Dul Lok me Apar Wi Angwen
Yo Ango ma Jehovah Telo Kwede Dulle?
1. Kit ngec ango ma Baibul tito i kom dul pa Jehovah, dok pingo pire tek botwa?
LUBANGA mono tye ki dulle? Ginacoya tito botwa ni en tye kwede. I Lokke, en miyowa wiye mo manok i kom but dul meno me aura ma tye i polo ni. (Ejekiel 1:1, 4-14; Daniel 7:9, 10, 13, 14) Kadi bed pe watwero neno but-dulle man, ento man gudo luworo me ada i kare-ni. (2 Luker 6:15-17) Dul pa Jehovah bene tye ki bute mukene ma nen, i wi lobo. Baibul konyowa me niang ngo ma dul meno obedo ki kit ma Jehovah telo kwede.
Ngeyo But Dulle ma Nen-ni
2. Kit kacokke manyen ango ma Lubanga okelo kamaleng doki?
2 Rok me Icrael gubedo pi mwaki 1,545 kulu calo kacokke pa Lubanga. (Tic pa Lukwena 7:38) Ento Luicrael pe gugwoko cik pa Lubanga dok bene gukwero wa Wode ki kome woko. Macalo adwogine, Jehovah okwero kacokke-nu dok oweko-gi woko niyak. Yecu otito bot Lujudaya ni: “Nen, dong gitenyo otwu botwu, iye odong nono.” (Matayo 23:38) Lubanga dok ocako kacokke manyen, ka en omoko kwedgi gicikkene manyen. Kacokke man kwako dano ma pat pat ma welgi romo 144,000 ma Lubanga aye yerogi me ribbe kacel ki Wode i polo.—Niyabo 14:1-4.
3. Ngo ma otimme i Pentekote i mwaka 33 K.M. macalo lanyut ni Lubanga dong onongo tye ka tic ki kacokke manyen meno?
3 Giwiro jo ma okwongo me kacokke manyen meno ki cwiny maleng pa Jehovah i nino me Pentekote i mwaka 33 K.M. Wakwano lok i kom nino meno ni: ‘Ka nino me Pentekote dong oromo, onongo gin ducu gucokke kacel i kabedo acel. Oyotoyot woo owinnye kun oa ki i polo macalo yamo ma kodo mager, opongo ot ducu ka ma gubedo iye. Ci gin mo onen botgi macalo leb mac ma opokke ci opye i wi ngat acel acel i kingi. Ka dong gin ducu gupong ki cwiny maleng.’ (Tic pa Lukwena 2:1-4) Pi meno, cwiny pa Lubanga omiyo lanyut kamaleng, ni, man aye dul dano ma Lubanga bitic kwedgi me cobo yubbe i te tela pa Yecu Kricito ki i polo.
4. Anga-gi ma gubedo dul pa Jehovah ma nen i kom kare ni?
4 I Kom kare-ni, udong pa jo 144,000 aye gitye i lobo. Ento i cobbe pa lok pa lunebi me Baibul, “lwak dano mapol ata” me ‘romi mukeneni,’ jo milion mapol, dong kiribogi kacel ki udong jo ma giwirogi-ni. Yecu, Lakwat Maber, aye oribo romi mukene-ni ki udong jo man me wek gudok dwol acel ite en calo Lakwatgi. (Niyabo 7:9; Jon 10:11, 16) Jo magi ducu gudoko kacokke acel, ma gin aye gubedo dul pa Jehovah ma nen.
Lubanga Aye Oketo Yub Meno
5. Anga ma telo wi dul pa Lubanga, dok i yo ango?
5 Ginacoya ma owaco ni “kacokke pa Lubanga makwo” nyuto kamaleng nga ma obedo latela-ne. Man obedo dul pa Lubanga, nyo Lubanga aye obedo lalocce. Jehovah miyo tira bot jo-ne kun tiyo ki Yecu, ma obedo ngat ma en ocimo pi bedo Latela me kacokke ma pe nen man, ki i Lokke ma i Baibul.—1 Temceo 3:14, 15; Jo Epeco 1:22, 23; 2 Temceo 3:16, 17.
6. (a) Niang pi tela me polo ongene nining i kacokke i cencwari ma okwongo? (b) Ngo ma nyuto ni Yecu aye pud tye Latela me wi kacokke meno?
6 Lakodi tela-nu onen kamaleng i nino me Pentekote. (Tic pa Lukwena 2:14-18, 32, 33) Onen i kare ma malaika pa Jehovah otiro wi kwena maber me donyo i Afrika, i kare ma dwan pa Yecu omiyo tira i kare me lokke pa Caulo me Taruco, ki bene i kare ma Petero ocako kwede tito lok man me kwena maber i kin Lurok. (Tic pa Lukwena 8:26, 27; 9:3-7; 10:9-16, 19-22) Ento, oo i kare mo, dwan mo keken ma a ki i polo pe dong owinnye, lumalaika bene pe dong gunen, mic pa cwiny me timo tango ducu orweny woko. Kadi bed kit meno, Yecu onongo ociko ni: “Nen, atye kwedwu kare ducu, nio i agikki piny.” (Matayo 28:20; 1 Jo Korint 13:8) I kare-ni, Lucaden pa Jehovah gitye ka lubo tira pa Yecu. Ka onongo pe kit meno, kono pwonyo lok man me kwena me Kerri pe otwere i kare man me gero ni.
