Dul Lok me Pyeraryo Wi Acel
Yub pa Jehovah Dong Ocobbe i Yo me Deyo
1, 2. (a) Lubanga tye ki yub ango i kom cwecce ma gitye ki ngec? (b) Angagi ma gubedo luot pa Lubanga ma guribbe i woro?
CWEC pa Jehovah ma gitye ki ngec ducu gibiribbe i woro Lubanga acel me ada dok gin ducu bene gibilimo bedo agonya me deyo madit macalo lutino pa Lubanga—meno aye obedo yub me mar pa Jehovah. Meno bene obedo gin ma jo ma maro kit ma atir gitye ka mitone mada.
2 Jehovah ocako cobo yubbe madit man cakke ma en ocako kwede ticce me cwec. Cwecce ma okwongo obedo Wode, ma cakke ki i cerre, odoko “dero me deyo pa Lubanga, cal pa Lubanga kikome tye i kome.” (Jo Ibru 1:1-3) Wod man onongo pat mada, kit ma Lubanga kene aye ocweye-ni. Ka i ngeye, kitiyo ki Wod man me miyo jammi mukene ni ducu me bedo tye: ocako ki lumalaika me polo, ka dong dano me wi lobo. (Yubu 38:7; Luka 3:38) Gin ducu guribbe gudoko luot acel. Jehovah obedo Lubanga, dok Won twer, bot gin ducu, Wongi me amara.
3. (a) Wan ducu waleyo ngo ki bot wonwa ma okwongo? (b) Mic madit ango ma Jehovah omiyo ki lutino pa Adam?
3 I kare ma gingolo kop me to i wi lunyodowa ma okwongo pi timo bal akaka, giryemogi woko ki i Eden dok Lubanga bene okwerogi woko. Bedogi i kin luot-te otugi gik woko. (Acakki 3:22-24; Nwoyo Cik 32:4, 5) Wan ducu wabedo likwayogi, dok bene ginywalowa ki cwiny me timo bal. Ento Jehovah onongo ngeyo ni jo mukene i kin likwayo pa Adam ki Kawa gibimaro kit ma atir. Pi meno oweko En oketo micce me mar wek jo man gunong “kuc ki deyo ma gimiyo ki litino pa Lubanga.”—Jo Roma 8: 20, 21.
Jo Icrael Gurwenyo Cwak ma Tye i Komgi
4. Jehovah yam omiyo Luicrael me bedo ngo?
4 Ka mwaka 2,500 okato i nge cweyo Adam, Jehovah odiro kare bot dano mogo me bedo ki wat ma dok kite pat. En oyero Luicrael me kare macon me bedo dano-ne dok omiyo botgi Cikke. (Acakki 12:1, 2) En oketogi me bedo rok dok otiyo kwedgi i yo mupore ki yubbe. (Nwoyo Cik 14:1, 2; Icaya 43:1) Kadi bed kit meno, gin onongo pud gitye i opii me bal ki to, ci omiyo gin pe gunongo mit pa bedo agonya me deyo ma Adam ki Kawa gubedo kwede con ca.
5. Luicrael gurwenyo cwak pa Lubanga nining?
5 Kadi bed kit meno, Luicrael gubedo ki cwak i nyim Jehovah. Ki bene onongo mitte ni gin myero gumi woro bot Jehovah macalo Won-gi dok guti tic ma opore ki yubbe. Yecu bene onwoyo botgi lok me cobo ticgi. (Matayo 5:43-48) Kadi bed kit meno, rok me Icrael gukwero timo meno. Kun Lujudaya giwacci “watye ki won acel, en aye Lubanga,” Yecu otito kamaleng ni ticgi ki cwiny ma gitye kwede-ni pe nyuto ada. (Jon 8:41, 44, 47, NW) I mwaka 33 K.M., Lubanga ogiko Gicikke meno woko, ci wat pa Luicrael ki en otugi gik cut. Ento meno dong tyen lokke ni dano mono pe bitwero bedo ki wat macok ki Lubanga?
Coko “Jammi ma i Polo”
6. Kit yub ango me “tic” ma Paulo oloko pire i Jo Epeco 1:9, 10?
6 Lakwena Paulo onyuto ni jo mukene ki i kin dano twero limo wat macok ki Lubanga. Me laporre, Paul ocoyo lok i kom yub pa Jehovah ni jo ma bibedo ki niye gibitwero doko luode. “En dong omiyo wangeyo mung me mit mere, kun lubo yub maber ma ceng en oyubo me cobo i Kricito. Yub pa Lubanga ma en obicobo ka karene oromo, en aye me coko jammi ducu ma tye i polo ki i wi lobo, ki ribogi woko kacel i Kricito.” (Jo Epeco 1:9, 10) “Tic” man ocung i kom Kricito. Kibitic ki en me wek dano oo i kit ma opore i nyim Lubanga. Wel mo manok keken ki i kin jo magi aye gitye ki gen me kwo i polo. Lwak mapol ata gibibedo ki kwo ma pe tum i wi lobo.
