Dul Lok me Apar Wi Aboro

‘Gin Pe Gubedo Jo me Lobo’

1. (a) Ma to-ne onongo pudi, ngo ma Yecu olego pi lukwenane? (b) Pingo bedo jo ma ‘pe me lobo’ pire tek mada?

I DYE wor ma onongo peya gineke, Yecu olego pi lupwonnyene. Pien onongo ngeyo ni Catan biketogi i lyeto magwar, Yecu owaco bot Wonne ni: “Pe alego ni myero ikwanygi woko ki lobo, ento ni igwokgi ki i kom gin marac. Gin pe jo me lobo, macalo an pe a dano me lobo.” (Jon 17:15, 16) Pingo pokke ki i lobo obedo gin ma pire tek? Pien Catan aye tye ka loyone. Lukricitayo pe gimito doko but lobo ma tye i te locce.—Luka 4:5-8; Jon 14:30; 1 Jon 5:19.

2. Yo ango ma Yecu pe obedo kwede dano me lobo-ni?

² Bedo ngat ma pe me lobo-ni, onongo pe tere ni Yecu pe tye ki mar pi jo mukene. Pien, en ocango lutwo, ocero jo muto, ki opwonyo dano ki lok kom Ker pa Lubanga. En bene odyero kwone pi dano. Ento en pe omaro tam ki tim mogo ma pe obedo pa Lubanga ma obedo cwiny me lobo pa Catan. Pi meno, en ociko pi jammi mogo calo mitti me tar wang, kwo me maro jammi me kom tutwal, ki yenyo yweka. (Matayo 5:27, 28; 6:19-21; Luka 20:46, 47) Labongo ur mo, Yecu bene okwero tim me wibye me lobo-ni. Kadi bed en onongo obedo Lajudaya, en gire pe ocwako tung ka mo i apokapoka me wibye ma obedo i kin Luroma ki Lujudaya.

“Kerra Pe me Lobo Man”

3. (a) Kit adot ango ma lutela wi dini me Judaya gumoro i kom Yecu bot Pilato, dok pingo? (b) Ngo ma nyuto ni Yecu onongo pe ki miti me bedo kabaka ma dano?

³ Tam kong i kom gin ma otimme i kare ma lutela wi dini pa Lujudaya gumako Yecu ka gucwalle bot Pilato, gabuna me Roma. I ada, lutela-ca wigi oballe matek mada pien Yecu onongo oyaro tim bwologi ducu kamaleng. Me wek gubuna oket cinge i kom Yecu, gin gudotte kun giwaco ni: “Dano man wanongo tye ka rwenyo rokwa, ogengowa ni pe wacul mucoro bot Cecar, kun lwonge kene ni en Kricito, kabaka.” (Luka 23:2) Meno onongo obedo lok goba atir kamaleng, pien mwaka acel i angec ma dano onongo gimito keto Yecu wek obed kabaka, en okwero woko. (Jon 6:15) En onongo ongeyo ni ebibedo Kabaka me polo i kare me anyim. (Luka 19:11, 12) Dok bene, laket en i kom ker pe onongo bibedo dano adana, ento Jehovah aye.

4. Tam pa Yecu onongo tye nining i lok kom culo mucoro?

⁴ Nino adek ma onongo pud peya gimako Yecu, Luparicayo gutemo Yecu wek owac gin mo ma kette i bal i lok ma dok i kom culo mucoro. Ento en owacci: “Kong wunyutta lim ma giculo kwede [cente pa Luroma]. Cal ki coc ma tye i kome-ni pa anga?” Gin gugamo ni, “Pa Cecar” en odokigi ni: “Wudwok jammi pa Cecar bot Cecar, ki jammi pa Lubanga wudwok bot Lubanga.”—Luka 20:20-25.

5. (a) Kit pwony ango ma Yecu opwonyo kwede lupwonnyene i kare me make? (b) Yecu otito tyen lok me tic ma en etimo nining? (c) Adwogi me ngolo kop meno obedo nining?

⁵ Yecu pe opwonyo jemo i kom luloc. I kare ma askari ki co mogo gubino ka mako Yecu, Petero owoto pala lucwan ka otongo it laco acel ki i kingi onguno woko. Ento Yecu owacci: “Dwok pala lucwanni kakare i akura; pien jo ducu ma mako pala lucwan, gibinekogi bene ki pala lucwan.” (Matayo 26:51, 52) Ka piny oruu Yecu otito pi ticce bot Pilato, owacce ni: “Kerra pe me lobo man. Kono kerra me lobo man, kono jona gulwenyo pira, wek pe gimiya i cing Lujudaya.” (Jon 18:36) Pilato oye ni “kop mo marac” pe i kom Yecu. Ento pi dic matek ma lwak oketo, Pilato omiyo giguro Yecu i kom yat.—Luka 23:13-15; Jon 19:12-16.

