DUL ME 40
Kit Me Yomo Cwiny Lubanga
NGO ma watwero timone me yomo cwiny Lubanga? Tika watwero miyo bote gin mo?— Jehovah owaco ni: “Lee me bunga ducu mera.” En bene owaco ni: “Ryal aye mera, jabu bene mera.” (Jabuli 24:1; 50:10; Aggai 2:8) Ento, tye gin moni ma watwero miyone bot Jehovah. Gin ango?—
Jehovah miyo botwa kare me yero ka wamito tic pire nyo pe. En pe diyowa me timo gin ma en mito ni watim. Kong watem niang pingo Lubanga ocweyowa ma watye agonya me yero me tic pire nyo pe.
Oromo bedo ni ingeyo gin ma kilwongo ni robot. Man obedo macin mo ma kiyubo me timo gin mo keken ma layubone mito ni otim. Pi meno robot pe twero moko tamme pire kene me timo gin mo. Jehovah bene onongo twero cweyowa calo robot. En onongo twero cweyowa wek watim jami ma en mito ni watimgi keken. Ento Lubanga pe otimo kit meno. Ingeyo pingo?— Toyi mukene gubedo calo robot. Ka kidiyo cwic mo i kome, ci tiyo gin ma layub toyi meno oyubo ni otim keken. Tika dong ineno toyi ma kit meno?— Pol kare dano ol woko ki tuku ki toyi ma timo gin ma giyubbe pire nyo kiketo ni otim keken. Lubanga pe mito ni wabed luwiny pien ni wabedo calo robot ma giyubo me tic pire. Jehovah mito ni wati pire pi mar ma watye kwede bote ki dok pien wamito bedo luwiny bote.
Pingo Lubanga pe ocweyowa me bedo calo robot eni?
In itamo ni Wonwa ma tye i polo winyo nining ka wawinye pien cwinywa mito?— Tita kong, ka kiti ber nyo rac lunyodoni giwinyo nining?— Baibul waco ni latin laco maryek “yomo cwiny wonne” ento latin laco ma ming “cwero cwiny minne matek.” (Carolok 10:1) Mono ineno ni ka itimo gin ma mamani ki babani giwaco ni itim, ci yomo cwinygi?— Ento ka pe ilubo lokgi gin giwinyo nining?—
Itwero yomo cwiny Jehovah ki cwiny lunyodoni nining?
Kong dong watam i kom Wonwa me polo, Jehovah. En tito botwa kit ma watwero yomo kwede cwinye. Pingo kong pe iyab Baibul-li i Carolok 27:11. Kany Lubanga tye ka lok kwedwa ni: ‘Latinna, bed ryek, wek iyom cwinya, wek anong lagam ma myero adok iye i lok ki ngat ma yeta.’ Tika ingeyo te lok ni yeto ngat moni?— Dano mo twero yeti ka nyeri dok wacci in pe itwero timo gin ma iwaco ni itwero timone. Catan kono yeto Jehovah i yo ango?— Kong wanen.
Wi po ni wapwonyo i Dul 8 me buk man ni Catan mito bedo Namba Acel dok mito ni dano ducu guwiny en. Catan owaco ni dano giworo Jehovah keken ni pien Jehovah bimiyogi kwo ma pe tum. I kare ma Catan obito Adam gin ki Kawa me kwero winyo Jehovah, Catan okelo pyem i kom Lubanga. En owaco bot Lubanga kit man: ‘Dano pe gitiyo piri me nono ento pi jami ma ginongo ki boti. Mi bota kong kare, atwero loko ngat mo keken me kweri woko.’
I nge bal pa Adam ki Kawa, Catan okelo pyem i kom challenge Jehovah nining?
Ngene kene ni, lok meno kikome pe nonge i Baibul. Ento ka wakwano lok kom laco mo ma kilwongo ni Yubu, ci nen ka maleng ni Catan owaco bot Lubanga lok macal ki meno. Pire onongo tek adada bot Catan gin ki Jehovah ka Yubu ogwoko genne bot Lubanga nyo pe. Kong dong wayab Baibulwa i Yubu cura 1 ki 2 me neno gin ma otimme.