7. Anga-gi ma gubedo “jammi ma i polo”?
7 Ma okwongo, cakke i Pentekote me mwaka 33 K.M., tam ducu onongo ocung i kom “jammi ma i polo,” ma en aye, jo ma gibibedo lunywak Ker me polo ki Kricito. Pi niyegi i kom gitum pa Yecu, omiyo Lubanga kwanogi ni kitgi atir. (Jo Roma 5:1, 2) Mot mot, Lujudaya ki lurok mukene-ni bene guribbe kwedgi, “jammi ma i polo ni” welgi bibedo 144,000. (Galatia 3:26-29; Niyabo 14:1) Udong jo magi pud mukene tye i lobo.
Coko “Jammi ma i Lobo”
8. Anga-gi ma gubedo “jammi me lobo,” dok watgi tye nining ki Jehovah?
8 Tic acel meno bene ocoko wa “jammi ma i lobo.” Kitye ka coko dano milion mapol kombeddi ki tam-mi gin bibedo i lobo naka naka. I ribbegi ki udong pa Luker me kerri, gin yaro nying Jehovah dok bene guilo woro-ne malo. (Icaya 2:2, 3; Jepania 3:9) Gin bene gilwongo Jehovah ni “Won” pien gitero en macalo wang it me kwogi. Ki bene gilimo bedo ki kit ma atir i nyime pi niye-gi i kom remo ma Yecu oonyo. (Niyabo 7:9, 14) Ento kit ma gin pud gitye ki rocci, gen tye ni gin pud bibedo lutino pa Lubanga i anyim.
9. Cikke ango ma tye pi dano i Jo Roma 8:21?
9 Jo man ma gitye ki gen me bedo i loboni kombeddi dong gitye ka kuro kare ma ginaketa ma dano ‘gibigonyo woko ki i opii me bedo gin ma top.’ (Jo Roma 8:21) Gonyo dano ki i opii meno bicakke ka Yecu ki lulweny-nye me polo gibigiko te twon can madit atika-ni ki kelo Armagedon. Ma tyen lokke bibedo ni Catan ki yubbe me kare ni kibijwerogi woko, ingeye, mot mapol ata ma tye pi Mwaka Alip Acel me Loc pa Kricito bilubo.—Niyabo 19:17-21; 20:6.
10. Lutic pa Jehovah gibiwero wer me pak ango?
10 Pud dong bibedo me yomcwiny, inino ma lutic pa Jehovah ma i lobo gibiribbe kwede ki dwan acel ki luticce ma i polo ki yomcwiny, ma giwacci: “Ticci ducu ma itiyo bedo me aura, dok gidito, ai Rwot Lubanga Won Twer Ducu! Kitti ducu tye atir dok me ada, in Kabaka ma iloyo rok ducu! Anga mono ma pe bilworo, ai Rwot? Anga kono ma pe bipako nyingi? Pien in keni aye ileng. Rok ducu gibino gibio wa i nyimi, gin ducu gibiwori, pien dong onen woko ka maleng ni ticci ducu tye atir.” (Niyabo 15:3, 4) Adada, lutic pa Jehovah ducu gibiribbe i woro Lubanga acel me ada. Kadi wa jo muto bene gibicerogi ka gibiribbo dwan-gi me pako Jehovah.—Tic pa Lukwena 24:15.
Bedo Agonya ma Mwonya Tye i Anyim
11. Kit bedo agonya mamwonya ango ma jo ma gibiloyo ki i twon can madit atika gibilimo mitte?
11 Ka twon can madit atika ni dong otum i Armagedon, tim maraco me loboni nongo kijwero woko, ci, Catan dong pe bibedo “lubanga me yub man me kare ni.” Luwor Jehovah pe dong gibilweny ki kwo marac ma Catan okelo. (2 Jo Korint 4:4; Niyabo 20:1, 2) Dini goba mo dong pe bene bitimo tic bwolo i kom Jehovah ki kelo apoka poka i kin dano. Lutic pa Jehovah pe dong gibilimo dic ki tic alany i cing luloc. Pud dong gibilimo bedo agonya mamwonya ya!