7. (a) Anga-gi ma gubedo “lagwok ot ma lagen,” dok pingo? (b) Tic ango ma gimiyo bot “lagwok ot”?
7 I kare ma Yecu dong cok ki to, en otito bot lupwonnyene pi “lagwok ot ma lagen dok maryek” ma Laditte biweko jammi ducu i te twero-ne. “Lagwok ot” meno bibedo tye ka Rwot odok i polo dok bimedde ki tic matek wa i dwogo pa Kricito ma nongo pe nen i Kerre. Kit ma gitito kwede lok man, niang iye twero bedo tek mada ka ni “lagwok ot” man ocung pi ngat acel keken, ento rwatte pi kacokke pa jo pa Kricito ma giwirogi aye. Kit ma en Aye owilo-gi ki remone-ni, Yecu olwongo-gi ni “lagwok ot.” En ociko jo magi me tiyo tic me pwony ki pit kare ducu, me miyo “botgi cam me [cwiny] i kare ma mitte ki kome.”—Matayo 24:45-47; 28:19; Icaya 43:10; Luka 12:42; 1 Petero 4:10.
8. (a) Tic ango ma lagwok ot ma lagen tye kwede i kare-ni? (b) Pingo pire tek tutwal ki tung botwa me lubo pwony ma a ki i yo ma Lubanga tiyo kwede?
8 Kit ma lagwok ot ma lagen omoko gire ka timo tic pa Laditte ki mwolo nio wa i dwogo-ne ma pe nen i mwaka 1914, gimiye lanyut ni tic mapol tye me atiya i mwaka 1919. Cakke i mwaka meno, kare me miyo caden i kom lok me Ker ki coko lwak dano mapol ata ma luwor Jehovah o kwede wa i kare me gwokogi ki i twon can madit atika-ni, ocakke. (Matayo 24:14, 21, 22; Niyabo 7:9, 10) Jo magi ducu gimito cam me cwiny, ma lapok cam man botgi obedo lagwok ot ma lagen. Ka wamito yomo cwiny Jehovah, ci omyero wajol pwony ma en miyo kun a ki i yo meno dok waket i tic.
9, 10. (a) Yub ango ma obedo tye pi miyo lagam i kom lapeny ma mako niye ki miyo tira i kom pwonyo kwena maber i cencwari ma okwongo? (b) Yub ango me tiro tic me pwony pa jo pa Jehovah matye i kare man?
9 I kare mukene, lapeny bino i kom cik ma mako niye ki kit yo me tic. Ka kumeno ci dong watimo ngo? Tic pa Lukwena cura 15 niangowa i kit ma kityeko kwede kop i kom Lurok ma gulokke. Kop meno gicwalo bot lukwena ki ludito muteggi ma i Jerucalem, ma onongo gitiyo calo lukiko madit. Onongo pe tere ni jo magi gipe ki bal, ento Lubanga otiyo kwedgi. Gungiyo ginacoya ma mako tyen kop man ki dok lanyut pa cwiny pa Lubanga i yabo bar manyen me pwony bot Lurok. Ka dong gumoko lok dok Lubanga oonyo gum i yub meno. (Tic pa Lukwena 15:1-29; 16:4, 5) Lukiko madit-ti, aye onongo gicwalo dano cito ka tito lok man me kwena me Kerri.
10 I karewa ni Lukiko Madit pa dul pa Jehovah ma nen ocoko utmego ma giwirogi ma gia ki i lobe mapat pat dok gibedo i gang kal madit pa Lucaden pa Jehovah. I te tela pa Yecu Kricito, Lukiko Madit man gimedo nya pa woro me ada i lobe ducu, gitiro tic me pwony i kacokke pa Lucaden pa Jehovah ma tye alip miya mapol atani. Jo me Lukiko Madit-ti ginywako tam pa lakwena Paulo, ma ocoyo bot Lukricitayo luwote ni: “Pe te lokke ni wan watye ki twero i kom niyewu, ento watiyo kwedwu kacel wek wubed ki yomcwiny, pien wucungo matek i kom niye.”—2 Jo Korint 1:24.
11. (a) Luelda me kacokke ki lukony kor tic gicimogi nining? (b) Pingo myero wati kacel ki jo ma gicimo ni?