Niang ni i Yubu cura 1, Catan onongo tye i polo i kare ma lumalaika gubino bot Jehovah. Dong Jehovah openyo Catan ni: “In ia ki kwene?” Catan ogamo ni en ea ka wire i lobo. Pi meno Jehovah openyo ni: ‘In mono ineno laticca Yubu, ni en tiyo pira dok pe timo gin mo marac?’—Yubu 1:6-8.
Cutcut Catan omiyo tyen lok ni. ‘Yubu wori keken pien ni pekone peke. Ka pe igwokke dok pe igoyo laa i kome, en biyeti ki i nyimi.’ Dong Jehovah ogamo ni: ‘Nen ba, Catan, itwero timo gin mo keken ma imito, ento myero pe iwan kom Yubu.’—Yubu 1:9-12.
Catan otimo ngo?— En ocwalo dano guyako dyangi ki kana pa Yubu dok bene guneko lukwatgi woko. I ngeye, lutkot ogoyo romine kacel ki lukwat ducu. Lacen, dano gubino guyako kinaga ducu dok guneko lukwatgi woko. Me agikkine, Catan ocwalo yamo mo matek ma oketo ot ma lutino pa Yubu gitye iye ci onekogi woko ducu. Kadi bed kit meno, Yubu pud omedde ki tic pi Jehovah.—Yubu 1:13-22.
I kare ma Jehovah dok oneno Catan, Jehovah owaco bote ni Yubu pud tye ka gwoko genne-ne. Catan omiyo tyen lok mukene kun wacci: ‘Ento wek awan kong kome, ci en biyeti ki i nyimi.’ Pi meno, Jehovah oye ni Catan owan kom Yubu ento ociko ni myero pe onek Yubu.
Yubu ociro pekki ango dok pingo ciro canne-ni oyomo cwiny Lubanga?
Catan oketo two i kom Yubu ma oweko del kome ducu ocek bur. Bur-re onongo ngwe marac ma weko dano pe gimito bedo cok kwede. Kadi dako pa Yubu bene owacce ni: “Yet Lubanga, ci ito.” Jo mogo ma gitimme ni gin lurem Yubu gubino ka lime ento guweko en owinyo marac kun giwaco ni nen calo en otimo gin mo marac tutwal mumiyo en tye ka nongo pekki magi. Kadi bed Catan okelo pekki ki arem magi i kom Yubu, Yubu pud omedde ki gwoko gennene kun woro Jehovah.—Yubu 2:1-13; 7:5; 19:13-20.
Itamo ni gwoko genne pa Yubu-ni omiyo Jehovah owinyo nining?— Omiyo Jehovah onongo yomcwiny pien en onongo dong twero waco bot Catan ni: ‘Nen Yubu! En tiyo pira pien ni en mito tic pira.’ Tika ibibedo calo Yubu, ma Jehovah romo cimone calo lanyut ma moko ni Catan lagoba?— Adada, obedo mot madit me miyo lagam i lok pa Catan ni etwero loko ngat mo keken me kwero tic pi Jehovah. Labongo akalakala mo, Yecu oneno man calo mot madit.
Lapwony Madit pe oye ni Catan obite wek Etim gin mo marac. Kong igo kit ma lanen pa Yecu-ni omiyo Wonne onongo kwede yomcwiny! Jehovah onongo dong romo cimo Yecu kun waco bot Catan ni: ‘Nen Woda! En ogwoko gennene labongo roc mo pien en mara!’ Tam kong bene yomcwiny ma Yecu tye kwede pi yomo cwiny Wonne. Yecu ociro wa to i kom yat pi nongo yomcwiny meno.—Jo Ibru 12:2.
In mono imito bedo calo Lapwonywa Madit ki miyo yomcwiny bot Jehovah?— Myero dong imedde ki pwonyo lok i kom jami ma Jehovah mito ni itim kun iyomo cwinye ki timone!
Kwan gin ma Yecu otimo me yomo cwiny Lubanga ki gin ma wan bene myero watim, i Carolok 23:22-25; Jon 5:30; 6:38; 8:28; ki 2 Jon 4.