Lupwonnye pa Yecu Gilubo Telane

6. Lukricitayo macon gunyuto nining ni gikwero cwiny me loboni ento gimaro dano?

⁶ Lupwonnye pa Yecu guniang i kom jammi ma mitte pe me bedo jo me lobo man. Ma tyen lokke obedo kwero cwiny ki tic maraco me loboni, ma tye iye galo wang me tim gero, ki tim tar wang ma obedo ka timme i bar tuko pa Luroma. Pi meno, onongo gilwongo lupwonnye-ni ni ludag dano. Ento mapat ata ki kwero dano luwotgi, lupwonnye-ni gutiyo matek mada me konyo dano pi nongo mic pa Lubanga me larre.

7. (a) Ngo ma lupwonye macon gulimo pien pe gubedo jo me lobo man? (b) Gin gubedo ki tam ango i kom luloc me wi bye ki culo mucoro, dok pingo?

⁷ Kibedo ka uno jo ma lubo Yecu, kit macalo otimme i kome. Ludito tic pa gamente ma onongo giniangogi marac aye polle gubedo ka timo man. Ento, i kine ka mwaka 56 K.M., lakwena Paulo ocoyo lok bot Lukricitayo ma i Roma kun cuku cwiny-gi ni “dano acel acel omyero owiny luloc ma giloye [luloc me wi bye]; pien pe tye kit twero mo ma pe a ki bot Lubanga.” Pe ni Jehovah aye keto gamente, ento en pud oye ki gin me bedo tye nio wang ma Kerre kene aye ocako loyo lobo ducu. Pi meno, Paulo omiyo tam bot Lukricitayo me woro luloc ki me culo mucoro.—Jo Roma 13:1-7; Tito 3:1, 2.

8. (a) Woro ma Lukricitayo miyo bot luloc myero obed nining? (b) Lukricitayo macon gulubo lanen pa Yecu i yo ma nining?

⁸ Ento miyo woro bot luloc me wibye myero obed ladyere, ento pe kwicikwici. Ka telo tol tye i kin cik pa Jehovah ki pa dano, lutic pa Jehovah myero gulub Cikke. Nen kit ma buk ma gilwongo ni, On the Road to Civilization—A World History oloko kwede i kom Lukricitayo macon ni: “Lukricitayo meno gukwero nywako tic mogo ma jo anywalli me Roma gutimo. Lukricitayo . . . gutamo ni donyo i tic mony balo niyegi. Pe gubedo i dog tic me wibye. Pe gumiyo woro pa Lubanga bot laloc madit.” I kare ma kot mamalo pa Lujudaya ociko lukwena “matek” ni pe gupwony, gin gugamo ni: “Myero wawiny Lubanga makato dano.”—Tic pa Lukwena 5:27-29.

9. (a) Pingo Lukricitayo ma i Jerucalem gucung kit macalo gutimo i mwaka 66 K.M.? (b) I yo ma nining ma meno obedo kwede labol maber?

⁹ Ma dok i kom lara me wibye ki tic mony, lupwonye-ni gucung ma pe gumiyo cwak tung ka mo. I mwaka 66 K.M., Lujudaya ma gibedo i Judaya gujemo i kom Cecar. Cutcut lumony me Roma gubino gurumo Jerucalem. Lukricitayo ma onongo gitye i boma meno gutimo ngo? Wigi opo i kom pwony pa Yecu ma ocikogi kwede me a woko ki i boma meno. I kare ma Luroma gudok cen pi kare mo manok, Lukricitayo guringo gungolo loka Kulu Jordan ka gucito wa i kin godi me Pella. (Luka 21:20-24) Cungo-gi me bedo labongo cwako tung ka mo obedo me labol pi Lukricitayo me kare me lacen.

Lukricitayo Myero pe Gucwak Tung Kamo i Kare Man me Agikkini

10. (a) Tic ango ma Lucaden pa Jehovah guketo iye komgi, dok pingo? (b) Gin ango ma pe gumiyo iye cwak?

¹⁰ Jammi ma otimme con mono twero nyuto dul mo ma tye ocung labongo cwako tung ka mo calo wacci Lukricitayo macon i kare man me agikki-ni? Tye, Lucaden pa Jehovah aye gutimo kit meno. Kombeddi, ka ducu, gin gitye ka medde anyim ki pwonygi ni Ker pa Lubanga aye obedo yo acel keken ma bikelo kuc, piny ma opye mot ki yomcwiny bot jo ma maro kit ma atir. (Matayo 24:14) Ento ma dok i kom rucurucu ma timme i kin lobe, gin gicung labongo miyo cwak tung ka mo keken.

11. (a) Kit ma Lucaden pe gicwako tung ka mo-ni opokke dok ki tic pa lupwonye dini nining? (b) Tam ango ma Lucaden pa Jehovah gitye kwede madok i kom gin ma dano timo i lok me wibye?

