omyero wanen i yo pa anga? (c) Ka itye ka gamo lapeny ma kiryeyo i paragraf 13, lok matek i kit me neno pa Jehovah.

¹³ Tam ka ma peko pol kare a iye. Baibul tito ni: ‘Dano acel acel gire mitine kene aye ma bite, ywaye, kun omo cwinye. Mitti ka oyac ci nywalo bal. Bal ka dong odongo muteggi nywalo to.’ (Yakobo 1:14, 15) Mitti cako bino nining? Pi gin ma watamo. Pol kare man bedo adwogi me bedo ki dano ma pe gilubo pwony pa Lubanga. Ngene kene ni, wan ducu wangeyo ni omyero wakwer “bedo ki jo maraco.” (1 Jo Korint 15:33) Ento kit bedo ki jo maraco mene? Jehovah neno lok-ki nining? Nyammo lapeny magi kacel ki ngiyo ginacoya ma kinyuto omyero okonywa me nongo gin ma atir.

Mono tye ada ni jo mukene ma kitgi nen calo ber nyuto ni gitwero bedo lurem mabeco? (Acakki 34:1, 2, 18, 19)

Boko lokgi, nyo oregi, twero nyuto ka watwero bedo ki wat macok kwedgi? (Jo Epeco 5:3, 4)

Jehovah mono winyo nining ka wayero bedo lurem ma poko pyer ngween ki jo ma pe gimaro en? (2 Tekwaro 19:1, 2)

Kadi bed watiyo nyo wakwano kacel ki jo ma pe giye niyewa, pingo mitte ni myero wagwokke mada? (1 Petero 4:3, 4)

Neno telebijon ki cinema, tic ki cal maraco ma i kompiuta, ki kwano buke, magajin, ki karatac lok angeya gubedo yo mukene me bedo ki jo mukene. Kit jammi ango macalo meno ma mitte ni wagwokke iye? (Carolok 3:31; Icaya 8:19; Jo Epeco 4:17-19)

Yero lurem ma wabedo kwedgi tito nining kit dano ango ma wabedo bot Jehovah? (Jabuli 26:1, 4, 5; 97:10)

14. Kit bedo agonya madit loyo ango ma tye cok pi jo ma giketo Lok pa Lubanga i tic i kare-ni?

¹⁴ Lobo manyen pa Lubanga tye cok adada i nyimwa. Pi gamente me Ker me polo pa Lubanga, kibigonyo dano woko ki i teko pa Catan kacel ki yubbe maraco. Motmot, kibikwanyo jammi ducu ma bal okelo woko ki i kom dano ma luwiny. Adwogine bibedo tam ki kom ma bal pe iye, ma biweko wanongo mit pa kwo ma pe tum i Paradic. Bedo agonya ma rwatte ki “Cwiny pa Rwot” olo twal bikelo yomcwiny ki ginacweya ducu. (2 Jo Korint 3:17) Mono bedo ber me rwenyo jammi mabeco magi ducu pien ni wacayo lubo tam ma i Lok pa Lubanga i kare-ni? Ka waketo bedo agonya pa Lukricitayo i tic i kare-ni, ci wabinyuto atir ka maleng ni gin ma wan ada wamito aye me nongo “kuc ki deyo ma gimiyo ki litino pa Lubanga.”—Jo Roma 8:21.

Nyammo wi Lok ma Kineno

• Kit bedo agonya ango ma dano aryo ma okwongo gulimo mitte? Meno pore nining ki bedo agonya ma dano gitye ka limo-ne i kare-ni?

• Kit bedo agonya ango ma Lukricitayo me ada gitye kwede? Meno kono pokke nining ki gin ma lobo tero ni obedo bedo agonya?

• Pingo pire tek me kwero bedo ki lurem maraco? Pe me bedo calo Adam, tam pa anga ma mako gin marac ma myero wayee?

[Cal ma tye i pot karatac 46]

Lok pa Lubanga ciko ni: “Pe wuwek gibwolwu: ‘Bedo ki jo maraco balo kit mabeco’”