Kony Me Loyo Lworo

IN MONO inongo ni tic pi Jehovah yot?— Lapwony madit pe owaco ni timone bibedo yot. I dyewor ma peya kineko Yecu, en owaco bot lukwenane ni: “Ka lobo okwerowu, wunge ni yam okwongo kwera ma kun peya okwerowu.”​—Jon 15:18.

Petero owakke ni en pe ebiweko Yecu, ento Yecu owaco ni Petero obikwero en tyen kidek i dyewor meno. Petero otimo kumeno kikome! (Matayo 26:31-35, 69-75) Gin ma kit meno otimme pingo?— Otimme pien lworo omako Petero ki lukwena mukene-ni.

Ingeyo pingo lworo omako lukwena magi?— Lworo omakogi pien gin onongo pe gutimo gin mo ma pire tek adada. Ngeyo gin meno twero konyowa me tic pi Jehovah labongo tamo pi gin ma ngat moni waco nyo timo botwa. Me cakone, omyero kong wanen gin mutimme i dyewor me agikki ma Yecu obedo kwede ki lukwenane.

Mukwongo, gukwero Nino me Kato kacel. Man onongo obedo cam mo madok pat ma bedo mwaka ki mwaka pi nipo bot yalwak pa Lubanga i kom kit ma gilarogi kwede i opii i lobo Ejipt. I ngeye Yecu okelo cam mo mukene madok pat botgi. Wabilok iye i dul ma anyim me tito kit ma cam meno konyowa kwede me po i kom Yecu. I nge cam meno, en omiyo bot lukwenane lok me cuko cwinygi ci oterogi i poto me Gececemane. Man onongo obedo ka mamwonya mapol kare onongo gin maro limone.

Yecu onyikke manok kakene me lega. En owaco bene bot Petero, Yakobo, ki Jon ni myero gulegi. Ento nino omako wanggi woko. Tyen adek kulu ma Yecu ocito kakene ka lega, dok tyen adek kulu ma en obino onongo Petero ki luwote gitye ka nino! (Matayo 26:36-47) Tika ingeyo pingo onongo omyero gubed ma wanggi twolo ka lega?— Kong walok iye.

Juda Iskariot onongo bene obedo ki Yecu ki lukwenane mukene-ni i otyeno meno. Ka wi po, Juda onongo odoko lakwo. Ento man dong en olokke me doto Yecu. En onongo ngeyo kabedo me Gececemane, poto ma Yecu onongo rwatte iye ki lukwenane kare ki kare. Pi meno Juda otero lumony kunnu me mako Yecu. Ka guo ci Yecu openyogi ni: “Wuyenyo anga?”

Lumony gudok iye ni: “Yecu.” Lworo pe omako Yecu, pi meno en odok iye ni: “An a en.” Lumony meno gubedo ki ur i kom tekcwiny ma Yecu tye kwede omiyo gujer ki ngegi ci gupoto piny i ngom. Ci Yecu owaco botgi ni: ‘Ka wuyenya ci wuwek Lukwenana guciti.’​—Jon 18:1-9.

I kare ma lumony gumako Yecu ci gutweyo cinge, lworo omako lukwena ci guringo woko. Ento Petero ki Jon onongo gimito ngeyo gin ma obitimme, dong gubedo ka lubo korgi ki cen. Motmot kikelo Yecu i gang pa Kayapa, ladit wi lulamdog. Kit ma Jon onongo ngene kwede bot lalamdog madit-ti, lagwok dog gang oye bote ki Petero me donyo i dye kal.

Lulamdog onongo dong gubino i gang pa Kayapa me cako pido. Gin onongo mito ni kadi ningo Yecu myero oto. Pi meno gukelo lucaden ma guloko lok goba i kome. Dano gudongo Yecu ki cinggi dok gudongo nyo gubapo lemme. Petero onongo tye cok i kare ma jami magi ducu tye ka timme.