¹¹ Ento, lupwonye me dini mapol me lobo-ni guluto wigi matek mada i lok me wibye. I lobo mukene, gin gibito kwir pi, nyo gikwero lucungu mogo. Jo mukene i kingi gudonyo i tic me wibye. Mukene guketo lyeto i kom luloc me wibye me tic ki tam ma gin aye gineno ni ber. Ento, Lucaden pa Jehovah pe giluto wigi i tim me wibye kadi bed jo mukene timo. Pe gijuko ngat mo gire ka mito donyo i pati, cungo i wibye, nyo bolo kwir i kare me yer. Yecu owaco ni lupwonnyene pe gubedo jo me lobo, pi meno Lucaden pa Jehovah pe gidonyo i tic me wibye.

12. Adwogi ango ma obino pi cwak ma ludini me lobo-ni gimiyo tungcel?

¹² Kit macalo Yecu otito con, lobe gulwenyo wang mapol ata. Kadi wa i kin dul matye i lobe mogo, lujemo bene tye ma gilwenyo i kin-gi ken-gi. (Matayo 24:3, 6, 7) Ludito dini kare ducu gimiyo cwakgi bot lobe nyo dul mogo ka gitye ka lweny ki luwotgi, kun gicuko cwiny jo ma lubogi me timo kit meno. Adwogine kono? Jo me dini acelli gineke keken-gi i lweny pi apokapoka me lobo nyo rok. Man dok pat ki mitti pa Lubanga.—1 Jon 3:10-12; 4:8, 20.

13. Ngo ma tye ma nen i kom Lucaden pa Jehovah kit ma pe gicwako kwede tung kamo-ni?

¹³ Ento, Lucaden pa Jehovah gibedo ma pe gicwako lweny mo keken. Watchtower me nino dwe 1 me dwe me Apar wi acel 1939, otito ni: “Jo ducu ma gitye tung bot Rwot gibibedo labongo cwako tung ka mo i kin lobo matye ka lweny.” Lucaden pa Jehovah ma gitye i lobo ducu, i kit mo keken, gitye ka medde ki cungo kit meno. Gin pe guweko apokapoka me wibye me lobo-ni ki lweny-nye me poko ribbegi calo utmego ma tye i wi lobo ducu. Gin “gibiteto pala lucwangi doko lak kweri dyang, ki tongigi doko pala me ngolo jang olok.” Kit ma pe gicwako kwede tung kamo-ni, pe gipwonyo kit lweny mo.—Icaya 2:3, 4; 2 Jo Korint 10:3, 4.

14. Gin ango ma Lucaden pa Jehovah gulimo pi pokke-gi woko ki lobo-ni?

¹⁴ Kit adwogi acel ango ma tye pi cungo-gi labongo cwak mo? Yecu owaco ni: “Ento wun pe me lobo, . . . pi meno lobo kwerowu.” (Jon 15:19) Gitweyo pol pa Lucaden pa Jehovah i buc pi bedo lutic pa Lubanga. Jo mukene gipwodogi, mukene ginekogi, ma rom aroma ki ngo ma otimme i kom Lukricitayo ma okwongo. Man pien Catan, “lubanga me lobo man,” dag lutic pa Jehovah, kit ma pe gubedo but jone-ni.—2 Jo Korint 4:4; Niyabo 12:12.

15. (a) Rok ducu gitye ka wot kwene, ngo ma Lucaden pa Jehovah gigwokke mada ki iye? (b) Pingo bedo mapat dok ki lobo-ni tye gin ma pire tek?

¹⁵ Cwiny lutic pa Jehovah yom ni pe gibedo jo me lobo man, pien rok ma iye ducu gitye ka wot me cito i agikki-gi i Armagedon. (Daniel 2:44; Niyabo 16:14, 16; 19:11-21) Wabiloyo adwogi meno pien wacung ma wapat ki lobo. Macalo jo muribbe i lobo ka ducu, watye ma wamoko i kom Ker pa Lubanga ma tye i polo. Adada, pi bedo jo ma pe me lobo, walimo iye yet ki alany. Cokcokki, kono, tim meno bigik woko, kit ma lobo man marac ma tye i te loc pa Catan-ni dong kibijwero woko matwal. Ki tung cel, lutic pa Jehovah gibibedo matwal i lobo-ne manyen me kit ma atir i Ker pa Lubanga.—2 Petero 3:10-13; 1 Jon 2:15-17.

Nyammo wi Lok ma Kineno

• Yo ango ma Yecu onyuto kwede kit me bedo “pe me lobo man”?

• Tam pa Lukricitayo macon obedo nining i kom (a) cwiny me lobo-ni, (b) luloc ki, (c) culo mucoro?

• I yo ango ma Lucaden pa Jehovah me kare man ginyuto kwede cungo-gi labongo cwak tung ka mo macalo Lukricitayo?

[Cal ma tye i pot karatac 165]

Yecu otito ni en ki jo ma lubbe ‘pe gibedo jo me lobo’