11 I wi lobo ducu Lucaden pa Jehovah giketo wangi i kom Lukiko Madit me yero utmego ma rwatte, ka utmego magi bene, ginongo twero me cimo luelda me kacokke ki lukony kor tic pi gwoko kacokke. Kitito kit me kwo ma mitte me cimo jo magi i Baibul, dok bene pe ni jo-nu omyero gubedo labongo roc mo. Luelda me kacokke ma gineno ber pa ngat moni ki jo ma gitiyo tic me cim gitye ki tic madit mada i nyim Jehovah. (1 Temceo 3:1-10, 12, 13; Tito 1:5-9) Pi meno, gin kong gilego pi cwiny pa Lubanga ka dong giyenyo tira ki i Lokke. (Tic pa Lukwena 6:2-4, 6; 14:23) Wan ducu myero wami pwoc pi ‘mot ma Lubanga omiyogi’ kun konyowa “nio ka wan ducu wadoko acel i niyewa.”—Jo Epeco 4:8, 11-16.
12. Jehovah tiyo ki mon nining i yub ma mege?
12 Ginacoya nyuto ni lunen wi kacokke myero gubed co. Man pe dwoko rwom pa mon piny, pien jo mukene i kin-gi bibedo luker i Ker me polo, dok gin aye gitimo pol pa tic me kwena maber. (Jabuli 68:11) Pi niye-gi, gin tiyo mada pi gwoko luotgi, ki yubo nying matir i kacokke. Ki dok mon medo nying maber me kacokke ki cobbo tic ma makogi i odigi ki gen. (Tito 2:3-5) Ento co ma gicimogi aye gitimo tic me pwony i kacokke.—1 Temceo 2:12, 13.
13. (a) Tam ango ma Baibul niango kwede luelda me kacokke pi tic ki rwomgi ma gitye kwede? (b) Kit mot ango ma wan ducu watwero nywako?
13 I lobo, jo ma gitye ki dit me dog tic giterogi ni pirgi tek, ento i dul pa Lubanga cik ma tiye aye ni: “Pien ngat matidi tutwal i kinwu ducu en aye ngat madit.” (Luka 9:46-48; 22:24-26) Ginacoya omiyo tira bot luelda me kacokke me gwokke pe me doko rwodi i wi jo pa Lubanga, ento me bedo ki lanen maber bot romi magi. (1 Petero 5:2, 3) Lucaden pa Jehovah ducu, co ki mon, gitye ki mot me cung pi Rwot me polo ki lobo, me lok ki nyinge ki dok me tito pi Kerre bot dano me kabedo ducu ki mwolo, ento pe jo mo manok ma nongo kiyero keken.
14. Tii ki ginacoya ma giketo piny kany, pi nyammo lapeny mogo ma giryeyo i agikki me paragraf.
14 Bedo ber ka wapenye kekenwa ni: ‘An mono ada anyuto pwoc i kit ma Jehovah telo kwede dulle ma nen-ni? Lokka, kita ki ticca ducu cwako yo meno?’ Lok ma tye ka bino-ni twero konyowa me niang i kom jammi ducu.
Ka ada alubo tela pa Kricito macalo Lawi kacokke, ci kit ma ginyuto i ginacoya magi, ngo ma myero abed ka timo-ne? (Matayo 24:14; 28:19, 20; Jon 13:34, 35)
Ka ada aye jammi me cwiny ma bino ki bot lagwok ot ma lagen ki Lukiko Madit ki pwoc, nongo atye ka nyuto woro bot anga? (Luka 10:16)
Dano ducu ma i kacokke, tutwalle luelda me kacokke myero guti ki dano acel acel nining? (Jo Roma 12:10)
15. (a) Kit cwiny ma watye kwede i kom dul ma nen pa Jehovah, nyuto ngo? (b) Kare ango ma tye pi wan me nyuto ni Catan obedo lagoba ki me kelo yomcwiny bot Jehovah?
15 I komkare-ni Jehovah tye ka telo-wa kun tiyo ki dulle ma nen i te tela pa Kricito. Tamwa i kom yub man, nyuto kit ma wacung kwede i kom twero madit me loc. (Jo Ibru 13:17) Catan opyem ni parwa madit cung i mitiwa keken. Ento ka watiyo i yo mo keken ma mitte, dok wakwero jammi ma ywayo tamwa pi paro piwa kenwa, ci wabinyuto ni Catan gire obedo lagoba. Ka wamaro dok waworo jo ma telowa kun ‘wakwero tim mogo ma cwinywa kenwa aye maro pi ber bedowa,’ ci wabikelo yomcwiny bot Jehovah. (Juda 16; Jo Ibru 13:7) Bedo ki mwolo i te dul pa Jehovah, miyo wanyuto ni Jehovah obedo Lubanga-wa dok ni waribbe kacel i miyo woro bote.—1 Jo Korint 15:58.
Nyammo wi Lok ma Kineno
• Ngo ma obedo dul pa Jehovah ma nen i kare ni? Dok tye pi yub ango?
• Anga ma gicimo pi Telo Wi kacokke, dok dul ma nen mene ma en miyo kwede tira me mar botwa?
• Tam mabeco ango ma myero wadong i kom jo ma tye i dul pa Jehovah?
[Cal ma tye i pot karatac 133]
Jehovah telo-wa kun tiyo ki dulle ma nen i te tela pa Kricito