12. Kibigonyo dano ducu ki i bal ki i adwogine nining?
12 Macalo “Latin romo pa Lubanga ma kwanyo bal me lobo,” Yecu obitiyo ki gitum-me me kwanyo bal pa dano woko. (Jon 1:29) I kare ma Yecu pud tye i lobo, en oweko bal pa dano kun cango jo ma kiweko balgi macalo lanyut-te. (Matayo 9:1-7; 15:30, 31) I yo acel-lu, Yecu Kricito, ma calo Kabaka me Ker pa Lubanga ma tye i polo, bitimo tango me cango luto wang, jo ma te lebgi oto, luding it, lugoro, lupoya, ki jo ma gitye ki two mukene mapat pat. (Niyabo 21:3, 4) Jo ducu ma gubedo luwiny kibilwoko “balgi” mot mot wek tamgi ki ticgi obed ma kelo yomcwiny botgi ki bot Lubanga. (Jo Roma 7:21-23) I agikki me mwaka alip acel, nongo dong kikelogi i kit pa dano ma nongo pe ki roc, ‘i cal ki i kit’ pa Lubanga acel me ada.—Acakki 1:26.
13. I agikki me Mwaka Alip Acel me Loc, Yecu bitimo gin ango, dok adwogi-ne bibedo ngo?
13 Ka Kricito dong okelo dano i kwo ma pe ki roc, en dong bidwoko twero ma nene gimiye me tic man cen bot Won: “Kricito bimiyo iye ker i cing Lubanga Won, ma nongo dong otyeko turo kit loc kit twero ki tek ducu me cwiny. Pien en myero obed ka loc, nio ka Lubanga biketo lukworre ducu piny i te tyene.” (1 Jo Korint 15:24, 25) Loc pa Kerri pi Mwaka Alip Acel nongo dong tyeko yubbe ducu; ci dong pe bimitte ni gamente mo dok obed i kin dano ki Jehovah. Pien bal ki to dong nongo kikwanyo woko ki i kin dano, dong tic pa Yecu macalo Gin Kok bigik. Baibul tito ni: “Ka dong gityeko keto jammi ducu i te locce, en Wod kikome bene kibikette i te loc pa Lubanga, wek Lubanga dong ocok jammi ducu i te locce.”—1 Jo Korint 15:28.
14. Ngo ma dano ducu ma gipe ki roc bikato ki iye, dok pingo?
14 Ma lubbe ki meno, kibimiyo kare ki dano ma pe ki bal, wek gin aye guyer ka gibimito tic pi Lubanga acel me ada nakanaka nyo pe. Pi meno, ma peya en oloko-gi me doko lutinone kikome, Jehovah biweko dano ducu ma gipe ki roc-ci me kato ki i atema tema me agikki. Kibigonyo Catan ki jogine woko ki i bur matut. Man dong pe bikelo awano ma rii naka i kom jo ma gimaro Jehovah. Ento ka ngat mo ma biweko kibibwole pe me bedo ki winy bot Jehovah ci gibijwere woko matwal, kacel ki lacak te jemoni ki jogine ducu.—Niyabo 20:7-10.
15. Kit kwo ango ma dok bibedo tye i kin cwec pa Jehovah ma gitye ki ngec?
15 Jehovah dong bijolo dano ducu ma gipe ki roc ma gucung pi locce ma malo i kare me atema tema me agikki macalo lutinone. Cakke i kare meno, gin dong gibilimo mit me kuc ki deyo ma gimiyo ki litino pa Lubanga macalo but dul me ot pa Lubanga. Ginacweya ducu ma gitye ki ngec ma i polo ki ma i lobo dok gibiribbe odoco i woro en macalo Lubanga acel me ada. Yub pa Jehovah pud dong bilimo deyo me cobbe ya! In bene imito bedo i but dul luot man, ma gibibedo pi nakanaka? Ka i mito, ci wacuko cwinyi me lubo gin ma Baibul oloko i 1 Jon 2:17 ni: “Lobo tum woko ki mitine ducu; ento ngat ma tiyo gin ma Lubanga mito rii nakanaka.”
Nyammo wi Lok ma Kineno
• Ma peya jemo ocakke i Eden, wat ango ma obedo tye i kin jo ma woro Jehovah?
• Kit tic ango ma lutic pa Jehovah tye kwede?
• Anga-gi ma pud kuro bedo lutino pa Lubanga, dok man rwatte ki yub pa Jehovah me ribbe i worone nining?
[Cal ma tye i pot karatac 190]
Dano mapol ma luwiny gibilimo mit me kwo i paradic i wi lobo