Anyaka mo ma obedo lagwok dog gang, ma oweko Petero ki Jon gudonyo-ni ongeyo Petero woko. En owaco ni: “In bene onongo itye kacel ki Yecu.” Ento Petero okwero ni en pe engeyo Yecu. I nge cawa mo manok anyaka mukene dok oniang i kom Petero ci owaco bot jo ma gucung kenyo ni: “Dano man onongo tye kacel ki Yecu!” Petero dok okwero aye ni pe engeyo Yecu. Lacen dok dul dano mukene guneno Petero ci guwaco bote ni: “Ada, in ngat acel i kingi.” Pi tyen me adek-ke Petero okwero kun waco ni: “Pe angeyo dano-ni!” Petero okwonge bene ni etye ka loko lok ada, ci Yecu olokke onene.​—Matayo 26:57-75; Luka 22:54-62; Jon 18:15-27.

Ingeyo pingo Petero oloko goba?— Pien lworo omakke. Ento pingo en obedo lwor? Ngo ma en onongo pe otimo ma romo jingo cwinye matek? Tam kong lok man. Ngo ma Yecu otimo me nongo tekcwiny?— En olego Lubanga ci Lubanga okonye me bedo ki tekcwiny. Wi po ni Yecu onongo owaco tyen adek kulu bot Petero ni myero oleg kun bedo ma wange twolo kun kiyo piny. Ento ngo ma otimme?—

Tyen adek-ki ducu Petero obedo ka nino. En pe olego dok bene pe obedo ma wange twolo. Pi meno mako Yecu onguke atura. Lacen i kare me pido, ma kidongo Yecu kun gigoyo pulan me nekke, lworo omako Petero adada. Ka wadok i nge cawa manok angec, ngo ma onongo Yecu owaco bot lukwenane ni myero gukur?— Yecu owaco botgi ni kit ma lobo okwero ki en, obikwero gin bene.

Kong dong watam i kom gin ma romo timme i komwa calo pa Petero-ni. Ket kong ni itye i kilaci ci jo mukene gucako lok marac i kom jo ma pe gigoyo calut i nyim bandera nyo pe gikwero Karama. Ento ka ngat mo olokke boti ci openyi ni: “Tye lok ada mono ni in pe igoyo calut i nyim bandera?” Nyo owaco ni: “Wawinyo ni in pe ikwero wa Karama!” Tika ibibedo ki lworo me waco lok ada?— Mono ibibedo ki atematema me loko goba calo Petero?—

Lacen cwiny Petero ocwer ni ekwero ni pe engeyo Yecu. I kare ma en oniang gin ma etimo, okato woko ci okok matek. Ento lacen en ongut ci ocako lubo kor Yecu. (Luka 22:32) Tam kong lok man. Ngo ma twero konyowa wek lworo pe omakwa ma miyo waloko calo Petero?— Wi opo ni, Petero onongo pe olego dok bene pe obedo ma wange twolo. Dong, ngo ma itwero wacci omyero watim wek walub kor Lapwony Madit-ti?—

Omyero waleg bot Jehovah pi nongo kony. I kare ma Yecu olego, ingeyo ngo ma Lubanga otimo pire?— En ocwalo lamalaika wek omiye teko. (Luka 22:43) Malaika pa Lubanga mono twero konyowa?— Baibul waco ni: “Lamalaika pa Rwot [Jehovah] cung kun gwoko jo ma gilworo Rwot [Jehovah], dok larogi bene woko ki i can.” (Jabuli 34:7) Ento wek wanong kony pa Lubanga, tye gin mukene ma myero watim. Tika ingeyo gin ma myero watim?— Yecu owaco bot lulub kore ni myero gubed ma wanggi twolo kun gikiyo piny. Itamo ni ngo ma twero konyowa wek watim meno?—

Mitte ni myero water itwa maber i kom jami ma kiwaco i cokkewa ki dok waket cwinywa i gin ma wakwano ki i Baibul. Ento omyero bene waleg bot Jehovah kare ki kare kun wapenye wek okonywa me tic pire. Ka watimo kumeno, ci wabinongo kony me loyo lworo. Dok wabibedo ki yomcwiny ka wanongo kare me tito bot jo mukene lok kom Lapwony Madit ki Wonne.